ang dagat ug ang mananagat

Didtong lugara
morag giam-am
ang matag gutling
samtang nagsukod
og dagayday
ang agay sa tubig.

Wala ko kalimot
giunsa pagtakos
ang palibot.

Gisampit mo
ang ngalan ko.

Gianod ang palibot,
gipahuwam sa yuta ang bas.

Gianod pod og apil
ang akong ngalan.

Sagdi lang, kay bisan
kaning lugara
gibadlisan sa kadagatan.
Di ko magpabilin
sa baybayon.

Managat ko.

Pangitaon nako
ang mga titik ug silaba
nga gisampit mo.

Bisan unsa pa
ang ilang kilawmon.
Ug bisan pa mokirig
ang akong mga tudlo
sa kabugnaw sa balud.

Ug bisan pa,
ikaw ang dagat
ug ako ang mananagat.

Alang sa Akong Regla

Ningkupos ang akong mga tudlo sa imong pagtuktok.
Sa pagkakaron, giam-aman nako akong kaugalingon.
Kalit gidat-ogan ko nimo og mga pulang gihay nga nanusok.
Gipadayon ko ikaw, gisabot nako ang imong pagdayon.
Gipabuswak ko ang mga buwak ilawom sa akong pusod.
Dayon, adunay nanurok nga puwa sa akong dagway.
Pagkakatol apan tak-om ko sa imong pagbagnod
Sa gabadlis nga kahapdos sa akong kaunoran. Naukay,
Nakubkob ang akong tagoangkan sa imong pag-ungad
Hangtod ningkulikot ang akong lawas sa imong hapuhap.
Pasagdan ko ikaw kay basin wala lang ko naanad.
Hinaot sa kangutngot adunay kaisog kanako motaklap.

Ug sa imong pagbalik, ipiyong ko daan ang akong mata.
Maminaw ko, magtimaan ug mangandam ning taknaa.

Sirkiro

Kab-ota ang kalisdanan nga naglutaw-lutaw
Kurata ang mga kalimutaw sa mananan-aw

Lupad sa duyog sa kulba ug ayaw palamat
Kay ang oras baya imong dublihon og inat

Kon ikaw masayup tulisan ka sa kagubot
Kawatan ka kon ikaw mahagbong kadiyut

Apan ang kaguliyang kuyog sa kalampusan
Ang paghagbong dili lang salag sa kalingawan
Ang tanang pakpak sa sirko tungod sa kakugihan

Lubog

Kining akong gugma dong, usa ka lubog nga sapa.
Kini di tataw, di dayag ug adunay balabag.
Tuod, naa ko’y gisagol sa tubig aron kini mahanap.

Ug kon ikaw dali lang mahimuut sa imong makita,
palihug, sabta. Palihug, ayaw pod pugsa.

Ug kon di ka kasabot, palihug og sakripisyo
ug pakigbisog sa di nimo makita.

Ug kon di ka, palihug ayaw na lang ispilinga
kon ngano man gud lubog ang tubig sa sapa,
kay basin madagma pa ka sa lapuk ug mahugaw
ang imong lapa-lapa, tiil, batiis ug paa.

Hala, lakaw na lang diha ug ayaw na pakita.

BIR

ang bir dong di sama sa babaye
nga imong iyarok ug dayon
imong isuka kon di na nimo kaya
di lang molami tungod anang
chicharon nga gikan sa Carcar
ug bisag apilan pa nimo
og barbikyo nga gikan sa larsian

di lang ni pagaan sa imong mga suliran
di ni makapahinay sa imong kaunoran
di makapadasig aron ikaw matabian
di makapatay sa imong atay
di makahubog hangtud sa kahangturan

kay ang babaye di paliton
kini gigama aron higugmaon

ang kasugiran kon ikaw mahigugma sa sigbin sa amoa

Sumala sa estorya, ang sigbin makadala
og bahandi sa katawhan sa amoa.
Apan dili sa kinabuhi ni Inday.
Kay mao ni ang sinugdanan kon nganong naay
mga abat ug impakto dinhi sa punoan sa Talisay.

Kay sumala ni lola, mag-amping ka
anang mga nawong nga sama sa yawa.
Labihan na kon kini naay dako nga pangil,
kay kini wa nag-apas sa imong paghuwas
apan sa imong bulahan nga lawas.

Kini siya way giila basta babaye na.
Siya mosupsop og dugo samtang ibuhagay niya
ang iyang makalipong nga baho.
Iyang ikog, modunggab sa imong pusod,
hangtod kini moluba sa imong unod.

Kuoton niya ang imong kasinkasing.
Dayon, gision aron himoong anting-anting.
Ayaw kalimti nga alang niya lami ang bata.
Iyang mga biktima kanang tam-is og kalag.
Unta luwason ka aning kasugiran una ni molayag.

Tipdas sa Kaminyoon

Sumala sa nukanuka
sa imong panit, tipdas na.
Apan walay kamatayon
ang imong mga agwanta.

Giunsa man ka sa imong bana?
Usa ka sayop,
napulo ka libo nga kulata.

Sama sa lipat sa mata,
arang-arang na
ang imong ginhawa.
(Alang sa kasaulogan sa Women's Month)

Apan ayaw gyod tunla
ang imong mga tikuka.
Isuka na sa iyang baba.

Sulti gyod og sakto na.

Inday, gihilantan na ang papel
nga inila daw sa inyong gugma ug pirma.
Ug ang mga pulong niini dugay
na nga gisumbag, gidabok ug gipukpok.

Ayaw huwata nga modaghan
pa ang mga hubag sa imong lawas
Patilawa na og mga yan-angan
ang imong kanahan nga kapikas.

Ug usa niining mga adlawa,
ayaw gyod dawata nga wala
kay bakuna batok sa imong bana.

Cindy Velasquez