Diin

Diin ang kanhi kong puloy-anan?

Akoy
2009.6.24

ang sulog sa mga balak

mibaha pag-usab ang balak
nganong ingon niini ka kusog
daw sulog nga walay kaikog
walay puas kanato sa pag-aabog
palayo, paanod didto sa walay palad
nga bul-og sa mga balud

hawiri ako palihog
kay dili ko buot maanod

-Hazelen Calumarde

dili kamot ang mogapos sa kasingkasing
ang imong kamot adunay mga pako og ang kasingkasing
dili mo na mahawiran

ang imong hunghong kaganihang hapon samtang
bag-o kang naligo sa sapa
mao'y nakagapos ning tanan kabahin kanako
ang akong kasingkasing
wala na katulog sa punay og paabot

kay dinhi sa nataran sa gugma kita magkita
andam na ang akong dughan
aron mamahimong salag sa imo unyang pagbatog
awiti ako, og ako mamahimong tinood nga tawo...


-Ric S. Bastasa

ang balak nga dili masulat

ngano ba sang ang balak
kinahanglan pa mang sulaton

nganong umulon pa ang mga pulong
ug ihulagway ang usa ka sonata

o sayawon ang usa ka ritmo
sa matuod nga paghigugma

dili ba diay kini pweding buhaton
dili ba pweding bation
o kaha katulgan
ug ugma paklion pag-usab
sama sa mubong sugilanon natong duha nga
dili matapos bisan sa atong kamatayon

dili ba diay mahimong lantawon nalang
ang langgam nga milangoy sa hangin
ug mupauraray sa matag huyohoy niini

dili ba mas nindot kadtong
balak nga dili masulat

dili ba mas nindot kadtong balak
nga kita lang ang nakatugkad

kita: ikaw ug ako
ang dili masulat nga balak

-Hazelen Calumarde

atubang kitang duha ning alas 10:46 sa kagabhion
samtang ang tanan nahikatulog na
ang mga pultahan mipiyong sa ilang mga mata
og ang mga bintana wala na magtabi sa hangin

naghinuktok ako nangita og mga kahulugan
sa akong pagpakatawo: walay hunong ang mga sulog sa suba sa mga pangutana
nga morag mga dagkong balsa gikan sa baha sa bukid
moagi ang dakong tubig dinhi sa akong agtang
og ako ang bata nga nagsakay niaanang gamay kaayong baroto sa tungatunga sa dakong
lawod sa dagat, ngitngit ang panahon
ang langit walay timik
og ang dagat naghulga kanunay sa pagtulon kanako diha sa dakong lilo sa iyang baba

apan wala ako mahadlok
kay sayod ako nga ania nahimutang sa mga libro sa mga panid sa akong kinabuhi
nahisulat sa akong palad
nga dili ako malunod bisan og unsa pang mga bagyo sa akong kinabuhi.....

miuyon ako kanimo, ang tanan nahisulat na,
ang ato, mao lamang ang pagdawat, ang pagpadayon, ang pagpaabot...




-Ric S. Bastasa

pagsulat nga gilaayan ka

sulaton ang kalaay
tan-awon ta kon unsay itsura nianang nawong sa kalaay
nga karon imong gidibuho diha sa mga linya sa mga balak
katulgon ang mga pulong
mohay-ad apan usab mosulay og ligidligid diha sa mga banig sa akong panumduman
mokulob apan sa kadugayan mohayang kay mangita og gamay lang nga hangin
alang sa usa ka pagtayhop niaanang mikamang nga kalaay
sa akong braso padulong sa akong dughan nga akong gitan-aw
gustong dakpon kining kalaay apan nagmadaogon ang pagpailob
idlas na kaayo ang manatad sa katulogon
ang mga pilok sama sa mga tinderang gipangsapot nga bisan unsaon nilag syagit
wala gyoy mokubit
hunong sa makadyot
undangon ang hunahuna patyon ang galamhan
ilabay ang pangatarungan
papason ang mga nakita
haployon ang kalaay
sama sa usa ka itoy
hapuhapon ang dughan
mohayang
nahikatulog na....


-Ric S. Bastasa

nagkinahangla'g duha

nagkinahangla'g duha ka sugilanon
haron ang duha ikasugilon

nagkinahangla'g duha ka linalang
haron mahimong managtiayon

nagkinahangla'g duha ka tawo
haron mahimugso ang gugma

nagkinahangla'g duha ka pisi
haron mahigot ang duyan

nagkinahangla'g duha ka kamot
haron masapwang ang gasa gikan sa langit

nagkinahangla'g duha ka pagsabot
haron magsinabtanay ang managtiayon

apan ingnon tika
nagkinahangla'g duha ka disiyon
haron ang nausa mahimong duha

maayo lang ug dili kana maato

-Hazelen Calumarde

gabaha

gabaha
gabaha ang balak
gibanlas sa baybayon
gikan sa kasing kasing
ni akoy

-Hazelen Calumarde

Ulipon

Nakalingkawas sa gapos sa tiil ug kamot
Apan ulipon gihapon sa pangisip ug kasingkasing.

Akoy
2009.6.23

Global Nga Krisis

Unsay naa sa hamis nga paa?
Maayo pa ang nawong
Kay may bugas-bugas.

Akoy
2009.6.23

Komon Sens

'Sentido komon'---
dili utok
dili bagol-bagol
dili agtang
dili kilid sa ulo

'Komon sens' diay!

Akoy
2009.6.23

Tipik

Nagkatag
Ang mga pulong
Tipik sa hulagway
Sa kahimtang karon.

Akoy
2009.6.23

Pula

May pagbati
Ang tangkugo nga gigunitan.
Ug adunay bulok
Kay mipula ang aping.

Akoy
2009.6.23

Usa Ka Payong

Duha ka amiga
Sa usa ka payong.
Ang ilang nawong
Nagkamay-ong.

Akoy
2009.6.23

Makumkom ba?

Makumkom ba sa balak
Ang tanang kaanyag?

Akoy
2009.6.23

Angkas

Matahom ug mapahiyomon siya
Nga gaangkas
Gahupot sa sapot nga nabinat paubos
Gikan sa iyang pusod.

Sutoy ang dagan sa iyang bisikleta.

Akoy
2009.6.23

Sa Usa Ka Balak

Sukdon ko
Ang kalangitan sa kahiladman
Suroyon ang kabukiran sa dughan
Ug sudlon ang kalasangan sa kasinatian

Dayegon ko
Ang mga tanaman, kahayopan, kalanggaman ug kaisdaan
Sa handomanan, kahimatngonan, handurawan ug pangandoy
Sa usa ka balak.

Akoy
2009.6.23

Sulod

Ang sulod nga unod sa balak
Wa gyoy lami kon dili kasudlan.

Akoy
2009.6.23

Hubo

Bisan unsa ka gwapa
Sa iyang sapot ug pamayhon,
Ang unod man gyod ang pangitaon---
Ang hubo nga kahiladman sa sugilanon sa iyang kalag.

Akoy
2009.6.23

Adlaw

Gabii
Gipabugnawan og 'Adlaw' *
Ang atong 'kapatiran'
Nalingaw ta's tagay
Ug estoryahanay.

Apan
Dili tingali ko makadumdom
Pagpalit ug pagbitbit
Sa imong tugon,
Uga nga Rexona.

* Sol, beer gikan sa Mexico

Akoy
2009.6.23

Tanghaga

Gusto nako pangutan-on
Ang kahoy sa atbang
Kon unsa kining
Tanghaga sa adlaw

Akoy
2009.6.23

Nakutaw

Mibagting na lang ang batingaw
Wa pa kalugdang ang akong gibati

Nakutaw!

Akoy
2009.6.23

Sungkod ug Basura

Si manang may sungkod na
Gapamunit gihapon og basura

Akoy
2009.6.23

Pahiyom

Nasalipdan sa tanaman
Wala ko niya makit-an
Gadala siya'g pizza

Sa iyang pagbalik
Nagkalingiay, nagkit-anay mi
Dala among pahiyom.

Akoy
2009.6.23

Milingiw

Milingiw ang babaye sa bintana
Samtang mipahapsay sa iyang buhok.

Akong nasiplatan pag-usab sa iyang pagkanaog
Manghod diay sa amiga sa akong higala

Kay ang among higala wala na
Milingiw siya kay daw dili na mi kaila.

Akoy
2009.6.23

Panahon

Gahinan mo ba
Ang dalan og panahon
Kun sa balay lamang
Igahin ang tanang higayon?

Akoy
2009.6.23

Dili Init

Nindot
Dili init, dili bugnaw
Dili hapdos sa panit
Ang hayag sa adlaw
Karon

Akoy
2009.6.23

Basurera

Ang bao,
balay ang dala.
Si manang,
basura.

Akoy
2009.6.23

Luwas Sa Kanser

Nahuman na gyod ang imong pag-antos
Natapos ang imong kabalaka
Nalaktoran nimo ang bung-aw sa kamatayon
Ug nasalba pa gyod ang imong paa.

Dalaygon ang Dios!
Giluwas ka gikan sa kanser!

Akoy
2009.6.23

Ngano

Nganong mobasa ko'g balak?

Aron makasinati og kahimuot.

Akoy
2009.6.23

Alas Tres

Untop alas tres
Lumoy ang kainit

Gihabolan sa panganod
Ang adlaw

Natapos na
Mopanaw na

Kasingkasing na lang
Ang andamon.

Akoy
2009.6.23

Halad

Kini
Alang sa kumbira
Halad
Hikay
Salo-salo ug
Katagbawan
Sa uban.

Akoy
2009.6.23

Unang Paglakaw

Hiyas
Ang una mong paglakaw
Taliwala sa hudyaka sa banay
Gikan sa bukton sa ginikanan
Paingon sa mga kamot
Sa imong uyoan ug apohan.

Akoy
2009.6.23

Gaaso

Gidugang ang init-tubig
Sa nahubsan nga tsa.
Tin-aw na
Tataw na ang luy-a

Gaaso pa.

Akoy
2009.6.23

Sugilanon

Miagi siya nga gatan-aw-tan-aw
Mibarog sa atubangan dayon lakaw
Ug sa iyang paglingi

Mora'g librong gikahinaman
Ang iyang dughan, lami bukharon
Unsa ka ha ang iyang sugilanon?

Akoy
2009.6.23

Luha

Kay gaulan
Mitulo
Ang luha
Sa dahon
Sa kahoy.

Akoy
2009.6.23

Kalooy

Kalooy sa bulak
Nga gibitbit sa dalagita.

Akoy
2009.6.23

Asa Ka?

Asa ka?
Asa ka?

Pastilan!
Asa tawon ka?

Di na ni mao.
Di na ni mao.

Akoy
2009.6.23

misungsong

sa dihang misungsong ang
imong train
og thought
diha sa usa ka void nga
darkness
mibalod ang usa ka sulog sa stream
og consciousness
wala ka na mahadlok
sa mga stabs of light
kay ang mga metal frames
nga morag mga
feelings of catacombs
nagpakita
anang kakusog
sa usa ka
defying act sa dihang naghimo ka
na sa imong
mga obra maestra
kabahin sa
poetica

naksyagit baya ang
metro gay-sano
og
God knows na lay
mahibalo nimo

dos por dos
santo
o my gosh
nahutdan og cash!


-Ric S. Bastasa

ayaw palupig

ayaw palupig
anang kasubo og kamingaw
paninghawak
atubanga kini
og himoang mga sambingay
tan-awon ta
og dili ba kini sila
malisang kanimo
ikaw nga ilang
giila nga
walay nada nga
mambabalak

tan-awon ta og dili ba silang
tanang
matikangkang
sa imong pagkapokwang



-Ric S. Bastasa

Manakop

Bugnaw ang kalibotan karon
Moadto ko sa Prague Cafe
Manakop og balak

Sa gawas molingkod
Sa daplin sa dalan
Mohanggab og lab-as nga hangin

Samtang motagamtam
Sa pagkaong Hinapon
Maniid ko sa iyang pag-abot.

Akoy
2009.6.23

syuting

Ikaduhang hugna sa syuting nga gihimo sa among balangay.
Daghan kaayong tawo nga nangiyawat makakita sa paborito nilang artista.

Bag-o pa ni silang misikat ug mikuyanap dayon ilang pagkainila.
Alegre kaayo ron ning syutinga kay karambola, daghan kaayong extra.

Lahi sa unang hugna kay gamay ra man toy nanan-aw.
Mingaw ug ang dayalogo hagawhaw. Karon, drama, hinilakay, gubot, sininggitay, away, bugno sinumbagay.

Di sama sa unang syuting nga way samok,way gubot, way alimuot. Ang mga artista gud way mga saput!

Boanga gyod uy, wa jud nuon kong kakita.
Ngano sad kahang wa ko nila pahibaw-a?

Eksklusibo diay kuno tong shutinga..
Para ra diay kuno to sa mga mag-shabu.

Panuway! Magshabu diay tong bayhana!
Patay siya sa iyang bana!
Hahaha..ibog ra ba to ko niya.
Da,mayra!


-Alan K. Caña

Kahimatngonan

Kinsay makataklob
Sa iwag sa kahimatngonan?
Kinsay makatiklop
Sa iyang mga pako?

Akoy
2009.6.23

Ang Kahilom

Mas daghan pa'g
Makumkom
Ang kahilom.

Akoy
2009.6.23

higda lang

ayaw kasuko

ayaw paglagot

likayi ang pagbagutbot

higda lang

ayaw kabalaka

wa ka mag-inusara

daghan kita nga ingon niini

maayo hinuon

kay samtang natulog ang uban

nagsiga atong mata

kanindot ra ning sakita

ngan ra may kuyaw

insomnia

hai mas labi ug makanser ka sugot ka?

-Alan K. Caña

sayaw sa kinabuhi

dili mahimong
ikaw maglingkod lang sa daplin
magpaabot
og usahay mobalibad
ning sayaw sa kinabuhi

kay kining sayawa
bisan wala pa gisibya
hibaw-i higala
sayaw kini
alang sa tanan

ma-sweet man o boggie
o chacha
o tango
bisan pa og ang imong
mga tiil
puros wala

ikaw,
kita higala
mosayaw gayod
hangtod kini
sa atong ikapudpod



-Ric S. Bastasa

nindot

nindot hunahunaon nga may kataposan
labi na kon kabahin kini sa uban

apan kon moabot na nga ikaw pagaingnan
nga imo na ang kataposan

dili baya pod lalim
ang imong hinanaling paglalalin


-Ric S. Bastasa

Kataposan

Usahay makapasalamat kay naay utlanan
Ug dili lang usa ang kanunay'ng halaran
Adunay kagawasan nga mopili
Ug moundang sa naandan
Mapasalamaton kay dunay kataposan.

Akoy
2009.6.23

ang buang

dili ka na motan-aw kanamo
nagdukoduko ka
diha sa salog nangita sa dili angay nga pangitaon,

nakahibalo kami kabahin niini
apan dili kami makahusga
kay kami wala gayod makasabot

naunsa ba kaha? nganong ania ka na
gadukoduko nga morag nangita og usa ka dako

nakaiyak si tiya sa maong nahitabo
gibasol sila
nga nagdala kanimo didto
nahurot ang imong mga tinigom
og ilang gikaon ang unta alang kanimo

miatubang ka kanako
og gihiwa ang akong kasingkasing sa tumang kalooy

dili na kinahanglan nga sila makahibalo
dili sila makasabot niini

nahulog ang usa ka sinsilyo
og giundang sa akong iyaan ang tanang mga buluhaton
sa iyang kinabuhi
bisag karon nga siya tigulang na

aron lang pagpangita kanimo
aron lang sa pagkuha kanimo gikan kanila


-Ric S. Bastasa

NAWALA

nawala ang tingog
ang pulong ang
mga paghandom

nawala ka og
nawala ko

ang hangin mihunghong
diha sa kangitngit
nagtug-an kaniya nga
nagbasa kon hain na kitang duha

kita nga wala na mangilabot
kaniya og ang hangin nga napuno sa kasina
ania lang kitang duha
tupad ka kanako
ang imong nawong duol sa akong dalunggan
ang imong pahiyom sang-at sa akong abaga
samtang naglantaw ka
kanako nga nagsulat aning balak
alang kanimo


-Ric S. Bastasa