sa banyo

usa lang ang banyo sa balay
apan kon ako na gani ang makagamit kaniadto
sa among kasilyas
cum banyo kaligoanan
na pasensya lang gyod ang tanan
kay haskang dugaya gyod nako nga makagawas
gikan sa sulod sa kalibangan

nanuktok na sa Tatay kon unsa ba
gikalibang ba nako
taga
misyagit na si Nanay og nangutana
kon buhi pa ba ako
o patay na didto sa sulod sa maong banyo
gidukdok na nila ang pultahan
apan ako
wala gyoy pakabana kon naunsa na
silang tanan nga gusto
nga malibang, mangihi, maligo,


cool lang ko dotz
naa pa ko sa page six
sa komiks
nga hinulaman
nako gikan kang butch.

kon nabasa na man lang sa ulan

kon nabasa na man lang sa ulan
sa imong pangatarongan
nan maligo na lang gayod
magtampisaw
og sama sa kabaw mas
lami pa gani nga
moligad diha sa lapok
kaayo nga
tunaan

nindot ba gayod kaha ang pagpahinayak?

lami ba paminawon nga ang tanan
nagkagot na ang ngipon sa
kasuko diha kanimo
apan ikaw
nagligidligid sa lapok
diha sa tunaan
sa kabaw og dayon nimog buhakhak
og katawa og dayon og ingon
nga kaming tanan
kanimo
nasina?

abi nimo, naa ko'y gikaloy-an
og akong gilud-an, giiyakan
apan dili ka na lang nako sultihan.

ang pinili nga kolor

ang gipili nga kolor
alang sa among habog
kaayo nga pader
sumala sa gikasabotan
mao lamang gayod ang
puti.

aron ingnon nga limpyo
gayod tan-awon
aron ingnon nga putli
aron ingnon nga tul-id
og ligdong

ang naa sa sulod sa maong
habog kaayo nga pader
ang among balay
apil na ang mga
alalay.

Kinabuhi sa Saudi

Tawag sa kalisod
Mibiya sa nasud
Gilabang ang lawod
Og pila ka bungtod.

Kanhing yutang himsog
Dili na makatunob
Kay ang gitumban ko
Yuta nga deserto.

Ako nahikurat
Mga arabo mangidhat
Di man ako lalaking igat
O mahuyang nga nagkiat-kiat.

Sa paglakaw ko sa dalan
Kalit akong hingkulbaan
Nagbukot og itom nga sinina
Mga mata lang ang gipakita.


Mingaw kong kalibutan
Sa kalit gibombahan
Sa matag-istoryahay
Lupig pa nila nag-away.

Usahay ako maglagot
Kay baho nila motapot
Naligo lang sa pahumot
Nanimahog utot.

Didto sa kadalanan
Nagkadaiyang sakyanan
Bosena ang imong madunggan
Og haguros nga hilabihan.

Gilain babaye og lalaki
Makig-istoraya di pwede
Gawas kung asawa mo kini
Oki ra nga mukombati.

Apan maro sad ning pinoy
Aron lang nga makataroy
Nameke og papel si manoy
Aron kang inday makataghoy.

Gimingaw nako sa bino
Og baboy nga giadobo
Lahi na sa kaniadto
Makalamoy sa gusto.

Apan pinoy may talento
Nagpayuhot og nagtago-tago
Gitilawan og gi-sekreto
Natagbaw og nakontento.

Apan dunay milaglag
Sa motawa mibutyag
Og sila nalit-ag
Nahimo og bihag.

Sa matagtapos sa buwan
Puno ang padalahan
Makalupad nang hinagoan
Kalipay nga hilabihan.

Og pag-abot sa ugma
Lahi na ang salida
Mga adlaw ginakwenta
Kung kini makaagwanta.

Pila lang ka riyals ang gibilin
Malipay lang ang nahabilin
Pilion pa nga mag-antos
Nungka sila didto mahiubos.

Hayahay ilang paminaw
Kanamo nga minglangyaw
Apan dili kini tiaw-tiaw
Naglangoy mi sa kamingaw.

Hinaot hataga’g bili
Among pagpakabuhi
Ayaw ninyo usiki
Mahala og ampingi!

Hunahuna

Bisan unsaun pa og puga
Ang utok ko dili na mapuga
Mas molana pa ang putot
Nungka ang hunahunang mug-ot.

Bisan pila na ka dahong papel
Ang nagkatag sa gilingkuran
Mas maayo pa ang naglukdo og barel
Makarason pa nga gibug-atan.

Nibalitok, niligid mura og gipatol
Gikuykoy na ang tanang nagkatol
Nangataltag na ang mga kaspa
Naapil na ang kugan og kugmo pa.

Gilumutan o gitayaan?
Ang mitapot na akong galamhan
Bisag unsa na lang ta ang mapaluta
Sa tintang dili mapapa.

Mas maayo pa maglamaw sa tagulo
May kalipay pa nga mapupo
Bisan og sa kakapoy gipaningot
Basta sa kaugalingon nakapahimout.

Ang kahago ko may ganti ba?
O di ba may modunol og kwarta?
Ang gipuktawan ko og sulat
Na mga storya og mga balak.

Dili mabayaran og bahandi
Ang sinulat na bunga sa pagbati
Sa kadaletra na nahipatik
Nakapahimo kanako na abtik.

Sa mga obra na ako nahuman
Wala gilaum na mabayaran
Igo na mabasa og maganahan
Sakto na makapatambok sa akong dughan.

-sakagawasan

Haiku: Mga Isyu sa Katilingban

Shabu

Lanay ug bato
Hingos tanan na aso
Usik ang piso

Gasolina

Taas ang presyo
Singgit sa kadaghanan
Dili na pun-an


Borikat

Pagkaanyag mo
Pispis mubo og lupad
Wala gipalad


Gubat

Sipa na buto
Nagpuyo sa kalisang
Dagan mga tawo

Rugby

Kusog ang tama
Makabagtok sa utok
Gukod sa buwan


Makililimos

Batang mosimos
Sa dalan nagpalimos
Sip-on gihingos

-sakagawasan

Sa Dili Pa Moabot Ang Kabuntagon

Nagmata sa tumang kangitngit,
kahayag nahanaw sa langit,
bisan ang gilaw sa mga bitoun,
wala nabatyagan, wala naangkon.

Kanus-a ko pa kaha usab malantaw,
ang pagsubang sa halandong adlaw.
Ako mapahiyumon nga naghandom,
May nahibilin pa kanako na paglaum.

Iwag na suga, akong nawala,
tungod sa akong pagkamakasasala.
Mahaw-as pa kaha sa nahimutangan?
Kining nipilit, natislob sa lunangan.

Mga kasal-anan gihinulsolan,
tanan nahimo diri sa kalibutan,
Nagpaabot sa silot na ipahamtang,
para mga kaligutgot matangtang.

Sa dili pa moabot ang kabuntagon,
may binuhat na naghandon, naglaum,
nga pagsubang sa adlaw, ugma damlag,
sa pagpakabuhi, dili na unta masaag.

-sakagawasan

Hinanaling Panamilit: Paghandom sa Higalang Nitaliwan

(Alang sa paghinumdom kang Jofer Azarcon June 7, 1985 - April 11, 2009)

Nagbangutan, nahasubo, nagbakho,
Kami na mga higala mo na gibiyaan,
Dili makadawat sa imong pagtaliwan,
Gianugnan sa pagpakabuhi mo na hamubo.

Kahinumduman ang pagkasadya,
Tibuok adlaw kita ngmaya,
Ang pagsawop sa maanindot na adlaw,
Gisaw-an ta sa paglantaw.

Nagkauban pa kita sa pagtadlas,
Sa maputi og pino nga mga balas,
Sa baybayon sa sa Puerta Galera,
Kuyog ang mga soud na higala.

Sa mga katapusang takna,
Hilabihan mo kasadya,
Matud mo pa, dili mo makalimtan,
Ang kalipay na natagamtaman.

Apan, ngano man?
Imo man kami gibiyaan.
Sa imong kalit na pagtaliwan,
Wala ka gani kapanamilit daan.

Dili namo hikalimtan,
And imong pagkaboutan,
Mga gibilin mo na handuman,
Among gitisok sa alimpatakan.

Dili namo hikalimtan,
Magpabilin ka sa among dughan,
Dili og dili ka matangtang,
Bisan pa sa imong pagkawagtang.

Dawaton namo ang kamatouran,
Ug kini ang among hinumduman,
Mga kung ang adlaw man gani mosawop,
Ang kinabuhi sad nato mahimo moawop.


-sakagawasan