El Niño

malisod buhion kadtong patay na
bubuan mo man ug ginalong tubig
halayo na kini sa imong pangandoy
nga mamulak ug mamunga

mikaging, nangalaya ug nangalarag
ang mga dahon niini ug sanga

hustisya ba nga imo nalang gikalimtan?

ania pa ako ilalum sa silong sa punuan
sa kanhi ta gugma, saad ug mga damgo

kinahanglan bang agian ug bagyo
haron matilawan ang katam-is sa tinulo
sa ulan ug hapuhap sa hangin?

Igo na dong Niño.

Bisita sa Baybayon

wala ako'y balak nga han-ay
sa akong pagkapadpad karon
dinhi ning imong baybayon

wala ko dalha kadtong akong binulig
nga mga garay sa pulong

dili ko buot magpasundayag
buot kong magpauraray ug iduyan
sa hampas sa balod sa imong aping
nga timgas ug maabi abihon

bisita una ko karon
dili ang kanhi imong bisitahon

ang gasadyang buwan

hagip-ot nga dalan,

daw dili maagian sa kangiob

danglog sa siyam na kaadlaw

nga pagbunok sa ulan

dili malilong ang pagsadya

sa lingin nga buwan

Sugilanon

Ang gugma
paulion,
alimahan,
patambukon,
dili lang
sa sugilanon.

pagbati

nganong palabman kanang pagbati?

gusto ko kanang
mabaw,
mahikap,
mahinol,
kay dili ka mahagbong,
dili ka matislaob
kay taphaw.

amag ang mga tinaguan apan dili ang gugma

anaa ang kaanyag sa gitago
ang puti nga ilok, ang hawak sa liog
hamis ug makahubog bisan wala'y bahalinang
gilad-ok, gibahog, karon gisid-ok
kay nakita ang amag nimong gitago

apan ang gugma nga tinaguan
lagmit kanang mabaho
mag-alintabo maong mangita ug lusot
dili gusto ang mabuot
mulagom, mamatay, ug mahimong maghikog

ang akong gugma

baog ang akong gugma
nag-inusara, dili manganak
dili makapangala
gaagwanta sa pagtagik
ning pulong sa huna huna

ang imong luna

nindot kining imong luna
maayong magpalandong ug panagsa
labi na sa init nga kaudtuhon
maghumol sa tunaan
magsalum-salom
maminaw sa tinagaktak
sa letra sa imong mga pulong

katulugon

malisod kining ana ka sa katulugon
daw matagak ang imong hunahuna
mawala ang imong gugma sa pagkaon
mag-alidasay ka ug wala kay tagdon
bisan pa ang garay sa mga pulong

ebulosyon

ang jolen sa una
karon bola na sa basket ball
dili na nimo mahakop
sa usa ka kamot
ug may gibug-aton na

nganong ingon ani ang kinabuhi
nganong ang kanhi mga butang nga
kanhi imong gustong buhaton
dili ug dili na nimo mahimo

panagsingki

wala musupak ang langit
sa panagsingki sa dalugdog ug kilat

wala kini manginlabot
sa dihang mitubod
ang luha sa panganod

ug misingit ang dalugdog
sa iyang tumang kalagot

dungan sa pagtigbas sa kilat
sa malang yuta

bulahan ang langit
kay dili kini mabasa

bulahan ang langit
kay kanunay kining makakita

ug bulahan ang langit
kay nahigugma niya ang yuta

hilak

unang higayon ko ikaw
nga nakitang mihilak
midangoyngoy sa akong atubangan
mitawag ka sa imong inahan
ug dayon tabon sa imong nawong
duko sa imong ulo nahadlok kang
makita ko ikaw sa imong pagka-ikaw

apan ingnon ko ikaw
nga gihigugma ko ikaw
bisan sa imong kahuyang
kay nasayod akong diha ikaw
nahimong mas lig-on
mas nagmatinud-anon

langgam nga itum ug puti

igo na ang pagtubag sa langgam
ayaw na baliha ang katawa niya
nga anaa sa sangga nagsayaw sayaw
miabli misira sa iyang ikog nga itom ug puti
agi lang kana siya sa iyang kalaay karong adlawa

bagyo

lisod ang bagyo ug maoy muagi
kinahanglan pang ibanting ang mga haligi
sa kagamay sa among payag
lagmit kining mapalid
sa hagighik sa hangin
ug katawa sa unos
gitabunan ko ang akong dalunggan

kusog nga hangin

ug ning sayong kabuntagon
gipukaw ang akong katulugon
sa kakusog sa hampak sa hangin
natukas ang nipa sa among atop
maayo nalang sang magpadaplin

init nga panimalos

salbahis ang siling kulikot
sa iyang kagamay

magpadugmok kini
magpakahilom

magpalumos sa itom
nga patis ug suka

apan pagbantay
dili imo ang tanang kalipay

sa iyang pagkapulpog
iya unya ang katawa

andam siyang mupahilak
ug sa walay duha duha

pangitaon mo ang tubig
haron ibanlas ang iyang

init nga panimalos

kape puro

paet ang kape kung walay kamay
apan mas maayo tingali ang kape nga walay tam-is
dili makadiabetes ug kay walay diabetes
walay complications dili magka problema
dili mag-agwanta

maong agwantahon ang kape
nga ispiso bahalag paet ug walay kamay
basta dili makamatay

dugukon

gustong lantawon ang kaanyag
nianang kahayag nga naglibot
sa dakong punuan sa acacia

mga mananap nga buot mulukob
nangalimyong punuan sa kahoy gataghoy
gikapoy ug dupa taliwala sa pagtampusisok

sa mga gagmayng lampara nga anaa sa lubot
sa galupad lupad nga aninipot
pagka-anyag ug pagkabulahan sa punuan
gidugukan

nag-inusara

piyungana ang imong mga mata
lantawa ang anaa sa sulod
damha ang mga bagulbol
ang mga pagbasol
ug makita mo nga ikaw ug ikaw lang
ang wala makighinabi
sa imong kaugalingon
ikaw lang ang naghimo kanimong
nag-inusara kanunay

batang lalaki

kanindot sud-ungon
sa usa ka batang lalaki
nagpiyong ang mga mata
nahinanok; malinawon

wala'y gihambin
sakay nianang asul
pinising duyan
gapa-uraray; nag-inusara

gitulog ang kaugalingon
gitayhop sa huyuhoy sa hangin
ilalom ning kaudtuhon
daw makabungol ang kahilom