ALAGAW

nindot ang kataposan diha sa karaang silindron
sa duha ka kamot nga nagtagbo, nanirado, nangabri,
ug nag-ilhanay sa dili gayod mahikalimtan diha sa usa
ka senyal

ang pulo ka tudlo
nangasibo.

sa disyerto sa imong kaguol
kinsa ba ang dili makasabot nga ikaw
naghandom ug ulan o dili ba kaha
malinawon nga sapa sa unahan
diin daghang punoan sa manga
nga gahitik ang mga bunga?

kinsa ba ang di ganahan nianang
saad sa bangaw?
ania ang yabe, kuhaa kini, lakaw
paingon sa pultahan,
ikaw ang moabre niini,
mao kini ang ganghaan paingon
sa nindot nga kalibotan,
sa mga sapa nga malinawon
sa unahan anaa ang mga
pagdayeg ug pasalamat.
ayaw kalimot, kay kining duha
ang kanunayng mong mahikalimtan.
ang pagdayeg sa Diyos
and pagpasalamat sa iyang kaayo kanunay.
ayaw gayod kalimti. ayaw gayod.

anaa ang mangtas
gipangutana ka kon unsa ang nawong
dili ka katubag. Nahadlok ka sa wa pa nimo makita.
Sa dili nimo masabtan.
Gipangutana ka pag-usab. Nahadlok ka ba?
Imong tubag, oo.
Unsa ba ang iyang dagway? Dili ka gihapon katubag.
Nganong nahadlok ka man?
Balik-balik ang imong tubag, nga dili tubag
"naa siya diha".
Apan asa? Wala man.

mao kini ang kahadlok. Wala'y nawong. Wala diha.
Apan gikahadlokan.

mao kini ang atong pakigbisog.
dili ta moundang. wala nato gigapos ang atong kamot sa atong hawak.
gipaabtik nato ang atong mga mata.Andam ang atong mga kamot.
Lig-on ang mga tiil.
gilantaw nato pag-ayo ang unahan. Dakong bukid. Sa ubos ang
natulog nga patag. Sa unahan ang dagat. Linaw ang tanan.
Sud sa atong dughan anaa ang kagubot.
Gaunay ang atong mga pagbati.Gikaon kita sa atong kaugalingong
huna-huna. Dili kita mosugot niini.
Bungkagon ang angayang bungkagon.
Kon mahimo, lainon ko kini ug kana.
Aron lang ako mabalik sa akong kalipay sa dihang
ako usa pa lamang ka bata.
Usa ka tingog nga namati lamang sa usa ka tingog.
Usa lang ang agianan.
Usa lang ang gilantaw.

mao kini ang atong pakigbisog.
Nga unta maluwas kita sa atong kaugalingong kagubot.
pagkadaghang langgam nga itom nga ang mga mata pula.
Dugo nga luha. Hait nga mga kuko.
Pako sa kangitngit.
Padulong ang tanan sa kahilom.
Dayon mamati sa awit sa usa ka inahan nga nagpatulog sa iyang
puya sa lalom nga kagabhion.
Ug ang bulan tibuok diri sa atong dalunggan.

IMAHE SA PAGPAMALANDONG

alindanaw naglutawlutaw sa hangin
pagsalop sa adlaw mitugdong
sa sanga sa lawiswis kawayan
siya lag usa

iyang duha ka pako
gihipos.

miari ka aron makalimot
misandig ka sa dughan sa kahilom
gilantaw mo ang imong panit
nakit-an mo ang daghang pultahan
gipili mo usa lamang
sud sa imong kasingkasing
gisubay mo ang dalan
nga malinawon
miginhawa ka ug lalom
mitiglom
nakighimamat sa imong kalag
aron unta dili
malaglag

ayaw kahadlok
ang kangitngit nga miabot
habol lamang sa imong
katulogon

ayaw ug katulog ug sayo
lantawa una ang bulan ug mga bitoon
sa abri mong bintana
hangop diha sa hangin gikan sa kabukiran
lantaw sa kalangitan
pagkadako ning kalibotan
unsa ba ang kabalak-an?
ayaw kahadlok
pamatia lamang
ang humot nga hunghong
sa Diyos
diha sa imong ilong.

sa usa ka tigulang nga tigmama
dili na kinahanglan pang isaysay ang kahalang
sa mam-on, ang katam-is sagol sa kapait
sulod sa iyang baba,

wala siyay libro nga gibasa
wala siyay kasinatian sa arte sa pag-usap sa iyang lagot
diha sa iyang kagot
apan makita nimo sa iyang paghilom hilom diha kilid sa pultahan
nga bitbit niya ang kalinaw
ang kahibalo, ang kalumo,
nga siya wala nay laing pangayoon pa ni Bathala
nga siya andam na sa iyang gipaabot nga kamatayon
samtang giusap niya ang tanan
ang kagahapon ug karon ug ang iyang
kabalaanon.

sa biernes santo
gikaligo ko ang akong iro nga gikagid
gusto na sa akong kauban sa balay
nga kini siya ipanghatag na lang sa mga palahubog sa bukana
aron himoong sumsuman sa
adlaw sa pagkabanhaw

ako ang nagpabilin sa balay
nangita ug trapohang mga abog
ug silhiganang nga mga
salog
samtang siya mikuyog sa via crucis
nagsakripisyo
sa tumang kakapoy sa tumang
kainit
kay gusto niyang puhon
siya makasulod sa langit
ug molingkod dapit sa
frantsit
ako ang nia dinhi nagpabugnaw
sa silong sa kahoy
naglantaw sa akong iro nga gikagid nga
human sa iyang pagkaligo
nagdagandagan
sa among tugkaran
nangitag kapahulayan