hilanat

tam-is ra kaayo ang
kahilom

sakit sa tilaok
katol nga di mawala

karong gabii mao
ang dakong
hilanat.

pangandoy

gipangandoy nato
ang dag-om
miabot na ang higayon
nga mas 
gikinahinanglan nato
ang ulan
kaysa sa kahayag

uga kita nga yuta
pugas kita nga nagpaabot
sa tubig.

wala na

miabot na ang panahon
sa ato
nga nga dili na makadulot 
kanato

ang mga pagpanamilit
dili na pilit
ang mga panugon
tua ras pugon

karong panahona mao 
lang ang panahon
ako,ikaw, magpuyong
malinawon

wala na kitay ngalan
arang sangpiton
wala na kitay nga kuankuan
nga balikbalikan

gikasilagan ang sakto

ang tambok nga
bayot
nakaingon sa iyang
iyaan

"nganong kamong
nindot og batasan
nag-ilaid man
sa kalisod?"

mihangad sa langit
nagpanglingolingo

"nganong kadtong mga
balasubas
kadtong mga laog
kadtong mga ngil-ad
ug batasan
wa pa man mahupong
sa ilang
kabutang?

milakaw palayo
naglibog sa kinabuhi
mikiaykiay

"tungod nila
maong naingon ko
ani"

gibasol ang langit
gikondena ang yuta
gikasilagan ang
unta sakto.

sa karupay

nahibilin ang akong
kasingkasing didtos bukid
sa karupay
tupad sa kang tatay
nasabtan kong nindot 
kadtong dapita
kay wala ka nay
asawa.

ang gugmang nagpabilin

pagkabalasubas sa
panahon nga kusog kaayong
milayat sa mga
adlaw

gibinlan kas mga puting
buhok 
mga kunot sa agtang
gakurog nga kamot
ngutngot sa tuhod
balikog nga likod.

apan, wala ang pagmahay
sa laing kabilin, ang kaalam.
ang gugmang bisag guba
nagpabilin sa dughang
puthaw ang kubal.

solo tango

adunay misayaw
sa tango
nga nag-inusara
lamang sa
ilang balay

alas sais sa hapon
walay hunong pagtukar
sa iyang internet
you-tube ang medley
tango.

nagpiyong ang iyang
mga mata
abtik ang mga tiil
sa tikig nga lawas.

walay hunong ang
mga damgo 
diha sa pagsayaw.

lig-on gihapon ang
paglaum diha sa tumang
kamingaw.

lain lain

kadtong walay
mahimo, magtudlo.
morag, kadtong 
di kamao
anaa, magtudlo.

dali lang ang
pagsulti, sayod ka.
lisod ang 
pagbuhat.

dunay nagbuhat
nga wala
gigamit ang 
hunahuna.

dunay dakog 
hunahuna apan
wala sa buhat.

gigabas ang sanga
sa gituntungan.
gikuha ang bato ug
gipukpok sa utok.

dunay wala sa
plano ang kamatayon.
apan maoy
nahitabo.

gidamgo ang kinabuhi.
gikutkot ang 
lubnganan.

one day soon

si jingjing nagpost sa family picture nilang perlita
sa ilang likod ang ilang tulo ka anak.
ang usa ka kamot ni perlita atua sa paa ni jingjing.
nindot lantawon ang ilang mga pahiyom.
nagcomment ang ig-agaw nga si rey, " ka happy sa family"

karaan nga kadtong family picture.
milubad na gani. duna nay mantsa ug gisi.
tungod kay gi post man ni jingjing, maingon
tang kini iya diayng gihipos sa dugay na
kaayong panahon.

si perlita atua sa america.
si jingjing atua sa malaysia.
ang usa ka anak nga babaye atua sa dubai.
ang laing anak nga lalaki nagpabilin sa
manila.
wala ko kabalo kon asa na ang kamanghoran.
siya lang ang wala sa fb.

si rey walay anak. ang iyang asawa manghod
ni perlita. hagbay ra usab nga nagbulag.
wala kaantos sa kamingaw nga midaog sa
ilang gimugna nga gugma.

ang daang larawan. dunay gustong isugid.
dunay damgo. dunay gitipigang paglaum.

"one day soon" kanta ni tom jones maoy gustong
kantahon ni jingjing.
mitubag si rey, ako sab, "one day soon" kadtong
kang humperdeck nga version.

ang kapoy kaayo nga lawas

ang kapoy kaayo nga
lawas
sayong nahikatulog
sa katre sa kagabhion
ang limpyo nga konsyensa
maoy iyang alugnan
unya ang gahabol kaniya
mao ang bulawang kahayag
sa bulan diha sa abre nga
bentana
anaa ang gilak sa kahilom
sa daghang mga bitoon

selfie

ang akong amiga nga si sofing
nangamaw sa america

ang iyang amaw haskang datoa
nga kon siyay pasultihon ang iyang
balay sa pinas
layo pa gani sa kasilyas sa iyang
tiguwang nga amo

wala nay memory ang maong tiguwang
nag alshaymers,
maong si sofing na lang ang nagsigeg
selfie atubangan sa samin diha sa kilid
sa tokador
samtang ang tiguwang nagsigig
katulog tungod sa iyang mga tambal

way lami

ikaw ang kasagaran
dili ikatingala
nga kon dunay maslayd
sa panit sa saging
dili mo gayod
mapugngan ang pagkatawa

lahi ni siya
gisayangan siya sa panit sa
saging
og nganong imong nayatakan

walay kangitngit

walay kangitngit
o pulong ang makababag
sa atong
pagmata diha sa kahayag
diha sa paglitok
sa amang nga mga pulong
walay babil
sa atong kinabuhin ang
makapahinanok nato
diha sa kamatayon sa atong
mga paglaum

kita

balod ang atong
kinaiyahan
migo, busa ayaw, ayaw
og pahulay sa lapyahan,
padayon, padayon,
isip balod sa kadagatan
balik, balik sa lawod
ayaw ug tugdong sama sa
langgam 
wala kitay salag
wala kitay kapahulayan
kita nga usahay
maghimog unos
sa kalibotan

ayaw intawon

ang balak
buwak nga gihagkan sa 
adlaw 
sa sayong kabuntagon
mibuswak
sa bugnaw pa nga
kainit

ayaw kutloa

ayaw huboi sa iyang
mga petals
ayaw putla ang iyang
mga dahon
ayaw balia ang iyang
sanga

pasagdi kini nga
mobuswak hangtod
sa iyang kagabhion

pasagdi nga kini
usab
mosandurot sa bulan
diha sa iyang
katulogon

ayaw tuguti nga
mawadla ang iyang
pagpangalimyon

ayaw huboi
ayaw patya

sa pagsayaw sa tango

mas nindot isayaw ug tango
kon nagpiyong ang akong mga mata

nabati nako ang akong paglutaw sa
mga panganod
unya ang akong ilong usa ka dangaw
ra diha sa imong aping

nabati, nasimhot, nahagkan ko ang
langit

ang akong nakita

imbis mamati sa iyang
abogado nga nagtukituki sa
iyang kaso
ang piniriso nga walo na ka tuig
sulod sa bilanggoan
naglantaw sa usa ka painting nga
gisab-it sa huwes sa bonggong sa 
korte

lalaki ug babaye nga nag-ani ug
humay sa basakan
sa unahan ang duha ka bungtod
unya sa tunga niini ang adlaw
unya sa kilid sa bungtod mao ang
payag 
unya sa sulod sa payag sa may bentana
nanambo ang batang lalaki
sa ibabaw sa payag mao ang mga 
panganod ug ang
mga langgam nga nanglupad
nanglabay

bilanggo

duha lang
ang kapaingnan

madugta siya
sa bilanggoan
o mapusilan siya
diha sa 
kagawasan

isog nga tawo
diha sa kapakyasan
gipuy-an niya
ang tungatunga sa
dalan

sapa nga linaw
walay batong
makatugaw

ang mga kalit nga panghitabo

i

kadtong akong
kauban sa
landbank kaniadto
didtos Tubod
nga nakalimtan ko na
gani ang iyang ngalan
basta ang iyang
mga ngipon morag
sa iring
ang dili nako malimtan
mao ang iyang
kalit nga kamatayon
ang kasubo sa ginikanan
nga wala mawala
hatod sa ilang bugtong nga
anak
didto sa lubnganan
unya walay hunong
ang ulan
nga misulay pagpapas
sa mga luha ug
bakho


ii

kadto si marlyn
pagkabuotan
maalamon 
cum laude sa dihang
nahuman sa
ateneo de davao
apan unsang hitaboa
nga ako na lang
nadunggan sa diha
nahuman na sa
pagtoon
naburos kini
ug tungod kay wala
pakasli sa lalaki
nagpakuha sa iyang
gisabak
nga kuno nabinlan
ang tiyan sa hugaw
maoy iyang
gikamatay

ug samtang giuli
sa Pagadian ang iyang
patay nga lawas
wala madawat sa
amahan 
ug siya usab namatay
busa duha ka haya
ang tua sa ilang
panimalay

iii

si junjun
laing maalamon
graduate sa philippine
science high school
ug dayon sa dihang
nagpadayon sa iyang
kolehiyo sa
san carlos
dunay usa ka hitabo
nga dili gayod niya
madawat
busa miuli kini sa
dipolog nga wala
nay laing kan-on 
kon dili manok
dayon dili na maligo
dili na mogawas sa
iyang lawak
hangtod nga namatay
ang iyang inahan
unya gustong patyon
ang iyang amahan
nga milayas ug sa dihang
siya na lang
sa maong balay
migawas kini ug 
gisunog

iv

anaa usab si junel
gahapon lamang
misulod sa C.R.
didto sa korte
samtang nakauli na
ang tanan
miinom ug hilo
dayog kamatay

v

sa kataposan
anaa si ramon
usa ka piniriso
gipusil
sa pultahan sa korte
sa wala pa tagad
matawag ang iyang
kaso

ang sugilanon kabahin sa anak ni reymar

lantaw sa TV 
pipila ka oras sa 
boxing, duyugan pas
basketball dayon pakyaw
sa football

sigarilyo, beer, ug
sumsuman nga
barbecue


samtang ang iyang 
bag-ong puya natulog
sa kuna

wala na madungog
ang gamay nga
gininhawa

ahok

nindot ang pulong nga
"ahok"

labi na ug ikaw ang
maka"ahok"

nadungog mo na ba
ang balita

nga giahok ni Bewa
ang imong asawa?

ania ka

ania ka
napugos intawon ug lantaw
basa
diha sa paghulat

kinahanglan mong
mokaon ug pan
apan sirado pa man
god ang
mga tindahan

salamat, salamat 
salamat na lang

ania ka napugos intawon

ug ginhawa

kay wala pa ang

tiglubong.....

gihimong bairan ang balas sa habol niyang pangandoy

aron dili matintal
ang ligwan sa pagpaak
gibuhat niya ang
dili unta angayan niyang
buhaton

kon nasayod lang unta
ang mga buwak
kon unsa gayod ang
nahitabo
niadtong kaadlawon

naputol ang usa ka pako
sa alibangbang
nagkulang na ang tiil
sa alindanaw

nahimong amang ang hangin
nga igo lang milabay
sa kahaponon
unya ang baybayon mao
lang gihapon
balik balik diha sa iyang
mga balod
gihimong bairan ang balas
sa habol niyang
pangandoy

ang mga ulagan

kusog kaayo ang
ulan kagabii

ang mga iring ug
mga iro nahinanok

nagmata ka ug kon
matulog man

manok-manok man
lamang

nanglupad didto
sa hugaw mong kusina 

ang daghang mga  ok-ok
nga durong pangulag

ang tapos

moabot ang panahon
sa pagbuhi

sa una kusog ang
pagpugong

naa ang daghang mga
maymay

duna pa gani ang mga
pagpangasaba

paghimo sa mga regla
paglabat sa mga giya

kinsa bay makapugong
sa baha? 

kinsa ba ang magbantay
sa usa ka kwadrang kabayo?

dili mo na mapugngan ang
tanang panghitabo

ug sama sa paghawid mo sa
balas 

mobilangkad ra ang imong
tudlo

pagawas sa mga balas nga
nausik sa imong palad

samtang ikaw anaa nagyaka
sa dalan

milantaw sa unahan sa mga
gipangbuhian

panahon na sa pagbuhi
wala na ang mga pispis

naguba na ang mga salag
nagsugod na ug pangahulog

ang mga dahon, ang mga 
sanga nga gabok

ang balay nga gianay ang
bongbong nga gibukbok

ah, dawata, dawata ang
panaw sa panahon

anaa ka, nagnganga sa usa
ka pagpaabot

kon kanus-a mahuman ang
tanan

ang tapos, ang panagtapok
ang hisgot-hisgot

amping amping

aron lamang mabuhi
pag-usab
malitok mo ang wala
nimo gibati

sama anang nadungog
kong
gihigugma ko ikaw
pahagka ko sa imong aping
padala sa
amping amping.....

dinhing dapita

sa tumang kahilom sa
kagabhion
dinhi niining
malinawon nga dapit
dungga pag-usab
ang awit sa imong
ginhawa
paminawa pag-usab
ang balak sa imong
kalag

sa usa ka damgo lamang

ang iro nga
imong gihuktan
ang duha ka
love birds
nga imong gihawla
ang goldfish
sa aquarium
ang batang
gikarang
ang bayongbayong
nga imong
pinugngan
ang kalabaw nga
wala nimo
gipatuna
silang tanan
usa ra ang gipangita
silang tanan
magdungan sa usa
ka damgo
lamang

ang gawasnon

ang atoa sa
gawas sa balay
sa sagbot
nagpalagaylay
silong sa adlaw
sa kilid sa
sapa
sa bugnaw nga
kalubihan
sa duyan
sa laing dughan

Usa na kagawasnon

Niabot ra gayud ang takna

nga wala na siya kinahanglana,

naibot, nga daw bukog
nga nag-ungot sa akong gusok

Pagkatawhay sa paminaw
klaro na ang panan-aw,
limpyo na ang samin sa banyo
makita ko na ang gulot sa akong nawong

Humok na ang akong mga bukog,
ang akong panit pwede ng pilo-piloon
og ipahiluna didto sa maleta
ibabaw sa naglumpong nga mga letra

Gisakmit ko man ang imong kalag
nga nipaak sa bulan nga abtik pa sa kahayag,
ayaw hunahunaa nga ako usa ka katalagman,
 hilom ako nga sapa sa ilalom sa kakahuyan

aron dili na kini masayop

sa lingin tang
kalibotan
hawid tas atong
mga tagsatagsa
ka kamot
ning sayaw sa
kinabuhi 
piyong ang atong
mga mata
bati sa awit 
pasingot
sa walay paglantaw
sa atong mga tiil
aron dili na kini
masayop

nanglabay lamang

kahalangdon mo
daghang gustong 
mahimo sama
nimo

kon ako usab
mahimong sama nimo
maunsa man ang ako?

mahimong abo?
mahimong abog?
mawala ko sama
sa tanang
nahimong sama 
nimo

nia ko
naglingkod sa bato
milantaw sa tanan
nga nanglabay
lamang

siya

kuskos sa gitara
sayaw sa musika
hudyaka sa katawa
asa ba ang kasakit?

ang tanan
isalig mo na lang
sa kahitas-an

siya ang tag-iya
sa tanang bahandi
siya ang naghipos
sa tanang kaalam
siya ang ipisan
sa tanang kalipay
siya ang agianan
paingon sa langit

sapa

dili mahubas
ang kasakit

samtang naa
pa ang sapa

mahjong

makamaong
maghudyaka ang
kawad-on

ang among
silingan bisag
walay gikaon
sa petsas sa
mahjong
nagkauyon

hudyaka sa kawad-on

Nikaging ang dughan,
kay gitunglo sa utok
Namalhan sa luha,
kay wa magpakabana

Wa koy labot nako,
kay haw-ang ang sudlanan
Padaplin diha,
kay way apil ang malipayon

Dihang nihubas na ang kasakit

kasakit tumbas balak
kon wala na, aw
blanko ang papel

swerte

swerte kadtong
adlawa
wala manampong
sa ulan
ang mt. Fuji

ulahi ang pagbasol

kon mahimo pa 
lang unta nakong
iuli ang putol nga pako
sa alindanaw
aron kini makalupad 
pag-usab
ngano gong dili?

balak#96

ang kataposang
duga sa close-up 
strawberry flavored
toothpaste imong
gipuga aron magamit
sa toothbrush

sa pipila ka adlaw nga
wala kini
nimo mabuhat

ang akong mahinumduman
kabahin niini
mao kadtong pagpamugos
mo kanako
nga ibatbat unsay
buot ipasabot sa akong
balak # 96

hubo ka sa banyo
samtang nagbula ang
imong baba

 saka kanaug
ang toothbrush diha
sa imong
ngipon nga walay
pangag

gihatag nako nimo
ang akong 
pahiyom 

dayon nakog 
dunol sa
puti ug limpyo kaayong
tualya

aron itabon  sa
nagtulo mong
lawas

pitoy patay

sa pagpamati nako
sa classical ottoman music
karong buntaga

nangurog ko sa
paghinumdom nga 
sa miaging tuig
hapit kami naapil
sa bombing sa 
istanbul

pila lang ka segundo
sa among pagpahawa
kalit nga mibuto ang
bomba

pitoy patay.

lakaw nga dunay tumong

matag buntag
gamay lang ang
manimba
sa kapilya, 

mas daghan ang
igo lang molabay
mangurus
dayog padayon sa
lakawlakaw ning
sayong kabuntagon
silong sa mga kakahoyan
sa plaza magsaysay
aron mohanggab
sa lab-as nga hangin

usa ako kanila

ayaw sabta nga kining
lakawa walay tumong.

pag-ampo lang

sa dihang 
gisulod na ang lungon
sa pantyon
nanghilak ang tanan
ako lang seguro ang
wala nga mitago
sa itom nga
sunglasses

"Francing ayaw
kabalaka
anaa si nonoy nga
maoy moatiman
sa iyang mga manghod"
maoy pasalig
sa iyang amigang
maestra

ako man lang ang
nonoy didto
atua tuod ang akong
mga igsoon
apan ako man
ang kamanghoran

" ikaw nonoy
pagbinut-an
ayaw pasagdi ang
imong mga manghod"

wala man ko sugod
nagbinuang
gani nagkapandol pandol
man ko
naningkamot nga sa matag
pandol 
mobangon 
sa matag pangos
manambal
sa matag kahulog
mokatkat lang gayod
gihapon

sahay malibog ko
sa kinabuhi
nganong bisag diha
sa kamatayon
naa pa mang gihapon
nag-alirong ang mga
botboton

sama adtong 
sa atong kagutom
ug kauhaw
ang idalit mao lamang
kunuhay ang
mga pag-ampo
ngadto sa amahang
langitnon

way masaligan

si mama ang tigtaod
sa akong ribbon matag
first honors

naningkamot lang ko
kay sayod ko nga ugma damlag
wa koy masaligan

si papa kon makatupad sa
pagpahulagway
walay gihapoy panudlay
nanimahong tuba

dili sila magtapad
ako ang kanunay nga naa
sa tungatunga

nagpadayon ang kinabuhi
bisag sila nangamatay
pikas pikas ang kahaw-ang
samtang ako
naa lang gihapon sa tungatunga
sa mga katuigan

ang dalan kanunayng magsanga
ulan diri init sab didto
ug tuod man hangtod karon
wala kay kasaligan

dili

dili ko magbabalak
misulat lang

apan kon sa imong
kaguol
nangita kag mobalak
aron ka
malipay dia ko

nagpakamagbabalak
mikokak
mibalay sa mga bakak
miputakputak
miapil ug iyagak

kinestetika

dunay paghaploy
nga ang akong tikoy
mokitoy

nga unta nahinanok
na man kini
diha sa manokmanok
nga bisag paakon sa
lamok
dili gyod mogimok

ikaw lang
ang imong kamot lamang
ang nakabanhaw
sa patay
diri kanako

sa makadyot lamang
namahala ko
dayon nakog higmata
nakalitan lang
dayog biya
palayo sa disgrasya

kalaksot

nakita ko na ang
akong hulagway
diha nimo

mao mao gayod
maingon-ingon

mihunong ko kadyot
namalandong
sa akong
kalaksot

lingla

ngano bang
sa tanang mong himoon
mora ka mag
mamasol

sama anang
sigi mog pagpangita
sa paon

pagtagkos sa
nylon sa taga
pagpaniid sa dakong
isda
nga makubit gikan
sa sapa?

dili ba mahimong
molingkod ka lang
sa kilid sa suba
dayon ang tumong
mao lang
ang paginhawag dako?

kana bang
wala kay tumong
sa paglingla
sa pagkubit
aron mabuhi

sa bangag

sa pamaagi sa
pagsulat sa kadugayon
na sa panahon
matag butang mo sa 
letra
sa panganod
mora kinig pyano nga
motingog

mora kinig kutingkuting
sa gitara
sa kuko nimo nga
taas na kaayo
unya hangtod karon
wala pa gihapon
maputli

matag pili sa silaba
aduna kay madungog nga
kagahapon

mga batang nagdula sa
takwan
o kaha nagdakpanay
o kadtong miutong sa 
kataas sa iyang pagshatong
o kadtong
mitiad aron ilabay ang
tsinelas 
sulod sa bangag.....

maandan

dugay dugay
baya usab nako nakat-onan
ang pag-inosara

haskang lisoda
ang atong giagian

kanang magbalibali
ka sa gabii
nga mora kag bingka
nga gihurno

baga sa taas
kalayo sa ubos

mora makita mo ang
paglitson sa
baboy

sa kadugayan
mohinumduman mo ra
gihapon ang
kalami sa tinap-an

ag bulad nga dugay
sa nataran gipatikig
sa pipila
ka init nga adlaw

makat-onan kining
tanan
inanay lang
hangtod nga dili na
kita madutlan

ang kamingaw
ang kahaw-ang
ang kasakit ang
kahapdos baya
morag wala na lang
morag 
nanglabay na lang
nga dili na gani
kaayo nato
mahinumduman

alang kang Meggie nga mobalhin na sa laing lugar

pati gani
ang kalibotan
moulan man

ayaw ipanghimakak
ang luha
apil kini sa
kinabuhi

maanad ka ra
niini
gani basin
ganahan ka puhon
sa saktong
kaasgad niini

ang manok

naa kay mga mata
apan wala ka gayod nakakita

wala mo makita ang akong
pagtagad
ang akong pagmahal kanimo
wala mo makita ang akong
panahon
nga gitagana kanimo

nakita mo ang dakong dyamanting
migilak patong sa imong singsing
ang bulawan mong aryos
ang mahalon mong sapatos
ug sanina

aduna kay mata
aduna kay katakos
ug kaisog
apan wala kanimo ang
kalumo

manok ka nga 
mas dako ang batikolon
unya ang kasingkasing
pangitaon

nostalgia

adlip sa hilaw nga
manggang bisaya
sagol sa ginamos nga
mawos
pwede sab dayok nga
isud-an sa 
bahaw o kaha ba puso
maoy tambal
sa imong gitawag nga
nostalgia

puhon

puhon ato nyang
balikan ang
payag tas Cogon

di na nato likayan
ang sagbot nga katol
gimingaw kos na 
gyod kos
alugnan nga doldol

sunday morning sa beach

pagkaputi sa balas
pagkabugnaw sa hangin
sa ibabaw sa duyan
silong sa alkansyang kahoy

usa ka slice sa watermelon
tupad sa puso ug barbekyong
baboy, 
naa say san miguel beer

bugnaw ang adlaw ning
dominggong kabuntagon
kuyog ang misis ug ang
ubang friends.

kalit lang pod nga nawala

dili ni bag-o
dili sab kini  matawag
mong imbento nga sa dihang
miabot ka na sa
pagkahunas
diin makita na ang
bukog sa suba
ang bildo sa sapa
ang samad sa
bukana
kalit mong
namaangkagan
ang tinood nga kagang
nga wala na midagan
ang mga pulong nga
namaak
sa kadaghan sa lain laing
hulmahan
mapaak o mabatikolon man
nanglupad
mitipon sa panganod
dayon sama sa imong
ginhawa
kalit lang pod nga
nawala

sa langit nga tab-ang

dili na kinahanglan nimong sipasipaon kining gugma ko kanimo
aron kini mamatay
ako na mismo ang mopatay niini bisag dili sa pagsipa kay makamao
na ako kabahin niini gikan pa kaniadto sa wala ko pa hisabti kaayo kon
unsa ang gugma
daghan na akong gipatay nga gugma, nga sahay dili ko gani tawgon sa iyang ngalan, kay dili na ako motoo sa dangga niini,
dili ka makasabot niini, dili ka mobati kon unsa kini
sayod ako, busa wala ko na ikaw sultihi kabahin niini, kon unsa kini, unsay iyang pamanit, unsa ang
iyang dagway, o lawas, ang kamot niyang kubalan,
ang tiil niyang hiwi, 
ang dughan niyang puthaw,
ayaw kog pangutan-a o hangyoa nga mabati mo kini o
masabtan, kay dinhi ning akong lahing kalibotan,
walay kauban,
dinhi nagtagbo ang isdang tambasakan ug
balhiboong alibangbang misulay sa usa ka gakos
ug halok
sa langit nga tab-ang

midaghan ang pagduha duha

wa ka na
mitoo anang milagro

sagol pag kasuko
kay sa imo way milagro

anaa nagbangutan kas
kalibog

midaghan ang pagduha
duha

milapas ang mga pangag
pas 

takulahaw na lamang
ang kaniadto

tapot nga pagsalig
nga ang tanan molabay

lamang unya ang
kabalaka mosulbad

tag iyaha ang wa nasabtan
karon, kalit lang 

mopakitag kahayag
bisag wa tay gihimo

katulugon

nahupas ang mga oras
sa kagabhion

nawad-an ug gana ang
katulugon

nagbaliwaos ang lawas
motakilid diri motakilid didto

galigid ligid sa tumang
kalaay morag gisudlan sa

dautang ispiritu sa mga
wala masabti

miabot ang gamayng
damgo, gipudyot mo ug

kini mao ang mahaploy
sa imong mga mata

paingon sa kalinaw sa usa
ka hinanok

all mixed up again

it is all
self talk

galakaw ka
nga wa ka kabalo
kon asa ka
padulong

let the wind take
me, you murmur

miabot ang kusog
nga hangin
nga mipalid sa imong
buhok

to include what
self in you that
was ever left

human sa dakong
kasakit
human sa tanan
human sa mga
nasugdan

which never never
really ends

mixed-up

ang kalaay
anaa kanunay

a dog ear
in the book that

i have not 
finished reading

ang kalaay
dili mabyaan bisag

mag-inenglish pa
ko buntag ug hapon

it is a familiar face
that i do not want again

sa akong lapokon nga
dalan

ang kasaba ug kahilom

ang kasaba
mitagbog sa kahilom

nga wala mangambat
kaniya

nasuko kini 
migawas sa balay

nagbagutbot
kabahin sa usa
ka galot

nagpabilin ang
kahilom

nga tibuok 
gihapon sama


sa usa ka
itlog sa manok

nga wala 
mabuak

naglingkod kini
sa kilid sa bentana

milantaw sa
mga nanglabay didto

sa karsada
diin ang kasaba

naglirawliraw
nangitag kauban

takla

gipatay sa
takla
ang pagpangabli
sa akong
hunahuna

mga damgong
mas
nindot lang sa
sulod
sa kagabhion
apan
kuslimaot sa
kabuntagon