2018/12/04

halad sa akong konsyensa

sayon ra kaayong gilitok nimo
nga ako napalit 
nga akong gibaligya ang akong
kaugalingon 
ang akong kalag
nga ang akong nawong baga
ug kublan

ako nga nga nakabasa niini
magpakahilom lamang

katungod mo ang magduda
katungod mo nga mangagpas
katungod mo ang pagdaot
tungod ka tawo ka man lamang

katungod mo ang pagputol sa
sanga
ang pagputol sa bulak aron
kini mamatay sa imong pagpalami
diha sa pagsimhot ug
paglantaw 

mao kana ang sagad buhaton sa
tawo unya nakasabot gayod ako
niini kay ikaw ug ako tawo man
lagi lamang

nagpakahilom lamang ako

ako ang miambak sa sagad nga 
panglantaw
ako ang mohukom human ko ikaw
madungog
human ko makita ang imong gipakita
kanako

sabta usab nga wala na ako mitoo kanimo
nga ako wala nay gitohoan ning kalibotan
kondi ako na lamang

ugma mosuroy na usab ako sa kabukiran
sa ilalom sa adlaw makigharong ako sa iyang kahayag
sa kilid sa mga bungtod hawiran ko ang mga kamot
sa kakahoyan
sa akong dalan hapohapon ko na usab ang
bugnaw nga tiilan sa kalibotan

sud sa akong kasingkasing anaa ang awit
sa tumang kalinaw.

No comments :

Post a Comment

Nindot ba? Unsay imong maikasulti?

Panginhas dire