ang pagkapandol

nadungog ko ang
mga tingog sa lagapak
sa mga tiil
sa daghan kaayong
mga kabayo

gihimo nila ang dalan
paingon sa mga kabukiran
nga
wala pa nato
masabti

ang atong nadungog
tabon lamang
sa usa ka dakong bato
nga diin
kitang tanan
inig-abot sa saktong
panahon

mangapandol

mapapas

daghang nagpakita
sa matag adlaw
nga wala mo sukad
makita

walay mga
ngabil ang uban
ang wa nako
masabti nganong
ang uban
mora na lamang ug
aso
nga mikuyog sa
hangin
nangapapas
lamang

ako nga nagtindog
sa silong sa itom nga
panganod
sa tunga sa dagkong
mga balod
miingon sa akong
kaugalingon

"wala ug dili na gayod
ako
mahadlok"

sa maong kasayoran
ako usab
mapapas

tigmo sa atong kinabuhi

ang batan-on mibasa
sa makadaghan sa sinulat sa
usa ka tigulang

ubay-ubay uyamot ang mga
nasulat
ug busa ang utok sa maong
batan-on
mikapakapa daw usa ka
isda nga mao pay
pagtuon ug
langoy

sa dihang namatay na ang
maong tigulang
midaghan ang basahonon
sama sa kabaga
sa mga lubnganan
ug sa mga
balas tupad sa nagpakahilom
nga bungtod
nga naglaray niining
kalibotan

mao lang gihapon
mao lang gihapon ang buhaton
sa mga bag-ong
natawo

ang mga nangamatay
wala na magpakabana sa
kawalay-pulos sa
maong
binuhatan nga walay
pagkausab
hangtod na kini sa
kahangtoran

kay sa pagkatinoon
gibuhat ang tanan aron lang
paghuman
sa mga umaabot kuyog
sa mga
mipahawa

tawo

kaniadto
layo ang imong panglantaw
nahisama sa kalayo sa
imong mga lakaw

sa dihang gikapoy ka na
gitamnan mo na ug mga bato
ang imong naagian

ang mga takna
mipahiyom
pagkaoran-oran
samtang misugod ka na usab
ug tikang
ug dayog tanom ug laing bato

ang mga takna
mibuhakhak ug pangatawa

sud sa ilang mga dughan
diin gitapion nila ang ilang mga kamot
mibati usab baya silag
kalooy kanimo

TUG-AB ni Atty. J. F. Lobedica

Kini ang timaan, timailhan sa pagkabusog.

Magdala kini ug pasidaan nga mitugkad na ang gipasulod

Nakab-ot na ang katagbawan sa kagutom nga nagbuntaog.

 Kitang tanan'g busog  magmalipayon, magmapahiyomon

Dinhi sa talad kan-anan sa mga hunahuna’ng mabulokon.

Sugaton ta ang talan-awon ning manindot nga kabuntagon.

DIYOSA SA KATULOGON ni Atty. J. F. Lobedica

matag tikyop sa kagabhion, atong makit-an

ang hulagway’ng  magpasidaan ug   katumanan,

adunay nag-aginod pa, mura’g nalimot sa paulianan

daghang singot gipatulo,  adunay  pipila usab nga naughan,

aron lamang ang mga mithi  ug tinguha  makab-otan.

sa tagsa-tagsa’ng panimpalad, adunay palaran

adunay pipila’ng  mahitumpawak sa kamot sa  kaalautan,

salamat na lang, kay matag latag sa  higdaanan,  

kon mosapigad  na ang hangin sa  mamingaw’ng kagabhion

andam kini natong sugaton ug dawaton,  pakatam-ison

 gakson ug pahiyom,  miabot na ang DIYOSA SA KATULOGON

P

Ako Ikaw

Ikaw
Akoang
Ginatan-aw
Gianinaw sud
Niining kalimutaw.
Ikaw nga hinulma sa
Akong galamhan, ikaw nga
Minugna sa akong hunahuna,
Akoa. Ako ikaw...Ikaw ako. Usa,  Kitang duha, nahiusa sud sa panan-aw,  sa hunahuna, sa atong galamhan nga tinipigan. Bisan tuod ikaw nga akong matataw sud sa akong panan-aw akong mugna, akong gama lamang...ug ang imong  Gianinaw sud sa imong panan-aw imohang buhat lamang..., ikaw Ug ako nahiusa ra gihapon sa atong tagsa-tagsa nga paghimatngon.     Akoy 2012.10.24

PANAPO ni Atty. J. F. Lobedica

 kini ang buhat nga motabon, motago, mohatag

 ug salimbong sa butang nga inampingan, 

dili gayud pahayagan, dili ipadaylang,

likayan kini nga makit-an, 

bantayanan nga dili makahungaw 

aron dili masingo ang hinungaw,

pastilan ang pagpanapo, 

magsugod kini sa kabatan-on 

apan makalimtan kon maabot na sa PAGPANGAPO!!!

Galiad

Nabinat 

akong galamhan 

Sa dayag nga kaanyag 

Sa lawas mong 

Galiad.

 Akoy 

2012.10.24

Ang Dalan Sa Kalamposan

Nahagit na ko, nadasig na ko 

Nahanaw na ang kahadlok 

Mipuli na ang kaikag 

Andam na ko

Mosagubang sa kapakyasan 

Paingon sa kadaugan. 

Matud nila

nga malampuson:

 "Kapakyasan ang agianan 

Padulong sa hingpit nga kalamposan."

Akoy

2012.10.24

blanko ka sa imong palibot

sulaton ko kining
balaka
sa walay paghunahuna
kon asa
paingon kining
mga pulong

sama ako sa
panganod
puti
gaan
dili mahikap
sa ibabaw
sa
eroplanong
akong
gisakyan

layo ang panaw
sa usa
ka kamingaw

walay utlanan

gisulayan mo
paghikap ang sidsid
sa kawanangan
basin
anaa ang
kataposang
pinutlan sa tanod
nga gitangag
sa usa ka tayaon nga
dagom

wala'y mahikap
ning dapit sa
kamingaw

lapad kaayo ang
kahaw-ang
morag hangin nga
hakupon ang
tanan niyang
adtoan

gisusi ang tanang
mga utlanan
ang tanang mga lutsanan
gisubay
sa wala'y pagkakapoy

bisan asa milapos
ang pangagho
mora bag ikaw anaa
sa tumoy sa habog kaayong
pangpang
ug
unya
misinggit ka
unya gisuyop sa
mga panganod ug
kapudpud-an
ang imong tingog
nga nahilis
diha sa kawad-on
ug kalad-ang

unya ang imong
kataposang nakita
mao lamang
ang kahayag
sa likod sa usa
ka kahayag

unya dayon
nablanko ka
sa imong palibot

mas tunog

giabtan mo ang
usa ka
sirado nga
balay

kusog ang
ulan
nagkalanrakas
ang tingog
sa atop

basa ang imong
sinina
nasudlan ug
tubig ang
imong sapatos

gakurog kang
miabre sa pultahan
misulod
ug dali sa imong
lawak

sa usa ka lahi
kaayong
kalibotan

diha sa sud
sa imong dughan
madungog mo
ang tingog
sa tinahian
sa dagom

gisunod mo ang
panaw sa usa
ka tanod
diha sa kaugatan
sa imong
kasingkasing

mas kusog dinhi
ang tingog
sa tulo sa usa
lamang ka
luha

balak sa usa ka jerjer nga legal

tungod kay
obligasyon man lagi
pwes
antoson

mapugos ka
pagpagawas
bisan
dili moawas

sa usa ka yahong nga sabaw sa pagbati

mabati mo ang
kamabaw usahay
sa imong
gitindogan

magmala ang
imong
baba

bisan unsaon
mo ug
pabula
dili mabasa
sa imong
laway ang
imong baba

gusto natong
matugkad ang
kalalom
apan dili kini
masayonsayon

sulayi ug
ambak
ang lalom nga
lawod
sa kinabuhi

mabatian mo
ang
pagkalumos
sa imong
hunahuna diha
ra usab
sa galawod
nga hunahuna

usahay
bisan ug wala
kaayo
ang kalipay

mas maayo na lang
baya usab
nga magtampisaw
kita sa kamabaw

walay sakit
sa kisaw
kining sayon
ra kaayo
nga sayaw

wala pa baya usa
sukad
nahitabo nga dunay
tawong
nalumos
sa usa ka yahong
nga sabaw

ang asong dili makumkom

ang aso
dili makumkom

dili sab
mapriso sa
balay
bisan unsaon
nimog
panirado

kon sirad-an mo
ang bintana
ug pultahan
sa dapugan
di magdikidiki
ug
dagan ang aso
paingon
sa imong
gikatulgan

ug dinha
tuk-on ka
niya
diha sa imong
tutunlan

ang kiat

ang kaigat
kon sirad-an
ang pultahan
mokatkat

dayog
lupad
bisan
asa ipadpad
aron
lang
makabilangkad

kadtong
nagpasikat
lupigon
gayod
sa kiat

Katkat

KATKAT

Buhat nga mopataas

Magpasabot ug kakutas

Imong kusog maugtas

Kanunay’ng maghingotas

Ang mga mata manglurat

Kitang tanan, makakatkat.

Kon babaye ang mokatkat,

Bantayanan kay makabughat

Kon  bag-ong panganak, maahat

Adunay mga mahiligon

Ang katkat sayon-sayonon,

Mukatkat gayud, bisa’g gutom

Bahala’g  ang nawong lusparon

Agtang kunoton, buhok ubanon,

Dili mabangbang, kay buluhaton

Matapigas man  ug mahagbong,

Pakatam-ison, bisa’g may kahabogon

Kini katkaton, KAPAYAS  nga may gidak-on!!!  

Atty. JAMES F. LOBEDICA

Capitol, Cebu City

ako, supak

mikiay ang imong kilay
sa dihang nahulog ang
mga dahon

sa hulaw ning atong
kinabuhi
sigig sayaw ang
mga abog
diha sa atong tiilan

sila lang ang malipayon
sa kilay mong kiat
sila lang ang nangagho
sa mga dahong
nangahulog

ako, wala, dili,
supak.

bisan kanus-a

kon imnon mo ako
palihog lang ug bilin
sa baso

kon kan-on mo ako
ayaw lang kulba ang
plato

kon anaa lang ang baso
dili mo ako
mahurot pagyarok

ug kon anaa lang gihapon
ang plato
nga nagtihaya kanimo

segurado akong
dili ko usab ikaw mahurot
bisan kanus-a

ang wala sugod matinood

kagabii
gidamgohan nako ang
mga anay
nga mikatap sa
akong
balay

ang akong
lawas
nahimong abog

ang mga anay
nahimong mga
langgam

ang akong damgo
nahimong mga
bukid

nakamata ko
sa kaadlawon

giuhaw ako
sa imong mga singot

nga nagtubod
sa imong dughan

sa imong
ngabil

sa imong liog
sa imong mga paa

gihigop ko
ang tanang kong
kahigwaos
kanimo

ikaw ang
akong damgo
nga wala
sugod
matinood

ako, ang akong anino ug ang bulan

sa kanunay mong panamilit
naandan ko na ang kamingaw

usahay gusto nakong
mawa ka na lang kanako

ako, kining akong anino, ug
ang bulan, malipayon na

sa among tagay sa among
kalipay

sa imong pagbiya pagkahuman sa usa ka halok

bugnaw ang akong mga kamot
sa imong pagbiya

akong gidapion sa akong dughan
aron mabati pa gihapon ang kainit

sa gadilaab kong dughan
nga imong gihagkan

Tinghulog Og Dahon Pa Ba Karon?

Oktubre pa ron

Ngitngit na ang langit

Basa sa ulan ang dalan

Ug tugnaw na ang kilomkilom.

Apan nagkatag sa agianan ang mga dahon

Gapadayag sila nga tinghulog pa ron

Tinghulog og dahon pa ba gyod karon?

Akoy

2012.10.16

Kiay Sa Kilay

Giibtan  imong kilay

Gibadlis sa imong dagway

Anghel sa kaanyag ka man unta 

Inosenteng birhen sa  kabatan-on

Ngano man, kay uso ang sulondon?

Akoy

2012.10.16

Abog

Diin gikan ang mga abog

Nganong sa kwarto nakasulod

Gasamok-samok pa gyod!

Akoy

2012.10.16

balak alang sa Adlaw

bisan sa
kabudlay sa
akong mga
pako

hapiton ko
gihapon
ang silong
ning kahoy

bisan wala
pa gani
miabot ang
adlaw

ako na kining
ampoan
awitan

pagkahuman
inig banagbanag
molupad na
usab ako

wa kong kabalo
kon asa
ang akong paingnan
apan
wa na ako'y
gikahadlokan

ang mga anay

miabot na usab ang
mga kugihan
sa hilom

tumpagon na
nila ang
imong
gipanghambog
nga dili
madutlan

DUDA

bisag wala
makita sa mata
himoan
sa hunahuna

ang nindot
nga hardin
gisabwagan
ug
mga binhi
unya nanubo
ang mga
tunok

dayog
singka sa baba
nga haskang
isuga

Ang Kagahapon 

Gimingaw sa kanhiay nga pinuy-anan 

Usa ka handurawan na lamang ang nakaplagan 

Kay tinuod man, ang kagahapon wala nay  ulianan.

Akoy

2012.10.14

ang sugilanon sa atong kaminyoon

ang akong mga bintana
ning balay nga dako ug habog
nabutaan sa
kaguol

kadtong bangko nga
gilingkoran sa
kinaulahiang miiyak
mibakho

natakdan ang mga
banga
napuno ug luha

giilad kita sa mga
hunghong sa katuigan
nga nagpaila
sa ilang mga ngalan
nga malipayon

ang mga mugna sa
mga hadla
puros man lang diay
tayhop sa
hangin

unsa ba diay ang ikaupat?

secret

dili ko gayod
kana
ipanugilon
dinhi

unsaon ba
paglitok
ang
kahilom?

unsaon mo ba pagsulod ang elepante sa refrigerator??

una,
dakpa usa ang
elepante

pilia kadtong
taas ug
ilong

ikaduha
isulod ang
elepante
sa imong
palad

dayon
imo kining
kumkumon

ikatulo
ablihan mo
ang refrigerator

pag-abot sa
ikalima
ayaw silag
ambata

ayaw ug
lingi nako

masulod mo
na dayon
ang maong
elepanteng
taas kaayog
ilong
sud
sa refrigerator

diha sa imperyo sa kahilom

gitipigan ko ang 

dili mo gusto

kadtong mga puti

nga buwak sa kilid sa bintana

gipatara ko sa adlaw

sa tubig gihidlaw

sa yanong panginabuhi

wa ta kinahanglana ang pari

kon magbungol ta

walay miul-ol kanako

mapugos kita pagtingog

kay wala na kitay laing pang buhaton

kon magkasinabot pag-usab

mag-inom ta sa usa ka tasa

nga sikwati diin gipangita

mo na ang kapait kaysa 

naandang katam-is

ako nangandoy gihapon

sa mga hulmigas nga

naa sa imperyo sa kahilom 

Tubag sa imong pangutana: Unsaon pag-pitch og tent?

Una, pangita og dapit diin kini luwas. Tuod, sama pod ni sa pagpangita nako kanimo. Kon anaa ka, di ko mahadlok bisan pa naa ko sa kinatumyan sa bungtod o bisan unsa pa kataas ang pangpang.

Ikaduha, kuhaa ang tent ug ang tanang parte niini. Bunggaka kini aron mas makita nimo ang iyang gidak-on. Ibanabana ang puwesto, hinaya pagkupot ang rain-fly, poles ug pegs. Tuod, dili ko magduha-duha og pagkuha sa tanang sulod niining akong kasingkasing, apan dili kini nako kuptan pag-ayo, dili pod nako pugson sa paghatag dayon kanimo. 

Ikatulo, ibutang ang trapal, mas maayo mas daku ni kaysa sa imong tent. Ipiko pasulod ang trapal kay aron kon mag-uwan, di kasulod ang tubig. Tuod sa gugma, moabot gyod ang higayon nga mangita ka og paagi nga panalipdan nimo ang imong pagbati. 

Kataposan, sugdan na ang pag-porma sa tent. Kon lisod, mangita og tabang. Kon naglibog, pwede mangutana. Kon nasayop, mohunong ka, ug pag-sukod og balik. Kon unsay kinataposan nimong gibuhat, mao po’y kinaunhan nimong buhaton. Mao karon, pangita og dapit diin kini luwas.

balak alang kang J.

ang wala mabalibag

mao ang akong kasilag

mao kini ang akong gisuot

ang iyang baho mao ang

singot sa atong kagabhion

mao kini ang akong gipanulti

nga sukwahi sa mga dahon sa libro

ang mga bato nahilos sa ilang

gitindugan sa yuta

nangapalid ang balas 

dia ang tulay

nagpabilin sa duha ka tampi

mao kini ang atong mga abog

natawo sa atong kaibog

pagkaanindot sa atong pagbiya

walay dahong nalaya 

kitang duha kaniadto

hagbay ko ra ikaw
nga nakita sa akong
kasingkasing

apan pagkabut-an
natong duha
wala kita'y gisupakan
nga mga balaod
nila

nagmatinud-anon
kita diha sa
usa ka pagpugong

kutob lang kita sa
paghandom
sa mga umaabot
diha sa kilid sa
bintana

nanambo kita sa
kaugmaon
gihambin ta ang
hapdos nga
bunal sa kagahapon

ang karon nga atong
gihawiran
usa ka baso nga
ang sulod
mao lamang ang
hangin

anino

wa ko pa
matugkad ang
tanan

apan andam
na ako
sa imong pag-abot

gipapas sa kapalaran

ang sapa walay
gisugid
sa iyang nakita
natong duha
didto

dugay na
kadto ug ang
mga handumanan
sama sa mga
larawan nga
gisab-it ko
sa bongbong
unya
gianay

gibalikan ko kini
apan ang sapa
wala na

milubad ang
mga katuigan
bisan gani ikaw
gipapas
man sa
kapalaran

pagpangita sa preskong hangin

gusto mong
mohanggab
ug presko nga
hangin busa
milakaw ka
paingon sa
lapad nga
basakan nga
gialirongan sa
mga bungtod
nga puno ug
mga kahoy

mibuswak na
diay usab ang
mga kahumayan

naa pay yamog
ang mga
espadang
dahon

basa pa ang
kasagbotan
ug ang mga
gagmayng bato
sa dalan
nagsinaw

bugnaw ang
panahon
unya hinay hinay
nga misaka
ang adlaw sa
dughan sa mga
kabukiran

nagtindog ang
nanaop sa basakan
sa kilid
sa agianan
nagkalo ug buli
nagsuot og
sweater
nanigarilyo
nagpaaso sa
kabuntagon

sa unahan adunay
nagdaub sa ilalom
sa kamanggahan
 giabog ang mga
daotang insekto
nga makahulog
sa mga gagmayng
buwak sa mangga

gibitbit sa hangin
paingon sa imong
ilong ang aso sa
sigarilyo

gituok ka sa baho
sa aso 
sa gomang gisugnod
sa kalayo
aron mabugaw ang
mga insekto
sa ilalom
sa kamanggahan

wala na ang presko
nga hangin
nagsakit ang imong
hunahuna

ngotngot hunahunaon
nganong
gibugaw ang
preskong hangin
palayo kanimo

mao kini ang nilugdangan
sa pagkawalay pakisayod
kon unsa ang
makaguba sa kinaiyahan
kon giunsa pagpasakit
ang kalibotan
diha sa sayong
kabuntagon
 

gubat sa bag-ong kabuntagon

sayo pa lang sa buntag natagbuan nako ang usa ka babayeng tabonon, batan-on pa, taas ang buhok nga medyo kulong,
nagtagbo mi
ang labyog sa iyang lawas morag duyanan sa bata
hugot kaayo sa iyang bilahan ang iyang mubo kaayong maong nga "short"
puok
nangliki ang atubangan
nangandiis ang likod
taas ang iyang mga tiil
kita ang pusod mga morag pasas sa mamon
lalom ang iyang mga mata
maanyag
medyo kiat kon molantaw kanimo
kiay
ugdo ang nipis nga blouse
namintana ang atngal
gustong mamusil
morag nangayam ug manatad sa lasang
pula ang ngabil
morag rosa
morag gustong motam-os kanimo

igwad
ang sampot
tag-as ang mga tudlo
morag kuyamoy sa
kasag
morag butong ang
iyang dughan
giuhaw ka ug
gusto nimong
moinom ug
sabaw

kadyot lang kadto

mora bag miingon siya
nimo nga
ania na ang gubat sa
kabuntagon
ug ang iyang mga
hinagiban andam
na

ikaw ang di pa
andam
gadali ka ug pauli
sa inyong balay

natagboan nimo ang
imong asawa

unya misulod ka
sa imong
kwarto
morag bomba
nga
nangitag
buthanan

bulingon nga mga kamot

wala ako mag-ambat
kon madungog ninyo
ang akong
mga gipangyamyam
sa akong
kaugalingon samtang
ako nag-inosara
dinhi sa
baybayon

wala ako magbagolbol
kon wala kini ninyo
mahatagi ug panahon
wala kanako ang
mga pagbagotbot

kining akong panaw
panaw kini sa usa lamang
ka pulong
 sa baybayon
nga ang mamakpak
mao lamang ang mga
bulingon nga
mga kamot diha sa
balas ning
akong baybayon

ang akong gugma

hatagan ko ang
tanan
ug panahon

ihatag ko ang
tanan
kanako

walay magmahay
hatagan ko ang
tanan

pagtagad
mga pulong
isip mga
angayang
buhaton

aron walay
magmahay
isabwag ko
ang tanang
ania kanako
alang kini
kaninyong
tanan nga
ania dinhi
sa akong kiliran

apil na ang
mga halayo
kanako
ihatag ko ang
tanan kong
kahayag

usa lang ang
dili nako
mahatag
kaninyo

gisaad ko na
kini sa akong
kaugalingon

Kalendaryo

Kanunay kong magtuo nga usa ka kaaksidente. Sama sa mga bag-ong dapit nga akong makaplagan tungod kay di ko mosalig og direksyon, o basin sama ka sa di magkapares nga tsinelas nga akong gisul-ob karon tungod kay kanunay ko magdali. Ikaw pod ang sayop nga tambal nga akong giinom kagahapon, maong naglabad ang akong ulo, nibikog ang akong tiyan, naglumbaanay og pitik ang akong kasingkasing ug adunay kabag-ohan sa akong pagginhawa. 

Usahay, sa dihang aksidente nakong matan-aw ang akong kaugalingon sa samin, naa ka. 

Hangtud karon, nagtuo gihapon ko nga usa ka kaaksidente. Sama sa pagkadiskobre sa penicillin o basin mao ni ang nabati ni Magellan sa dihang nakita niya ang mga isla duol sa Pasipiko. Kahinumdom ko, nasuwat nako ang imong ngalan sa akong notbok nga adunay daghang mga kalendaryo, mga petsa nga kinahanglan nako di makalimtan. Gisuwat nako didto ang imong ngalan, apan una na nahitabo. Nagbutang ko og mga tuldok nga walay hinungdan. Ug kon imong ning subayon, imo diay tong ngalan. Gisuwat nako imong ngalan uban sa mga kalendaryo, aron unta sa tunga-tunga aning mga petsa, aksidente kang magpakita.

ang dakong lingla sa kinabuhi

pagkadaghan sa angayan
pa untang sulaton

giingnan ta ka
nga kon imo kining mabasa
gihangyo ko ikaw
nga ayaw na lang tugkara

kay ang kalalom niini
nakalomos sa mga dili pa andam

ug wala na gayod sila igkita
gipapas sa kawanangan sa gilawmon
sa akong
kasakit

ang wala nako maingon kanila
mao ang mga ginagmayng kalipay
nga akong
gitanom sa akong kasingkasing

wala nako kini gisulat
kay sayod ako
nga walay bisag usa nga makasabot
niini


ang kalipay usahay
usa man god usab ka dakong lingla
sa kinabuhi

pagkaparot paghikalimot pagkamatay

di na nako igsapayan
ang akong mga kahago
ang akong mga pagbago
dinhing dapita
dili na nila makita bisan
kanus-a pa

nagsulat ako ug mga sugilanon
aron ugma puhon
mabasa ug unya diha sa
pamasin
nga ang akong ngalan
dili mapapas
ug ang akong kinabuhi
mahinumduman sa
mga nangabilin

apan tagsa-tagsa kanila
aduna usa'y ilang mga panaw
nga mas layo pa
kaysa akong
kagahapon

busa mibalik ako sa
nanglabay
mga dahon nga gipalid sa
hangin
nga nangahulog
nga bulak
 ug unya
ang mga sanga
naghambin sa tumang
kamingaw
nangabali usab
sama sa mga
pangandoy
nato

nagabok ang lawas
nahagba
mibalik na usab sa iyang
pagkaabog


unya ang imong madungog
pagbalik  mao na lamang
ang haganas sa sapa sa daplin
sa atong dalan
ang hoyohoy sa hangin
ang mga taghoy sa
mga labong nga mga dahon
sa lapad nga
kakugnan

ang akong tinanom nga kahoy nga daghan kaayog bunga

ang dakong kasubo
sa kahoy nga akong gitanom
nga naghitik sa
iyang mga bunga mao
nga wala gayoy
bisag usa na lang ka
bata ang mikatkat
aron
pagkuha sa mga
hinog niini

anaa nangahulog
nangalata
gikulinitan sa daghang
mga langaw

kitang mga tawhanon

ang mga bongbong
kada sulti nato
naminaw kanato

apan lahi sila
dili sama nato
nga kamaong
mobati

pagkahilomon
baya upod kining
mga bongbonga
morag mga
tugas nga
tig-a

naghisgot tag
kapait
nakaiyak kita
sa kahapdos
kining mga
balatian nga
tawhanon

lalom nga
kahiubos
gisapsap sa
mga kapakyasan
kining atong
mga dughan

usahay
mahikatulog kitang
gabasa sa luha
ang atong
mga alugnan
asgad na kaayo
ang mga habol
ug gitay-an na
man gani
pagsugod ang
mga bukton
sa atong
mga puthaw
nga higdaanan


sa dihang
nahilom na ang
tanan

way puangod
nga ang mga bongbong
nag-agik-ik ug
katawa
sa tanang natong
mga gihisgotan

way kalooy
siging panaway
natong
mga tawhanon

walay giabtan

ako natingala nganong
naghisgot kag
sakit

nakatawa ko kay
ang sakit
mao diay ang
imong dughan

unsa bay sulod diha
sa imong
dughan?

kining ako
haw-ang

dili sakit
wala kini maghatag
kanako
ug sakit

gianad ko kini
nga mabuhi
nga mahupong sa
kawanangan

kay diha sa kawanangan
anaa ang kahaw-ang
ug mao kana
ang tinood nga
tinubdan sa tanang
kalibotan

karon
sayod ka na
nganong
dako kaayo ang
akong kalibotan

ug ang kasakit
morag hangin
nga naglapos-lapos
lamang
sa akong
kanunayng abri
nga mga bintana

apil na niana ang
mga kalipay

mga bitoon sa
kagabhion

ang adlaw nga
misalop

ug ang
mga balod sa 
kadagatan nga
siging
panaw
apan walay
giabtan

dula sa panahon

kon moabot ka
magdula ta

dulaan ang
atong
tangag
tangag
ug dakop
dakop

kadyot lang
man god
ang panahon

pagkahamubo
ra sa
atong
panagdula

kalit lang
nato kining
putlon
kay taas pa
man god
ang atong
panaw

pagkahuman
magbulag ta
sa maayong
panahon

ako diri
ikaw didto

unsa bay
sakit ana?

gidulaan lang
kita sa
panahon
busa
ato lang pod
siyang
gidula-dulaan

mao kana
ang akong tawag
sa kalipay



 

alang sa usa ka gamhanang mayor sa lungsod sa Corapcion

DILI dakong sala ang
pagpakaon sa
mga gigutom ug
pagpainon sa mga
giuhaw

Ang imong sala
mao nga
ang kwarta nga
imong gigamit
sa pagpalit sa mga
pagkaon
dili gikan sa imong
bulsa

gikan kini sa balaanong
kaban
sa kagamhanan

unya ang imong
gipainom ug
gipakaon
mao lamang ang
mga nagrehistro
aron makabotar
sa sunod
nga eleksyon