ang tanga ...

dugay na nga nagkamang
kining tanga sa akong likod
samtang nagsulat ako
kabahin kanimo,

nagpasagad na lang ako
wala na nako hunahunaa kon unsay
dangatan kon
iya na akong paakon

nagpadayon ako og sulat
kabahin sa usa ka daan na kaayo nga
lungsod nga giabogan na hapit
sa kalimot
didto ka nagpuyo sa una
og didto usab ako
unang namisita

midagan ang tanga og nagsalag
sa tungatunga sa akong alimpulo

nagpaabot ako nga iya akong paakon
apan basin og nahadlok siya sa
kapait unya sa dugo nga gikan
sa akong kasingkasing

lagom ang akong mga ugat
dag-om ang bulok sa akong dugo.

unsaon ba pagkab-ot ang kalipay?

sa saktong mga katuyoan
sa tiunay nga pagbuhat sa
pagtabang sa uban
sa mga gisakit, nagkalisod,
nahikalimot og
nangawala,

sayod ako,
nga dili na ako magsubo
og mag-inosara.

hala ka
ayaw patugatuga og luwas anang
tawong hapit na malumos
sa lawod sa dagat,

kay hangtod sa kahangtoran
imo na kuno siyang
tulubagon...

di ba hadlok?
uyon ka kaha?

bugnaw ang atong kalibotan
wala man untay ice ang mga kakahoyan
dinhi sa kilid sa atong panimay

bisan gani og migitib na ang adlaw
hangtod sa misyagit ang orasan sa alas dose
sa kaudtohon
bugnaw lang gayod gihapon ang atong
kalibotan sud ning atong panimay

kulang ang kainit og ang kabag-on
sa habol dili na katugbang sa nawalang gugma
ning atong panimalay nga wala na ang
panimuyo.

Sulat

Hubad sa balak," letter"

Maampingon kang
misu'od  sa sobre
sa dihang ikaw nanamilit

Apan ang tinood nga ikaw
mipanaw na sa gubat
batok sa nahitabo
sa imong amahan.

Ang katapusan niyang kasaysayan
nagsugod og mugna sa tambalanan
sa usa ka lungsod
nga di ko na gani mahinumduman
hangtod nga ang imong pangalan
maoy katapusang silabang nalitok
sa mubo kong pag-ampo,
pangaliyupo nga mura ba og
kini makapanalipod kanimo
o makaayo sa karon
nga daw naay butang
alang kanato sa umaabot

Dawata Kining Kahayag

hubad sa balak, "take this light"

Usahay naay mga panghitabo
nga sa iyang kahilom
imo kining mamat-an.

Sama sa kadalisay
sa kahayag nga milusot

sa rehas sa imong  tambo-anan

nga naglamdag sa lab-as nga batunaw

Anaa ako sa gawas
namasin nga makita
mo usab ang dan-ag.

Kani usa usab ka panghitabo.
Ang akong pagpaabot,
maoy nagpahilom sa kahayag.

ang bagyo umaabot og ang duha ka tigulang nga magtiayon
naglingkod sa ilang katre atubang sa bintana nga naglantaw sa dagat
sayod sila kon unsa ang kasakit
pait sa dila mosurup sa kasingkasing
makapiang og ang kawayan nga tungkod maoy mag-agak
kanila hangtod sa lubnganan
apan dili na sila malisang niining
pagsalop sa adlaw
makabalo gihapon sila sa gahom sa
duha ka kamot nga
maghawiray.

ang panganod naglutaw mikuyog sa hangin nga wa sad kabalo kon asa padulong nagkasinabot silang duha sa paghatag og kahulogan kon unsa ang katarungan nganong nindot pa gihapon ang mabuhi dinhi sa ibabaw sa bungtod.

nagkasinabot ang tulo
ka mga kalag nga
moadto sa England
nanglingkod
atubangan sa farm

adunay lalaki
nga mihilak sa
kilid sa bintana
sa chow king

basin kaha
og init ra kaayo
ang sabaw sa
noddles

agig respetar sa kabuntagon...

misulti na ko
sa bintana nga akong
giabrihan

"good morning world"

then balik kog
sulat sa akong mga balak
nga nagsigig
pamalikas...

(it is a bad day...)

lami ilarga og Egypt
tupad ni Mubarak.

Gidamgo Ko Ikaw Sa Kanunay

Gidamgo Ko Ikaw Sa Kanunay
By Genamos_US of Washington DC, USA

Gidamgo ko ikaw sa kanunay
Ang imong imahe makalukmay
Sa akong damgo dili ikaw tinood
Pero sa dughan ko ikaw nisulod

Kung aduna bay gamayng pamaagi
Nga mahikap ko ikaw sa damgo ipuli
Ang imong tam-is nga halok ug tingog
Nga gusto kung tilawan ug madungog

Gidamgo ko ikaw sa kanunay
Sa mga bukton mo ako magpauraray
Ibugkos ko sa imong dughan
Kining pagbati ko nga bulahan

Bation ko ang tumang kamingaw
Sa matag damgo ako gipukaw
Kung ngano kini naghasol
Sa pagbati nga dili mabasol

Gakson ko ang imong anino
Uban sa tagay ning bino
Ang imong alimyon
Ang kahumot nagpadayon

Ang imong panagway
Bisan sa damgo tiunay
Padayon nag-uban kanako
Sa hunahuna nga nagdako

Ikaw ang bugtong nagmando
Sa damgo lang kita matagbo
Pugngan ko ikaw sa paglakaw
Aron ang damgo dili mahanaw

Gidamgo ko ikaw sa kanunay
Mga tuig ug adlaw nilabay
Hawiran ko ang pagmata
Aron sawhan ta ang romansa

Gamating Nga Iring

Mitungtong sa tiil  

Ang gamating nga iring

Misandig-sandig, mipakilid

Mipaduol lang gyod sa kainit.

Bugnaw ang semento

Wa siyay tsinelas

Wa na pod siyay inahan.

Nailo ba siya o biniyaan?

Mibutho siya sa kusina

Gisagop niya kining balaya

Gihimong unlan ang akong tiilan

Panahon sa ting-ulan.

Akoy

2011.2.5

Akong Kasaring Kaniadto

Akong Kasaring Kaniadto
By Genamos_US of Washington DC, USA

Aduna koy guwapang higala
Nga nagpuyo nga karon sa Italia
Maayo ni siya mosayaw
Mga lalaki makapanghupaw

Ang iyang pagka alegre
Sa mga klasmet siya nadiskobre
Buotan ni siya nga pagkababaye
Bisag naglagot iya nalang ibayle

Sa high school pa kami niadto
Ang sayaw nga iyang paniudto
Kay uso pa kaniadto ang estilo pinabagets
Mga estilo sa senina wala ko ka gets

Adunay usa ka higayon
Naglakaw ko nga nagpahiyom
Gisugat ko sa usa kung higala
Sa softdrink nga iyang gidala

Pabugnaw kuno ni kanako
Gikan sa higala kung dako
Paghangad nako sa building
Si inday diay nagpaduding

Wala ko kahibalo kung kinsa kanila
Kadtong bugnawn softdrink nga gipadala
Daghan ang nagtan-aw kanako
Sa mga hugyaw ako midoko

Hapit ko intawon napandol
Kay wala akoy ikasokol
Sa mga hugyaw sa akong mga higala
Kay sa softdrinks nga perting tam-isa

Lisod ning manggiuwawon ta
Kay gamay ra atong mga higala
Dili pareho sa akong usa ka schoolmate
Tibook eskuwelahan iyang mga roommate

Kung makalabay ko sa ilang classroom
Mokalit lang ug banha murag naay giurom
Nahibulong kung ngano kadto
Kung aduna bay nilabay nga multo

Mga klasmet akong gipangutana
Kung unsa kining pagkahitaboa
Malingaw gayud ka niya
Kung kini siya mokatawa

Madungog nimo ang mga bahakhak
Murag ang langit ug bituon mangatagak
Ang iyang mga pasiaw
Mga suliran mo matunaw

Kay tiunay kini iyang gibati
Sa matag komedya iyang gipili
Walay pagkalaay ang imong adlaw
Kung imong ikauban nga maglakaw

Kay dili mahutdan og estorya
Sa personalidad may kompyansa
Karon kay iya naman nakab-ot
Ang damgo nga iyang gipaabot

Mga kabulahanan iyang gipaambit
Kay ang tingog sa Diyos siya gisampit
Karon kay malipayon nga siya
Sa kamot sa iyang hinigugma

Busa kini akong ipaambit
Ang kasinatian ko nalambigit
Ang uban dili nalang nako isulti
Basin masipyat ta sa akong ipanulti

Lisod ra ba gyud ni siya maglagot
Kay ang mga bukton manghugot
Unya sa sweatbands siya magpalaban
Sa sayaw nga dili kakumpyansahan

Perting humoka sa iyang lawas
Murag iring nga mangawras
Nalipong ko sa estiping perting lisora
Mga witik-witik sa kamot perting liboga

Talented gyud ning akong higala
Nabulahan ang nasod sa Italia
Kugihan nga walay sama
Sa kapalaran siya giamoma

timbang timbang

sulat sulat lang
hulip lang sa kalaay

itsa itsa og bola
paingon sa langit

ontol ontol lang bay
sa kotson nga panganod

labay labay lang bay
basin makaabay

sa pikas bahin
gatipun-og ang kabahin

konbikto dili?
daog pildi?

unsaon ko man ni?
pagkaapiki

chat chat sa ta bay
ginagmayng kalipay

facebook facebook sa
ta oi
parisan og taghoy

sa laing bahin
takbason ang bitin

timbang timbang
timbang timbang

asa ang ebedensya?
kinsay gisaligan?

timbang timbang
susi susi sumpay sumpay

hangtod mailhan
kon kinsa gyod ang gapatay.

nakasulay ka na ba anang
pagsulat nga pamahala?

nakatilaw ka na ba anang
walay mamati?



nakasulay ko.
pait.

apan kon naa pa ka diha
kalipay ko ra

nakadungog na ba ka
kabahin sa dose ka mga
bungol?

nakadungog ka ba kanako?
kon wala

congratulations kay
ika trese ka bay!

tagai lang god....

gilisod-lisod mo ang iring,
naglagot ka nganong sige kining saka sa imong
banggera og dayong panungkab
sa imong inun-onan diha sud
sa imong kolon,

og nganong di man god nimo
pakan-on og sakto hukaran diha sa
salog sa pipila ka
isda nga palotpot?

magtiayon usa ka kagabhion..

sa pikas lawak
nag-utingkay ka og mga papeles
madungog nako ang
mga wiris wiris og dayon gisi
sa ambot og unsa
mga resibo sa utang
nga nabayran na
o updated financial
statements sa imong
negosyo...

giwang lang sa pultahan
ang naglagyo kanato

nagtalikod tang duha
apan usahay molantaw ko
tungod sa imong
mga ginagmayng kasikas
nga morag dunay mga
bagtok nga nanagan
sa ibabaw sa kisame
o basin og mga
dwende ning balaya
nga karaan na

hinoon ako
anad na sa akong kahilom
naglibot suroy ko sud
sa akong utok
naghunahuna og bisan unsa
nagpaabot sa dikta
sa akong mga musa

magbabalak man god kunuhay ko
unya ikaw
sab negosyante
tig-ihap og kwarta tigbalanse sa
mga bayad og mga utang

magbabalaod man god kunuhay ko
unya ikaw
ako man kahang asawa

basin nakalimot ka nga naa
sab diay kay bana?

sa pikas nga lawak.

nindot di ba? terno ang sofa og ang carpet sa sala
yellow green ang mga ponda, og labong kaayo ang mga presko nga bulak diha
sa vase
sinaw ang brown nga center table
ang john humok og ang design bulak bulak
contrast ang light sa morning
sa salog nga medyo may pagka-artistic ang pagkalagom
sa marble

just perfect...

kalagot, ning balaya, ay,
mga iro ang hawod kanunay

kon di mabantayan
magpahayahay ang mga kanahan!

magligad ligad sa sofa
magdagpanay sa sala

kon bunalan og tabla
palaban sa ilang Mama.

dapit sa udto
maoy akong nakita ang
lalaki nga walay t-shirt
naglingkod sa kilid sa ilang puti nga balay
atubangan sa pultahan nga
sarado

samtang ang ikog sa iro
sa ubos
nagkiwilkiwil hangad sa
iyang amo

makalipay tan-awon
ang panag-amigo
kiwil sa ikog
og ang pulong nga
tukoy-tukoy...

kagahapon man god
miabot ang akong maestro sa high school
nga bag-ohay lang nga nabyudo

nagpakita sa iyang survivorship claim
sa iyang asawa nga nagmaestra sud sa
25 ka tuig

og tungod kuno sa daghang utang
ang nahibilin P2,810 na lang

nagpahungaw
nanigarilyo nga morag pugon nga
walay undang

kusog ang ulan sa gawas sa balay
og bugnaw ang panahon

gibutangan nakog kape
usa ka pungpong nga grapes
og chocolate nga pasalubong sa akong
brother-in-law nga seaman
wa ganahi sa tanan
nga gibutang

og nagpunay na lang kinig bulhot
sa akong nawong og sigarilyo

og busa
aron pagpakig-ambit sa iyang kasakit
mikuha sab kog sigarilyo og mibulhot
sa mga aso sa iyang nawong

mora mig nagpista og aso
mora mig mga bulkan nga nagdungan og
kaboto

mora sab og naluagluag ang akong
dughan
makahupay man diay usab
ang pagpanghupaw
og lutawlutaw diha sa
bagang aso sa sigarilyo
samtang
mamati kita sa kahigwaos sa
ubang mga
dili kaayo malipayon
uyamot

mao nga
ako, nakasulat og pagdapig
diha sa
sigarilyo

pagpanigarilyo...

ang madungog sa pagpanigarilyo
kanunay dili baya gayod maayo

kay kuno makakanser sa baga,
makadaot sa atay, makabahog gininhawa
makaitom sa alingagngag

wala nato mabati ang mga katarungan
sa sigarilyo

pila na kaha ang pagpanghupaw ang iyang
napagawas sa baba?
pila na kaha ang kapungot og kalagot ang
iyang nahupay?
pila na kaha ang plano sa pagpatay ang
nawagtang diha sa aso sa tumoy sa iyang
nagbaga nga kalayo?
pila na kaha ang pisi sa pagpakamatay ang
wa madayon og tagkos sa haligi
diha sa pagpagawas og paghabwa sa dughan
sa gitanom og gilubong nga mga
kasakit?

lantawa ang aso diha sa kisame sa sigarilyo nga
imong gibuhian sa imong dila og ngabil
kahibalo kining mosabot kanimo og
makighinabi

pila ka gabii nga kamo nagsugilon sa inyong mga
kagikan
nagpaambit kon ugma asa na usab kamo paingon?

gisunog mo ang imong mga kahiubos diha sa
nilikit nga tabako
gipagawas mo ang imong dili mo masulti og
nanglupad kini sa imong lawak lukop ang
mga bongbong og sa inabrihan nga mga bintana
migawas silang tanan og mibiya

samtang ang bag-ong hangin mihapuhap sa imong
lawas
mihatag sa usa ka katulugon nga maoy maghatod kanimo
sa ugma sa lain na usab nga
kabuntagon....

pagpahipi

ang kamatooran mas nasayod
sa kamatooran
sa matag adlaw nga ikaw manamin
nagpahipi lang kini sa daplin

dili kini kanimo makig-ambahan
sayod siya nga dili ka ganahan
dili kini makighawid sa imong kamot
kay basin og ikaw unya mangomot

magpahipi lamang ang kamatooran
kay andam na kini kon unsay dangatan

Salingkapaw Nga Kagawasan

Salingkapaw Nga Kagawasan
By Genamos_US of Washington DC, USA

Dili ba nindot paminawon
Kung ang tawo gawasnon
Nga buhi ning kalibutan
Nga luwas sa mga suliran

Usa lamang kini nga pangandoy
Sa matag dughan gipang-asoy
Gihangad sa manggiloy-ong langit
Ang matag adlaw nga mga hagit

Kung atong subayon ang kasaysayan
Mga gisugilon sa atong katigulangan
Ang dagan sa atong nasod
Daw gibanlas sa dagkong balod

Nga walay kasigurohan
Kung unsay sampotanan
Daw kini gitiaw-tiawan
Sa mga walay batasan

Pagkaanogon sa mga damgo
Nga ang nasod wala moasinso
Gumikan kini sa atong kinaiya
Mobarog nga walay kompyansa

Asa naman tong mga naula nga dugo
Nga gilimos sa atong mga bayani
Alang-alang sa atong kagawasan
Gikan sa kamot sa mga dayohan

Ato na ba kining kalimtan sa dayon?
Kay ang kagawasan dili man sayon
Gibiyaan ang mga bulawanong mithi
Aron sa pagpadayon sa atong kinabuhi

Wala nga ba nato madungog
Ang tingog sa ilang pakigbisog
Mga dangoyngoy sa pagdumot
Sa kagawasan nga wala makab-ot

Nalimot nga kita sa mga pagtulun-an
Nga gibilin sa atong yutang natawhan
Gipadayag ang tingog sa kagawasan
Sa mga panglupig kita gikataw-an

Ang kusog sa mga katawhan
Sa langywang kamot gipasipad-an
Karon, hain naman ang kagawasan
Nga gituhaan nga kita nabulahan

Nakawang ang atong mga paningkamot
Mga kasingkasing puno sa kalagot
Mga tingog nga sige lang og pamaghot
Nag usik-usik lang sa atong mga singot

Ang atong kagahapon puno sa kalisdanan
Nga dili buot himoong rason og basihan
Kung ngano kining atong nasod dili molambo
Nga aduna naman tay igong tingog ug kahago

Ang nahisobra nga gawasnon sa tawo
Sa kahakog mosangko ug pagkadawo
Unahon nalang ang personal nga interes
Kay sa kinabag-an nga duot makigpares

Ang tawo walay katagbawan
Ang tanang lami iyang suwayan
Kung unsay wala kaniya matilawan
Mamintaha ug manikas ngadto sa uban

Mga batasan nga unta malikayan
Kung ang dughan unta naa sa katawhan
Gusto kung balikon ang matag kasaysayan
Aron iuli sa langyaw ang kagawasan nasulayan

Pagkapaet gayud ang kinabuhing pinoy
Sa mga sugilanon napuno sa mga asoy
Kay kining nasod atong namat-an
Puno sa salingkapaw nga kagawasan

military scandal na pod?

kapoy og pamati sa mga milyon nga
gipangawat sa mga heneral.

mibalhin ko og channel
lantaw sa cartoons diin daghang

mga pinocchio nga nag-contest og
patas-anay sa ilang mga ilong...

bisag kinsa ang naa dinha
mao ra baya pod ang buhaton

leche yawa!

pagpanglantaw...

ginhawa nga dako
manampiling sa atubangan
sa computer

way masulat

molakaw

balhin sa bintana nga nag-atubang
sa karsada

tan-aw lang

walay gihunahuna
morag banga nga walay sulod nga tubig

morag ligid sa biseklita nga
na-flat

morag yahong nga nag-atubang sa
suga sa kisame

morag mga bukton nga nag-ol-ol
walay kadapatan sa siko

ang mga tudlo nagpunay og tuguktok
sa bongbong

madungog ang pagpanagan sa daghang
mga kabayo

mahinumdom ka ba ni
Diego Salvador? si Tiagong Bangkilan?

si Flora del Cielo? ah, si Reneboy og
Flor de Luna?
Kaila ka ni Saturno?

manampiling sa bintana
walay nailhan nga nanglabay

tuk-ong, ipatong ang tiil sa bangko
manghingiki sa ngipon

pagkasamok sa kalibotan
pagkakusog sa hangin og nangahulog baya ang mga
dahon sa balimbing

kapoy.
wa koy labot

dayog sira sa bintana
palong sa suga (kay ngitngit na)

walay panihapon
katulog.

ang mga amahan nga naghatod
kuha sa ilang mga anak nga nag-eskwela og kindergarten
sa among atbang
malipayong naghisgot sa bisan unsa na lang sa ilalom
ning kalibotan

tuyok tuyok ang mga sugilanon
nga walay tumong

sa pagbagting sa bell nanggawas na ang mga bata
nga tagsa-tagsag hawid sa bukton sa mga amahan nga dagkog mga bukton
og bagtak

tagsa-tagsa dayon og sutoy ang mga motorsiklo pauli sa ilang mga balay
alas-dose na
tingpaniudto na usab

matag adlaw, naay maghatod, naay magpaabot,
naay mobiya

ako ang naglantaw sa kanunay.

sa beach...

nawaslik ang mga nagkatay
sa balas
kagabii sa dakong balod
sa kusog nga hangin

pagkabuntag
sa gihapon namulak
sagol asul og
tapul

ang song of india
milabong sa kilid sa
labat nga kawayan

mibatog ang asul
nga alibangbang sa
puti nga rosa

sa kilid sa pultahan
nahinanok si Sansan*



* iro sa among silingan

sa sud og sa gawas

bugnaw nga hangin
mihapuhap sa aping
puti nga kurtina

sa gawas ang kainit sa
mga tudlo sa adlaw
minggitik sa
pula nga gumamela.

Niadtong Nilabyng Mga Adlaw

Niadtong Nilabyng Mga Adlaw
By Genamos_US of Washington DC, USA

Niadtong nilabayng mga adlaw
Mga panganod nagsayaw-sayaw
Sa kabaga sila nagpasopaso
Kay ang adlaw wala nipasiyo

Inanay nikisdum ang langit
Nga ang adlaw nanamilit
Gibabagan ang iyang kahayag
Sa nasuko nga langit nipalag

Nangabasa ang mga yuta
Mga dahon laya nga nagduka
Nag-anam anam ang tumang kahilum
Nga ang dagway sa adlaw niaslum

Kay ang kagabhion nga nagpaingon
Aron apason ang buwan nga gitugon
Sa mga nahabilin nga kahaponon
Nagpaabot sa buwan ug bituon

Samtang naglingkod ko sa bantawan
Mga kanhing larawan akong gikuptan
Gipangtan-aw ko ang matag imahe
Uban sa pagsawop sa adlaw nga napilde

gisulat mo ako
gisulat ko usab ikaw
sa matag karon
og unya
giukit mo ang
mga letra sa
akong ngalan
gusto mong sabton
ang matag letra
gisulat sa bitoon
og ang bitoon gisulat
ko usab
ning kalibotan ta
tuya-tuya ang
kamatooran
gihambin ko ikaw
og gihambin mo
usab ako

nagsakit ang akong
dughan
og mitulo ang luha

apan walay pulong
ang gibungat
sa baba.

sa paglabay sa mga
katuigan

usa ka adlaw niana
mabati nato ang pagkapiang
sa atong mga bukton

ang lisa sa atong hawak
ang pagkurog sa mga tuhod

gusto natong moluhod og
mangayo og pasaylo
gusto natong balion ang
atong mga kumagko
diha sa altar sa kaminyoon

apan ulahi na ang tanan kay

ang angayan nga makadungog
unta niini
unsaon ta man
hagbay ra mang gihatod
sa iyang lubnganan

ang iyang dalunggan dili
na makadungog
og ang iyang baba
dili na makatingog

magsuroy-suroy ka sa mga
takna
maglibot-libot ka sa
walay kataposan nimong
mga pagbasol

Managlahi Ang Atong Mga Pagbati

Managlahi Ang Atong Mga Pagbati
By Genamos_US of Washington DC, USA

Unsay timaan nga ang tawo nahigugma ug kanus-a?
Mga pangutana nga naghasol ni ining kalibutana
Ang suod nga panaghigalaay ba o kaha naibog ta sa uban
Mao nga ba kini ang pagatawgon nga gugma ug basihan

Adunay mga pagbati nga ginadili sa mata sa langit
Maila ba nato kini gikan sa atong dughan ang hagit
O kaha masabtan ba ning maaghop tang pangisip
Mga pangutana nga lisod ang tubag iholip

Angay gayud kining pagasabton ning kinabuhi
Aron magiyahan ning atong dughan sa pagpili
Adunay mga pasumbingay nga lisod sabton
Ug adunay mas lisod sab kining pangita-on

Pila man ang ginahanglan nga kalipay
Aron makab-ot ang gugma makalahutay
Dili mapugngan ang gugma sa kausaban
Kung pagbuot sa kapalaran kini hilabtan

Adunay dakong kalainan ang matag usa kanato
Sa mga panghunahuna ug tinguha kita gitagbo
Labi nga gyud kung kita gilamat sa gugma
Ang duha ka mga kasingkasing magkahiusa

Ang lalaki gamiton niya ang iyang mga mata
Aron tilawan ang kaanyag sa gugma
Ang babaye gamiton usab niya ang mga dunggan
Aron sa pagmati sa pinitik sa iyang dughan

Duha ka managlahi nga mga binuhat
Nga gituyo sa langit sa pagsulat
Kung ang usa ka tawo tinood nga mahigugma
Mahimo siya nga magbabalak sa iyang pagmata

Malitok niya ang mga talagsaong pulong
Ilawon sa dughan kaniya nagpasilong
Ang babaye ahatado kon hisgutan
kabahin sa ilang relasyon nga gitahan

Sa kinaiyahan ang lalaki magpanuko
Ang pagsulti sa tinood nga gibati modoko
Mao kini ang kinaiya nga gihatag sa langit
Nga pagasabton ug himoon kining hagit

Sa mga babaye kining pagbati mahisaypan
Ang pagtoo nga taphaw kini ug gibugalbugalan
Ang kasingkasing sa babaye lahi, bukas ug dayag
Nga maoy nagdala og kainit sa kahayag

Lisod gayud pagasabton ang kamatuoran
Ang pagtugkad sa hunahuna sa uban
Mahimo kining usa ka tagna tagna o sulagma
Kay wala tay gahom sa pagtan-aw ning atong ugma

Lainlain ang mga tima-an sa gugma kung kini moabot
Magdepende kini sa pagsabot sa gibati niyang pagkahugot
Mangandam kita kung ang timaan sa gugma nisubang na
Aron sa pagtudlo ning atong kasingkasing sa pagmata

ang tugon...

duna akoy gibilin
sa ilalom sa hunos
nga imo ra puhon nga
ablihan
sa akong pagpanaw

tan-awa lang
batia lang....

(ingnan ko lang ikaw daan
nga dili mo kini makita

bation mo lang kini
diha sa mga wala nako masulat
diha sa mga kahaw-ang
sa mga hunos nga wala na'y
sulod
sa mga bintana nga abri
ang katunga
sa mga pultahan nga
guba na ang mga kandado...

ang tugon mao,

dawata ang tanan
nga haw-ang
ilubong kini sa
ilalom sa yuta

mobanos na dayon
ang kapuno sa
lain na usab nga
kahaw-ang

ah, kahinumdom ko
dayon kabahin ni
papa sa dihang dali
dali gayod kining
miapas kang mama

og ang puting salapati
didto sa kilid sa
bintana
wala na gayod
nag-inosara....

bayas

ambot og ngano
nga basta gani ok-ok
bisan og moingon pa
kini sila
(kon makasulti lang
god unta)
nga limpyo og

manag-uyab nga
nanuroy lang god
pod unta
sa mubong higayon
sa ibabaw sa imong
banggera
sa silong sa dakong
kaldero nga
gilutoan sa humba
kagabii

ambot og ngano
nga imo man dayong
giisprihan og baygon
og ang duha nga
nagtupad og
naghan-ay sa ilang
mga antena
tan-awa karon
haska na gyoyng
tikiga.

ang usa ka ok-ok
nga nagpahipi sa
kilid sa kolon
(nga naglantaw sab
sa duha ka ok-ok nga
kaganiha nagtupad
nga morag nagselos)
haskang lipayang
mibalik (sa siak
sa kawayan didto sa
kusina) nga
dugay na niyang
gipuy-an

ala una bente tres sa kaadlawon: paghisgot

ang sakit sa dughan mao
ang kamaong mosulti kanato
kabahin sa unsa ang
mahinungdanon

sa paghawid sa imong mga
kamot sa imong dughan
mabati gayod dayon kon
unsa ang angayan nga biyaan

ang mga dagom og ang
mga mata niini
ang mga kabaw og mga
tungaw

ang mga pako sa kwaknit
ang binali nilang kalilbotan
ang pagsukwahi sa unsa ang
angayan og pagatuhoan

ang mga pagtapos sa mga adlaw
og ang pagkayab sa bulan
ang paghimugso sa mga bitoon
nga gustong kab-oton

ang mga angayan na
nga ilubong sa yuta
ang dili na angayan nga
kaykayon pa

ang mga giayag og ang
mga gipalid sa tayhop
sa hangin
ang mga tipasi og nga
bato nga
dugay na untang imong
gilabay gawas
sa bintana

kining tanan
maaninaw usa ka gabii
sa pagsakit sa
dughan

sa kaadlawon sa siradong
bintana
sa kabugnaw kaayo sa
hangin

mohunong ka
manamin
og paayonan ang
tumang kahilom

pagpapas sa mga tunob didto sa daplin sa baybayon

kusog ang hangin
og dagko ang mga balod karon
didto sa daplin sa baybayon

gibalikan ko ang akong
mga tunob
adunay uban nga dili
maabtan sa mga
kamot sa balod og
busa wala kini
mapapas

akong gilantaw pag-ayo
ning akong pagbalik
og gipapas ko dayon ang
tanan

sa imong pag-apas
kanako wala ka nay
makita bisan og usa pa
kabahin kanako

ayaw paghunahuna og
unsa
mas makaayo kanatong duha
nga mahanaw ang
tanan

nianang kusog nga hangin
kuyog sa mga nangapalid nga
dahon sa abgaw
magsugod ang tanan

kay diha sa tunga-tunga sa bagyo
anaa ang akong pagtoo
nga matawo na usab ang mga bag-o

sa mga wala matuyo...

ang oras, ala una kwatro
sa kaadlawon
pait ang mahigmata sa
usa ka katulugon nga
giputol-putol sa mga
kabalaka
nga nag-aghat na usab
sa akong mga tudlo sa
paghimo og mga
panaw

layo na usab ang akong
abtan
damgohon ko na usab ang
mga nangagi

magsulirat ang akong
mga mata
sa pagpangamuyo sa
akong mga tuhod

gibati mo ba ang kaibog sa
nangagi natong duha
sa dihang nakit-an mo
ang duha ka alibangbang
nga nagsumpay sa ilang mga tumoy
sa kilid sa punoan sa kahoy?

perspective

sa halapad nga panglantaw
kitaon ang tanan,

lingi sa wala og lingi
sab sa too

walay laktaw
ubos og ibabaw.

Nahigmata Nga Pagbati

Nahigmata Nga Pagbati
By Genamos_US of Washington DC, USA

Niadtong wala ko pa siya makita
Ang dughan ko padulong sa pagkalaya
Mga hunahuna nga saag nagkatigulaag
Sa pagpangita sa tinood nga kahayag

Sa pagtuo nga walay gugmang gituhoan
Gumikan sa bati nga gugma nasulayan
Daw maanindot ug tagibanwa mga sugilanon
Sa radyo og telenobela lang kini pagaduwaon

Pero mao kini ang tinood nga panghitabo
Sa giasoy kung kasaysayan ako nasubo
Lain man ang lihok sa akong hunahuna kaniadto
Sa napalta nga gugma ako mangayo og pasaylo

Daghan man ang nag-ingon
Usahay ang gugma katugon
Panghitabo nga dili malikayan
Kay ang gugma giduwa-duwaan

Daghan ang panagway sa gugma
Mga hagit nga puno sa romansa
Dili igsapayan ang gugma nag-aginod
Basta ang mahinongdanon dili maunlod

Ngil-ad man o nindot nga kasinatian
Kini gayud ang tinood nga kalibutan
Sa walay kahadlok kini akong giubanan
Adlaw ug gabii giabyan kung kamatuoran

Ang kinabuhi kung gisubay kaniadto
Ayaw hisaypi nga dili ko romantiko
Sa usa kasinati-an nga dili malimtan
Nga nagtudlo kanako og pagtulon-an

Sa Iyang Pag-inusara

Lab-as nga hangin

Ang mihulbot sa panghupaw

Hapyod sa mga balod

Ang mitagbaw sa baybayon

Sa iyang pag-inusara.

Akoy

2011.1.31

Sakob

Nahinanok ang palibot
dihang gisapnay
sa kagabhion ang
kinatumyan sa kahilom


Bisan og supak
ang banagbanag
sa kasulopan sa kangitngit,
ikaw nga dumuduong
puno sa tam-is
nga katarungan

Sakob ka
sa Hubong sanga
sa panahon sa tingtugnaw
nga nagsanta sa iyang pagkatagak

Uban sa mga layang dahon,
mao lamang ang alingawngaw
sa kaparutan

Sa Akong Pag-inusara

Sa Akong Pag-inusara
By Genamos_US of Washington DC, USA

Hilum ang mga palibot
Ang kamingaw dili masabot
Ngi-ob ang kahaponon
Mga panganod nga nagtigum

Nitayhop ang hinay nga hangin
Ang kabugnaw nga nagpabilin
Kay nag-uwan gahapon og yelo
Natagak sa langit nga walay abiso

Ang abuhon nga yuta gihabulan
Sa puti nga yelo sila gitandayan
Ang mga opaw nga kahoy
Giagbayan sa yelo nga gikapoy

Ang mga langgam nitago
Sa katugnaw sila nabilanggo
Ang mga piso nga nagpiyak
Nangita sa pagkaon nga naghilak

Dinhi ning akong nahimotangan
Duol sa kahoy nga ilang gitungtungan
Nakapanghupaw ako nagtan-aw kanila
Ang dughan ko giduaw sa mga pangutana

Kung unsay naghulat nga kapalaran
Sa tanang kinabuhi ning kalibutan
May mga tagsa-tagsa nga agianan
Nga kita namugna nga may katuyoan

Ang Tingog Sa Mga Katawa

Ang Tingog Sa Mga Katawa
By Genamos_US of Washington DC, USA

Ang tingog sa mga katawa
Dughan ko papahuwaya
Ang tingog sa nagduka nga kahilum
Butang nga matahom ug may gahum

Ang tingog sa mga katawa
Makapungot sa may mga problema
Kung ato sab kining iluom
Hayan kita nga molagom

Pagkanindot sud-ongon
Mga panagway masanagon
Sa mga kinagiki sila nagpasilong
Nalingaw sa mga pasiaw ni Dodong

Kay ang katawa makatakod
Sa mga kasadya dili ikalimod
Isabwag nga gasa sa kamaya
Aron kab-oton ang himaya

Ang tawo dali ra kabigon
Sa mga tawong malipayon
Iladlad ang tinood nga kalipay
Sa mga nagsubo makahupay

Ipabuhagay ang tingog sa kalipay
Aron kalimtan ang mga pagsuway
Ang tingog sa mga katawa
Pagbati nga perting dakoa

Pasagdi ang nagsagom-ot
Mga nawong murag gikomot
Sa mga kunot gitandayan
Mga kasingkasing gipaundayan

Kung ang dughan ko nagsubo
Kay gisapot ang adlaw gisugo
Nagdumili sa pagtawag
Sa tingog nga walay pagkayabag

Ang tingog sa mga katawa
Dughan ko intawon pasayawa
Sa nindot mong mga talidhay
Ikaw ang kalibutan ni Inday

Sa Takulahaw Muabot Lang Ang Gugma

Sa Takulahaw Muabot Lang Ang Gugma
By Genamos_US of Washington DC, USA

Sa takulahaw muabot lang ang gugma
Gipaabot sa uban nga perting dugaya
Walay petsa ug adlaw moabot
Sa kasegurohan usahay makasapot

Daw usa ka udyong nitaop sa dughan
Nga lisod ibton kung sa pagbati nabulahan
Ang kasingkasing ug hunahuna nagsalimoang
Kung mahigugma murag dili mahimotang

Kasagaran dili ganahan mokaon
Bisag ang sud-an lami kan-on
Magtimi-timi dayon sa paghungit
Kay ang hunahuna tua na sa langit

Ang mga mata magpitokpitok
Kay sa gugma sila gipamitlok
Maghunahuna sa mga nanghitabo
Kung kanus-a ang sunod nilang panagtagbo

Kung dili magkita sa pipila ka mga adlaw
Mga Kasingkasing puno sa kahidlaw
Kung walay kominikasyon nagpahibaw
Mag-emote dayon sa daplin nga walay tiaw

Kung sa Takulahaw gayud moabot ang gugma
Dili kita magdalidali aron dili madisgrasya
Sa mga pagsalig nga nindot paminawon
Ayaw dayon sa pagtuo sa mga saad ni Dodong

Ning modernong panahon karon
Dali nga ang tubag maangkon
Kay sa text, chat ug email ipadala
Ang mga mensahe nga pagkadali-a

Kung mag-text gani dili tubagon
Ang mga hunahuna madudahon
Kung walay motubag sa cellphone
Sa balay ug boardinghouse susihon

Magmatngon kita sa Gugma
Kay moabot bisan kanus-a
Dili matagna ang panahon
Kung unsay moabot kita paninglon

Pagkanindot gayod kung mahigugma
Kung ang imong napili walay sama
Sa kalipay walay labad sa kinabuhi
Kay ang gugma nipabor nga nagtingsi

dili katuhuan
nga ang sugod sa away
sud sa duha ka gatos ka tuig
mao man lang diay
ang husga ni Paris
kon kinsa kanila
ang labing
gwapa....