ayaw og too kanako
kay bakakon kong dako

mao kana ang tinood
napatik sa akong likod

ayaw pailad sa akong mga bukton
makamatay kana sama sa lukon

ayaw padala sa akong mga tutok
kay ikaw ako lang gipaitok

ayaw og pamati sa akong mga pulong
kay silng tanan puros nangasuhong

ayaw og katingala nga magsulti ko karon
inday, kanimo sa tinood nga ako bakakon

kay kon ako imong higugmaon gihapon
bisan pa sa akong pagkatinood nga bakakon

nan sa akong bakak nga gugma ikaw halaran
kay kanako bisan sa kabakakon motoo ka pa man

kay inday, ang tinood nga nahigugma
sa mga bakak dili na masakitan pa

kay ang gugma inday mapailobon, masinabtanon
kanunayng motoo, bisan og ang tanan nahimo nang mga tonto.

mais nga lagom
kon akong handomon
ako makahinumdom
sa mga ngipon nga itom
nga namugna sa mam-on
sa tigulang nga
namatay nga
malipayon

kabahin anang pagdagandagan

silang tulo nanagan
sa ilang likod ang mga bala og ang mga boto-boto
ang kalayo
modagan sila palayo sa kasamok
apan ang kasamok magsunodsunod kanila bisan asa
ang mga bato nagmug-ot
wala silay kahadlok og bisan kanus-a wala sila managan
ang mga abog sa bag-o pa malisang apan sa pakigsuod
sa nangabungog nga hangin
namuk-ong ang mga abog og wala na malibog
nanagan sila
hadlok niaanang kamatayon
bungkagon ang ilang mga ulo og kutaykutayon ang ilang mga unod
og ang ilang mga bukog ipasad sa dalan
mapapas sila sa mapa sa kinabuhi
og ang mangita unya nila puhon
malimot og manginabuhi diha sa mga bag-ong kadaplinan sa mga suba
kaniadto miapil usab ako anang dagandagan
mikurog ako sa kahait sa bala nga matusak sa akong dughan
nakuyapan ako anang baho sa pulbura
og kadtong migukod kanako mibuhakhak og katawa didto sa patag
kay mitago ako sa dakong bungtod og nagkurong gihapon sa kahadlok

wala ako malig-on apan nawala na ang kahadlok
atubangon ko ang kamatayon
og kon mahimo ako siyang gakson

aduna akoy nasayran kaniya
nga wala kaayo masabti sa atong mga kauban dinhi
siya man diay ang naghawid sa yabe sa akong kagawasan
nganong ako man siyang likayan?

sa akong pakigsulti kaniya
siya mismo naglibog nganong ang mga tawong iyang gustong ilailahon
mahadlok man og managan
nagbasol gani siya usahay nga ang uban nga dili pa unta mamatay
kay kini gilugwayan man og pipila ka tuig
sa kahadlok namatay man sa usa lamang ka alig-ig

pagpaaway sa mga pulong

naligsan sa trak si pepe
napidyat
natikig si lola
mora lang natulog
wala diha ang panamilit
bisan dili kaayo kalit
o kalit
para nimo
walay kalainan
mao kana ang
kamatayon

natawo ang bata ni
maria
iyang kamagwangan
haskang lipaya sa amahan
nananom og daghan
bulahan
nanganak sab ang
iring nilang pacing
gitangag sa inahan
ngadto sa
garahian

alang kanimo
walay kalainan ang tanan
mao rang
pag-abot mao ra usab
nga paggikan
walay ordinaryo
walay espesyal

ang tanan pagpaaway
lamang sa mga pulong
ang pag-ayom ayom
ang pagpahaom

dili ka malipayon

ang naghubo nga kamatooran

ang naghubo nga kamatooran
pagkasapyot gayod og sampot

palihog migo kong tapay
tabon-taboni pod gamay

bisag dahon na lang sa
luspad nga kamunggay

pagkalood handomon
hilas baya kaayong tan-awon

kon mahimo lang unta migo
paliti na lang og sinina nga bag-o

kalagot

makalagot
kining barkong wala moabot
balik na sab sa balay
aron pagkaugma
sa eroplano mosakay

makalagot
nga pick-up
na stock-up
morag ap-ap

makalagot
makalagot
akong ngipon
mingkagot

ningbalhin kos
motorcab, pagkapait,
dali dali
aron makaabot
sa last flight

maayo gani
kay nakaabot
og nakasakay
ra gyod ti
ang panuway
nawa ang kalagot

hayahay na unta
sa dihang
nahog ang
eroplanong
gisakyan namo

(black-out)

hayyy!
maayo gani
kay damgo
ra diay

ang kamatayon ni romeo og ni juliet

pagkadako sa akong
panahon nga gigugol anang
drama sa sugilanon ni Romeo
og ni Juliet

wa kong katulog kaniadto
nga naghunahuna
anang gugmang gibabagan
anang gugmang
nahimong trahedya sa kamatayon

ting-init kadto
sud sa klase ni Fr. Galdon
gipangutana ko
batan-on pa ko kaayo adto
og gustong magpari:

"what is this Romeo & Juliet
all about Ric?"

"it's about a
love story, about two warring
families...
it is so tragic"

abi nakog nakaiskor ko sa
banggiitang pari nga ang
apapangig morag
duha ka kilometro nga
kalubian

kalit niyang gikuha ang
libro
giukab ang katapusang
panid og
gibundak sa lamesa
og miingon

" Young man
this is all about the
stupidity of puberty!"

wa kong katingog
sa akong kahadlok
og kakurat.

abi god nako og ako ray
bogo anang nataran sa gugma
daghan man diay ta.

pulawan

ang pulawan
mao ang pantalan
ang abtanan sa mga barko
og mga sakayan

mga ulo nga nangitag
balay kapasilongan
niadtong kusog kaayo ang
ulan og ang hangin
nanghadlok
niadtong ikaw og ako
naghawiranay pa sa atong
mga kamot

pagkahuman niining tanan

pagkahuman niining tanan
lantawon ko ikaw
nahinanok ka pa

idibuho ko ang larawan
sa usa ka tutok nga
nakiglambigit sa kaanyag
anang kahilom

mobangon ko og isul-ob
ko og balik ang akong pantalon
nabati mo ang kasikas sa akong
pagkabalisa
mimata ka og milantaw usab
kanako
usa ka hubo nga kalag nga
mobalik og suot sa iyang lawas

gibalikan ko ikaw
mitupad ako kanimo
nag-iyak ka pabalon sa akong
pagpanamilit
gidapion ko ang akong kamot
sa imong ngabil
og gipapas ang imong mga luha
nga mibanaw diha sa
imong aping

namalihog ako
nga pagkahuman niining tanan
ilubong natong duha
ang mga tam-is nga handurawan
diha sa mga balas
sa tumang kalimot

magpakahilom ako
sama sa pagsulsi nimo sa nagisi
nakong panyo

pag-abot unya ni kamatayon

pag-abot unya ni kamatayon
kon iya akong halogon
og hagkan

dili nako siya panumbalingon
babagan sa akong mga kamot
iwakli og ako siyang
tutukan og ingnon
nga dili pa ko ganahan

(pagkatibugok mo
morag aduna kay mahimo!)

pagsalig sa kaugalingon

wala ako mag-inosara
kay kauban ko ang
sakayan og ang bugsay
ang mga katig nga
kawayan

ang lawod og ang
mga gabon og ang
mga hunghong sa
mga gagmayng
baba sa mga balod

wala ako mahadlok
gihawiran ko ang
lig-on nga bugsay

og sayod ako nga sa
unahan anaa pa gihapon
ang nagpaabot
nga daplin
sa baybayon

dula anang kulitog

kahinumdom ka ba
sa gagmay pa kita
kanang pugson kitag
pakatulog ni mama
bisan og dili pa gyod
unta kita katulgon
nga og kon moabot
siya aron kita
inspeksyonon
mora kitag mga
monyeka nga
nagpiyongpiyong
upod sa atong mga
mata ni angelita?

nga og kon mogawas
na si mama
kahinumdom ka ba
nga nagdula ta anang
kulitog kulitog, ingon
ani ba:

(migunit ka sa akong
kamot nga akong gikumo
og dayon gisulod nimo
ang imong tudlo og dayog
ingon nga:

"kulitog kulitog
abot na ba?"

og motubag sab kog

"wala pa."

balik na pod
anang

"kulitog kulitog
abot na ba?"

hangtod nga
motubag kog

"abot na"

og dayon nato og
agik-ik og
pangatawa

hangtod karon
ikaw wala pa
gihapon makasabot
pagkamabaw mo

ikaw man unta
kadtong nangulitog
og ako man
unta ang imong
gikulitog

apan hangtod karon
ikaw wala lang gayod
gihapon makasabot

ako man god ang imong
gikulitog
mao seguro nga hangtod
karon ikaw
mabaw lang gihapon
bisan sa imong
pagkaisog

ako ang nahimong
lalom
bisan sa akong
pagkatalawan

usahay dili ko ikaw
mabasol
nganong ako ang
mas gisakitan

ang mga rason nganong magpaopaw ang usa ka tawo

ngano ba nga magpaopaw ang tawo?

sayon ang rason
kon ikaw moingon nga ikaw kaspaon
lisod dawaton nga ikaw
kutoon
mahimong imong gitagoan ang imong
pahak
kay ang opaw pahak lang baya gihapon nga
og kon ang pahak malamog sa lapad nga pahak
mahimo kanang
usa ka sinaw nga opaw

ang uban wala magpaopaw
apan opaw
og ang rason
nga sila naopaw
tungod kay sila giopawan

aduna'y uban diha nga naopaw dili tungod
kay gusto nilang magpaopaw o maopaw
o dili usab kay pwersahan nga sila
giopawan
kon dili naupaw lang sila dili gani
sa pangidaron kon dili
nangahulog
nangalarag ang ilang mga
buhok tungod sa tambal aron sila maayo og
mabuhi kay
aduna silay kanser
sakto ka,
chemo, ang hinungdan

og kon kana ang atong hunahunaon
morag mohunong kadyot ang atong kalibotan
makahinuktok
makapahinuklog labi na kon ikaw na gayod
ang maong hingtungdan
buyag lang,

apan dili kana maoy akong gustong isulti kanimo

mobalik kita sa kasagaran nga rason
naopaw tungod sa problema?
medyo mabaw ra kana kay
kinsa ba goy tawong walay problema
og nganong dili man tanan ang naopaw.

daghang rason, daghang kasinatian
anang pagpaopaw
apan ang wala lang nila nato masabti pag-ayo
mao
nga anaay
ubang batan-on nga nagpaopaw
sa mabaw nga rason
nga kuno sila angayan og
ang uban kanila maganahan
ma-turn on, kay kuno sila
sexually desirable na
kay dili ba god nga ang opaw mora mag
ulok nga sinaw?

dili kataw-anan,seryoso kini
apan mikatawa ka lang gihapon

sa laing bahin, nagpaopaw ang akong suod
nga higala sa rason
nga nagsipok ang iyang utok
init kaayo ang iyang mga buhok
igang ang palibot
alingiing ang hangin
nanginit ang iyang sampot
og midako ang iyang sapot
kay siya kuno wala na makasabot
sa iyang kaugalingon,

kon unsa siya,
unsay tuyo sa iyang pagpakabuhi,
unsay pulos sa iyang hinanaling kamatayon
kon iyang tuyuon
kon asa siya padulong
kon nganong ania siya dinhi


nahingangha ko, nakuratan ko
kay ang iyang
pagpaopaw nahimong hinungdan sa daghan kaayong
existential questions

nahilom ko sa makadyot,
nakalimot na gani ako sa pagpanguros
wala na nako masangpit ang mga santos
og ang Diyos

kay abi nako og ang kinabug-atan nga katarungan
nianang pagpaopaw mao lang gayod
nga kini morag ulok sinaw

ayaw og katawa.

ang impyerno og ang langit

kanang kalayo nga walay
pagkapalong
ingon sila mao ang impyerno

kadtong lugar nga paraiso
mga kabulakan, lunhaw nga kasagbotan
miawit nga mga langgam
malinawon, malipayon
ingon sila mao kana ang langit

ang uban miingon nga ang kalisod
ang kagutom, ang kapobrehon,
ang kasamok og dili pagkasinabot
mao ang impyerno

ang bali, mao ang langit,

ang pilosopong si sartre nagkanayon
nga ang impyerno mao ang laing mga tawo
daghang naghikog niini
og iyang gisulayan og pasabot
ang iyang gitawag nga sayop
nga ang impyerno
mao "ako"

ako, dili ikaw, sige isulti ang pulong
"ako", dili ako kon dili ikaw.

misamot ang kagubot, og mas midaghan
ang naghikog, hangtod nga ang mga anghel

nanglupad

(wala manganaog)

mitugpa sa mga bungtod og mitug-an
nga kuno kini si Sartre
tua na sa impyerno

(tinood ka, 'hel?)

kay ang tinood ang langit mao
ang mga tawo, kita, og kon moingon gani
kita nga kita

apil ko, apil ka
o, unsa man

feeling good ka na?

usa ka kasinatian---duha ka binuhat

Gisabulak nato kadtong kahilom
ilawom sa walay bagutbot nga kagabhion
nahimo kadtong balaan,
nahimo kadtong timaan
nahimong usa ang duha ka timailhan
walay niduyog nga tinaguto sa tiking walay pamilok---
nagpaantaw sa atong nahimutangang may kahimuot
daw ang mga bangaw sa langit mikanaog
ug nahimong hagdan sa atong pagbaktas
niadtong atong duha ka kasinatian
wala kita mahisalaag,
kay gitultulan kita sa usa ka matinud-anong gugma
igo lang kita sa pagsubay niini nga walay pupangutana
gum-os man ang habol sa katugnaw
wala kini nato igsapayan
kay gusto nato kadto---ang pagsuhid ta
sa tunob sa kamatuoran

ang moslem og ang kristiyano

nagsilingan silang duha
sa usa ka balangay
nga ang utlanan
mao lamang ang
labat nga kawayan

mipahimangno ang
kristiyano nga magbantay
sa silingang moslem
kay lagi
tulisan og trayador

sa laing bahin
ang moslem usab nagtudlo
sa iyang mga anak
nga magbantay sa kristyano
kay mangilogay og yuta
og kon dili mabantayan
titulohan pati
ang ila unyang
tugkaran

ang kawatan

mihangyo siya nga dili
lang pod unta siya
kondenahon sa iyang
pagdala nianang daan na kaayong
abaka nga pisi
kay wala gyod lagi niya
matuyo nga nadala niya
pagbira ang simod sa
kanding.

kamatayon

adunay duha ka mga tigulang
nga dugay na nga nagpaabot kanimo
sa ibabaw sa taas og lig-on nga tulay
mga syetenta ka tuig na
nga naghawiray sila sa ilang mga kamot
kanimo kanunay nga naghisgot
kon kanus-a ka gayod moabot

nawad-an na silag pagsalig kanimo
nangurog na ang ilang tuhod
nangatarog na ang ilang mga ngipon
nanag-as na kaayo ang ilang mga kuko
og ang ilang mga handorawan gahinayhinay na
og kapapas
wala nay pulos kanila ang kabugnaw og kainit
ang ilang mga kamot dili na makahungit
og mga kalipay sa ilang mga baba
nangahilos na hapit ang ilang mga bukog
apan bisan pa niini
gipaningkamotan nila nga monaog na lang sa tulay
aron modahilos didto sa ubos kay mokuyog sa sulog
nga kusog kaayo aron maoy modala
nila diha kanimo
nahikatulog ka na ba alang usab kanamo?
limtanon ka na ba usab sama kanila?
pamatia ang naghandom kanimo, ang ilang pagtawag kanimo
sakit na baya kaayong pamation
sa among mga dalunggan

pagbasol

pagkahuman
sa among panagbulag
naglingkod ko
sa hagdan
sa atubangan sa korte

sa kilid sa akong paa
morag gibasol ko
sa akong
attache case
nganong wala ako
mamati kaniya

gitukhan ko ang akong
agtang
sa akong kamot
aron dili ako
matuwang

ang akong itom nga
sapatos
morag migahi nga
apapangig
dili ganahan mangambat
nakigbungol
sa nabaho nakong
medyas

unta mipalit
daan ako og tambal
nga usa ka
kabo nga paghinulsol
alang aning akong pagbasol
nga kanako karon
mihasol

apan ulahi na
gitan-aw kos akong bakos
nga kanako gustong molatos
boss, wala baya'y
pagbasol nga mag-una
kanunay kanang
maulahi
sama sa mga pulis
diha sa kalye

tabonon

bisdak nga tabonon
ikaw ang akong handomon
wait mong lagom
pagkalaming ogomon
hawak mong bus-ok
wala gyoy bitok
pagkalaming hikapon
kanang imong pus-on

bisdak nga tabonon
unsay akong buhaton
aron ko ikaw lipayon?
unsay akong gam-on
aron ako imong higugmaon?

sultihi ako
bisdak nga tabonon
aron ako
mahimong magmalamboon

kon mahimo
pahaloka una ako
sa imong aping
aron unta ako
mag-amping

bisdak nga tabonon
karong gabii
ako kang damgohon.

sa dihang nakita mo na ang tinood niyang dagway

sa dihang nakita mo na ang iyang tinood nga dagway
ikaw mitalidhay
migawas sa inyong balay og nagtindog sa hardin sa
mga rosas
nahugno ang imong kalibotan
nga mora kag gitakloban sa tanang
mga panganod
miginhawa ka og lalom
imong giaswat ang usa ka panghupaw
imong gisulod sa imong tilaok
nanghugot ang imong dughan
apan wala ka magpadala sa sulog
ningbaha ang pagbating
ambot morag dili pa nimo masabot
nanghawid ka sa imong mga kamot
kay mora kag mapalid sa hangin
nga gikan pa sa bungtod

hugot sa bakos
nakalitok ka sa maong pangadyeon
anang tawong gisakit
sa kapalaran
mitan-aw ka sa langit
apan wala ka manganti
sa kabangis sa adlaw
nga morag namaak
sa imong nawong

mibalik ka kaniya og miumol sa
pinili nimong mga pulong
kanang mapuslanon
og dili mabiaybiayon
gitunol nimo ang imong kamot
nga nagdala na sa imong nakit-an nga maskara
nga dugay na niyang gitagoan
nga karon lang siya nalipat
og imong nasakpan

imo siyang giingnan
nga ang gugma masinabtanon
mapailobon
gipasuot nimo pagbalik ang iyang maskara
kay kini mao ang
imong gihigugma

walay sapayan ang tanan
kay imo rang gikalimtan

sa imong pagsugot kanako kaniadto

sa imong pagsugot kanako
kaniadto
sa mga batan-on pa kita
sa dihang miingon ka nga
o,
og ako misyagit
og
hurray!
nga mora kog nakadaog
og lotto
sus
mipaspas og tuyok ang akong
kalibotan
nga morag misayaw og
hiphop
ang mga bulak mikalit
og pamuswak
ang mga uwak morag
nangaputi
ang mga dagat morag
mga amigong nagpangamay
sa ilang mga kamot
ang mga bungtod mingsibog
ang mga panganod
nag-undak-undak
ang mga suba nanganta
ang mga bitoon nagsigig
pangihat
ang bulan mibuhakhak
og katawa
duyog sa akong
dili masukod nga kalipay

karon
naunsa ba nga
human sa pipila ka tuig
naunsa ba
nga silang tanan
nangausab man

apan, ako, dili gyod.
ikaw, basin ha?

kanang gugmang imong gitago-tago

kanang imong gugma
nga gitago
gilubong sa imong dughan
og gitabonan sa
daghang mga unod
og gigaid sa imong
mga bukog og
gusok

ay!
ayayay!

mora kanag kabaw
puhon nga
moipsot sa iyang
koral
og magdagandagan
sa imong nataran
sa silong sa nagdilaab
nga bulan
kay ang iyang
itlog
gisilian!

alang sa nangawat sa akong balak

sa dihang gikawat nimo ang akong balak
ang bulan mipahiyom og ang mga bitoon
misamot og kiblat-kiblat didto sa langit
niadtong gabhiona
wala usab nako batia ang kahingawa
o bisan gamayng kagool
nga ang akong balak
imong gisulod sa imong bulsa
gani gikalipay ko uyamot
nga nakasimhot ang akong
balak diha dapit sa akong
mga gitinguha.

dunay nag-ingon nga unta dili nako
pasagdan o
palabyon lang ang maong hitabo
pero sa laing bahin
kon imo gayong gihigugma ang maong balak
hiposa kana,
amomaha, og higugmaa sama sa akong paghigugma niana

masuko unta ko
apan sa laing bahin
gihimo ko man usab kadto alang lang gayod kanimo.

tambag alang sa akong amiga nga gustong mobalak

inday
paghimo og balak
kanang patira pataka
kanang pasagad

kanang mora ka lang
og nalibang
sa kalibonan og imong
gibilin lang didto
ang mga liso
sa santol nga imong
gilad-ok sa kagilok
sa imong tilaok

ayaw butangi og
kama og peryod
aron ang mga kritiko
nga mobasa
kay istrikto ra ba kana sila
dili jud makaginhawa
dili makahunong
aron unya ato silang
ihaya

(sus, pwera buyag lang)

bitaw inday
paghimo og balak ba
kanang morag sagbot sa
amorseko didto sa
plaza nga wala pa
malimpyohi sa mayor
kay wala pay budget

kay kanang amorseko
motapot kana sa
ilang mga karsones
og mga medyas
og maghinuktok gayod
sila pagtangtang
tagsatagsa

miga, paghimo lagi og balak
kanang dili balak basahon
kanang morag resita sa doktor
nga giwiriswiris
nga siya lang og ang
pharmacist makasabot

paghimo na ba og balak
kanang mora ka lang og nangluwa
sa imong green kaayo nga plema
nga hinog pas
igit nga tisa
kanang ilang matumban
og usa ka semana silang
lud-on

paghimo na
kanang makabalos ka


(ha ha ha joke lang
walay gipasabtan
lingaw lingaw lang ning ato
miga

unsay imong lingaw karon?

unsa? wala na sab kay trabaho diha
sa canada?

na hala, paghimo na lang usa
og balak
kanang mawala ang kalaay
samtang wala pa kay
trabaho

aning global warming
og global recession)

peks man
mamatay pas obama
wala koy
giigo aning balaka,

dili ba siya pikon?)

ok, dili man diay
pwes ora mismo
el filibusterismo

paghimo na lagi og balak miga
kanang pati ikaw
mahigmata)

walay lami ang kinilaw
kon walay suka
asin, sibuyas nga
dahonan
biasong, kamatis,
gamayng kaaslom
usab
sa lemonsito

preskong mga bulinaw
kadtong nagkisikisi
pa gikan sa imong
pukot

mas lami gani
kon kini gilamog
sa imong kaugalingong
mga kamot

ayaw kalimti
ang kahalang
sa kulikot nga
sili

dayon parisan
nato sa gabukal nga
tuba nga gipapula
sa tungog
nga gihatod
ni Baning

dayon natog
kuskos sa gitara
og kanta
anang mga
binisayang
kabilin ni
yoyoy og max
surban

magsumsuman
kita sa bahaw
nga mga balita

maghisgot kitag
init kaayong sabaw
sa politika

apil na ang
kabahin sa bomba
ug uban pa

nindot usi-usikan
ang mga adlaw
unsa pa bay katarungan
anang kakugi
nga wala maghatod
sa atong mga
pangandoy
sa kinabuhi?

sila sila lang
ang nagsabot sa ilang
paglambo
kita kita lang usab
ang mag-abot
sa kahiubos
niining atong kapakyasan
nga dili nato
tinuyoan

dinhi sa akong gamay nga lantay
dili na kaayo pait bisan pag mamatay

kabahin anang kasakit

aduna ako'y langgam
nga akong
nadakpan og akong
gialam-alaman
akong gipatuktok
akong gipainom
akong gihimoan og
salag arang niya
katulgan

sa matag gabii
moawit ang maong
langgam
mas nindot kaayo
ang iyang
awit sa tungang gabii
diin ang tanan
sa among balay
nahikatulog na

naanad na kaayo ang
maong langgam
og ang iyang mga pako
misinaw ang iyang bulok
dili lagom
medyo mag pagka-asul
sama sa mga
panganod sa kaudtohon

wala mipalayo kanako
ang maong langgam
dili na kamaong molupad
kay sa iyang hawla
giganahan

mao kana ang
akong sugilanon kabahin
sa kasakit

kasakit

ang kasakit bililhon sa nga tanan
mas daghang kasakit
mas mabati nimo ang kinabuhi

samtang ang kamatayon
adunay dakong kalainan
kay didto wala ang tanan

wala ang sakit, wala ang kalibog
wala ang pag-antos, wala ang pagping-it
wala ang gugma natong duha
wala ako ug wala usab ikaw

asa na kamong mga gagmayng ginoo sa kasakit
ning kinabuhing akong gibatunan
pun-i ang kasakit nga gibati
pun-i ang pag-antos nga gibatunan

ihatag kanako ang tanang mga sakit nga dili matukib
kung gusto nimo gukda ako ug lutusa
kastiguha ug kung mahimo ilansang
apan buhia pa, ayaw ako ug patya

(version sa Pain ni Bay Alan)

tipasi

ang mga tipasi
sa Tagbilaran og sa Maribujoc
nagtapok
nagkasabot nga dili lang usa
mosimba
kay lagi kuno ang ilang mga kalag
dagko na kaayong pundo
didto sa dakong kamalig
sa langit
sa atong Ginoo.

hubag

walay bothanan
walay nana

kining akong hubag

kaila kaayo kini sa
akong
mapailobon nga pus-on

Hinog

Dalag ang sapot
Siya nga nagsingabot
Hinog og dughan

Akoy
2009.6.3

Palis

Ang kalibotan
Gadagan pasidlakan
Palis na'ng landong

Akoy
2009.6.3

Aduna

Ang kinabuhi
Ikaw, ako aduna
Dunay utlanan

Akoy
2009.6.3

Tutpik

Human og kaon
Tutpik ang way sayd epik
Panghingiki pa

Akoy
2009.6.3

Anghel

Kon dili ni langit, unsa man?
Adlaw nga masanagon
Dalan nga matahom
Akong gisubay

Misangko sa Vintage Cafe
Mi-order og juice
Nangita'g papel kasulatan
Mipalit og notebook sa tindahan

Diha sa gawas,
Sa kilid sa agianan
Mibalik ko sa paglingkod
Sa pagtagamtam sa palis

Misugod na'g sulat
Dihang natan-awan ko siya
Nga mitabok sa dalan
Sama sa anghel nga gapayong.

Akoy
2009.6.3

itom nga rosa

i: ang unang panglantaw

itom nga rosa
ang bulok sa iyang mga gihay
mao ang dakong dag-om sa langit
ang iyang sugilanon mao
ang kabahin sa
pagpaabot sa kamatayon
walay baho
ang patay nga

itom nga rosa

ii: ikaduhang panglantaw

itom nga rosa
mibukhad diha
sa tungatunga sa
basa nga yuta
nga gialirongan
sa mga sagbot

itom nga rosa
dinhi ang sinugdanan
sa usa ka ganghaan
diin mogawas ang
tanang liwat
ning atong
kalibotan diha sa sulod sa

itom nga rosa

iii: ikatulong panglantaw

itom ang ginikanan
sa kinabuhi
diha sa kangitngit
natawo ang kahayag
diha sa kangitngit
nakat-on kita
sa paggamit sa atong
kinaadman sa saktong
panglantaw
kay diha sa kangitngit
ang kamatooran
dinha kita
nakakita kon unsa
ang tinood
nga kahayag

sa tumang kangingit
lamang mibuka ang
atong mga mata
mibuswak ang atong
mga pagbati
sama sa usa ka

itom nga rosa

gamay lang nga kahayag ang akong kinahanglan

gamay lang nga kahayag
ang akong gikinahanglan
aron ako og ikaw
malamdagan
niining atong mga kahinam
dinhi sa lawak
nga atong giabtan
sa makadyot lamang
gusto lang nakong makita
ang imong pahiyom
pasiuna sa imong sukli
sa akong gihatag diha
kanimo nga
gugma
gamay lang nga kahayag
pidyot lang
mga morag asin nga
akong ipaasgad
sa akong kinilaw

lantawa usab ako sa
makadyot
bisag gamay lang kaayong
aninaw anang kamingaw

pagkahuman niining
ginagmay nga seremonya
sa akong pagpangga kanimo
kining gamay nga
kahayag ako dayong
tayhopon

ikaw, akong gakson
kanang hugot nga dili
kasul-otan og dagom

mahadlok ko makig-ergo anang mga putot

mahadlok kong
makig-ergo anang mga
putot
kay ang ilang ulo
og lubot
hapit nang
mag-abot

unsa kahay
dangatan
kon ang utok og
tae magsagol?

lamian nga kangitngit

kon idapion na gani nimo ang imong
mga ngabil sa akong ngabil
nga morag ang atong mga dila
mao na lang ang mg buhing
puyo sa imong
sapa
makapiyong gayod
ako sa akong mga mata
anang kalami
morag mawad-an
kos akong panimuot
mahimo kong
walay buot

nianang maanindot
humot
og pagkalamian
nga kangitngit

mihalok ko nimo,
mibalos sab ka nako,
nawala ko kadyot

napadpad kos
imong dughan

sa imong pusod
nasabod ko

sa imong langob
nabitik ko

sa imong tiilan
misimba ko

mibalik ko sa
imong mga ngabil

og akong gihap-an
ang imong trono

simbahang katoliko

kampana mibag-
ting bagting bagting bagting
lanog sa hangin

pagkaanindot sa sayaw sa sayaw

buntag na diay
miabot na ang adlaw
sayaw misayaw

asawang nangadye sa kaadlawon samtang katulgon pa ko

hayag nga suga
sakit ang akong mata
siya nangadye

Unsa Ang Balak?

Nilakwan ba sa babaye,
Ga-itom og sinina?

Batan-on ba nga gahinay-hinay'g kitkit,
Tagubtob nga pizza?

Tulo ba ka dalaga nga milabay,
Gabilin og alimyon sa kahumot?

Adlaw ba sa kasadpan,
Gitabonan sa panganod?

Ang magbabalak nga gakitkit og tutpik,
Bukton ang 'gipanampiling'?

Gasulat og balak,
Ang mata kapiyongon na...

Ang balak damgo lang diay!?
Paghangad, midag-om na!

Akoy
2009.6.1

Handurawan

Siya gitan-aw
Imong dagway mitumaw
Sa handurawan

Akoy
2009.6.1

Tutpik Sa Ngabil

Tutpik sa ngabil
Galingkod pahayahay
Katulgon gamay

Akoy
2009.6.1

Tawhay

Bag-o la'g kaon
Sige og utot-utot
Tawhay kaayo

Akoy
2009.6.1

Lami

Lami kaayo
Sardinas ug Siver Swan
Sa tawong gutom

Akoy
2009.6.1

Lahi'g Dalan

Siya galakaw
Silang tulo ga-awto
Lahi og dalan

Akoy
2009.6.1

nearer thy God to Thee

ikaw, mag-antos
kon dili man masantos
maduol sa D'yos