sa kamot sa silhig

kon wala ang rason
ingon ka walay nada
wala ang kaanyag
wala ang kaanindot

miabot sa akong panahon
ang pagkawalay nada
walay rason
wala ang kaanindot
wala ang kaanyag

gipangita mo kini kanako
pasayloa kay
ang langgam nagkamang
ug ang mga hulmigas nanglukso
ang mga isda nanglupad
ug ang mga unggoy nanglangoy

lantawa ang universo
gipanghambog nila nga kini
mipanaw sa usa ka rason lamang
kaniadto gipangita ko kini
apan wa ko
pasayloa kini hikaplagi

usa lang ang akong
nahibaw-an karon
wala ang rason
walay bisag usa nga rason
ang sarang
makatumpag sa akong pagtoo
nga kining tanan
lamat lamang

ugma, mahimo akong abo
sunod ka

kon motoo ko nimo
basin ug mag-ilhanay ta
sa pagkakaron
hawiran ko una kining akong
katarungan

wala, wala, ug wala ako'y
nakaplagan

kanang igo, ug hingpit
kanang akong mahawiran
nga mas tinood pa kaysa
sa kamot sa silhig

watsinanggo

kon moingon na gani kog
"i love you"
ayg tuo, bunga ra kana
sa akong
kalaay

sama ra kana sa "like"
matag minuto
naandan lang kana
walay tinood ana

gaduka kos kinabuhi
anaa ang nostalgia nga
sa akong binisaya
(actually nausea)
gilood lang
kasukaon
nangitag bulseta
aron unta kahiposan
sa mga hinabwa
ning ginhawaang
nanimahong
patay nga isda


kon mamatay ang tanang
mga puyok
ug watsinango
magkulang jud ang
mga lungon
sa puneraria Olanggo.

paghandom sa gisulti ni Angging

dili yano ang tanan
dili na kini sayon

anaa ang pan
gihulmigas
ang asukar
nausik sa kilid
sa tasa
diin ang tubig
nga alang unta sa
kape
namugnaw na

anaa ang tigulang
nga andaw na
molakaw

sa iyang kilid
ang iyang bag nga itom
ug ang iyang bandana
iya ng gihawiran
apan naglibog siya
kon asa siya
paingon karon

anaa ang anak nga
babaye nga
edad-edaran na
nagpaabot sa
iyang bana
apan wa siya'y
kalibotan kon
kanus-a
moabot

ako usab
daghang nalibgan
ning oras nga
nagkayagaw
ning mga dapit
nga nahimong
hanap tungod
sa nagkalayo nga
kalay-on

sahay sama kang
Angging nga hagbay
rang mipanaw

himoon ko na lang
ang angayang himoon
way pangutana
kon asa ug unsa
lakaw, lihok,
kon ganahan
mohunong kon
mahinumduman
hapiton
kon init pabugnaw
kon bugnaw
tayhopan

kapoy na
ang paghunahuna
buhaton na lang
kutob
sa kinituban.

ang bata ang tiguwang ug ang inahan

matinud-anong
mikumpisal ang tiguwang
nga siya dili na kamao
kon unsaon pagpakabuhi

mikatawa ang bata nga
nakadungog niini samtang
nag-ihap sa iyang dyolin
ug mga lastiko

nga mora bag mitubag
ug "asus, kasayon ra niana!"

ang iyang nanay nga
nanasa ug nipa sa daplin
sa suba naglantaw nga morag
nakasabot sa kalisod sa pagtubag
sa maong pangutana
ug dayog tagbas sa punoan
sa nipa
sa tumang kakusog
aron kini
maputol ug mabuntog

nunot nunot lang

nunot sa sulog
mosakay ko

wala koy
supakan

nganlan  mo
ako ug imong

ngalan nga
akong hagkan

lagom

gadangas ang agtang
sa kahaponon

ang kagabhion
sunoy nga nangarol

ang kaadlawon
sumpay nga

kilay sa kabuntagon
ay!ka lagom!

ang gahom sa hapwag

kagabii
grabe
maayong pagkaukay
nimo ang
akong kalag

maayong pagkalatag
sa akong
lawas

na-blackout
tanang suga sa akong
mga damgo

hayahay
pagkabuntag

breakfast is ready
with matching 
song

unsaon paghikalimot ang kapakyasan

gihiwa nako ug pino ang saging
nga mora nag pasas
gilamog nako sa pinikas nga
avocado
gisagol pod ang tinag-as nga
slices sa hinog nga manggang bisaya
ug butong
gibutangan ug condensed milk
haskang tam-isa na
ug haskang lamia

milingkod kos uway nga rocking
chair
dapit sa veranda
dili pa kaayo init ang adlaw
unya bugnaw pa sab ang hangin
gikan sa plaza
nga gialirongan sa karaang
mga akasya

kalami sa kinabuhi
kaanindot sa kalibotan
nakalimtan ko ang tanan

 

malas

kapoy sahay
hunahunaon

sa pamahaw
gusto nimo
ang itlog nga
sunnyside up

apan ang  naa
piniritong talong

unya pag-abot
nimo's collonade
naay mikihat nimo
baga ug pilok

naandan na man god

ang kasamok usahay
daghag lamas

pananglitan sa zamboanga
pila na ba ang patay? kapin nas gatos
pila na ba ang namakwit? kapin sa trese ka libo
pila na ka balay ang nasunog? labaw pas pulo ka libo

wa mabuak ang antipara sa atong  punoan
nga nagtan-aw

lamang,

daghan ang naghunahuna ug unsa ba kaha'y
hinungdan niini" si misuari giisnaban? nagdrama aron
malimtan si napoles, enrile, jinggoy ug revilla
ug uban pang wa pa makiha

kapait
kasakit

yaw ka, pagkahuman niini
malimpyo na pod ang maong syudad
mawa na ang mga laknot nga nawong ni santa barbara
ug motukod ang mga bag-ong edipisyo sa
mga dios ug diosa sa komersyo

bag-ong robinson, gaisano,
sm, ug uban pa

balik sa naandan

materyalismo, scam na pod,
morag wala lang

eleksyon na pod,
gubat gubat na pod
away away na pod

halin ang mga armas ug bala
motaas ang budget sa militar

magkulang na pod ang mga
sundalo ug mga tawo
dayon mobalik na pod ang laing
nawong ni misuari
ug ni napoles

botbot

hawiri ang lubi
karon kuhaa ang bunot
kuhaa pa jud ang bagol
kuhaa pa jud ang
unod
ang mabilin sabaw unta

apan wa mo mahawiri ang
sabaw
wa mo masalod sa imong palad

unsa pa ba ang nabilin alang
kanimo?

ah, ang botbot
kan-a kini
mas lamian kini
sa tanang
wala nimo mahipos

huwes

ang sofa
kawayan lang
pangag pa
kay gikaon ug
anay ang
pipila ka
sukip niini

gipatong ang
mga libro
kabahin sa
balaod

sa lamesa
usa ka dakong
botelya sa tubig
nga ilimnon

adunay krus
ni jesus
ang tunga sa
lamesa

naa pod ang
taya nga
clip

dayon madungog
mo ang
gaubo ug
luspad nga
tawo

siya ang huwes
dinhing dapita

kaganiha

kaganiha
wa pay kahayag
sa adlaw
migawas ko sa
balay

gilakaw ko ang
dalan
paingon sa
galawod nga
basakan

nag-una kanako
ang among
silingan nga
mestizo katsila

tigulang na
apan ligsi lang
gihapon nga
molakaw
kay sa matag
sayong buntag
naandan na niyang
tagboon ang
unang pagsubang
sa adlaw dinhing
dapita

hinay ang akong
tikang
dili nako gustong
mag-abot
mi ug dayon
mag-estorya
na pod unya
kami
sa iyang balik
balikon nga
hisgotan

ang umaabot nga
kamatayon

dunay ko'y ubo
nga lalom ug
uga
nga morag
gikan sa tumoy
sa akong
baga

ug di ko ganahang
maghisgot
ug kataposan.

kataw-anan

kataw-anan
baya

ang imong gikahadlokan
puros lamang anino sa tawong misayaw

ang imong nadungog hagawhaw lamang
sa usa ka bugal-bugal

kon imo lang untang gipasiga ang suga
makita mo unta nga ikaw walay makita

upat lang ka bongbong
nga walay bintana ug walay
pultahan

lantawa ra god ang atop
ug ang kisami

nan, puros lang kana
mga panganod

pagkakataw-anan gayod
nga sa imong katanga
nabyaan ka na man hinoon sa
atong panahon

hinanaling kamatayon

ang among gihisgotan bag-o lamang
mao ang mga katam-is

gani gihulmigas man dayon
ang among mga ngabil

adunay nakasulod sa among dila
ug misulay kini ug paak

ug sama sa ubang gustong motilaw sa
katam-is
ug mopaak niini

ay, kalooy ba sa hulmigas
nakaangkon intawon sa iyang
hinanali ug wala
damhang kamatayon

balonon

ihunghong kanako
palihog ang gusto nakong madungog

kanang nindot, kanang maanyag
kanang bugnaw sama sa dahon sa pangadlaw
kanang tiunay sama sa kaputi sa panganod sa wala pa ang ulan

ipaduol ang imong ngabil sa akong dunggan
palihog lang
hagki ang akong ngabil ug aping
kanang dili kaayo init
kanang kasarangan lang sama sa kan-on nga bag-opang gihaon
ug atong gipabugnaw sa atong mga palad
ning sayong kabuntagon

mao kini ang akong
balonon sa akong kamatayon.

lingaw-lingaw lang gaw

di ko ganahan anang tigi

ang mga mata sa hurado
morag mga mata ni batman
giputos
sa ilang kaugalingong
pagpihig

dayon ang akong mga mugan
ilang gibutang sa tadtaran
gipino-pino
dayon gisulayan ug luto
unya kon di ganahan
sa baho
ayay! gilabay sa iro

unya manugilon pa nga bisan
ang iro
wa gani ganahing mokaon

ayay! pagkapait sa akong
obra

di sab ko ganahan anang
sukod-sukod nila sa akong
pagkamangihomoon
nga mora bag gisubay nila
kon kining yuta nga akong
gipuy-an titulado ba kaha
kay ug kon wala
etsapwera ka
ug ugma ka na lang kutob
kay ikaw
gayod mopahawa

duha lang ang kapaingnan
ning ilang tigi-tigi:
kon modaog, sikat,
dayon matubuan kag sungay
sa imong kagalot

kon mapildi, ayay!
mora bag giputlan kas imong
liog ug
dayog kamatay!

mas maayo pa ning
lingaw-lingaw lang
hulip sa kalaay
pagsukip sa nipa sa
buslot nga balay
pagtapak sa buslot
nga salog
pagtaod sa hagdanan
nawad-an ug usa ka
ang-ang

pagdakop sa alibangbang
ug dayon paluparon pag-usab
gikan sa palad

paghikap sa buwak ug
pagsimhot niini
sa walay pagbudhi
pinaagi sa pagputol
niini

lingaw-lingaw lang gaw
walay laraw, walay baraw.

kuyapi!

dula-dula lang
ang akong tuyo

balay-balay
tatay-tatay
nanay-nanay
uyab-uyab

kaon-kaon
sa platong
dahon

lung-ag lung-ag
sa latang
tayaon

bagol-bagol
shatong-shatong
tago-tago
dakop-dakop

gidapit ko ikaw
ning akong
dula-dulang
lingaw-lingaw

ambot, oy,
naunsa ka man
nga gibati ka
man hinoon
ug kalisang?

ah, basin ug
kanang imong huna-huna
dili andam sa dula-dula?

ah, basin ug
hugaw lang kana?

ah, basin ug dili ka
ganahan ug dula-dula
basin ang imong
gusto
ang tinud-anay

dia ay, kining akong
kauban
diri sa among
shatong-shatong
sa among
nataran

wa ba kuno ka
kuyapi!

ang balak balak lamang, mugna mugna lamang sa usa ka hunahuna

naghimo kog balak bahin sa gugma
ug nabasa kini sa usa ka dalaga ug
gipangita ko niya kay kuno ako usab
iyang gihigugma ug gusto niyang ako
hagkan ug gakson,

nadani siya sa akong balak nga kon siya
pa, mapasalamaton siya, nga siya ang
gihalaran niini,

sa dihang ako siyang giingnan nga kadtong
balaka para sa tanang dalaga ug dili lang
alang kaniya, dako kaayo ang iyang
kahiubos nga sa kadugayan nahimong
usa ka kasuko

ambot, apan ako siyang giingnan nga ang
balak, balak lamang, mugna mugna lamang
sa usa ka hunahuna, ug kon imo kining
panitan, kon sa mais pa, pakhaw lamang,
walay unod nga makaon ug makabusog
sa usa ka babayeng gutom.

sa maong syudad

daghang kog nakita sa maong syudad

bibo ang plaza, daghang baligya sa merkado, baga ang sakyanan sa iyang mga karsada

aduna pa man gani kadtoy perya ug mga circus

yagaw ug samok ang kagabhion

nga morag mga kabayo nga gibuhian sa ilang mga kwadra

hayag pa ang tungang gabii sa ilang mga kalingawan

may mga mugbog lupad pa nga nangita ug init nga kape sa kaadlawon

apan bisan pa niini

bisan ug mahimo untang mahikalimtan ko na ikaw

tungod sa kabibo ug kasamok ug sa akong pagkahisalaag

dili ko gayod gihapon ka nako malimtan

ikaw nga migunit sa akong kamot

nga morag gapos sa akong kalag

kita nga nangawala sa pipila ka kagabhion sa atong kaugalingon

ikaw nga migakos kanako ug hugot kaayo nga mora bag hadlok ka maanod sa usa ka baha

aron kita bulagon

kon makita mo ako karon

ania ako sa dakong kasubo

sa naniradong kasingkasing

sa gauga nga ngabil 

layo na kaayo kanimo

dinhi ning syudad nga

yagaw

laog

kon modan-ag ang kainit sa imong adlaw
ako ang unang nalipay niini ug ako kining gisangyaw sa
ilalom sa dagat
ug didto pa gani sa ngilit nga langob
ug kadtong wala makakita ug kahayag
bisan makausa
nangamuyo kanako nga unta
ipadayag ko ikaw
puhon

sa dihang gipahulam ko ang akong
gamayng kahayag
naglibog ko nganong gikasuko mo kini

gitikyup mo ang kahayag ug imong
gipakita ang tumang kangitngit

ang wala nako hisabti nganong gipanghalab
mo ang dili mo maangkon hangtod sa kahantoran

kon ipamugos mo kanako ang imong mga talamdan

morag maoy imong giingon
bisag ang sayaw ang awit ang
tanan

pati na gani ang pamuyo
diha ug didto

adunay gayoy mga regla
mga pamalaod

mga gidili ug gipasunod
mga angayan ug dili

gusto nimong mao usab
unta ako

han-ay nga pulong nga morag
labat nga kawayan

tupong ang katag-as
ug ang kabag-on

mahimong sundon ko kini
apan kon madungog mo

ang akong awit lahi na kini
lahi na ang tanan

mayabag ko, matiurok ang
akong mga pulong

didto sa akong tilaok
mabukog ko sa imong

mga gusto, makagot ang
akong ngipon

mauga ang akong dila
unya magsakit pag-ayo

ang akong alingagngag
ug kon ipamugos mo kining

tanan kanako
basin ug ugma

magluwa kog dugo
mangliki dayon ang akong

mga ngabil ug ang akong
ilong magsunggo.

mosunod ang tanan

kon anaa lang unta
kadtong miulpot ulpot nga pagbati

kadtong panglantaw nga
pilit pas
budbod tanjay

kadtong gatabisay nga laway
nga morag
irong buang

kon anaa na kining tanan
ayaw kabalaka

mosunod ang tanan
ang kamot, ang ngabil, ang
tiil, ang

pus-on, ang
balahibo

ug dayon moulbo ang kalayo
sunog diri sunog didto

ug kita lang ang makabati
sa kainit

ang makakita sa asong lugar
anaa ang aso ug agipo

nga para kanato
haskang humuta.

timbangtimbang

akong gisulayan
pagtimbang ang kabahin
natong duha

ang kalipay kon ugaling
magkasabot ta
ug ang kamingaw kon
ugaling magbuwag
ta

timbang timbang
siging gatimbangtimbang

ug makalimot diha
sa gahom sa kalimot
hangtod
sa ikatikay-ang
ug kahilis sa akong
panagang

ang kasakit nga tinan-ogan

unsa kaha no kon pahibaw-on  ko ikaw
sa akong mga kasakit?

moundang kahag tuyok ang imong
kalibotan?
mangatagak kaha ang mga dahon
sa imong lasang?
moulan kaha sa udtong tutok?
madako ba kaha ang mga balod
sa dagat?
mauga kaha ang mga sapa?

dugay ko nang gihambin ang mga
aslom ug pait
sa akong dughan ang mga tagok
kanunayng nagmantsa
sa akong kasingkasing

wala ako magsaba kanimo ug kang
bisan kinsa
ako lang kining tanan
gihipos, giampingan, gitago,
gitakloban,

gihalad ko ni Bathala diha sa iyang taksanan.
sa kaulahian, nasabtan ko, mas daghan, mas nindot.
nakahamis sa akong kalag, nakapalami sa akong
mga awit, nakapalig-on sa akong mga bongbong.

kapalaran

gusto nakong hikapon ang wa pa nako mahikap masukad.
hagkan ang wala pa nako makita.
gakson ang layo kaayo kanako.

pahikapa ko sa imong mga damgo.
pahagka ko sa imong mga kahaw-ang.
pagaksa ko sa imong pangagho.

pagkadugay sa akong panghupaw.
pagkamubo sa akong ginhawa.
pagkataas sa akong kahigwaos.

gusto nako nga higugmaon mo usab ako.
kitang duha nga wa sukad magkita.
bisan gani sa damgo usa ka man gihapon ka gabon.

bukid ba gayod ang kapalaran nga dili nato makatkat?
dako bang lasang ang atong mga pangandoy
ug kita didtong duha dili magkita?
idlas ba gayod ang kapalaran ug danlog ba ang iyang
panit ug dili nato mahawiran?

kon ako

kon ako ang  pangayoan nimo ug unod
hatagan ko ikaw
walay mawala sa akong lawas nga giputos niini
gikan sa akong agtang
hangtod sa akong kiting

kon ako ang imong kawatan ug  halok
dili ko na ikaw gukdon ug paninglan niini
ihatag ko kini kanimo
bug-os ug hingpit
kay wala'y mawala bisag usa ka nipis
nga panit sa akong ngabil
og dili maputlan ug ugat ang akong dila
sa pagtanom niini sa imong ngabil
sa pagtam-os niini diha usab sa imong
dila
hangtod pa sa bitayng tabil
sa imong tilaok

laway lang ug paghandom ang akong puhunan
aron hatagan ko ikaw sa imong
kalibotanhong
kalipay nga kaniadto pang panahon
gihikaw nila kanimo

kay kining tanan ania kanako
unod, bukog, laway, dila, ngabil, panit
hinatag ra usab kini
gikan ni Bathala
ug dili kini para kanako
kon dili
alang kini kanatong tanan
nga gihikawan
sa danlog ug idlas nga
kahigal

nga ug sunogon sa imong kalaog mahimo ra usab nga abog.

pagkalaog mo gayod
wala ka ba makakita kaniya nga nag-antos sa katugnaw sa kamingaw
niadtong gabhiona?
usa ka gakos, usa ka halok, usa ka pagdulog lamang
sa usa ka kagabhion
aron maluwas mo unta siya sa usa ka hinanaling kamatayon

nganong wala man nimo kini gihatag kaniya?

lawas lang kana, ug ang imong giluwas mao baya
ang iyang kalag

unsa ba ang anaa diha sa imong mga kamot ug liog ug dughan
ug buhok ug tiyan ug tiil ug hawak ug agtang
nganong imo man kining gipanghalab kaniya?

ug buot hunahunaon unod ug bukog lang kana
nga ug sunogon sa imong kalaog
mahimo ra usab nga
abog.

kon makaatik ka lang unta

usahay kon nakabantay ka
ang atong tilaok nangita ug tunok sa isda
aron usab kita mangita ug iring nga mokawras sa atong
liog nga walay libog

usahay sa kalaay kon nakaatik ka
gipangita nato ang dakong bato aron ipukpok sa atong ulo
aron lang mabati nato ang kasakit aron lang nato mabati pag-usab
nga kita diay buhi pa

usahay sa kahaw-ang misakay kita sa duyan unya atong gipakusog ang labyog
aron kita mabali sa pikas ug dayon malabay ug mahulog ug mahagba
aron nato mabati nga kita diay malilong pa
ug mabati na usab nato ang labyog sa kinabuhi

usahay mas mokusog ang atong pagbulhot sa sigarilyo ug kon makabantay ka niini
mora bag gipaspasan nato ang pagpaingon sa atong gipangita nga
kamatayon.

walay gihawiran walay mahatag ug walay hiposon.

ganahan ko anang
mablanko ang akong panglantaw
kanang wala nay pulong nga mag-ung-ong sa ako baba nga gibitbit sa akong dila
nga morag paon nga wa kalingkawas sa iyang taga

ganahan ko anang mahaw-as gikan kanako ang tanang gapunsisok sa akong dughan
kanang mora akog kanal nga gibahaan ug ang tanang basura apil ang lapok mahawan

kay pagkahuman mora na akog bag-ong tawo ning kalibotan
walay nakamahuan
walay gihawiran
walay mahatag
ug walay hiposon.

wa ka dulot sa kabaga sa imong nawong nga anad na sa kaulaw.

sayon sultion ang pulong kapakyasan
mikatawa ka pa gani sa wala pa kini miabot
nanamin ka, nanudlay sa imong buhok, nagpahumot sa imong liog,
gipulbosan ang dughan, gipahaluna ang kwelyong misimang,
dayog lingkod sa kilid sa pultahan

sa ubos atua ang tulo ka ang-ang sa hagdanan
ang pagkatawo, ang pagkabuhi, ang pagkamatay
nakulangan kini sa imong gihandom nga pagkabanhaw
naglingolingo ka sa kadangag sa panday

pag-abot sa kapakyasan
lanog kaayo ang iyang tingog ug nabungol ka
natulilik, nahagbong ug dayon nakuyapan

nakamata ka sa dihang wala na siya
ug dayon nimong panghambog nga siya kaya ra kaayo nimo
wa ka dulot sa kabaga sa imong nawong nga anad na
sa kaulaw.

pagpanglood

mora ka mag
signal sa wifi ning among gamayng lugar
nagwalawala
unya kon moabot man ugaling
morag bao
haskang hinaya

kon kanus-a ka gimingawan
wala ka
kon kanus-a ka gisalikway na unta
miabot ka man hinoong
amawa ka

karon nakat-on na ako
nga mabuhing nag-inosara
gisirad-an ko na ang pultahan
ug ang mga bintana

ayaw ako ug apasa
aduna ako'y lakaw
paingon sa lugar sa kalipay
ug wala kay labot
kabahin niini

aron ko ikaw hikalimtan

usa na ka semana ang
milabay

naligo na ko ug
kaupat hangtod
ikalima

ang imong kahumot
dulot pa gihapon
sa akong panit
sa akong kasingkasing

kon nabuang na
man ugaling ako
dili sab ko ganahan
nga ako
matambalan
aron ko ikaw hikalimtan

sa atong mga kasikas

pagkahuman sa
usa ka kagabhion
diin namilit ang imong
kahumot sa akong
mga palad

sukad niadto
sige akong gihasol
sa akong
tanlag

kon nganong didto
ra man kita
kutob
nganong wala man
kita milahos
padulog didto sa kusog
nga sulog

nga unta ang dagat
makamao pa mang
modawat
sa atong mga
pagbaha
sa atong mga
kasikas

basig mawala tang duha unya

matag halok nga
akong gitanom sa
imong liog
samtang nagtalikod
ka kanako
nagbilin kanako
ug daghang pangutana
"ngano ba?"

ug sa layo ka na
kanako
mipadayag
"palihog
sunda ko"

wa ko misunod
kay nahadlok ko
sa tubag puhon
niini

basig mawala tang
duha unya
di na ta kabalik
sa atong
agianan

mokuyog kanimo

dili baya lisod sabton ang mga
nawad-an og paglaum,

 ilabi na
nga kita, ug buot sutaon,
gikan
baya didtong lugara.
Kadtong
panahon nga dili ka ganahang
mobangon,
nga bisan unsaon
ka nilag tintal sa kahumot sa
kape,
 sa ka init sa bag-ong
hinimong pan og
tortelyang
itlog,
wala ka gayod mitingog
ug igo mo lamang
 gibali ang
imong alugnan
 ug balik ka usab
sa paghigda.

ako nakasabot kanimo.
Wala
ako'y pulong nga buhian sama
sa usa ka puting
salampati gikan
sa usa ka hawla.

akong ipaambit ang akong
tinipigang kahilom.
Namati ka
pag-ayo ug sa kadugayan
ako usab
nakahukom nga
mokuyog kanimo
sa dyutayng
kahilom

tigmo sa kaulag

kon magkasinabot sa usa ka
pagtipig
itagbo nimo ang imong dila
sa akong dila. Likosan ko
ikaw diha sa imong alingagngag.
Niining pagdat-ol sa akong ngabil
sa imong ngabil, wala kita'y
panahon sa pagpanugid.

kon maghagwaay kita sa pagtoo
nga niining atong gipiling lugar
dili na kinahanglan pa nga mosayaw
ang gugma aron kita malingaw
mahimong magdugay ang atong
paghimamatay sama sa panaglami
sa duha ka pawikan didto's
kalalom sa lawod nga dagat.

kon ang panahon atong itago
sa atong duha ka palad ug dayon
lantawon nato ang umaabot sama
sa usa ka hanap nga kainit sa
awaaw, mahimong magmalipayon
kitang duha diha sa ngiob tang
mga kagabhion

adunay nanag-iya kanako
dugay na kini nahitabo apan
ikaw wala'y nakatag-iya kanimo
gawas lamang kanako nga
gigapos sa karaang kahoy sa
atong  mga naandan

kon imong basahon pag-ayo
kining akong gisulat, tataw ang
pagtipig sa dili unta nimo angayan
nga sabton sa sunod nga adlaw.

ang akong hangyo mao lamang
ang usa ka halok, usa ka gakos
 sa usa ka hugna sa
panahon diin gikalimtan nato ang
kahadlok sa mga tigsibya ug mga
tigsudya ugma puhon kanato.

nangandam na akong daan.
walay labot ang gugma dinhi.
tukib nga kaulag lamang diha
sa inihap mga hinay nga  tikang.

sa sunod nga pagpapas.

hagbay ra ang arka ni
noah nga miabot dinhing
lugara. Milawig kini sa
hangin, ug mipondo sa
atong mga panganod.

abri ang mga bintana ug
ang dakong pultahan
ug bisan kinsa gipasulod
ni Moses sumala sa
kabag-ohan, dili mga
mananap, kon dili ang
mga tawong gikapoy
na sa kalibotan ang nanulod
niini: tanang klase, dili lamang
babaye og lalaki. Sabta nga
nausob na ang plastada sa
sunod nga dakong baha
sa diwa.

dawata ang kabag-ohan
duha ka lalaki naghawiray
sa ilang mga kamot
duha ka babaye naggakos
naghalok, nagkasinabot.

dili kini mito, realidad kini
sa bag-ong sugo. Gugma
lang gihapon ang gihimong
batayan sa pagluwas sa
sunod nga pagpapas.

ang nahitabo didto sa paraiso

si adan ug eba usa ka sugilanon lamang.
ang halas didto, usa ka hunghong sa kaalam

nga kanunay sa gihapon, nagtintal sa tawo
aron malaglag sa kawalay kahibangkaagan

usa lang ka mansanas, usa lang ka pagsangpit
wala didto ang pagpugos, hukom lamang.

kat-uni ang kalipay diha sa pag-inosara

ang kalipay baya
di na kinahanglang saluhan pa
labi na ug ang imong
kaatbang niini
dili kamaong manghatag
sa iyang kanunayng
giangkong iyaha

kaon, inom, higop,
tulon, supa, ingkit,
nganga, usapa,
ang imong estorya
sa imong kaugalingon

nganong paaboton ang
dili moabot?
nganong damgohon ang
ang dili makab-ot?

kat-uni ang kalipay diha
sa pag-inosara
kay ug tagdon mo pa sila
ikamatay mo ba?

silang wala mangabot
silang aduna usay gisunod nga
mga mapa sa ilang kalipay
kon wala sila, ikamatay mo ba?

ayaw palupig
sunda ang mapa sa imong
kalipay
buhata ang angay lamang kanimo

kabayong pak-an
kabawng sungayan
irong ikogan
boring nga iring
tabugok nga ok-ok

ikaw na gayod

kon kamao kang
molabay sa mga pan-os
nga kagahapon

kon kamao kang
kalimtan ang mga
nangamatay na

kon kamao kang
mohangad sa langit
unya taas lang gihapon
ang kilay diha sa
bag-ong panglantaw

pwes, pahalipayan ta ka
usa ka sa makamaong
manginabuhi ning kalibotana
nga malipayon

bisag mora ka nag lata
nga nalumping
bisag mora ka nag bato
nga nasiak sa pagpuli-puli
sa panahong labihang inita
ug labihang bugnawa

bisan diha sa abogan nga dalan
hala ginhawa
bisag nabasa na sa ulan ug
haskang kuroga
hala bira sayaw sayaw
sa huni sa kinabuhi

ikaw na, malipayong nilalang
ang koronahan sa titulong
tunukon.

duha ka estranghero sa usa ka cancelled flight

talagsaong pagbati
nga misugwak gikan
sa wala nato
matugkad nga
panag-abot sa atong
gasanga nga 
kapalaran

duha kita ka estranghero
sa usa ka cancelled flight

gi-book ta sa usa ka hotel
diha sa duha ka higdaanan
nga sa katugnaw sa aircon
diha na lang sa usa ka habol
kita nagpatabon

the rest is history
bahala ka na
basta ako haskang lipaya.