politika 2010

hapit na nga malunod ang barko
nga imong gisakyan
og ikaw nga gusto pang mabuhi
miambak gayod dayon
sa tunga sa dagat
nga baloron

milangoy
palayo kay nahadlok sa lilo
mibalhin sa laing barko
nga imong gihunahunang mosalbar
kanimo

pagsaka mo
sus mao lang gihapon
laing na usab
nga barkong tayaon
og busloton

6:56

nagyawyaw ang radyo nga morag dako kaayong
baba sa tigpasibya
giatake na usab ang usa ka politiko
nga nangurakot kuno sa atong gobyerno

pila na pod kaha ang gibayad sa iya no?
sa pikas nga partido?

ang nahitabo

nagbaga ang iyang mga mata
napagod ang iyang bagol-bagol
nag-aso ang iyang ilong og baba
apil na gani ang iyang dunggan
nasunog ang iyang mga buhok
ang iyang mga kilay og mga pilok
nasunog ang iyang aping

tungod kay iya man gong
gitago ang lampara nga maghatag
unta kaniyag kahayag

haiku: maninistis

dagway'ng gaya
hulagway pinintalan
nagmagul-anon

sayaw ug kiay-kiay
dikolor nga sinina
tonto'ng komiko

sayaw

mosayaw ka sa ilang sayaw
pamati sa ilang sonata
kon gusto ka nga mosaka
mosayaw ka sa ilang sayaw

ania na kita sa panahon nga kuyaw
kay kinahanglan nga usa lang ang sayaw
mosayaw ka sa ilang sayaw
aron ka makatilaw sa kalami sa ilang sabaw

Kidlap

Balay miguho
Pagkidlap sa kahayag
Sa panimuot.

Akoy
2009.4.14

Kaatbang

Way kaugmaon
Ambot sa kagahapon
Kaatbang, ka ron.

Akoy
2009.4.14

3 ka haiku: higala

dan-ag sa adlaw
takna sa kaudtuhon
kamalipayon

halog ug hagwa
mga yanong pakigdula
kamabulukon

pagsalop niya
tanan magmagul-anon
ikaw bililhon

Haiku: laray

tiil gikaway
hubong lawas naglaray
agni's mulabay

haiku: kasing kasing

matang luhaan
natungang kasing kasing
'di kapakyasan

Haiku: Dahon

lalag nga dahon

nagkumpayot sa sanga
katagakon na

lain lain man ni sila

naay usa nanglood
duha na ka semanang
walay tingogtingog

naay usa ay
nasuko
tulo na ka adlaw
nga nanira sa pwerta
dili jud paestorya

naay lain
nagsigig busdakbusdak sa
iyang mga tiil
morag misayaw og singkil

naa pa ju'y lain nga nagsigig adlip
nawad-an sa iyang pangisip
sigi pog panitsit
naghandom og pansit

lain lain man ni silang
nauwat intawon sa pulong
ni huwan nga karaang
bakakon og inilang kawatan

ang kabaw nga nasina sa iro

(kon kabalo na ka ani, ayaw na lang og basa)

nasina ang kabaw sa iro
nga igo lang mopaghot
o mohothot
og dayong kiwil-kiwil sa ikog
close man kaayo sa ilang amo
og lami sab kaayog
feeding

esep esep ang kabaw
naay mi light sa iyang ayoyok

so pagkaugma
nagpakyut ang kabaw
misayawsayaw tupad sa iyang amo
mikiwilkiwil sa iyang ikog
og dayon mipaghotpaghot
imitating the dog

kayabag baya
ning kabawa!
nasuko ang amo
mikuhag martilyo
kay bughaon ang ulo

gibunalan sa amo og dos por dos
dia nahiubos
nag-iyagak morag iring nga nalaphawan
og tubig nga binukalan

(oi mikatawa ka?
sus kamabaw bas imong happiness!)