tsk, tsk, tsk.

ang tigulang nga akong nailhan
palaampo, matag buntag atua gayod siya
sa simbahan, nagluhod, nagbasa sa nobenahan,
kumpleto sa putong, regular ang amot,
taas ang sanina, dagkot sa altar,
piyong sa mata, usahay gani magdupa
close sa pari, atendido ang mga
kapunungan

ang wala nila masayri nga
usa ka buntag niana
gisagpa niya ang iyang maid
didto sa kusina
tungod kay ang iyang kape
dugay kaayong giserbe.

balak alang sa tawong walay pagkatagbaw

Mikanaog ka sa awto nga imong gisakyan
gisukna mo ang tawong nagpatunga sa karsada
nga hapit nimong naligsan
gipangutana og ngano, gusto ba nimong maghikog?
wa mitubag, og imong gipangutana unsay iyang ngalan og
asa diay siya paingon
og mitubag siya, ako ang tawong walay katagbawan
ako ang walay kalipay
og gusto ko nga mupahulay na unta
magpaligis sa ligid sa imong sakyanan
ayaw na ako og pangutan-a pa
og biyai ako, kay unta didtong lugara
basin og wala na akoy laing bation pa.

hubad sa balak ni Li Po

Sa tunga sa kabulakan, anaa ang tadyaw sa tuba
Kay ako ra man usa ang nagtagaytagay
Akong giisa ang baso og akong gidapit ang bulan
Giapil nako ang akong anino, maong nahimo ming tulo
Apan kay di man kamaong moinom ang bulan
Ang akong anino lang ang nag-awat-awat sa akong gibuhat.

Gihatdan kog anino sa bulan aron anaa koy kauban
Kining pagbansaybansay sa kalipay kinahanglang mosunod sa lakat sa Tingpamulak
Sa dihang mikanta ko, misayaw sab ang bulan
Mitindog ko, misayaw og ang akong anino milihok sa nga morag awing

Samtang di pa ko hubog magsadya tang tanan
Kay kon mahubog na gani ko mag-iyahay tag lakaw
Magbugkos ta sa kahangtoran ning lad-ang nga mga panaw
Manumpa ta nga magkita usab didto sa layong kaayong lugar.

SESSHU

Patay ang mga kahoy
uga ang mga bungtod
abog ang palibot
hait ang mga pangpang
bangkilan ang mga bato
gabaga ang mga balas
makasunog ang adlaw
giuhaw ang mga sapa
gigutom ang yuta

walay klaro ang dalan didto
padolong sa usa ka templo.

sa silong sa usa ka landong...

nabati mo ba
nga usahay mas
lami
kon ikaw anaa
lamang sa kilid
sa haligi
nagpahipi
naghambin sa
gugma nga
imong giamuma
nga dili mo
mahatag kang
bisan kinsa?

usahay
maghandom ka
unsa kaha kon
ako kining
gisalig sa usa
ka tawo?
kon ako kining
gipatilaw
kaniya?

anaa gihapon ang
kabalaka
basin og iya
lang kining
pasagdan og
dili ampingan
kon basin og
iya lang kining
kataw-an
og ipanugilon
nga walay
lami
maot, aslom,
pait
baho, pan-os
laksot

magkulismaot
gayod ang imong
nawong
sa tumang
kasakit sa usa ka
kahiubos nga
mas lalom pa
sa imong
gibating gugma
kaniya

og hangtod nga
ikaw mahimong
usa ka
kapungot
og dinhi mopuli
ang kasilag
og dili ka ganahan
niini

mahimo kang usa
ka balay nga
nasunog
og ang ilang
maabtan mao
lamang ang
imong mga
abo

og dili ka gayod
ganahan nga
mao kini ang
mahitabo sa
imong kinabuhi

busa, nakasabot
ako sa imong
pagpahipi lamang

mas malipayon
ka sa kilid sa haligi
sa silong sa atop
sa usa ka landong
nga bugnaw og
walay samok.

ang gitara ni c.

pagkamaayong mokitik
sa mga tudlo ni Cathy
sa iyang gitara
kon mamati ka pag-ayo
labi na sa gabii nga
gihayagan lamang sa bulan
dapit sa ikatulong ang-ang sa
hagdan
mosayaw gayod ang imong
kasingkasing
daw dunay upat ka tiil
nga mohagtik diha sa salog
nga tugas
mahigugma ka
mobalik ka sa sinugdanan
malimtan mo
nga ikaw adunay kataposan
mawala ka sa imong
kaugalingon
ibayaw ka sa langit
og ulahi na ang tanan sa
dihang hipalgan mo ang
usa ka patayng
lawas nga naghay-ad sa
nataran nga puno og mga
amorseco
mokalit og hulog ang
kusog nga ulan
masapawan ang musika
sa gugma
madungog ang iyagak
sa usa ka balo.

ang daan nga balay
ang sagboton nga nataran
ang abogon nga lingkoranan
ang mga dag-om nga panganod
ang balason nga yuta
ang nangamatay nga gapas
ang nangalaya na nga doldol
ang mga gusbat og hibat
ang labat nga wingig
kining tanan
angayan na nga
biyaan.

sa kaadlawon
gidagkotan na usab namong duha
ang usa ka kandila
alang sa mga nangamatay nga
labaw sa napulo ka libo
didto sa Fugushima

dili namo kini palungon
hangtod na sa pagtak-op
sa adlaw

kining gamay nga kahayag
halad kini
sa usa ka ka kawanangan
nga kangitngit...

ang paak sa tanga nga
dagat
mitukob na usab sa
sobra sa
napulo ka libo ka
nga hapones