ang kinatas-an nakong balak kaniadto sa ulitawo pa ako

"i love you"

(daghan pa kaayong mga bulatik,
ulog-ulog, pamakak, pasikat,
intriga, paubos, paghilomhilom
paghubog-hubog,
sunodsunod, padala og hershey's
nga kisses, pamisita sa
ilang balay, atang-atang sa
eskwelahan,
sakaysakay sa single nga motor
panihapon sa
Chin Lam, paliko-liko sa
mga pulong, padukoduko,
paulaw-ulaw kunuhay,

hangtod nga siya mitubag
og )

"oo, i love you too"

(yehheyyyyyyyyyyyyyyyyyyyy!.
kalami ba!
gibayaw ko's langit!)

ang kinamub-an nga balak sa usa ka magtatambag

ayaw
kaulaw.

iyak lang.

ang hilig sa pagpamalak

kon hilig mo gayod ang pagpamalak
na bisan pag mobali ang kalibotan
o matul-id og mobalikog
o mawala sa iyang agianan
diha sa kinaiyahan
na ikaw
mamalak lang gayod gihapon

nga bisan pag tahion ang imong mga ngabil
o huktan ang imong dila
o sampongan ang imong baba
kay hilig lagi
ikaw gayod mobalak lang gihapon

mobalak ka matag adlaw og gabii
mobalak ka bisan adunay linog
bagyo, hulaw, baha, bisan pag
kan-on ka sa nangaliki nga mga yuta
og bisan pag anuron ka sa kusog
kaayong baha
mobalak ka lang gayod gihapon

kon mahigugma
sa matag pitik sa kasingkasing
kon mapakyas
matag samad matag tulo sa dugo
matag ngutngot sa
hiwa sa imong panit
matag kagot sa imong ngipon
matag bali sa imong mga bukog
mobalak ka lang gayod gihapon

bisan pag patyon
pusilon, luokon, dunggabon, tikbason
lumsan, hiloan, paakon sa irong buang
og magsalimuang
pabothan og dinamita
bisan pag hiwahiwaon
bisan pag dauban
mobalak ka lang gayod gihapon

unsa ba kahay imong dakong sala
nganong gisilotan ka man ni Bathala?

ang kausaban

nagsugod ka sa pagkaulod
nagkamang ka
apan gitabangan ka sa mga langaw
nga nakatungtong sa
mga kabaw
wala ka matuhak sa mga
langgam
og busa nahimo kang
usa ka alibangbang
gitabangan ka pa sa mga
kabaw
kon unsa ang nahitabo
og unsa ang ilang gigamit
wala na ako masayod
nahimo kang usa ka halas
nga kusog ang lala
midako ka miburot og
nahimo kang dako kaayo
nga sawa
nga ang ulo labaw pa
kadak-a sa kabaw
nga ang katas-on labaw
pa sa kawayan
og unsang hitaboa nga
sa imong pagkausob
silang tanan imo mang
gipangtukob

pagkawala gayod
nimo'y puangod!

ang negosyante

gitug-an ko kanimo ang kinutuban
gisabotan nato
ang utlanan

miingon ako nga dinhi
ra ako kutob
og akong gitudlo ang
sinugdanan og ang kataposan

mikatawa ka
kay ang imoha labaw pa
mipatong ka
og imo na ang ginansya
bisan gani
og igsoon mo siya

wala ako'y gihambin nga kasuko
kay ang sabot
sabot
ang imoha maoy maimo
bisan gani
og igsoon gihapon kitang duha

sa kangitngit

sa kangitngit
ang mamahimong mga mata
mao ang atong mga kamot

ang atong imahinasyon
ang magtug-an sa doldol nga panganod
sa kainit sa pula
sama sa kalayo
sa kabugnaw sa lunhaw
sama sa mga sagbot

ang atong kasingkasing
na dayon ang magtug-an
sa tanang kamatooran

mamahimong ang atong mga
mata ato nang langkaton
og atong ilubong
diha sa lubnganan
sa iyang kaparotan

didto sa syudad

sayod ka na sa
kasaba sa
dakong syudad,
unsaon ka ba
niya pagdungog sa
iyang dunggan
nga sinampongan?

apan ikaw
namugos gayod
pagsulod diha
sa iyang
pultahan nga
tinarangkahan

tan-awa unsa
ba'y gibuhat niya
kanimo?

nahimo kang bato
giputlan ka sa imong
mga pako
gitangtang niya ang
imong mga kuko
gibutaan ka
og sama kaniya
gikalipay niya
nga ikaw
nahimong
usa ka bungol
og amang

nagpaabot kami
kanimo diri sa atong
kabukiran
nag-andam na ang
atong balangay
sa imong pag-abot

naghandom ang
mga dalan kanimo

nangandoy ang
mga kakahoyan
sa imong mga
taghoy

ugma damlag
makatilaw ra ang
mapasagarong syudad
sa kasakit nga iyang
gihatag kanimo

ugma damlag
mangita ra siya sa atong
mga busay
sa hangin nga
lab-as
sa yano nga
mga patag
sa kinabuhing puno
sa kapiskay

ugma damlag
tan-awa ra ang iyang
pagkatumpag

ang bulan

ang bulan

gibayaw sa langit
ang iyang lingin nga nawong

ang bulan nga nahadlok matunaw
sa kainit sa nawong sa adlaw

mipalayo kini'g midistansya
katumanan sa matuod niya'ng bulok

alang siya sa kagabhion
didto siya magmalipayon
uban sa mga bitoon

ngano ba minahal ko?

pagkaanindot mo diay nga mosayaw
sa dihang gihubo mo na ang imong mga sapot
og nakita ko na ang tanan nga anaa sa
kinaiyahan: ang sagbot, ang duha ka bungtod,
ang baga nga kagulangan, ang mga sapa
og mga suba, ang mga bulak og ang mga
prutas,

misalom ako sa kalipay
diha sa imong mga sapa
mikatkat ako sa imong mga bungtod
gipaak og gipang-os ko ang imong mga prutas
giinom ko ang imong ulan
gisuotsuot ko ang imong kagulangan
mihigda ako sa imong mga sagbot
gisimhotan ko ang imong mga bulak
misakay ako sa sulog sa imong suba

gibuhat ko ang tanan alang kanimo
apan nganong subo ka man gihapon
sama sa usa ka hapit na mapapas nga bulan?

walay kalibotan sa panghitabo

mobilangkad ang kagabhion
sa tumang kangitngit
mag-agulo ang bulan
og mangahilom ang mga bitoon
mosulod ang kaisog sa usa ka hinigugma
manghawid sa mga sanga sa kahoy
panington ang mga sagbot og hagkot
molinog ang kabukiran
og dayon ang tumang kahilom

pagkaoran-oran motaghoy ang usa ka langgam
aron itug-an kanato ang pag-abot sa kabuntagon
moabot ang adlaw suot ang iyang kahayag
walay kalibotan

Usahay

puol gamay
labad ug dyutay

sige ta'g balik balik, balak balak
padayag sa atong butbot
padugang sa pusta
haron ingnong hawod

hahay, kanus-a pa kaha ta masayod
nga nakadugang ta sa gubot
naka-ali ta sa dalan
mura sad ug mga sagbot

lalag na ug nangalarag
nagpalayo ang kalunhaw
naanod sa pangidaron
nga gihagit sa adlaw

sahay maka-ingon ko
mas lami paminawon
ang linaw nga baybayon
kanang walay balud

nganong mahigugma?

nganong mahigugma ang tawo?
nganong muhatag ug gibug-aton?

gustong magtakuban
gustong mahimong mananap
gustong kung manamilit
haron imong talikdan

gustong mahimong baybayon
haron imong yatak yatakan
ug imong higugmaon ang dagat
nga akong suod ug silingan

gustong mupalayo
gustong mahimong banog
haron magpaantaw nalang
ug dili kanimo makatimaho

laay na usahay
puol na usab ug hagwa
gusto nako ang kalinaw
nga wala'y katapusan

ang kalabotan

adunay kalabotan ang liston sa sapatos
sa kamatayon sa usa ka
botete didto sa ilalom sa dagat
bisag lahi ang ilang mga kalibotan
dili kini layo
sa panagtabo sa kataposan
sa luwag og sa kasili
diha sa kolon
mao usab kana ang mahitabo natong
duha
walay usa kanato ang adunay katungod
nga moingon
nga ako og ikaw walay kalabotan sa bisag
unsang mahitabo
sa usag usa kanato
dili ba ikaw man ang miingon nga ang pilok
sumpay kana sa
balahibo sa imong lubot?