gikan baya ako sa halayo nga dapit
nag-aso ang akong mga tiil sa kakapoy dihang mitunob kini sa
dughan sa yutang natawhan

gikutlo ko ang unang bato nga migitib sa gipahulayan
init kini sama sa bulak sa imong kamot

gidapion ko kini sa akong kasingkasing samtang
gipiyong ko ang akong mga mata aron makita pag-usab

ang atong gibiyaan: usa ka hanap nga isla, morag giaagian
nga aping sa imong mga luha

init pa gihapon ang paghawid diha sa paghandom
sa panit sa kamingaw misurop

ang gatubod nga orasan
unsaon ko man?

kining tunok sa panahon
gibaid sa mga kalaay
hait

kinsa ang magpaduol
masamdan

ang milalin ug ang nahibilin

dili nako ipakita kanimo ang
dayag.

ania ako sa imong atubangan
kunuhay namati, apan ang sulod sa akong kasingkasing

humana nangabri unya ang akong mga pagbati diha kanimo
hagbay rang migawas

paingon sa laing balay, nga miabli sa laing pultahan,
unya atua na ako didto, nakighinabi sa makalipay kanako

atua na ako, mihigop sa iyang usa ka tasa nga
init nga kape.

samtang ikaw siging gayawyaw, unya ako
usa na lamang ka patay nga kahoy,

wala nay dahon
wala nay bulak.

si ervin
hadlok mahugawan ang iyang duha ka kamot
sa yuta,

"yaks, daghang kagaw!"
maoy iyang panaway sa akong duha ka kamot

nga mihabok sa daghan kaayog bunga nga
punoan sa kamatis

duha lang ka kagaw, ang kagaw sa hunahuna
ug ang kagaw nga naa lang sa libro.

si ervin
pordoy.

ang gaba

...maayo mag sili
nga mohalang dayon

...kon unsa ang imong
gitanom
na mao ra pod ang imong
anihon

....dili jud magsaba.

ang kaalam ni tiya tutay

kon dunay mangayog
dahon sa
kamunggay
pakapinan gayod niyang
dakong sanga

kon mobalik
pakapinan na gyod
niyag litaniya
sa pagpamoyboy ug
pangasaba

" kay ngano kanang
inyong tugkaran
bato?"

di ganahag utang

si tatay
makatulog ug tarong
sa iyang
lantay

sa iyang balay
nga gamay
mahinanok

kaysa dakong balay
unya
dunay bayronon
sa loan.

bahalag siging
blackout

basta hawid
lang ang atong
mga kamot

unya naang
simhot-simhot
payts lang
 gihapon

consuelo de bobo

maayo rang
natangtang ang atop
karon
kita na nato ang mga
bitoon

ako ang nalooy kanimo

adunay bata nga walay purol
unya hirig ang iyang nilakwan nga
mora ba ug dili tupong ang salog
sa dalan
dili iyaha ang iyang gisuot
luag kini ug taas sangko sa
kumagko sa iyang tiil,
nangita kini siya sa iyang
inahan
balikon ko aron unta nimo
masabtan,
nangita kini siya ug inahan,
nadungog mo apan milingi ka
paingon sa wala
unya layo na kaayo ang imong
tinan-awan
lapos pa gani sa pikas
tampi.

usa ka lumalabay

usa ka lumalabay

kinahanglang hugot ang atong
pagsalig sa nakita
kinahanglang walay kapin
walay kulang

kadtong tamsi nga mibatog
sa sanga sa bayabas nga
wala na mamunga unya ang
mga dahon nangahulog sa
sapa sa kilid sa dalan diin
ang iro nga puti nga puntik
ug itom nga nagsigig paghot
sa bulan nga nagpadulong
na sa iyang kadulom,

ayaw na ingna nga ang tamsi
nagmasulub-on nga ang bayabas
aslom nga ang mga dahon nahutdan
na sa paglaum og busa nangahulog
nga ang sapa nalanag sa mga dahon
nga nangalata nga ang iro nabuang
ug busa siging gipaghot ang bulan
nga anaa nagbakho sa hilom sa
taas kaayong kangitngit sa
kagabhion,

ayaw na dugangi o kulangi ang
imong nakita
naghatag lang kana ug kasakit
kanimo nga usa lamang ka
lumalabay.

ikaw ang mas nasayod
sa kaanindot sa imong mugna
ang imong kasingkasing
maoy magsumbong niini diha
kanimo
sud sa imong dughan
magpista ang
tanan.

busa ayaw na paabota pa
ang bisan kinsa
ayaw na ako agdaha
bibo na ang sulod sa imong
balay
misayaw na ang tanan
miawit
apil na gani ang mga bitoon,
ang bulan,
ang hangin, ang dagat,
ang mga kabukiran
walay lampara ang adunay kaisog
sa pagpalong
sa imong bag-ong nakaplagan
nga kahayag
busa padayon higala sa imong mga
mugna
kay diha sa imong langit
anaa na ang tanan
ulan ug init

usa ka tanghaga kabahin sa kinaham nga kasag

pagkadako pagkataas
sa iyang mga kuyamoy apan
sa dihang giluto na ug gibira
pagkagaan unya sa
pagkabuak pagkapait

bisan og dako
iyang bayanan
ay ang gadaghan
hangin ra diay

gikahadlokan ko ang
pagpaduol kanimo
kay sa matag dap-ig sa akong
panit diha sa imong bukton
makahinumdom ako
sa akong kaniadto
isip batang maldito
nga nagdakop sa alibangbang
giputlan ug duha ka pako
dayon gibiyaan sa hagdan.

sa tungang gabii
pamiloon mo ang mga habol
plantsahon mo ang mga ponda
ilain mo ang mga pantalon
hiposon ang mga panyo

ako sab
magtapok sa mga libro nga
dugay na nga nagbuka sa ilang mga
dahon
nga wa pa nako mabasa
ingon ani tang duha
kon maghunahuna na gani kon unsaon pag-ikyas
ang napriso tang mga pagbati
palabyon ta ang kagabhion
sama sa usa ka di kaila nga anino
giandam na usab nato ang akong mga
dughan
ug mga bukton
sa pagakos sa
bag-ong kabuntagon

nagmalipayon ang atong
mga likod
sa atong mga mata nga
nagpiyong-piyong
sa kalami sa lain natong
tagsa-tagsa ka
mga damgo
pagkalayo ba diay sa panaw
aron pa
mahikap ang kaanindot pa sa
atong umaabot
ug sud sa akong dughan anaa
ang tumang kahadlok
nga basin unya pag-abot didto
wala ka na.

adunay hulagway sa kilid sa atong tiyan
nga kon lantawon kini usa ka patay nga uhipan
mahimong wala kini kalabotan sa atong pagpakabuhi
apan gihandom

unsaon ta man nga mora man usab ug kita mamatay
kon dili kini tandugon
nga ug tandugon nimo ug sugod sa buntag
molihok kini, mosayaw, molukso
hangtod na sa kagabhion
nga mora bag nagpasalamat nga bisan ug
wala ka'y gusto
gipauyonan mo kini panalagsa
kay sayod ka nga kon mosayaw na kini
adunay luna sa imong kasingkasing ang
mosayaw usab
mapasalamaton nga sa usa ka gutlo
nabuhi ka nga sa pipila ka adlaw
o katuigan ba kaha
nagdulhog sa usa ka kamatayon

kon magpista
sila-sila ra pod
sila'y luto
sila'y kaon

ang ilang pamilya
morag pultahan nga
siging panira
wala'y gana nga
makig-ila-ila
sa kaanindot usab
unta sa uban

ang tumang kahilom
bugnaw
sama sa kaadlawon sa Mayo
didto sa
Sagada

kon dili ka pa andam sa
kainit sa
umaabot nga kabuntagon
hangtod na sa udto
kon imong pauyonan ang
kabugnaw sa imong mga pagbati
adunay moligti
adunay mabuak sama sa usa ka baso
nga gibutangan sa ininit nga tubig
nga kalit lang nabuak
unya ang kainit sa tubig
sakit kaayong mipaslot sa imong
gadangag nga kamot

sa tungang gabii
pamiloon mo ang mga habol
plantsahon mo ang mga ponda
ilain mo ang mga pantalon
hiposon ang mga panyo

ako sab
magtapok sa mga libro nga
dugay na nga nagbuka sa ilang mga
dahon
nga wa pa nako mabasa
ingon ani tang duha
kon maghunahuna na gani kon unsaon pag-ikyas
ang napriso tang mga pagbati
palabyon ta ang kagabhion
sama sa usa ka di kaila nga anino
giandam na usab nato ang akong mga
dughan
ug mga bukton
sa pagakos sa
bag-ong kabuntagon

nagmalipayon ang atong
mga likod
sa atong mga mata nga
nagpiyong-piyong
sa kalami sa lain natong
tagsa-tagsa ka
mga damgo
pagkalayo ba diay sa panaw
aron pa
mahikap ang kaanindot pa sa
atong umaabot
ug sud sa akong dughan anaa
ang tumang kahadlok
nga basin unya pag-abot didto
wala ka na.

adunay hulagway sa kilid sa atong tiyan
nga kon lantawon kini usa ka patay nga uhipan
mahimong wala kini kalabotan sa atong pagpakabuhi
apan gihandom

unsaon ta man nga mora man usab ug kita mamatay
kon dili kini tandugon
nga ug tandugon nimo ug sugod sa buntag
molihok kini, mosayaw, molukso
hangtod na sa kagabhion
nga mora bag nagpasalamat nga bisan ug
wala ka'y gusto
gipauyonan mo kini panalagsa
kay sayod ka nga kon mosayaw na kini
adunay luna sa imong kasingkasing ang
mosayaw usab
mapasalamaton nga sa usa ka gutlo
nabuhi ka nga sa pipila ka adlaw
o katuigan ba kaha
nagdulhog sa usa ka kamatayon

ikaw ang mas nasayod
sa kaanindot sa imong mugna
ang imong kasingkasing
maoy magsumbong niini diha
kanimo
sud sa imong dughan
magpista ang
tanan.

busa ayaw na paabota pa
ang bisan kinsa
ayaw na ako agdaha
bibo na ang sulod sa imong
balay
misayaw na ang tanan
miawit
apil na gani ang mga bitoon,
ang bulan,
ang hangin, ang dagat,
ang mga kabukiran
walay lampara ang adunay kaisog
sa pagpalong
sa imong bag-ong nakaplagan
nga kahayag
busa padayon higala sa imong mga
mugna
kay diha sa imong langit
anaa na ang tanan
ulan ug init

usa ka tanghaga kabahin sa kinaham nga kasag

pagkadako pagkataas
sa iyang mga kuyamoy apan
sa dihang giluto na ug gibira
pagkagaan unya sa
pagkabuak pagkapait

bisan og dako
iyang bayanan
ay ang gadaghan
hangin ra diay

gikahadlokan ko ang
pagpaduol kanimo
kay sa matag dap-ig sa akong
panit diha sa imong bukton
makahinumdom ako
sa akong kaniadto
isip batang maldito
nga nagdakop sa alibangbang
giputlan ug duha ka pako
dayon gibiyaan sa hagdan

ang pulong nga "siya" dili dayag
kon unsa ikaw ug ako
dili nimo matino kon unsa ka taas ang
iyang ilong
kahamis sa iyang aping
kalumo sa iyang mga mata

nagpabilin ka diha pagtago sa "siya"
ug ang "ikaw" nalipay
nagpabilin "sila" sa usa ka tanghaga
linaw ang imong kaugalingon diha sa
wala pagpaila
siya ang imong gimahal
nagpabilin silang buta sa imong gihandom
nindot ang kahayag sa bulan
sa imong "siya" ug "ikaw"
ug mipatigbabaw ang kangitngit sa kalipay
halok sa hangin, gakos sa hapos.

bisan ug maayo na ang
Mayo
sa bag-ong pagbuswak
sa mga buwak

nagpabilin pa gihapon ang
abog sa Abril diha sa
imong dughan

ABRIL

abril ka lang gihapon,
init, putong,
kanunayng sabton

ugma ang iyang
kahilom paingon
na sa paghubas.

dayag ang mga bitoon

ang sipat
mitubag sa dihang giingnan nga

dili moulan kay ang langit
puno man sa mga bitoon

dili balaknon ang moingon
nga ang mga bitoon trapal

apan lahi ang panglantaw
sa nagpabiling naghandom

wala ang dakong dag-om
busa dayag kaayo ang mga bitoon

ug kon dayag kaayo ang mga bitoon
nan, ang imong mga mata dili subo

kay kini wala may mga luha
wala ang gabon sa nahigugma.

Dungan

ning adlaw nga
init kaayo, dinhi sa akong lawak,
gipakatawo nako ang akong
mga awit, nga miawit usab
alang kanako? kay kinsa pa
ba ang moawit kanako? Ikaw?
wala na may awit sa imong
dughan. Ang imong lawak
hagbay mo ra usang gibiyaan.
Ako lamang usa dinhi apan
daghan ang akong mga awit.
Kinsa pa ba ang moingon
nga mingaw dinhing lugara?
Ikaw? Wala mo mabuhat ang
angayan buhaton. Miikyas
ka sa lawak. Giwaldas mo
ang ato untang kalibotan.

karong gabii, dili ko matulog.
maghimo ko ug gugma
ako sa ako, dughan sa akong
dughan. Ipahimutang ko
pag-ayo ang akong kalag sa
akong lawas. Ug sa hinanok
mangatulog ming duha.
Walay mauna. Dungan.

pasinaha

kanang imong gihawiran
mao ang imong kinabuhi.
hawid gayod. Ayaw pagbuhi.
ayaw pamati kanako. Anaay
tingog ang imong kinabuhi.
Pamatia kini. Ayaw anang
kabalaka. Sayop kana.
Paglipay, pildiha ang kamatayon
diha sa gihawira mong kinabuhi.
Ang mga kahoy nga dili kadagan
nga dili kasulti, nasina kanimo.
ang banog diha sa taas nga naglupad
gustong magpahawid kanimo.
Init man ang imong palad.
Unya ang suba sa kinabuhi
anaa mipadayon pag-agas.
Libot sa imong lawas balik
sa imong kamot.
Matag adlaw paglipay.
Kon mahimo, pasinaha ang
mga hagbay nang patay.

sa pagpakahilom

ang nawong sa dimalas
(ayaw og kasuko) anaa nimo

(di sab ko masuko) anaa sab
nako ug ang tanan maglipay

kay ang suod nga higala sa
dimalas, mao ang pagmahay
angay tang magsadya ang
nawong niining tanan nga
akong gihisgotan, anaa kanato
ug kita nga nagkuyog sa merkado
ug gani sa simbahan usab,
pulos mga subo, pulos mga
dimalas, pulos nagmahay.

apan kinsa bay ganahan manugilon
kabahin niini? bisan gani ang mga
patay, kalit man o dili,
gipili na man lamang ang
pagpakahilom.

sugod

dili mahimong sayon-sayonon ang tanan.
dili patag ang kalibotan, sayod ka, daghang bukid nga bato
daghang dagkong balod sa unahan,
ang mga balili anaa ang mga halas nagtakuban.
naay mga dalan nga gisabwagan ug mga bildo.
anaay mga hikot nga dili mo mabadbad.
ayaw kog pasaligi anang gugmang dili molubad.
kanang pagsabot nga lalom. mga bulatik sa bulad.
Asgad na. Makasakit na kana sa kasingkasing.
Gusto nako nga motipon na ako sa mga balas.
Gikan sa imong palad.
Buang sab ko kaniadto. Di sab makaon ang
akong pamatasan sa irong gikagid.
Dili ta magkasinabot. Mao kana ang sugod.

mga kukabildo

unsaon na man nato kining
nabilin? kining iyang sapot
kinsa ba ang mosuot niini?
sunugon na lang kaha dala
ang lawas? abono pa ang abo.

duha sila niining lawak.
naghawiray sa kamot sa
dihang nahitabo kini.
nagbula pa ang baba,
naghilo ba? kinsa ang
unang mitungab? basin
og gipugos lamang ang
usa. Apan nganong aduna
may marka sa ngabil ang
dughan? nagsabot kaha
silang duha? ang salog,
han-ay man usab ang sapatos
tupad ang medyas. Hapsay
man. Unsa kaha ang imong
isulat bahin niining duha

ka mga lalaki nga karon
wala nay mga ngalan.

sa hinapos

mao.
wa ko madawat.
ikaw sab, wa mo makuha ang gusto mo ning
kalibotana.
hihapos sa adlaw, mitutok ka sa adlaw.
wa matuman ang damgo.
ang gitagna
nalata.

apan bisan pa ning tanan,
malipayon lang kita gihapon.

ako imong gitawag nga
Hinigugma.

nakadungog, di ko motoo nga wala.
wa lang gayod gihatag.

wa ko maghambin ug katarungan.
nagpasalamat lang gihapon. mao kana ang
atong hinapos.

sa kadaghan sa gisulti
wala kay nasulti, bisag usa na lang

pagkakusog sa hangin
apan wala'y bisag usa kanako ang napalid

pagkadako sa kahoy
pagkalabong sa iyang mga dahon
apan wala'y  bunga

sa kadaghan sa giatiman
wala'y naatimanan

sa kadako sa dapogan
sa nagpasad nga mga kalaha

wala na ang baga
wala na ang kalayo

dili na nako makalot
ang imong katol

pasensya na

kon gusto ka
ipakalot na lang sa uban

pasensya na

kay dili mo na usab
mabali
ang kagahi sa akong

ulo, pasensya na, dili
na magtakdo  ang

imong katol sa akong
tudlo.

gihunahuna ko ang langaw nga morag helicopter nga
nagtuyok tuyok sa dakong ugdo sa tae sa kabaw
diha sa
kalibonan
anaa sab ang lamok nga nagsamoksamok sa kagutom sa langaw nga
gusto nang motilaw sa lamian niyang putahe

human nako madungog si obama nga basin kuno
 ug motabang siya kanato
kon sulngon kita sa china.

miingon ka
nga ang akong balak usahay
molahos sa bukog
deretso sa kalag

wala ko kana damha
kon nahitabo man ugaling
pasayloa ang buta
sukad sukad wala ko gayod
damha bisan sa damgo lamang
nga ako mahimong
usa ka hait nga
punyal

si domino
trantaykuwatro na
ambongan,
kwartahan,
negosyante,
pwerte,
dili moinom,
dili manigarilyo
dili pa gyod laagan

wa pa gihapoy uyab
gipaabot daw ang
spark.

wa mo kaabot ni
mary poppins
ug kadtong sound
of music
sa among panahon
tag-as ang
saya sa mga babaye
long sleeves dayon
matching ang bag
ug sapatos nga puros
sab itom
dayon paabot sa hangin
basin ug makalupad
aron mapadpad
sa atop nga sin
unya kaming mga bata
martsa martsa
dagan paingon sa bungtod
hawak kamay
kuyog sa among
maestra nga otro pod
kusog ang pantasya
kuskos dayon sa gitara
dayon namong tanan og
kanta kanta'g
doadir a pimil dir
ri a goldin ri ob san..