mantika sa tubig

tan-awa ang mantika nga misagol sa tubig
tan-awa pag-yo

ang mantika nga naa sa ibabaw sa tubig
kinsa ba ang mas kusgan
kanilang duha?

mao kana
ang akong pangutana

ang mantika miingon
giduot niya ang tubig

ang tubig miingon
giisa niya ang mantika

ang mantika miingon
ako ang gamhanan
kay ako ang naa sa kinatas-an

ang tubig miingon
ako gayod ang gamhanan
kay ako ang kusgan
nga nagpailalom alang sa minantikaan

ang mga tigulang

ang mga tigulang
kon magkagrupo na gani
naarag hisgot anang ilang mga sakit
og ilang mga tambal
naarag kwenta sa ilang galastohan
matag adlaw
naarag hisgot anang ilang mga anak
nga wala na diha
sa tumang kamingaw

pagkalooy gayod sa mga tigulang, og ako
nga nagsulat kabahin sa mga tigulang
nga nagkagrupo og naghisgot sa ilang mga sakit
og mga tambal og sa ilang mga anak sa tumang kamingaw

ania, gibatig kahadlok sa pag-abot na unya sa panahon sa akong pagkatigulang,
seguro, usahay, makapanghinuklog ko

mas maayo pa kaha'g dili na lang
ako matigulang.

walay lingaw

si tatay kaniadto kon magsugod na gani
ko og basa
sa akong mga libro

komiks, o bisan unsa na lang
sama sa mga
daan nga pamantalaan
nga gigamit na gani
sa pagputos
sa bulad
og asin

di lang matandog ang iyang kalag
apan
masuko gayod kadto siya kay ang tan-aw god
niya anang pagbasa
tinapolan
dili sama sa pagdaro sa basakan og
pagpamunglay sa kamaisan
nga panington gayod
ang akong agtang

para kaniya
mao kana ang pagkakugihan

busa aron paglikay sa among panagbingkil
didto ko magbasa sa among
atop nga nipa sa ibabaw
sa among balay nga karaan
tupad sa mga sanga sa
caimito

lahi usab siya
kay wala man god
nakaeskwela
og tarong tungod sa kasamok
sa gubat og kagubot

kon makit-an sab ko niyang magtanga
usahay
masuko gayod siya
kay kuno wala ako'y trabaho

kay ang iyang gusto kanako
mao man gayod
nga moagas ang mga singot
sa akong mga kamot
og dagkong bukton

wala lang siya masayod
nga ang pagbasa
kon sutaon labaw pa's
pagdaro

nga ang akong pagkatanga
labaw pas
pagpaagas sa mga singot
didto's huerto

wala siya masayod
nga ang pagkatanga
mao ang pagsugod
sa akong pagpamalak
maoy pagkatawo
sa akong mga hunahuna
nga ang akong pagbasa
sa kanunay mao'y
akong pagsugod og tukod
nianang akong
sakayan
lawig paingon
sa akong kagawasan

abi nakog nahuman na

abi nakog nahuman na
ang tanan
nianing gitago
nga bisan sa pulong
dili jud masulti

abi nakog napapas
na sa milabay nga
katuigan
ang lama sa akong
kasakit

nahisama ako sa
bato nga nawad-an
og baba
ako
gusto untang manulti
sa sugilanon sa
akong kasingkasing
nga samdan

sa nahitabong pagpakahilom
sa gugma
apan wala naman ang kaisog
nga kaniadto
anaa sa akong mga ngabil

napiangan man god ko
sa usa ka pagkapandol
kaniadto

dugay na og abi nako og nahuman
na ang tanan
naalim
abi nako og dili na motingog ang
ulat
ania misyagit gustong moambak
sa akong panit
nagbirigbirig
gustong manguhit sa dihang
nadunggan niyang

nahibalik na ikaw sa atong
balangay

usa ka hitabo sa bata

ang bata
kalit nga midagan
og dayon nadagma
mitan-aw siya
kon dunay nakakita
iyang hunahuna
wala
mibangon
namonbon
miaginod sa kasakit
apan wala
moiyak

gatakiang
mipahulay kadyot
dayon og dagan
og balik

nangita og
nanay
wala man
siya'y tatay

lakang

ang kawad-on

dili angay nga ikaulaw
apan dili usab angay
nga ikapanghambog

dili sab mahimong rason
sa imong pagkakaron
dili nato maingon sa tanan
nga kita hangtod sa kahangtoran

kulob-hayang ang tanan
moabot ra ang kausaban
tuod ilang panahon karon
basin ugma imo na puhon

ang mga gamhanan dinhi

kuyaw nga pagka-dwende
nahimong presidente
kurat nga pagka-buaya
nahimong senadora
ang halas nga tapulan
nahimo na nga kongresman

ang ilang mga pari
siging nagtaritari
ang ilang mga maestro
walay kahibalo

dinhi sa among lugar
ako ang pagarpar

matematika

naulipon ka na usab sa
numero

naghandom kanunay
nianang numero
otso

otso otso
pasaka paasenso

dili ang nwebe
labi na ang ilad sa siete
nga puros paubos
og walay bili

gustong kab-oton
ang hingpit
nga dies
apan ang kaya
mao lang ang tres

nailad ka na usab
nianang uno
nangita kag dos
og sa kapungot

mikuha ka sa
dos por dos
gipadak-an
sa kwatro
por kwatro

gilaparo ka sa
lubot sa kwarentay singko
ayay pagkasakit

karon nangita kas
trenta'y otso
aron madiretso

ayay
kahadlok ba niining
kasamok
sa mga numero

sa swerte, dimalas
kahadlok, pagdumot
sa paubos og pataas
sa kamabudhion
og sa kamatayon

politika 2010

hapit na nga malunod ang barko
nga imong gisakyan
og ikaw nga gusto pang mabuhi
miambak gayod dayon
sa tunga sa dagat
nga baloron

milangoy
palayo kay nahadlok sa lilo
mibalhin sa laing barko
nga imong gihunahunang mosalbar
kanimo

pagsaka mo
sus mao lang gihapon
laing na usab
nga barkong tayaon
og busloton

6:56

nagyawyaw ang radyo nga morag dako kaayong
baba sa tigpasibya
giatake na usab ang usa ka politiko
nga nangurakot kuno sa atong gobyerno

pila na pod kaha ang gibayad sa iya no?
sa pikas nga partido?