bersyon dos

bersyon dos

gikalipay mo
ang usa ka nagtikaw-tikaw
sa pikas bintana
atbang nimo nga nanambo
ning bag-ong
pag-abot sa kangitngit
ning adlaw
sa lain na usab nga
kasubo

abi mog laing
silingan
abi mog dili ka na
mag-inosara
bisag karong gabhiona
lamang

ang imong anino
dili motingog

sa lawod sila kamao na usab nga molangoy

sa lawod sila kamao na usab nga molangoy

gisulayan mo na usab
ug paningkamot nga lumsan
ang mga kasakit nga
milanding sa pantalan sa
imong kasingkasing

dakong taob ang usa ka
basong tanduay
dakong gapnod ang mga
aso sa sigarilyo gikan
sa duha ka ganghaan sa
pugon mong ilong

makamao na moasdang
ang mga kaguol
diha sa gitagoan mong
mga ganghaan sa
hunahuna

bisag unsaon dili mo gayod
kini sila malumsan
sa karon sa ilang kahanas
na usab diha sa paglangoylangoy

sud sa eroplano gikan davao paingon cebu

nakatulog ko kadyot
nga morag
manok

nataligamhan
seguro nga mora bag

wa koy nadungog unya
nakita nako ang piraw

nga wala na magtuyok
unya nabag-ohan ko

nako nga mora na mag
wala'y kakulba

kon kining eroplano
unya mahagsa

panahon sa pagsukod

panahon sa pagsukod

miabot na ang panahon sa
saktong pagsukod

ang duha ka magtiayon
nagkuyog sa simbahon ning
sayong kabuntagon

wala na maghawiran ang ilang
mga kamot

wala na ang angkla sa abaga
ug wala na ang baha matag ulan

dapit sa merkado wala na usab
nila bantayi ang ilang iro nga wala

na'y kaligo nga malipayong
mikatkat sa dakong baril nga

gisudlan sa basurahan nga wala
pa makuha sa mga hingtungdan

pagpanumbaling sa gilabyan

pagpanumbaling sa gilabyan

upat ka baki ang napidyat
ang ilang mga dila milugwa
sa ilang baba

usa ka tambubuan nahug gikan
sa sanga sa kamanse
ug mihalok kini sa yuta

naughan ang sapa sa kilid ning
dalan nga batoon

unya ang mga panganod nagpunay
ug panamin sa tin-aw nga tubig sa
basakan nga kagahapon mao pa'y
pagkahuman ug tortol.

pagkadagdan pa gayod sa mga pangutana nga hangtod karon walay tubag

ang duha ka tiguwang
namaligya ug tangkong
sa daplin sa karsada sa
Sta. Felomina

nakatulog ang usa sa
kalalom na sa kagabhion
unya kadtong babaye
naglutok ang mata
nga gihayagan sa suga
sa poste sa ZANECO

pagpanumbaling sa gilabyan

pagpanumbaling sa gilabyan

upat ka baki ang napidyat
ang ilang mga dila milugwa
sa ilang baba

usa ka tambubuan nahug gikan
sa sanga sa kamanse
ug mihalok kini sa yuta

naughan ang sapa sa kilid ning
dalan nga batoon

unya ang mga panganod nagpunay
ug panamin sa tin-aw nga tubig sa
basakan nga kagahapon mao pa'y
pagkahuman ug tortol.

bersyon uno

nakuratan ka sa anino
sa pikas bintana nga samin

abi mog
dili kadto ikaw

abi mog
karon dili ka na gayod
mag-inosara
 bisag karong
gabhiona lamang

ambot wa kong masayod kon
naunsa
nganong natangtang man ang tahi
sa sidsid sa akong
karsones

nabulag ang duha ka panapton nga
kaganiha
usa lang sila nga mitabon kanako

gikuha ko ang nabadbad nga tanod
gitastas ang nabulag
giinat ko ang tanod ug gisukod kon
unsa ang katas-on

gisubay nako kon asa gayod kini paingon
ug asa ako niya hangtod
dalhon

alas nuebe na sa kagabhion
wa pa mahuman
motindog ko
mogawas
saka sa taas paingon sa veranda

ngitngit ang kagabhion
bugnaw ang hangin
gibati ko ang kamingaw
gipalid ang akong buhok
paingon sa kabukiran

di na ko maghandom
gusto lang nakong lantawon kon
mogimaw ba ang mga bitoon

gibalikan mo ang pagsakay sa karomata.
 ikaw na lang.
wala na sila.
hapon na.
 walay suga ang dalan dinhi.




kuyugan ta ka,
 ako ang dili mo makita
kanunay ako kanimo.
ako ang tingog nga
madungog mo kon
sugdan mo na ang pag-ubo.
ako sab ang tun-og ug
ang mabati mong
kanaas sa ginit sa lubing gibatol.
gipalibotan ka nakog
 gakos sa bugnaw nga
bukton sa kamingaw.
gihigugma mo ako
 bisan pa niini.
kon mobakho ka unya
hapohapon ko ang
imong abaga.
hawiran ko ang imong kamot
ug ako kang ingnon nga
 kini lumalabay lamang
nga walay molungtad
ako kang hunghungan
 kabahin kanato
ug dili kini magpabiling
 ingon ani na lang

mohawa sa ko
hatdan takag usa ka baso nga tubig
sa akong
pagbalik.

naa lang kana
sa hunahuna

hunahunaa pag-ayo
iya lang kana sa
hunahuna

hunahunaa ug dugay
hinuktuki kini pag-ayo
bunga lang kana sa hunahuna
nga usahay dili na kabalo
kon unsay hunahunaon

unsa ba kining kahadlok sa
dili nato masulti kon unsa kini?
gibati mo lang ang kahadlok apan
dili mo masulti kon unsa gayod
ang imong gikahadlokan

wala kay mahikap nga sungay
wala kay nasimhot nga sunog nga kandila
wala kay nadungog nga agulo sa kanding nga giihaw
wala kay natilawan sa kapait sa apdo sa sawa

apan nganong nahadlok ka man
karon nga ikaw na lang usa dinhi?

dili mo mabungat ang pulong
busa hunahuna lang kana
hunahuna lang
tutuki ang pulong
pamati

pamatia ang imong tingog
ikaw ang tinood

kitang duha

kon suklan ta ang
mga balod

budhian usab nato
ang puting balas sa
baybayon

kon padayonan ta ang
atong pagbati
padulong kita sa lawod
didto sa kahilom

ug kadulom ug dito
nga kita na lang duha
maglibog na kita kon
unsa ang angayan nga
buhaton

si Lolo Gidong

nindot lantawon
ang iyang
sinaw nga sapatos nga
itom

terno sa iyang buhok
nga gitina

unya bagets kaayo
siyang lantawon sa iyang
sunglass
terno sa iyang buhok

unya puti ang tanan niyang
gisuot
nga amerkanang
seda

gamhanan gayod ang
kaulag
apan wa kini kapanalipod
sa pag-ilad  kaniya
si Adela

nga kon mohalok
morag suso ug kon
mokapyot
labaw pang motapot
sa karaang tuko

si Coring

sayong nabyuda si
Coring tungod
sa dinamita

gibinlan ug suyod sa
iyang bana

ug tungod lagi kay
wa na'y laing
panginabuhian kay lagi
di naman usab siya
dawaton sa iyang Nanay
didto sa Panay

nagpabulan na lang siya
sa usa ka magtiayon nga
walay anak didto's
Olingan

buhat sa kalooy
bisag ug gilood nagpadayon
ang magtiayon sa
pagtulon sa ilang pamahaw
samtang
nagpahid is Coring sa
igit sa iyang anak nga
nagkalibanga agig kinaon
ug hinog nga saging

si Simo

tigbugha ug
kahoy si
Simo nga dili
makamaong
mobasa

apan ang kalendaryo
sa balay
kanunay niyang
gipaklid paklid

nga mora bag giihap
niya kon kanus-a
matapos
ang iyang adlaw

kon kanus-a mahabol
ang iyang atsa

kon kanus-a mahurot
ang tanang kahoy
sa iyang kalibotan

ang kasilag ni Lukring

gipatay si Panit
sa iyang kaugalingong
anak

gipasaylo sa inahan
ang anak


apan ang amahan niini
gikasilagan
gayod niya

nagdagkot siyag kandila
sa altar matag gabii

alang sa kalinaw
alang sa dakong pagpasalamat

si Takyo

karon sayod ka na
kon nganong nagsigig
hubog-hubog si
Takyo

hangtod karon
gaduhaduha siya kon siya
ba ang
amahan sa iyang
kamanghoran

apan kay tungod lagi
kay gwapo ang maong
bata ug
hait ang panabot

gipamugos gayod niya
gihapon ang
iyang kaugalingon

si Lola Mameng

sa edad nga
nobenta
natikay-ang si
Tikya

ug maayong
pagkasulod sa iyang
sampot didto's
bukag

naligid gikan sa
hagdanan sa kusina
hangtod
na sa lapokan nga
alad sa
baboy

nakuyapan
apan wala lang gihapon
namatay

og tungod kay wala
na lagi intawo'y
buot

sa dihang nakit-an
na siya
nagpunay kinig
pahiyom
ug gusto ka niyang
gakson

samtang gadugo ang
pangos sa
iyang bukton

si Ramon

kadtong
gisugbang buhi
didto sa
pugon

tungod lamang
sa napago nga
balarite

diha sa tumang
kahubog

si Linda

kahinumdom ko's
kalipay ni Linda

kadto lang baya
ang dramang Flor de Luna

ug wa na panumbalinga
ang gadampuog nga labada

ang mga tamsi ug ang uwak nga nagmingaw

gusto unya sa uwak nga
makigsandurot sa mga tamsi

ligoy-liboy lang unta diha
sa libot suroy
libod sa mga labod sa
kuyog sa balod
 sa hangin

apan ang mga tamsi giluod
unya gibaid ang mga sungo
kay kon moduol kini kanila
bisan diha sa panaghigala
ila gayod kining tuhakon

unsaon ba nila paghikalimot
ang nahitabo kaniadto?
kadtong gipuril ang ilang mga
salag
kadtong gitusak sa uwak ang
ilang mga pispis
kadtong gidagit ang ilang mga
itlog ug dayog hulog niini
didto's bung-aw sa kalimot

selos

sa dihang
nakita mong naghalok ang
buwan ug ang
adlaw

da, maayo gyong
pagkagun-ob
ang imong kalibotan

nangabuak ang mga bitoon
ug pino kining
mitapon sa dagkong balod
sa dagat

sa pagpangadye

adunay gisi gamay
pwes gisulsihan kini
adunay nawala pwes
pagahulipan
aduna sobra pwes putlan
gahi ra kaayo, unya,
nganong dili man nimo
kini pahumukon?

gabukal pa gihapon ang
imong mga pagbati
ug nianang mga butanga
ako kanunay ang
nangadye

didto sa balay sa mga G....

sa ilang panimalay
patay ang oras

ang ilang nilihokan
maihap mo sa hinay nga
paglitok sa mga
pulong

miadto ka ug miingon
kanako nga pagkabulahan
gayod nila

timpla timpla sa kape
hisgot hisgot sa mga bag-ong
baho
pahumot sa kaugtohon
pahulay matag gutlo
duyan duyan sa hangin sa
lagwerta
dayon kanunayng mamati
kon anaa na ba ang bag-ong
tuktok sa pultahan

kabahin kanato
ingon ka
alaot kita nga gigukod kanunay
sa usa ka tigre nga orasan
sigi kitang galihaylihay
apan bisan unsaon
kanunay kitang masakpan sa
panahon

matikangkang naman
o dili ba matikongkong

sa akong pagtimbang-timbang niini
wala ako masina kanila
hipos ang akong utok
unya ang akong kasingkasing
kanunayng abtik diha sa
pagbalintongbalintong

oo, masakitan, kanunayng gadali,
apan anaa pa gihapon ang pagkaharuhay
sa likod sa mga takna
ubos sa mga pangulipas
kilid sa klaro pa gihapon nga
mga pangandoy.

2013

dili na niya gustong
 hinumduman pa
kadtong tuiga diin
gitantang ang dila
sa iyang kampana ug
busa naamang siya

gitunton ang iyang  pagtoo
sama sa usa ka
pisi
ug wa kini kaabot sa pusod sa
atabay
ug busa nawad-an siyag
pagsalig sa
iyang kaugalingon

giputol ang mitubo sa iyang ulo
ubos sa iyang mata
ug nahalap siya

giputos ang iyang kasingkasing
ug ang tun-og niadtong sayong
kabuntagon
wala na gayod makaila
kaniya

wala na man god ang siya
nga pagkasiya

ang miabot sa kagabhion
lahi na
ngitngit na kaayo ang
nawong
unya ang gininhawa nanimahong
patay

ang usa potot nga pution
ang ikaduha taas lagi apan morag hinay man modagan
ang ikatulo dako ug tiyan unya upaw
ang ikaupat dako ug bagtak dayon
bako

upat silang nagdula ug basketball
adunay usa ka bata nga gustong moapil
apan wala nila panumbalinga
sa taas sa gubaong atop sa gym adunay kalapati
nga nagbakho
dungog nako kaayo kini
nagtinan-away mi sa bata ug miingon kini
nga "nangitlog na gyod siya sir"

alang kang J.




nakasabot ang Ginoo
sa dihang
miiingon ka nga siya bayot
diha sa iyang duha ka mga
mata diin ka
nanamin.

gihusgahan mo siya
sa color sa iyang garden chair
pink man god ang pintal niini
ug sa dihang milingkod ka na
gitagaan mo siya sa imong hilaw
nga katawa

wa kini niya panumbalinga
kagahapon namintal sila sa pughaw
nga nga kabinet
adunay sobra sa pula ug gamay nga
puti ug aron kini magamit
iya kining gisagol
unya nakita niya ang giap-ap na nga
lingkoranan nga
wala na kaayo maatiman didto sa
sagbot nga hardin

ug tuod man gisulod niya ang iyang
usa ka tiil
sa imong sapatos sa paningkamot nga
iyang masabtan
ang tanan

basa basa ang sulod niini
ug sa dihang iyang gihikap sa iyang tudlo ug gisimhot
morag kabaho kini sa usa ka dubok nga
isda
nga ang mga mata kon tutukan
haskang luboga na
gayod
dili buot ipasabot nga kon gisul-ob ang sapatos
ug diha sa pagsabot niini
nga dili na siya motug-an sa tinood
sa dihang gitangtang na niya ang iyang tiil
nakaingon siya nga wala'y laing mabasol
kon dili ikaw, ug ikaw lang gayod lamang.

miingon si Isko
kon pula man ang akong brief
unya light green ang akong medyas
kinahanglan pa bang siya moisplikar kanimo
kon ngano?

sayod ka sa kahawod sa iyang kapikas
nga kon iyang supakon
aduna gayo'y malangkat
ug bisan unsaon pag patapot ug balik
dili na gayod
magtakdo
pasensya na lang, mao unta'y iingon ni isko kanimo
apan sagad sa naandan
wala diha kanimo ang birtud sa pagpamati.

nindot ang talan-awon
sa sopa

tupad sa lalaki ang babayeng
wala miambat kaniya kay nagpunay kinig
haploy sa buhok sa iyang iro nga
podol
ang wala makita mao ang pagkitiw sa mga tudlo
sa lalaki
sa dihang nakita niya ang monyekang haponesa
sulod sa kabinet
nga paborito sa babaye sa dihang
bataot pa kaayo siya
unya pagkaoran-oran durong aw-aw sa podol
nga morag suko kaayo sa lalaki
nga sa iyang tan-aw kaha
wala may kaulaw.

sa dihang gipalagpot siya ug layo

wa siya maghambin ug
kaligotgot

walay layo nga lugar
sa nindot kaayong sakyanan

pagkadaghan sa malabyan
hanoy ang dalan

lunhaw ang mga kabukiran
ang mga patag makalingaw

atua ang mga kabaw nga
mipahulay sa ilang tunaan

unya inig-abot sa padulngan
gasiga pa ang mga mata sa anduhaw

init nga tinola
presko kaayong kinilaw

tagay sa gabukal nga tuba
kanta sayaw ang mga bata

ang iyang bana sa dihang nag-edad na ug saysenta

mora na lang siyag
kabinet
gisudlan ug mga
pinilo

alang kang D og F

kadtong hulagway
diin siya anaa sa imong kiliran
unya ang iyang kamot
mihawid dapit sa imong
bilahan

dayon daghang miingon nga
nindot
nga mora bag ilang buot ipasabot
nga ang inyong gugma
molungtad hangtod sa kahangtoran
nga wala gyoy paglubad

abi mo, ayaw lang kasuko,
lahi baya ang akong nakita.

morag nagpaingon na mo sa
pagsugat sa usa ka kataposan
busa nagpahulagway mo aron
unta di mo malimtan

o siya lang ba kaha ang di nimo
gustong hikalimtan
diha sa nag-ungaw niyang
pagpanghupaw

kon balikbalikon

bisag unsa kaanindot
ang kanta
kon siging balikbalikon
matag oras
sakit na gayod sa dunggan
pamation

kausbanan sa layong panaw

sa layo nga panaw
maabtan mo ang pag-usob-usob sa panahon

kaganiha kusog ang init
busa gitangtang nako ang akong sapot

miabot ang ulan busa namandong sab ko
sama nimo

usahay makaingon ka
naunsa ba kining panahona sigi mang nag-usob-usob

sama nato, ikaw namaypay sa tigtugnaw
ako, nagbukot sa ting-init

posisyon sa kaminyoon

dili sa tanang higayon nga ikaw
ang magpaibabaw

gasalig ka nga ako kaniadto kanunay
nga nagpailalom lamang

karong gabhiona nagpatakilid tang
duha unya gatagbo ang atong mga gininhawa

morag patas ang atong panaghap
nagduladula ang atong duha ka dila  nga morag mga bata

apan kadtong usa ka higayon nga ang atong mga sampot
nagtagbo kay lagi nagtalikdanay man kita

abi mo, mas nindot ang akong mga damgo
dili lang ako, dili lang ikaw, naa koy nakitang lain

unsaon ko kaha pagsulti kanimo nga mas ganahan ko adto
mas gawasnon ko, unya lami ang akong katulugon.

TIMPLADA SA USA KA GABII NGA KITA RANG DUHA

laposlapos ang
imong makita sa samin
nga baso

gihulog ang lima ka
ice cubes nga lubad kaayog
tingog

dayon sa imong puti nga
kamot
gibuhos mo sa hinay hinay
ang akong
san mig light

ang pagsulat dili baya
hago,
usa lamang kini pagpahungaw

usa kini ka pagpangalisbo sa usa
ka tinagoang
kahinog,

kon walay kahungawan
asa man kaha ang buthanan?

kon dili makapangalisbo,
moinit ang giputos mong bakat
madugta dali ang
kahinog,
malata, magtubig,
ug sa kataposan mahimong
sama kanato nga
unya
wala nay pulos.

siya nag tigtabon sa imong mga sayop
busa ikaw ang malipayon

siya ang tigsulti nga ang balay didto sa
taas sa bungtod lig-on
nga ang mga tanom didto namulak
ug ang mga kabayo ug kabaw didto
kusgan ug kusog managan

siya ang nagsigig pamakak alang kanimo
ug busa ikaw ang malipayon

sa laing bahin, wala usab siya nagsubo
alang kanimo
gisabot ka niya, sama sa usa ka lubing
buang kuyog sa dakong bulig

nga inig kahulog sa sama kanimo
inig tapos ning tanan, iya kang uyugon
wala siya'y gustong madungog kanimo,
dayon, iya kang ilabay didto sa suba

ug kini ang iyang kinaham nga lantawon,
ang imong paglutawlutaw ug pagkaanod
ug siya mobalik sa iyang balay didto sa
habong nga bungtod, kuyog sa iyang kabaw
ug mga kabayo, ug sa iya usab nga
gipanghimakak kanimo

ang iyang gugmang matood.