TROIS


tulo ka
pasahero sa dili kaayo dako nga habalhabal

gamay lang ang lingkoranan kay lagi
dili baya kaayo dako ang habalhabal
ikaw ang tunga
unya ang imoha dap-ig kaayo sa gadala sa manobela
sa gamayng motor
ang ulahi durong kapyot
hawid sa unahan didto sa kinatumyan
dap-ig sab kaayo
aron di mahulog
ang kainit gibati
dayon dunay migahi.

ang tanan naay sekretong
tinipigan
sama sa dagat nga nagtipig
usab ug
mga isda sa iyang kabatoan

sa mga kahoy sa ilang edad
sud sa ilang mga panit
sa mga bitoon diha sa tumang
kahayag diha sa adlaw
sama sa mga kagabhion nga
nagtipig sa mga tawong wa katulog
nagbalibali diha sa katre
nga nangita usab ug laing wa
katulog
silang tanan nangitag tupad
mga kauban
mga hungihong nga unta
adunay mahibalag
pati gani ang dugdog
nangita mag kadulog

nagpingki ang mga kawayan
niining away nga balaan
silong sa dili kaayo dan-ag nga bulan
ang usa gitalikdan

sa tumang kalipay
nahulog ang ulan.

PANGUTANA SA USA KA TASA NGA KAPE

ang init
pabugnawon
unya kon bugnaw
na painiton
unsa ba ang
saktong higayon
nga ikaw ako
na unyang imnon?

ang tiki ug ang langaw

kita kaayo nako ang tiki nga migukod sa langaw
nga mitugdong sa bintana nga samin diri sa akong lawak basahanan

kita kaayo nako ang iyang kaabtik,
walay kamot nga gigamit,
baba lang, ug dila ang iyang dag-anan
ug ang langaw gitulon human nasakpan

ug ang iyang tiyang  mibutirik
dayon niyag balik diha  sa pagpatikigtikig

nagpaabot napod sa sunod nga matukob
asa kaha ang iyang busganan kutob?

kay dinhing dapita, dili kita ang matood.

sa dalan
mihangyo ka nga mohunong una
sa kahaponon nangutana: "unsa ba'y tan-aw mo kanako?
mora ba akong unggoy? dili kaha ako ungo?
dili mo kaha ako tawgon ug kulungo?"

abi kog unsa'y atong gihunungan
mga pangutana man lang diay gihapon

dili angayan hunungan ang mga pangutana
bisan gani ang akong mahimong tubag unya dili kana
angayan nga hunongan

magdali kita, layo pa kaayo ang atong panaw
ug ning dapita dili pa angayan ang mga pangutana ug ang mga tubag

gitudlo ko ang layong kahayag sa akong simod,
gihawiran ko ang imong abaga, ang imong nawong akong gitumong paingon didto,

"tua ra didto ang atong adtoan, tala na, ayaw na ug hunong"
kon mahimo magpadayon kiti niining atong lakaw, kon mahimo atong daganon,

kay dinhing dapita, dili kita ang matood.

ang perlas sa akong taklubo

kon manginhas ka
ayaw sa mabaw
kinhason ra ang imong
makawkaw

ali diri sa lalom
salom, salom, salom pa gayod
naa ang dako kaayong
taklubo

muokab, mosira, moukab,
lantawa lang ang iyang
perlas

ayaw kuhaa, ayaw gayod ug
sulay ug kuha,

lantawa lang, ayawg kisaw,
ayawg ikiwil ang imong mga tiil

lantawa lang
ako lang kana, ako  lang gayod kana

dili mo mabati kon unsa kahapdos
ang kahapdos

busa paningkamoti ayaw intawon
ug pagkuha sa  perlas

mubong sugilanon sa taas nga kahidlaw

mubong sugilanon sa taas nga kahidlaw

kapeng hagbay nabugnaw

ug gihulmigas nga plato

sa kamoteng gibarbekyo 

samtang sa pagkatagpilaw 

sa imong dughan gahaylo

ang bilangkad sa libro

-- RIC S. BASTASA

tulo ka sulat sa akong minahal

tulo ka sulat sa akong minahal

ang unang sulat mao gayod ang alang kang nanay:

"nay dia na ko diri
dako ang unibersidad
ako ray lahi ug pantalon
ang akong polo shirt
daan, ang akong kauban
sa dorm di pa kaayo nako
sinati, apan
lahi ko nila nay.
apan ayaw kabalaka
ako jud sundon ang
imong tanang tambag,
magtoon kog ayo nay
di ko magbarkada
simba ko matag adlaw
dayon di ko mangitag
away.

musta namo diha nay?
si tatay mouli pa ba
gihapon nga hubog?
naayo na ba ang petromax?
ang kabaw wa ba maniwang?
daghan pa ba gihapon ug
itlog ang mga bebe?
si peping midayon ba
sa zamboanga?
ayaw palabi ug bilar nay,
makadaot kana sa imong
lawas
ayaw lang daghana ug
bingka kay di man sab
na mahalin tanan

nay gimingaw na ko
nimo
apan antoson ko ang
tanan."

ang ikaduhang sulat
mao sa akong kaugalingon
nga akong kanunayng
gitago sa akong maleta
ug basahon matag
buntag human nakog
simba, dayon nakog
pamahaw.

ang ikatulong sulat
alang kanimo
apan nakahukom ko
nga dili ko na lang
una kini ipadala
kanimo.

gipaabot ko lang
ang saktong higayon
apan

dugay pa gayod kana
kaayo.