panaw

adunay mihunghong
ugma
mao na ang kataposan

ugma mao na ang
panaw

wala ako matandog niini

gitiman-an ko ang mga adlaw
ug gabii

ang puting pungak nga nanagit
ug mga
tingog sa mga
wala makabantay
akong
gidakop
apan ako kining
gibuhian

gusto ko kining matang sa panaw

wala ka'y dalhon bisag unsa
wala bisan usa lamang ka
halandomon nga nahitabo
kaniadto

wala'y daghang lalis
bisag usa lang ka sitsit
mokuyog dayon ako

sama sa usa ka kapong
nga napul-an na
sa kalsadang dugay na niyang
gitindogan

unya galaylay na ang iyang
duha ka tiil
ug upos na usab ang
sigarilyo
sa iyang duha ka tudlo

ang mga damgo

matag gabii
adunay manuktok sa pultahan
sa panahon nga
ako duawon na sa
katulugon

miabot ang mga damgo
apan wa na  nako sila
giaghat sa sulod
sa akong
kalibotan

silang tanan puros man god
walay katumanan

paghinuktok

mas tin-aw ang tingog
sa kahilom
mas nindot ang larawan
sa kasakit
mas lig-on ang kasingkasing
sa dihang
nawagtang ang
tanan

pagkadaghan sa pilianan, pagkadaghan na sa atong mga kasaypanan,ning atong kagawasan

pagkadako sa hawan
pagkalapad sa lawod

kon lantawon nato ang
atong kaugalingon sa
atong nahimutangan

mga abog lamang kita
sa langit

mga lubog lamang kita
sa mga gianod diha sa
suba sa kinabuhi

mga lawot lamang kita
sa aslom nga suka

makaulaw kita kon
moangkon nga kita
isog ug gawasnon

kapitan sa kapalaran
kon makaasta

haring gangis sa hulaw
sa mga kakahoyan sa
kabukiran

ang atong kapilian
pagkadaghan gayod

mokurog kita sa
kahadlok

kay pagkadaghan na
baya sa atong mga
sayop.....

kagawasan

nindot baya ang gawasnon,

gisulayan ko kini sa paghan-ay

sugdan kini sa pag-isa sa mga sundang
sa too
ug mga kumo sa
wala

dayon ang dumog
ug pagsagolsagol sa mga dugo
ug mga bali
diha sa mga patag ug
kabukiran

human sa pagpinatyanay

mobalik na ang kalinaw

apan dili kini magdugay

anaa ang sunod nga hugna sa
pagpanglimbong, pagpangilad,
pagdaug-daog

mobalik na usab kita sa
unang han-ay

sugod na usab sa uno
apan
wala na kita didto

sila na usab, lahing panahon
unya
nausob na usab ang kahulugan
sa kagawasan

gisugdan na kini
sa pag-ipon sa mga samang matang
kasal sa mga
dili manganak

hangtod sa bugno diin
walay mabilin
pati na gani ang kalibotan

nga mabungkag nga morag
mga bildong bulan sa
kagabhion

mobuto nga morag
adlaw nga
kwitis
sa dulom nga
kaudtohon
 

ang kasakit ni Mario

kon wala na si
mario dinhi, unsa kaha ang
iyang mga
panugon:

akong tagnaon

nga gipasaylo na niya ang
durong katawa sa dihang nakaihi siya
sa iyang karsones
tungod sa kahadlok niya ni
Mam Buenavista

nga unta dili na mangurit ug bulog
ang maong maestra

nga ug kon dunay madunggaban sa
pagkabugalbugalon
ug pagka-istrikta dinhing dapita
unya mamatay

mobalik gihapon siya
aron
pagbilar sa ila unyang
haya hangtod
na sa kwarenta....

pamalihog

ayaw paghisgot ug
kagawasan
sa usa ka tawong
walay sala
nga dose na ka tuig
sa prisohan.....

ayaw
paghisgot ug
hait nga kutsilyo
sa usa ka
samdan

undangi ang
pagkiay-kiay
atubangan
sa kiniskisan
ug kilay

kurungan

usahay
mas malipayon ang
usa ka langgam

sulod sa iyang
kurungan

kinsa ba ang dili ganahang maglipay?

ang nahitabo
lahi sa akong gihunahuna
untang mahitabo
kaniadto

nagsulat ako
alang kaninyo

pagkadako sa
akong sayop

karon gitul-id ko
na ang tanan

nagsulat ako alang
kanako

ug gikan dinhi
daghan pang manghitabo

tali kini nako ug
kanako

basin puhon
mailhan na niya ako
pag-ayo

ug ako usab makaila
na kaniya

ug unya dili na ako
mangutana

ug naunsa ug
ngano

basin matultulan
ko na

ang among gipangita
nga ganghaan

basin
mahimo na kaming
gawasnon

kinsa ba ang dili
ganahang
maglipay?

pagpakaisog

 

mao kini ang
akong
nakit-an, dinhing dapita diin
ang mga bintana
nagtakuban sa baga kaayong
mga kurtina
nga misapaw sa
mga samin

nakita ko ang
kalig-on sa kwadrado

kwadrong lawak
upat ka
nawong sa
gipili kong
kalibotan

daghan
ug kusog na kaayo ang
akong pagdungog

matag hikap ko sa
kilid sa lamesa
adunay molagiti

kon ibalhin ko ang
akong usa ka kamot
magbangutan ang
pikas

kon palawman ko
pa ang akong
pagpakahilom
adunay nahadlok nga
tingog gikan
sa akong lingkoranan

makahadlok

apan isog ang akong
mga mata
nga morag
kilat sa langit

milinti ang akong
utok
mihukom ug
kalig-on

ang tanang
mibabag sa kwadro
hurot silang
nangaparot

nangahimong abog
sa akong
tiilan

kahilom

usa lang ako
karon

diri sa
kangitngit

sa dihang
gipasiga ko
ang suga

duha na ako
karon

mibutho ang
akong anino

unya kay
gamingaw man
lagi kami

gidugangan namo
kini ug
laing kuyog

ang iyang
ngalan
kahilom

kamao kong mobangon

 
kon nahapla ko
sa imong
huyop

kana tungod
kay
huyang ko
sa
walay
pagpangandam

kamao kong
mobangon

ugma kon imo
na usab akong
tayhupon

unya sama
lang gihapon
ako sa
dahon nga
daling naipo
sa iyang
gikasaligan
nga sanga

kamao kong
magpaanod-anod

ug kon
mahagba na usab
ako sa
kabatoan

kamao lang
gihapon
akong mobangon

kon sa
makadaghan
pa kini
mahitabo

naa na koy
laing
makat-unan

madungog
mo na ang akong
katawa

water lily

 

gamot nga
naglutaw sa
tubig nga
ibabaw sa
lapokon nga
lam-aw

dahong nagdupa
aron ipabuswak
ang pinakaputi
niyang buwak
karong adlawa

bidbiron

usahay
sa kataas sa katawa
ug sa pagbalikbalik ug lit-ad lit-ad
diha sa
mga agik-ik

di na nato mabantayan ang
pag-abot sa kangitngit

unya sa dugay pang tagay
sa mga sugilanon

 

bisan gani ako
di na nako mabantayan nga ako

gitaral na diay sa usa ka sakayan
sa pikas tampi

wa gani nako
nasusi pag-ayo kon unsay nawong

sa nagbugsay
kon usa ang tingog sa sulog

sa akong kinabuhi
hangtod nga kini nahilom nga morag

puya nga nakatulog
sa kuna bisan ug wala diha
ang bidbiron sa
iyang baba

HUPAS NGA KALIPAY

HUPAS NGA KALIPAY

Gitadlas  mo ang hangin sa kadalanan,

Gisungasong  ang naglikoliko’ng dalan,

Gibuntog ang  hamok sa alimpatakan,

Dali nimo’ng nakab-otan ang katumanan  ,

Gisayonsayon ang buhat nga dili kasarangan,

Nangandak nga anaa na kanimo ang tanan

Ikaw’ng mas nasayod sa  imong binuhatan,  

Apan diay, nagtungtong ka’s haguka nga pantawan

Gipunting nimo ang lubog nga   padulngan

Sa pagpangligid sa  panahon’g  masalaypon,

Bakwion mo man,  ikaw nahimong ulipon,

Nagpadayon ang damgo’ng badlongon

Pagkab-ot sa kalipay,  imong  mata malanay,

Dili tanan'g butang makalipay, madali ug madugay

Buhat nga pinaspasan, magdala’g pagmahay

 “Unsa may bili sa butang kalibotanon,

kon sa panglihoklihok,  ikaw hasion

 kon sa  tanlag ikaw  ig-on, tulisokon?”

ankor wat

mao kini
ang nahibiling
kanhi
lig-on nga gingharian

hirig nga haliging
bato
nagsangkiig nga
palasyo

larawan
larawan na lamang
ang iyang
bili

taxidriver

kining taxidriver
baya

gikan ko's airport
gapaibog

sa iyang tulo ka
anak

nga kuno ang
kamanghuran
nga maayong mokanta

ang tunga-tunga maayong
mosayaw

ug ang kamagwangan
kuno pambato sa
math

wa na kong
mamati

ning tungatunga sa
traffic

akong gihunahuna
kon kanus-a
ko maabot sa ako
sang padulngan

kon mopakapin
kog plitehan

na singko ra
gyod

katulgon

ang katulgon nga
balak
nanghikap sa mga
bungtod ug
mga patag
sa kalibonan
gisul-ob ang
mga matang
hubog na
diha sa
damgong
gaung-ong

pagkahuman sa ulan

katapusang
tulo
diha sa
katapusang
tingog
dayon
magsugod
ang unang
kahilom

ulan ug binhi

nahisama sa ulan
ang akong mga binhi
nahug sa kadalanan
gisalo sa mga kanal
nalamog sa mga
basurahan
nahug sa mga atop
subay sa mga sandayong
bisan asa padulong

pangutana

mag-unsa pa man ang ulan
ning laya  nga dahon?

usa ka talan-awon

itom nga payong
kusog nga ulan
pula nga bangko
usa ka talan-awon
sa atong
panagbulag

kalipay sa atong hugaw

ang atong hugaw
lamian
atong gibalikbalikan

gagmayng kalipay

sa kugmong
gilingin-lingin
dalikdik nga
gilikit likit
sa pagpalabay
sa dugayng
panahon

ang monyeka ni b.

 

ang karaang monyeka
sa aparador ni mama
mao lang gihapon ang
postura: abri ang mga
kamot ug bukton nga
morag gustong mogakos
kang bisan kinsa

walay paglubad ang
mga walay pagbati

ulan

 

sud sa lawak
ning kaadlawon
nakamata ka
sa abi mog unsang
kusog kaayong
iyak-----

ay! ulan man
lang diay!

tampisaw kunohay sa mabaw nga sapa sa kinabuhi

gisulayan ko baya ug
tampisaw sa kinabuhi nga akong

gipakisama nga kini usa lamang ka mabaw kaayong sapa nga ang mga isda gani dili kalangoy,

ang akong buot nga ipasabot nga dinhi ang mga isda dili mabuhi kay alang lang kini kanato nga
mas mabuhi kon mabaw ang tanan kon wala ang lalom nga tubig kon wala ang dagat

kon layo kita sa salog sa mga bato sa mga ngitngit nga langob sa ilalom sa lawod
diin namuyo ang wala nato sugod gikahibalag

(ginhawa, ginhawa pa ug lalom, ayaw kan-a ang pulong kay dili kini makatambok)

gisulayan ko pag-angkon nga ang kinabuhi yano lamang, nahisama kini sa usa ka pranka nga babaye
nga kon papilion ka, duha lamang ang kapilian, kon duna, duna, kon wala, wala

wala na ang mga posibling kompromiso sa tunga-tunga nga sama sa usa ka paypay sa panahon sa
ting-init

kay dili baya mahimo nga duha lang ka panid ang usa ka paypay,

naulaw ko sa akong gisabwag,
abi ko ug yano lang ang tanan, kay sama sa usa ka bright nga babayeng nag-edad na ug 46
unya cpa-lawyer, unya miaagi na sa napulog-unom ka mga relasyon, nga karon,
bag-o lang usab silang nag-break sa iyang uyab nga taga-Phuket

sa dihang akong gipangutana, ang iyang tubag, " sort of, ....well,..it is complicated"
dayog alsa sa iyang kilay, piyong sa iyang mata, kuhag tissue,

ug dayog iyak sa walay paghunong, nga wala na niya masabti ang gidangatan sa iyang
kinabuhi,

daghan na akog nakita kabahin niini,
diha sa mga lubnganan, sa mga nagbangga nga mga sakyanan,
diha sa gipusil nga politiko, patay,

ug uban pa, diha pati sa mga gikasal, sa mipasar sa bar exam,
katawa, hilak, katawa,

lingin nga kalibotan, walay kataposan nga adlaw ug kagabhion,
asgad nga luha, tab-ang nga ulan, humot nga ylang-ylang
nalibang nga itoy nga morag teddy bear,

ice candy nga avocado, danlog nga humba, nindot nga pagsalop sa adlaw,
pagpusa sa bugas-bugas kilid sa palwa nga ilong....

kalit nga blackout

kaganiha nagtupad mo
sa katre

gikan kamo sa usa
ka panaw

kadyot ra kamo didto
tungod sa

kalaay unya gisugdan
niya paghisgot ang kabahin

sa usa ka sakit
sa kasingkasing

nga imong gisulayan
na unta ug paglikay

pinaagi sa paghandom
sa mga nangaging

ginagmayng kalipay
sama sa pag-unot

ninyo kaniadto sa silong
sa balay dapit

sa butanganan ug daghang
humay unya

kalit nga
mi-blackout.

ang mga tunob sa tamsi

abi mo
daghang kang makita nga
lalom tugkaron
diha lamang sa
paglantaw
diha sa pagpakahilom

makita mo ang balahibo
sa tamsi nga nahug gikan sa
sanga sa kaimito

unya madungog mo ang
iyang awit
sa iyang pagpalayo kanimo

unya ang iyang mga tunob
kaganiha
samtang nagbalhin-balhin
kini sa mga sanga
nagpabilin diha sa imong
kasingkasing

naghimog mga
sugilanon

ang gripo nga wala nimo masirad-i

sa hardin
sa ilalom sa namulak nga mga
kahoy nga lanzones

sa imong duol
nakita ko ang mga maya
nga namatog

unya adunay duha ka parisan
nga milupad
unya mibatog sa banga nga
imong gipuno ug tubig
sa kilid sa labat sa inyong balay

ang gripo nga wala nako
masirad-i
nagpunay ug sirit

dili kini bitoon

sa paglawig
gilantaw mo ang
barko nga
mihiwa sa
dagat

ngitngit ang
kalangitan
unya sa unahan
anaa ang usa
ka kahayag

dili kini
bitoon
panaghap
kini nimo
sa usa ka
kaluwasan

diha sa kanunayng pagpanikop, dili gayod managsama ang tanan

walay bisan usa
nga managsama

ang adlaw nga
misubang
kagahapon
dili na mao ang
iyang pagsubang
karon

lahi
kanunayng lahi ang
tanan

busa ako nga
nagsud-ong
sa mga bitoon
nga mibati sa
bugnaw nga hangin
nga mitunob
sa sapa
nga mikatkat
sa kahoy
sa mangga
nga naghitik
sa bunga

wala gayod
gibati ug kalaay
ang akong mga
mata
morag mga bata
nga nagdagan-dagan
sa suba
nangwitik sa
tubig
nanikop ug mga
isda

gugmang mibuswak

mga rosas nga
laya na
ang akong gihalad
kanimo

walay laba ang
akong sapot
walay hugas ang
akong mga
kamot

gihagkan mo ang
mga nalayang rosas
mipahiyom ka

unya miingon ka
dali diri sa akong
mga bukton

kang kinsang gugma kaha
ang dili
mobuswak?

wa na koy kasayoran

human mo matigom ang tanan
sud sa imong palad
apil na kadtong dili na gani
maigo
unya imong gikumkom ang
imong kamot
sama sa usa ka
balay nga nanirado sa
iyang tanang
bintana ug
pultahan

sugdan mo na usab
dayon ang
dili mo unta mahimong
buhaton

moingon ka
way bili kini
ug imo kining gisugdan ug
hulog

mopadayon ka
nganong gihawiran ko man
kining butanga
wala ko kini magamit
dili ko kini
kinahanglan

ug busa imo na usab
kining gibalhin ug
gibiyaan

usa na lang
ang imong gibilin
ang imong kalag
nga giuhaw
nga gigutom

apan sa pipila ka
tuig mo
nga wala maambat
wala gayod
mamatay

unya moingon ka
kini na lamang
ang nahibilin kanako
kini ang
tinood nga bililhon

ug gibiyaan mo ang
mga tipaka
unya
misakay ka
sa anino sa
mga pako

unya nawala ka
sa ilang mga
mata

apan nakaplagan
mo ang
imong nawala
kaniadto

lahi ka na karon
ug
wa na akoy
kasayoran

maayo ra unta

gisulat ko na
ang akong nahibaw-an
labi na
kadtong
akong gihunahuna nga
ako gayong
nasinati

paibog lang
pautot
haploy lang
sa
batong karaan

karon
sa tungang lawod sa
akong kalibog

sulayan ko ug
sulat ang wa ko mahibaw-i
ang wa nako
sukad mahibalag

pamandongan ko kini
pag-ayo

kabahin kini sa
mga misteryo
nga nagtuyok-tuyok
diha
Kanimo

sugdan ko ang
wanang
unya ianod ko
unya mawala ko

maayo unta
(ug kini mao ang
akong giampo

nga sa kaulahian
hikaplagan
mo Ako.

pamalandong

ang mga damgong
nagbitay sa kisame
gustong
tukbon sa mga
dagkong tuko

ako usab nga
katulgon

naglantaw lang
hangtod nga ang usa ka
damgo

natukob gayod sa usa
ka dakong
tuko

nga mipakatap sa iyang
dakong
katawa

sud sa iyang tilaok
ang akong damgo
miiyak

ako nga katulgon kaayo
wala gayoy
gibuhat

ugma sa sayong
buntag
magsigi na usab akog
bunal sa
akong dughan

ug didto sa unahan
pangitaan ko usab
ug sala
ang uban

balik-balikon kini
hangtod
matapos na usab
ang pipila ka
adlaw
hangtod motikyop na
usab ang
pipila ka kahaponon

bun-og na kaayo
ang akong
dughan
unya ang akong
palad
gikubalan

alang sa nawad-an ug katarungan

gipangita na nako ang mga
katarungan
aron masumpayan unta ang
akong katuigan

bisag usa lang
bisag putol lang gani

apan wala na
bisag usa lang
bisag putol pa gani

busa
gidawat ko ang tanan
giandam ko ang
akong sakayan

kon moabot na
ang dakong unos
isulong ko kining
akong sakayan
nga walay katig

unya ang akong
ipabilin
mao lamang ang
sugilanon

nga dili gayod nila
masumpayan
ug tinood nga
kataposan

alang kang P.

lahi na man god
ang atong kalibotan nga gipuy-an

kini ang kalibotan sa
pag-anad-anad nga kita na lang

walay kisaw ang mga bata
sa hawanan
walay mga buak nga
porselanang duwaan

walay iyak ug katawa nga
madungog
walay samok

kagahapon gusto unta nato
nga kini mahitabo
apan gitikasan kitang duha
sa kapalaran

wala nato patya ang kahoy nga
wala mamunga
wala nato kasilaga ang
salog nga
haskang sinawa

sa hardin ni Bathala

kaganihang hapon
nakita ko ang babayeng niwang
nga nagpatotoy sa iyang anak
nga asul

milingiw ko sa pagtoo
unya nakita ko ang usa ka dalan nga
walay utlanan

nanawag ang kahayag
tungod kay ako ang gilutos sa
kahadlok

mahimong wala ko pa gayod
hisabti ang tanan

lahi man god ang pamalaod
ning atong karon

kon moadto ko sa wala
sakiton ako sa kahoy nga wala mamunga
nga unta pagkanindot man sa iyang mga
sanga ug dahon

kon moliko ko sa pikas
dagiton ako sa ngiw-ngiw nga balikog ug
sungo

kon mosalom ako sa dagat
ug kon kapoyon na ako sa akong paglangoy
ang ihatag kanako mao
ang sakayan nga bali diin ang iyang
tiyan naghayang
unya gustong mohalok
sa adlaw

gusto ko nga mobalik ako sa sabakan
sa kalibotan
unya dili ko matulog
aron akong pilion ang akong
kabag-ohan

gusto ko nga ako ang modawat
kamot nga abri ang mga tudlo
andam nga
mosalod sa ulan nga
kahayag

usbon ko ang sakayan
haployon ko ang mga bitoon
sama sa mga buwak
sa hardin ni Bathala

sama sa naandan

kuhaon mo ang tanan
kanako?

unsa ba kaha'y akong
ikasulti?

ah, imo kining tanan
wa ko'y ikasulti

kuhaon mo ako sa
kataposan

nagsulay ko ug bilin
sa mga bulak

didto sa pultahan diin
ako mibiya

ahh, sayod ako
kon unsay dangatan

malaya ang bulak
ug walay makabantay

labyan-labyan ang
pultahan

sama sa naandan.