kay dinhing dapita, dili kita ang matood.

sa dalan
mihangyo ka nga mohunong una
sa kahaponon nangutana: "unsa ba'y tan-aw mo kanako?
mora ba akong unggoy? dili kaha ako ungo?
dili mo kaha ako tawgon ug kulungo?"

abi kog unsa'y atong gihunungan
mga pangutana man lang diay gihapon

dili angayan hunungan ang mga pangutana
bisan gani ang akong mahimong tubag unya dili kana
angayan nga hunongan

magdali kita, layo pa kaayo ang atong panaw
ug ning dapita dili pa angayan ang mga pangutana ug ang mga tubag

gitudlo ko ang layong kahayag sa akong simod,
gihawiran ko ang imong abaga, ang imong nawong akong gitumong paingon didto,

"tua ra didto ang atong adtoan, tala na, ayaw na ug hunong"
kon mahimo magpadayon kiti niining atong lakaw, kon mahimo atong daganon,

kay dinhing dapita, dili kita ang matood.