pagyubit

dugay na kining
anaa dinha
gani sa wala ka pa matawo
anaa na kana
nagbalhinbalhin
usahay mas ganahan siya
nga dili na lang una
makita

apan dugay na kana siya dinhi
og didto
usahay motumaw kana siya
magpahipi
og kon moabot ang iyang gana
mohagsa daw sama sa usa ka
buhawi
makalumos og iya kining gikasakit
gikahadlokan
og busa mas daghan ang panahon
sa iyang pagpapahipi
sama sa usa ka alibangbang
nga miawat sa bulok
sa usa ka dahon
sa nangka

nakita mo na kini siya
apan wala ka kaayo nagpakabana
tungod kay ang iyang
kinaiya
yano lamang
sama ka yano sa ulan
sa bukid
sama ka yano sa balas
sa dagat
sama ka yano sa hangin
nga mokapyot usahay sa imong
buhok

sama sa usa ka katulogon
nga midap-ig sa imong pilok
diha sa naglibog nimo
nga kilay

apan kon gitagaan mo lang unta
kini og gamayng panahon
sama kagamay sa tumoy
sa imong tudlo
unta dugay mo na kining
nahikap

og diha ka na unta motoo
og dayon
imo na kining
mayubit

kaniadto

adunay babaye nga dako og tiyan
nagpaabot

humod sa ulan ang maong babayeng
dako og tiyan sa
gawas sa ilang balay

nagtindog lang
wala manangpit og ngalan
nagtindog lang
sa gawas sa balay nga makita
sa ukab nga
bintana

sa iyang pagpunay og pahid
sa iyang mga mata
dili ikalimod nga siya nag-iyak

gipangutana nako
kon unsa ang iyang tuyo
apan wala siya mitingog

mibalik siya sa iyang agi
samtang ang ulan
misamot og kakusog
og gisirad-an sa tigulang nga
babaye ang
pultahan sa balay

ayaw ako pangutan-a
kon kinsa kadtong iyang gisabak
og kinsa ang tinood
nga amahan niadto

patay na ang maong babaye
apan ikaw buhi pa
ikaw kadtong gisabak
kaniadto

ang ngalan nga gisangpit
mao ang
ngalan sa akong manghod
nga kusog kaayong
magdula og kote
kaniadto

ikaw karon ang
namati
ayaw paghilak
ang kinabuhi morag
usa ka handurawan
nga milugsong
sa bukid

wala'y dala kondili
ang mga pagbasol

sukod

i

ang kapuno sa kalipay sa usa ka
dughan
sukdon kini sa
kalapad og kadako
og kalalom
sa kahaw-ang

ii

ang kakusog sa pagdagan
unya sa tubig
sukdon kini sa
kataas og kalapad
sa ugat nga iyang
subayon

iii

ang kaligdong sukdon
kini sa usa ka
matahom nga
pagsulay

iv

ang tanan adunay sukod:

ang mga dangaw
magsukod sa bangaw

ang ulan sukdon sa
kabasa sa mga bulak
og dahon

ang imong kakugi
og pagmabinantayon
sukdon kana sa pipila
ka buslot sa imong
atop inig abot
na sa ting-ulan

v

kining akong gugma diha
kanimo
kon imong masukod
pakyas ako
sa kataposan

sayod ka sa gipanulti
sa mga
makialamon

ang gugmang matuod
walay sukod
ang kalalom og kamatooran
niini
dili masugilon nianang
mga dupa sa pisi

ang tubig niini dili
matukib
sa hinaw-asan sa usa ka
sag-ob

BRIDGE DECK

kining magsakay ta
og barko
makalingaw usab
labi na
og naa ka sa ubos
sa double deck nga
higdaanan
nagkalamoglamog
nga mga
liki
og hubag ang imong
makit-an

hinoon
usahay ang usa ka tiil
nga nagbitay
og unya mokiwilkiwil
pa jud

nan
diha na jud ka kakita og
unsa kahugaw
ang lapalapa
sa Pilipinas

ang bangis nga bulan sa Abril

nakakita ka na ba og usa ka
tamsi nga
nagtampisaw sa tubig
sa ulan nga
gihawiran sa palad
sa usa ka dahon
sa usa ka yahongyahong?

ang kanahan
nagpadidit pa
siging padidit
sa kabugnaw na tubig
nga didto
sulod sa yahongyahong

namati ako sa awit
sa tamsi
nga haskang lipaya
sa unang ulan
diri sa among dapit
sa bulan sa
Abril

ingon si Leah
bangis kuno
kining bulana

Dula Sa Kinabuhi

Ang kinabuhi nakigdula
Sa kalamposan ug kapakyasan
Sa mga surpresa ug problema,
Sa kasegurohan ug kulba-hinam
Kay ang tanan iyang panginahanglan.

Akoy
2010.4.13

gihurot pati bukog sa manok sa jolibee

sa wala pa ang kamatuoran
siya pa ang magtambag nga
dili ipaapil og kaon
ang panit sa manok
kay taas kini og
cholesterol

pila ray sugilanon sa dihang
gisultihan siya sa doktor nga mao kini og mao kana
unsa bang hitaboa

nga giorder ba ang bucket
sa KFC
gipakyaw og kitkit ang manok nga haskang
dagkoa
giapil ang bukog
gihurot ang panit
gitilok ang gravy

og mibuhakhak og katawa
mitutok sa gawas
gusto untang moiyak apan wala na kini
mipatulo bisag usa ka
luha

gibayaran ang bill
migawas sa KFC
milakaw paingon sa Capitol
walay lingilingi
mitabok sa kalsada
og wala nay kahadlok kon
maligsan ba siya og dili

sayod na ko kon unsay gisulti sa doktor
dili malalim
dili jud malalim

panagsukliay sa taxi driver og sa pasahero nga abogado

i

misugilon ang abogado kabahin
lagi sausa ka bana nga luyat na
agi og paminsar kon asa kuhaon
ang kwarta nga ibuhi sa tulo niya
ka mga anak
nga motungtong na sa kolehiyo

nga ang asawa nagbagotbot
kay ang gahi sa ilang balay
mao na lamang ang
ubo sa iyang bana

og ang bana usab
wala papiri nga mibalos
nga ang danlog lang kuno sa ilang
balay mao man lang sab ang banyo

ii

dugay nakuha sa taxi driver
ang sugilanon
apan sa pipila ka minuto mikatawa
kini og

iii

ang taxi driver mibalos nga adunay
pasahero nga giilad sa usa ka
sama kaniya
nga gilibotlibot didto sa Carbon
og miingon baya ang pasahero nga


"manong, pwede ba
dili lang sa ta karon magsuroy-suroy
ugma na lang
kay gadali ko!"

iv

og imbis ihatod sa Pier Dos naunsa
ba nga silang duha
nahiadto man hinoon sa Pier Tres

v

nabiyaan ang pasahero sa M/v Virginia
og ang ilang gibuhat mao
na lamang ang pag-inom
og red horse
sa carenderia ni Pering

vi

pagkahuman gikaon ni Pering
ang kuan
sa Pasahero samtang ang taxi
driver hubog kaayong nagligad
sa salog sa carenderia
nalimtan na ang iyang
bayranan

sa boundary
sa tindahan

nagpuyo na lang kini
sa nindot nga damgo sud sa
hubog nga
kalibotan

nalibog sab ko nganong gisulat ko kini
seguro naglibog ka usab nganong imo kining gibasa

apan ayaw kabalaka
ingon ana baya ang kinabuhi
usahay
sakit dawaton apan mas lami kon ang kinabuhi
walay tumong kanang

morag wala kay katarongan
nganong mabuhi

sama sa usa ka alibangbang
nga kaganiha
mibatog pa sa usa ka gumamela
og karon
usa na lamang ang pako
nahagsa sa kabatoan

wala'y reklamo
wala sa'y nangambat
kon ngano
og naunsa

ang bata nga nagpakariling sa
ligid sa guba nga biseklita
milapos sa kalsada

misyagit ang usa ka babae
sa iyang nakita
wala katingog ang driver
sa ten-wheeler truck
wala gani kaatik kon
unsa'y nahitabo didto sa
sulod sa ilalom
sa maong truck

pag-abot gikan sa usa ka bakasyon

daghan pa unta siya og isulti sa iyang
asawa
og ang asawa andam na baya pod unta
nga mamati sa iyang
mga sugilanon sama sa hapit
na malunod nga barko nga
gitay-an
apan dunay gisulti ang iyang bana
nga nakapadani kaniya
kay lagi giingnan siya nga
mangatulog una silang duha
ayha niya
isugid ang tanan
nga nahitabo didto
sa syudad sa
Sugbo

kargador

ang tan-aw sa iyang anak
nga bayoton nga ginganlag Dodoy
sa iyang Tatay nga
maskulado nga si Pidot
usa lang gayod ka kargador
sa Pier
ang iyang asawa nga taas og buhok
puti og lihok kaayog mata
mihatag sa gamay kaayong pahiyom
nga mora kadak-a sa iyang
insik nga mata
wala magpakabana sa iyang bata
nga sa akong tan-aw
nagbiay-biay sa
pagkadili edukado sa iyang
amahan nga lapad kaayog
abaga
sama sa dakong sako sa copra
nga landay

co-dependency

nahanaw ang akong panan-aw
dihang gipiyong mo
ang imong mga mata

Gugma

Unsay Gustong Buhaton Karon?

Akoy
2010.4.11

Nahubog Sa Balak

Kwadrado ang lamesa,
Nga gialirongan sa mga bangko
Nga among gilingkoran
Nga gasandig sa bungbong

Sa gamay nga lawak.

Si Su Feng mipalanog sa balak ni Ru Bing
Nga gabasa sa hilom sa mugna ni Su Dong
Nga mipahinungod og usa, 'Alang Kay Su Feng',
Nga lalom og pagtuo ug kasaysayan.

Usa siya ka Muslim.

"Gisabwag ko ang bino ngadto sa langit.
Nangahubog ang napulo ka mga bukid.
Gikulit ko sa punoan sa kahoy ang awit
Mubo lamang kini, sama ning kinabuhi."

Nahubog ko sa balak.

Akoy
2010.4.10

Alibangbang

Ang Iyang Sampot

Akoy
2010.4.10

Ad eundum quo nemo ante iit.*

sa CR sa mga babaye

mao kana ang misyon nimo

Boy Cobra

pangihi didto nga maglingkod.

*To boldly go where no man has gone before.

Meum est propisitum in taberna mori*

Gusto nakong matapos ang akong

mga adlaw diha

sa pag-inom og tuba sa

tersena ni

Teresa.

*I wish to end my days in a tavern drinking.

Odiosus Mihis

kagamhanan
sa usa ka nilalang
nga walay mata
og walay ilong
nga wala tanan
kondi usa lamang
ka baho
nga gikamatay
nilang tanan!

ikaw ang magbabalak?

Tu urbanus
vero
scurra!

oo, ikaw kana
ang gipatongan
sa mansanas
ni Guillermo
Mamulongay,

oo, ikaw kana
ang misalo sa
bala sa
kalibre .46
milimogmog
sa baba
ang aso sa
sa kalayo nga
gikan sa gisunog
nga lana didto
sa Kuwait

oo, ikaw kana
ang nagpabilin
sa plaza
sa dihang gitagsa
tagsa og tusok
ang mga bata
sa mga Hapon

oo, ikaw kana
ang tig-ihap sa
bayabas nga
mahulog sa
baba ni Juan

oo, ikaw kana
ang naglatid sa
pisi diha
sa mga utlanan
sa dagat og
suba

oo, ikaw kana
ang molatay
sa tulay nga
bangaw

oo, ikaw kana
ang nakigbaylo
sa baka
sa usa ka
liso sa mansanas

oo,ikaw kana ang
misalig sa pulong
nga wala magdayon

daghan pa unta
apan wala na ang
panahon
nga nagkalibanga
sa tumang
kapungot
sa imong
pagkabuang.

hinulaman

ingnon tang
hulaman ko lang kadyot kining larawan

mahimong ingnon
nga ako usa ka kawatan

mitago nianang kangitngit
apan aduna ako'y katarungan niini

mahimong dili mo ako tuhuan
tungod kay giangkon na ako sa uban

apan dili imposible nga ako
nahigugma gayod kanimo

kon dili ka motoo
wala na ako'y mahimo

paaboton ko ikaw
didto sa menteryo

kabalo ko
guston nimong sulaton ang kinalamiang balak
og sa matag adlaw
imong gihunahuna ang mga pulong
nga angay niini
apan usahay mablanko ka
mapalaw ka

kasabot ko
nganong usahay mokalit ka lang
og tungtong
sa akong hawak
nangapkap ka
sa kinalamiang pulong
sa akong
mga kamot
sa akong lig-on nga bagon

hangtod mga moiyagak ka
kuyog sa usa ka pahiyom

dayon sugdan mo na pagsulat
ang kinalamiang balak
sa atong kinabuhi

ugma pamation ko
ang imong awit.

inday

lisod ba sabton
nga ang akong gikamingawan
dili baya ikaw
sa tinood lang mas gihandom
ko ang inagik-ik sa
katre nga uway
samtang imong ihunghong
sa kilid sa akong dunggan
ang sunod natong
buhaton
og kining akong ilok
mogilok
ang akong mga tiil gustong
mosayaw og tango
nga ikaw ang paris
dinhi sa luna
nga tam-is

salvador dali

sa edad nga sais
anyos
gusto nakong
mahimong
kusenero

sa pagtungtong sa siete
gusto nakong
mahimong
Napoleon

gikan niadto
ang akong mga pangandoy
nagtubo

siging nagtubo...

pangutana

ngano ba nga inig
gawas nimo

imo mang iduot ang
akong dughan

og dayon nimong igting
hangad sa langit
piyong sa
mata

og dayon og lingo
lingo sa imong nawong

nga mora bag
dako kaayo ako og sala
kanimo?

coitus interruptus

mikalit og abri ang
pultahan

nahugyaw ang
hapit na nga
moboto unta
nga kalipay

mikaratil og lupad
wa gani kabitad sa habol

wala kasiplit
ang kinatumyan sa pus-on

paetz

mas nindot dito

mama
human na ang atong pangatawa
sa paghilaid nimong pag-antos panahon na
nga ikaw mopahulay
og sa pagpiyong nimo sa imong mga mata
mama
wala ako magpatulo og luha og kinsa kadtong nangiyak sa imong paggikan
akong gibadlong
kay dili angayan nga sa imong paglalin
subo lang gihapon ang kalibotan
dili angayan nga ikaw pabalonan sa mga kabalaka
og mga kasakit
mama
mas nindot nga sa imong paglakaw sa imong pag-inosara
wala kay laing bitbiton kondili
mao lamang
mama
ang among bug-os nga gugma kanimo
sukli sa tanan
nga imong nahimo

mama
ayaw kabalaka
padung ka sa usa ka pultahan nga dugay kaayong giabrihan alang
sa sama kanimo
nga napuno sa gugma ang kasingkasing
sa imong kataposang pahiyom
dawata ang kamatooran
nga nagpaabot kanimo didto

mas nindot didto
wala na ang mga kaguol
mapapas na ang tanang kahinawaing

mama
salamat
mama
salamat gayod.

akong pangutana

ambot
hangtod karon
ako nangutana lang gihapon

ngano ba nga nanglaktod kita
sa kasagbotan diin labong kaayo ang kakugnan
ngano ba nga gilikayan nato ang lapad nga sarang agianan sa tanan

sa kilid sa basakan daghan ang nanubong tunukon nga mingkatay sa kakahoyan
nag-una ka, nagdali nga morag dunay giapas nga mga laraw sa imong mubo nga kinabuhi

og didto nahingangha ako, nakuratan sa dihang nasuta ko ang tinood nga hinungdan:

ang halas!

mga pahimangno sa usa ka bisita

dunay mga ritwal ang maong balay
anaa ang pagsayaw sa kalayo disir manihapon

ginadili ang paghisgot sa usa ka bata nga kamaong motokar sa piano
kon imong kantahon ang usa ka oyayi

mohilak ang atop pinaagi sa pagtulo sa mga ulan gikan sa itom nga langit
og matingala ka ngano

ayaw na og pangutana
kon yubiton mo ang ngalan sa batang babaye nga nagsag-ob og tubig didto sa tubod

mokarag gayod ang haligi
og mangatagak ang mga kwaknit nga nangumbitay diha sa kisame

kon gusto nimo nga magdugay og puyo diha sa ilang balay
tagoi sa imong bulsa ang mga itlog sa maya

ayaw ipagimaw ang balahibo sa kalapati
palopara lang hinoon kini

og lantawa ang paglabay sa mga uhay
ang pagboak sa usa ka baso sa ubos sa imong bilbil

sa imong mga tiil
anaa ang mga bulak sa sampagita og mga pula nga santan

dayon pamatia na lang ang mga nagpingki nga mga baso
ang kusog nga tingog sa kampana sa simbahan dili kaayo halayo sa imong gitindogan

gipaabot ko ang
pagmatood sa disyerto

wala na kuno kini
gimingaw sa tubig

kulukadidang na
niya ang tanang hangin

matag abot sa kagabhion
andam ang balas sa iyang kainit

TUngod NiANANG sABAT SABat sa Pangadye Sa Patay

Tungod Nianang sabat
sabat sa Pangadye sa Patay
Nagkahibalag
Si Gabino og si Kuring

Sa KIHat ni Gabino
Nalukmay si Kuring
Og sa pagsulodsulod ni Kuring
SA iYANG tudlo diha sa iyang baba
Samtang mipahiyom Si Gabino
samtang Ang Manalabtan
Nagsigig utong utong Anang
Novenahan
Nagkasinabot ang Duha nga Puros
Minyo og Dunay daghang mga
Anak
nga morag doremifasolatido

Gibiyaan ni Kuring si Kulas og
Gibiyaan usab ni Gabino si Gawdin

Nag-ipon sa usa ka barongbarong sa Barra
Namasyada sa habalhabal si Gabino
Padayon sa ManikyurPedikyur si Kuring
Naglami silang Duha
Hangtod nga Nahuman ang
novena sa Patay didto sa baryo
sa Banonong

ang dili pag-ambat

sa higayon nga ikaw dili na niya
ambaton
ayaw kana ikasakit

wala ka ba masayod nga siya
nanambal lang una
sa mga samad sa iyang kasingkasing?

kon makita mo lang unta ang iyang
gidangatan
human siya nakigbisog sa gubat
sa kahaw-ang
didto sa nahugdaw na nga kalayo
sa usa ka gugma
makasabot ka unta
ngano nga dili na siya ganahan mobungat
nianang mga pulong

nahisama siya sa usa ka iro nga samdan
nga sa usa ka suok sa kilid sa imong pultahan
nagsigig tilap sa iyang mga samad
aron mawala ang kahapdos niini
aron moundang na og agas ang mga dugo

tagai siya gamay og lugway
sa iyang pagpangita og tambal
sa iyang pagkapukan
gamay lang nga panahon
aron niya makaplagan ang gipangita
nga kalinaw

sa duha ka magtiayon nga nagbulag

wala na sugod magkita
pa ang bulan og ang adlaw
og dinha nagsugog na ang kalinaw
gibahin nila ang kalibotan
iya ang kangitngit
og siya ang kahayag
iya ang mga gatikawtikaw
nga kaudtohon
og iya ang nahinanok nga
kaadlawon

daghang mga bitoon ang maghandom
sa iyang kaligdong
ang mga dagat maghimo og mga unos
sa iyang kabangis
magpabilin siyang mohalok sa mga
bungtod matag abot niya
hangtod nga siya mosaka
molingkod sa gingharian
nga iya ng gibiyaan

hawid sa mga kamot
katawa sa ibabaw sa mga sagbot
lukso likay sa mga tunok
ang pamilyang
malipayon!

tango

ingon ani ang sayaw sa tango:
kon moatras ko, moatras ka usab
kon pila ang akong atras, mao usab ikaw,
akong kuhiton ang imong hawak
aron mahibalo ka kon asa kita paingon
kon akong hugtan ang imong kamot
mohangad ka sa makadyot
kon akong luagan, mohay-ad ka
og dayon nakog duko aron unta hagkan
ang imong dughan
mamati kita sa duyog nga musika
tantyahon nato ang atong paglakaw
mapaspas kadyot, motuyok, mohinay
taas ang atong panglantaw
iisa nato ang atong mga apapangig
dili kita mokatawa niining sayaw nga maugdang
kon ako kang tutukan, molingiw ka
kon ikaw ang motutok kanako, molingiw usab ako
baklion ko ang imong lawas sa katapusan
kon unsa ang akong ihatag, imo kining dawaton,
dili mo supakon ang akong tiil, sama nga ang akong mga tiil
dili usab mosupak sa imoha, og
sa kataposan--
mohay-ad ka nga mora og
nagawsan.

ingon ana usab ang kaminyoon.

usa ka hulagway sa kagahapon

ang kagahapon
nagpunay og hinumdom sa usa ka anino sa usa ka tawo nga nag-inosara sa usa ka lingkoranan
nga kahoy didto sa usa ka parke nga daghang kahoy
usa kadto ka hapon
wala na ang buluhaton
nahuman na ang tanan

miabot na ang pag-inosara
kanang wala na ang mga tawong imong kaila
wala na ang imong mga anak
atua na sila sa lagyo kaayong mga lugar sa imong handomanan

mopanaw ka na usab
nga walay dalhon bisag usa na laman ka panyo
bisan gani ang bulak sa imong bulsa
wad-on na usab

papason ang parke, ang anino, ang tawo, ang kahaponon
miabot ka na sa kawad-on
nianang kahaw-ang
nianang hanaw nga bungtod
nga bisan usa ka lugas sa dahon
wala kay mapudyot.

rebelde

kining atong lakaw
paingon sa bukid
subay sa dalan
nga walay kapaingnan

kon kapuyon ka
pauli lang
balik sa imong
gigikanan

ako ang rebelde
sukwahi ang dalan
gukdon ako sa gobyerno
iyang pusilon ang akong ulo

ako ang halad sa
kausbanan
sayod ka na niini
busa ayaw palihog
og sunod kanako

ang akong dugo
mao ang tubig sa suba
sa bukid nga giuhaw
ako ang ilimnon...

ode to kabisdakan

i

teacher:
penis or not penis,
pass your pepper!

ii

bisdak (sa telepono)

si ronron? ah, kanina meron siya
ngayon wala na
pumunta na siya sa
carbon

iii

consummatom est

nahuman na jud kog pamati
sa siete palabras

nanglimbawot ang akong
mga balahibo

ang kahayag nahigugma kaniya
og siya nahigugma sa kahayag

misurop ang kahayag sa iyang lawas
gihapohap

mihigda siya
gigakos ang kahayag

nahimugso ang anak sa kahayag
sulod sa lawak sa iyang hunahuna

mga hunahuna lamang

i
ang mga tunob
nagsunodsunod sa gahimo niini
nagpakilooy nga dili biyaan

ii

adunay mga tunob nga
supak sa imong giagian
dili kana imoha

iii

sa pagbiya
ipha ang imong kalipay

iv

panahon sa pagdukoduko
bisan og walay gipangita

v

adunay panahon sa pag-inosara
nga wala nimo hukmi

vi

padulong palayo
pahilis pahilayo

vii

duha ang nagsunod kanimo
ang imong mga tunob nga imong hinimo

og ang imong anino nga iyang gihulma
gikan sa imong lawas

viii

nahinumdom ako
sa imong pag-abot sa akong pag-inosara

ix

wala'y gamit ang mga balas sa dagat
kon wala ang mga tiil nga nawala

x

adunay mga sala nga dili na mangayo og pasaylo
giangkon apan wala gayo'y mahibalo

gidala kini sa lubnganan
nalata giulod nahimong abo nawagtang

kon gikasakit mo ang atong panagbulag

sa pag-abot sa panahon sa atong panagbulag
dili ko damhon nga ikaw unya
sakitan niini,
sa hinay gibati nako nga ikaw puhon ang
mag mas malipayon
ako mahimong bulbog na lamang sa imong dagat
og ikaw mahimong usa ka bulan
kuyog sa dayandayan nimong mga bitoon
og paghuman mo og hatag sa kahayag
sa imong paghikatulog tupad sa mga panganod
sa hilom
mahimo akong usa ka iwon
langoy paingon sa isla sa akong matood nga kalipay...

dili na ako ang imong gihigugma
og ako dili na usab makaila kanimo...

ang gipuy-an og ang pulong

adunay usa ka lugar nga imong balik
balikan
siging balikbalikan
bisag dili na unta angay
nga balikan
imo kining gibalibalikan bisan
og nakahibalo ka nga ang kalami niini
kadyot lamang
og ang iyang pagsulod sa imong utok
paghigda sa katre sa imong
konsensya
usa kini ka tuyum
nga naghatag og taod-taod nga
kasakit

apan bisan pa niini
wala nimo gitagaan og bili ang mga
pagtusok, pagsamad
paghatag og kahapdos

misaad ka nga dili na kini nimo balikan
kausa na lang
apan permanente kang nahimong bakakon
hangtod nga gikapoy ka na
og himo og mga saad
og imo na usab kining gibalikbalikan
hangotd nga nahimo na kining tipik sa imong kinabuhi
pinitik sa imong kasingkasing
hangtod nga kini nahimong ikaw

og dinhi wala na nimo kini gibalikbalikan
gipuy-an na kini
naghiusa na ang imong balay
og ang imong
mga pulong

aristotol

walay tawo nga
imong ibutang sa usa ka isla
og imong
biyaan

mamatay ang tawo kon
wala na siya'y
kaestoryahan

sama sa usa ka liso sa mongo
nga imong ibutang

og itago sud sa lata
motubo kini

mangita gayod og
ganghaan aron

makita niya ang adlaw
kay og dili

walay pulos ang tanan
walay pulos ang tanan.

buga nga walay padulngan

kon wala na'y ibuga
pwes maghilom

kon matagbaw na
sa paghilom

sugdan na usab ang
pagsulti

ang pag-awit
ang pagsyagit

paningkamot nga
ikaw madunggan

apan kon wala
gyoy makadungog

pwes syagit lang
kutob sa imong mahimo

basin diay og
mamati ang mga bitoon

basin diay og
makasabot ang bulan

basin diay og ang
kawanangan gihidlaw

sa imong tingog
sa imong awit

sa imong pagsyagit
basin diay og matandog

ang uniberso
nga dinhing dapita adunay

tawo nga usa lamang
ka gamayng bato

apan hagtik
nakasamad sa tiyan

sa langit
nakatandog sa kamingaw

sa kawanangan
nga dugay rang wala

nay tawo nga dugay rang
wala na kaila kon unsa

ang tawo
kon kinsa siya

kon nganong hangtod
karon

anaa pa gihapon siya
nagtikawtikaw

sa usa ka kalibotan
nga dugay rang

nawala sa pagtagad
sa kinaiyahan

bahong labana ang kabuntagon

sayod ko
nga gikalipay mo
ang pagpangalimyon
sa labana
sud sa atong
lawak

kada buntag
mosayaw ang kalipay
diha sa imong
mga taghoy

padungog: dili ikaw

dunay bukog
sa akong tutunlan

iring ang akong
gikinahanglan

NORANIAN diay ka bay?

gikalipay mo ang kadaogan ni nora
akong gikasakit baya kana
kay dili ko noranian bay
vilmanian ko sukad pa niadtong gamay pa ko
sukad pa niadtong nauso pa
ang kantang

sad movies make me cry
nga imo pong gikontrahan atong
rain gently falls whenever you say goodbye
og kadtong pearly shells from the oshan,

kahinumdom ka kadtong gitirador ta ka
kay imong gidrowingan ang akong notebook sa nawong ni nora aunor?

wa ko kalimot adto
mibalos sab kog wiris wiris sa imong notebook sa kulongon og taas kaayo nga buhok ni
vilma santos nga gisimhotsimhot ni edgar mortiz

tiaw mo ba...daghan pa unta kog iistorya nimo bay
apan asa ka naman intawon?

nangamaw na man kuno ka sa chicago?
kon magkita mo ni nora aunor diha sa L.A.
ingna miss na siya ni vilma
diri sa Batangas....

ako dia, tigpaypay ni vilma, giigang intawon
sa init kaayong pamulitika..

hilak sa kalipay

dunay duha ka magsoon
nga dugay na nga nagbungol

akong giuli ang ilang kabubut-on
human sa 25 ka tuig nga away

nanghilak, naggakos,
hugot, nagbakho silang duha

nga morag gibiyaan sa ilang mama.

Hilak Sa Kalipay

"Mang, nganong gahilak ka?",nangutana ang bata.
"Hilak ni sa kalipay", tubag sa inahan.

Natingala ang bata, katuohon dili.
Ang iyang hunahuna, "Naa diay hilak sa kalipay?"

Akoy
2010.3.26

balak alang sa usa ka kabit

kiwa nga tan-awon nga ikaw nga gikaselosan sa akong asawa
anaa mikumpayot gayod pag-ayo sa hawiranan sa lubot niining jeep
nga akong gipadagan

ako ania tupad sa akong asawa nga bisag unsaon
number 1 lang gyod gihapon

usahay akong kalit nga gipakusgan kining akong sakyanan
aron unta ikaw mahulog sa dayon
apan naunsa ba usab kining akong asawa
nga haskang selosa
ako man hinoon ang giayog kawras
bunal og leche leche

samtang naghawid ko
sa manobela

animal, mangabangga man hinoon tang tanan ani da!

akong pangandoy

akong pangandoy
nga unta magpahilayo una ako
nga unta imong masabtan ang tanan
nga kini sarang ra gayod nga buhaton
sa mga langgam
apil na ang mga isda
gani ang mga hulmigas
nakahibalo og nagbuhat sa ingon

akong pangandoy
nga unta hisabtan mo nga ako usahay
gusto usab nga mag-inusara sa silong sa anino sa mga kahoy
sa tiilan sa dakong bungtod sa lapyahan sa lapad nga baybayon

ako usa nga pangandoy ang bisan gamay na lamang nga kamingaw
naglingkod ako sa usa ka bato nga gialirongan sa mga sagbot og mga sulom
nakighimamat ako sa bulan sa usa ka kagabhion kuyog lamang ang akong anino
nakigtagay ako og bino sa mga bitoon
gihagkan ko ang aping sa hangin
gikakos ko ang lawas sa akong hunahuna.

kaulag nga walay responsibilidad

usa.duha, tulo, upat, lima ka bagnod
diha sa mainiton nga sulod
wala gani magdugay
migawas
miduko
mitindog
nanira og
dayon og biya
wala gani nagpabilin
og bisan gamay na
lamang nga pulong-pasalamat.