ang mga halas nga nangita sa panit sa kahoy sa ilang kinabuhi

dugay mong gihuman ang
imong balak
giayo mog pili ang mga pulong
morag mga bato sa dagat nga
imong gipasinawan
giayog "kilatis" disir gimintis
morag mga sigay
nga gibagaybagay

halangdon ka nga nangita sa
unsay anindot
naghandom ka ba sa ganti sa
mga maantigo ug maalamon?

ibutang ta gusto lang gyod nimo
nga nindot ang nilugdangan ning tanan
nimong paningkamot
dabes ka ug sila pa
apan alang para asa ug para kinsa
ug alang kanus-a?

ang mga halas sa lasang nangita sa
tambal sa ilang samad
gipangita ang panit sa kahoy sa kinabuhi

wala na ang kahinungdan sa tonada
ang nindot nga awit sa langgam
singgit kini sa ambulansya sa tawong 
nagtinga sulod sa lawak sa orasan nga
nahilis sa paghanap na sa kinataposang
panglantaw.

ang mga balak nga buki

mao kini ang akong kabuki
gilatayan sa kabuhi

unsa bay hisgotan niining
kapakyasan?

unsa bay isulat sa tawong
wala nay hawiran?

mao kini ang balak sa kabuhi
mga balak nga buki....

ug nganong 
natabian na kaayo 
si marlon?

dili ba nga
sa uyab pa silang
irma
hilomon man kini
unya daling
masuko kon
magsaba ta sa
atong mga
komedya?

nagbulag na diay
silang irma
unya ang kasakit
sa iyang dughan
morag napaakan
sa pukyutan
anaa nagngutngot
nangitag
buthanan

ana diay ang
tawong nahubog sa
kasubo
pataka na lang
ug yamayama
morag nasudlan ug
yawa.

ang nahupas nga kaibog

ang kaibog usab mahupas
samas imong maong nga karsones
nga natastas

ug sa dihang nawala na kini
bisan na lang sa hunahuna wala na kini luna.
nahimong trapo nga wala malabhi
sa iyang kahugaw
nalata tua sa gawas giduladulaan
sa mga iring
gikulinitan

ang ulagan ug hunahuna nga gustong makagawas sa iyang kahimtang

hinoon, sa laing
bahin
mahimong ang
ulan nga mihunat
ug buhos

sa atong gamayng
kaulag nga
panglantaw

mao ang nahitabo
sa dihang
ang langit nga
nautgan
sa yutang gapabentang

anaa
nahuwasan kay
nagawsan.

12:36 sa kagabhion

nakamata ka
unya wala say makita sa langit
sa dihang midungaw kas bentana

kalooy sa mga bitoon nga wa
kalusot sa mga panganod ning dulom nga
kagabhion

kapait sa mga kahoy nga walay anino
sayang ang mga oras nga nanglabay lang
unya walay nahitabo

kaanugon sa laing kapakyas
nga imong gikalimtan
wala ka gihapoy nakat-unan
sa kinabuhi

gisulayan mo ug sulat ang
maong balak
nga nakaipsot sa imong
panumduman
isdang danlog sa sapa nga
imong nahawiran
sa ikog
apan wala makuha

ang nadala nimo sa imong
pagpauli mao lamang ang
pagpanakla

kalinaw sa sinaman

si mama naghungit kang
leonora adtong bata pa siya
si papa nagkugos kang 
ricardo nga nakaihi sa iyang
lampin

panihapon sa pasko naay
nanaygon sa balay
bugnaw kaayo ang hangin
unya puno kaayog pagkaon
ang talad-kan-anan

pakaoran-oran miabot
ang kahilom dayon 
dunay nanuktok nga 
nagdalag armalite
nangayo ug sud-an....

ang pahungaw ni Macario

mas maayo ang
kapungot
layo kas kamingaw
dili ka
makahunahuna 
sa kamatayon
nianing bahina
mas gusto pa nimong
ikaw ang
makapatay

wala na unta

gihimo mo kini
sa matag adlaw
sa pangandoy nga
unta dili ka na
ganahan

gipangita mo
kini aron kini
mawala

gihandom mo 
kini aron hikalimtan

ang imong giampo
nga bisag 
ihidhid pa kini sa
imong lawas
wala na untay moawas
wala na untay 
manggawas

pagpamugos sa kaugalingon

sakit baya kadtong imong
gisulti nga gipamugos kuno niya
ang iyang kaugalingon 

ang kalipay dili baya dali
sahay mahimong balibalikan
hangtod mokuyog

sa dihang nakuha na niya  ang
kalipay karon siya na usab ang
nagpunay ug pamugos sa iyang
kaugalingon

sabton ta. balikan ta. ang kalipay
dili sayon. dili lalim. 
usahay ipamugos gayod nato
ang kaugalingon.
ayaw anang kataha, ayaw anang
kaulaw.

morag nagkasinabot

ang balak
tinipigan nga kinabuhi.

gusto nimong isugid
kay naa kay gibati nga lain
nga kon dili kini
makagawas
dili ka gayod mahaluna
mahimong ikamatay mo
kini diha sa dakong
pagmahay

apan ang pagsugid niini
adunay gamayng arte

ihatag-dili, ihatag-bawi,
isulod sa baso, apan lubog,
gusto nimong sabton
nila ang nahitabo diha sa
nahitabo usab kanila nga
dili usab basta-basta nila
nga maasoy kanimo

diha sa usa ka lawak
gibasa ninyo ang mga libro
nga gitago sulod sa 
higdaanan

usahay magtagbo ang
inyong mga panglantaw
nga morag nagkasinabot
maong dili na lang motingog.

ang balak gisugid mo
sa tawong wala nakaila
nimo nga nagdali nga
mosakay sa bus pauli sa
lungsod nga iyang
natawhan.

ang kabahin sa bugtong anak nga lalaki

giregalohan sa tatay ang iyang anak nga lalaki ug
plastic nga helicopter

birahon sa pisi dayong motuyok ang piraw unya
motugsoy kinig lupad paingon sa langit

ang bugtong niyang batang lalake nga iyang gipangga
pag-ayo gibayaw ang kalag sa langit

didto nagsugod ang sugilanon nga hangtod karon 
dili pa gayod mahumanhuman dayon.

ang nahitabo sa anak ug inahan

tungod lagi kay wala man siya kuyuga sa lubong
ang bata nagdumot sa iyang inahan

gilukat ang tanang african daisies sa iyang harden
dayog dala niini labay didto sa kabatoan nga karsada diin
ang dakong trak miligis niini

sa dihang nauli na ang inahan nga walay dala kondili ang
kasubo
nadugangan kini sa tumang kasuko kuyog diha sa pagmahay
nganong ania pa kining maldito nga bata sa iyang panimalay

nakaiyak siyag duro unya ang dila sa bata mao lang ang walay labod.

ang mapa paingon sa pagpasaylo dugay rang nagisi 
nasunog pa gani
ang gugma usa na lang ka isla nga gisibog sa pito ka lawod
gialirongan sa baga kaayong gapnod
ang sakayan nga masakyan didto daghang buslot
unya ang byudo nga bangkero walay anak.

ang nagpabilin sa karaang balay mao na lamang ang dili
ingon nato nga salamangkero.

ang pamalak ni laklak

sa dihang
miambak ka

sa walay
bayad unya dili pa
gyod makaon

unya mibalak
pa kag
dugang

ang tambag ni padre lagutin

ang wa
nanghatag ug sud-an
kagabii
gikawatan

ang gitudlo sa
pari 
nga tiguwang mao
nga mangayo
unya kon dili ihatag
kawata.

banog ,piso, inaan

ang banog maayong
mosakay-sakay sa hangin
samtang ang iyang mga mata
nagtimaan sa piso nga
mibulag sa gadangag
nga inaan

ug kalit lang dunay inaan
nga nawad-an

alang kang bleux

sa una lang kuno
ang lood

iyang gibalik
balik

unya ang tawong
tupad niya
wala nanumbaling

dako pa ang iyang
panglantaw
lalom pa kaayo ang
iyang pangagho

mobalik siya sa
ospital
aron mamati sa
kataposang tugon
sa
nagtinga niya nga
asawa.

tantiya

sa una lang
malipay ka

dili mo 
masukod ang
buhakhak
sa katawa

apan sa dili
madugay
makaamgo ka

unsa ba kini?
duladula lang ba?
asa ba kutob
ang kalipay?
kanus-a magsugod
ang tinood?
ang gibantog nga
kasakit?

sundan kini
sa pagdawat dayon
anaa na
ang pagpamati
ang pagpakahilom
ang pagtantiya kon
unsa gayod ang
angay nga
buhaton

pagbati nga ikaw mahimo nang amahan

nahinumdoman ko na
sa dihang una niyang gibalita kanako
sayong buntag
nga siya mabdon

namubo ko kaniadto sa mga tanom
unya sa dihang nabati ko kini
mora kog haring gangis sa dakong lasang
unya ang akong tingog maoy
kinakusgan

daghang bersyon kabahin sa hubag

nakakitag
buthanan
ang hubag
nagawsan
na ug nana

ang nana
mirampa 
migawas 
sa mata sa
hubag sa
sampot ni
hilaria

sinaw ang 
hubag nga
walay mata
namukol
sa bukton
ni antonia

daghang 
hubag dinhing
lugara
gitugbangan
sa mga hubag
nga walay
buthanan

hilom ang
pagbuto sa
hubag
init ang 
iyang ginhawa

makatakod
ang hubag
ang ako 
mihubag

aron mobuto
ang hubag
hapuhapon
mo kini
labaw na
kon hagkan

ang mga midas sa akong panahon

daghang nagpakamidas
sa atong panahon

nakat-on sa bulawan
nga dili makaon

apan nagpabilin ang 
damgo sa salapi

kutob sa mahikap unta
mahimong salapi

ug sama kang midas
nagtungtong ang unggoy

sa bukid nga bulawan
walay kaon-kaon hangtod

nga kini namatay sa oras
nga dili pa tinglubong.

hangtod kanus-a kaha?

ang mga langgam 
sakto sa oras

sa panahon sa
ilang pagtugpa

motugpa dayon 
walay kisaw 

inig-abot sa pag
panglupad, lupad

layo ang ilang 
panaw

di na kini magpahibalo
kanimo kon mobalik

wa ko kadungog sa 
ilang mga kasakit

anaa ka dugay mobangon
nag-atiman sa imong kaguol

hangtod kanus-a ka
magtoo nga adunay mopukaw nimo?

manawag alang sa andam na
nga pamahaw?

death wish...nga daotan

nasugdan na kini sa paghikalimot
sa adlaw kon kanus-a ka gikasal
nadugangan ang iyang natawhan
ug kadtong dinalian nga operasyon

ambot kon unsa kaha ang gipaabot
ang saktong petsa kaha sa iyang
 kamatayon?

tungod sa imong pagpangga

kay imong gilawgan
sa iyang kinaham nga isda
ang iring nga puti
anaa natulog sa kilid sa
bentana
unya wala na nanungkab
sa kalderong
gitagoan mo sa inun-unan.

sa dihang nakagawas ang kalipay

nasayod na ako
nganong nagsigi ako ug
lupad diha sulod sa akong
damgo

itom nga langgam sa asul
nga langit
pak-an nga mikutaw sa
tubig nga panganod

kabalo na ko nganong
miulan ang langit
samtang mikuyanap ang
kahayag
sa berdeng mga bukid

nganong ang yuta nalipay
sa dihang nabasa unya
nanggitib ang mga liso
sa nangka diha sa nasiak
nga mga bato sa Dabiak

hubag

ang hubag 
nga walay 
mata 
sa kaulahian
nakakita
ra gayod sa
iyang
 buthanan

ug didto sa
iyang mata
migawas
ang nana niya

ang punto ni papa

mao kini ang iyang
balay

kay lagi namugos ka
man nga mamisita

dali sulod, ayaw kaulaw
lingkod sa salog
pahangin sa mga abog

ang mga bongbong
morag mga pamanit sa
usa ka gia-ap

ang mga haligi morag
mga bali nga tiil 
mouyog kon molakaw
ka paingon sa kusina

dali sa kusina
taliaway ang mga plato
ug mga kutsara
naay mapa sa agianan
sa ok-ok ang mga
baso kon imo kining
isihag sa kahayag

ang salog maayong
moabi-abi kang bisan
kinsa, iro, iring, apil
pa gani ang halas 
nga ganahang matulog
sa ilalom sa 
banggera

sa tinood lang
walay nada kining balaya
walay nada ang mga namuyo
kay lagi
tapulan, hugawan, 
bitokon, nukahon,
way kaligo,

apan kon ako pa nimo
sulayan lang gayod nimog
gusto kining balaya

kay suknaon ta ka
dayo ka lang
unya asa ka man matulog
karong gabhiona?

ang mga makikililimos
dili mopili
ang mga walay kapuy-an
dili makabuot

mao na, gipahinungtan
mo man god ang kaulag

ngano bang nagminyo
ka mag sayong
buanga ka?

sa kagubot sa hunahuna

ang imong mga mata
nakapabata sa akong tiguwang nga
apapangig

kon magpalayo ako kanako
mopatigbabaw ang kasuko sa akong
kabuang

dunay tingog nga magsulti
likayi kana daghang maglagot
kon mopadayon ka
usa lang ka pitik sa kamot
magusbat ang tanan diha
kanimo

mitoo ka
nagpalayo apan dili kalikayan
nga adunay 
dili matuyo

dinhi miabot ang buang
durong katawa
gustong maligo sa tunaan
gustong mokaon ug kalayo
gustong moambak sa
pangpang
motabok sa lawod sa tunga
sa dakong unos

ayaw pagdali
hinuktuki una ang tanan
kon mahimo
gaposa usa ang imong
kalag diha
sa imong lawas

ayaw kahadlok
ikaw gihapon kana
apan sa dili madugay
mahibalik ka ra
kadtong imong kaugalingon
nga imong higala
nga nagpangga usab kanimo
nga sa imong katulugon
dili mobiya
tupad nimo
sa kagabhion samtang ang
ulan mibunok
sa atop diha sa gubot kaayo
nga hunahuna....

kadto

mas nindot ang imong
dula
giganahan silang tanan
nga naglantaw kanimo

ang imong kalipay 
kalipay sab nila
gitagaan ka pa gani
ug bola ug dakong panahon
aron ka mas
magmalipayon

lahi sab tong iyaha
tago-tago kon magdula siya
wala siyay bola
gamay lang usab ang panahon

gani usahay wala man
kay kon masakpan siya
dila lang ang di  molabod unya
diha kaniya

pareho lang silang mga
bata nga ganahang magdula
apan lahi ang ilang mga
hantonganan

ang usa sayong mamatay
ang usa mabuhi ug dugay

kadtong nagtagotago ang
akong giingon
dili tong imong gustong
sa hangtod magmalipayon

tungod kay anaa ka man

nindot lantawon ang
dagat
mas misamot ang 
kaanindot sa langit
ang mga bitoon
misamot sa kagilak
lami paminawon ang
kabugnaw sa
kagabhion

tungod kay naa ka man

ang nawong sa dagat 
ang kaasul sa langit
ang kalinaw sa mga bitoon
ang hapyod sa hanging

atua ka sigi didto

ambot kon wala ka na
mao pa ba kining tanan gihapon

wala man ang gugma

dili baya usab malalim ang
iyang giagian

sulod sa langob nga napuno
sa kangiob

nagkita silang duha unya
wala diha ang gugma

kapalarang suringiw
morag ngiwngiw nga 
milingiw

ang tukbun na untang
balagtok
sa dughan mibatok

ingna lang

nasabtan mo na kaha
ang daghang mga 

mangtas nga mitumaw
human sa paghaya sa mga
bukog

human kini malubong
diha sa tumang kahilom

sa sunod kon mahimo
aron walay samok nga 
mahitabo

sunuga, sunuga pag-ayo
unya ang mga abo
isabwag mo sa suba sa
Dikayo

kon mangutana ang mga
babaye nga nanglaba didto
ingna lang
nga mao kini ang sugo sa
imong amahan

kon mangutana kon unsa
kanang imong
gikumkom ingna nga
sama kini sa ilang
gihambin
sa dugay na usab kaayo
nga panahon

ang mga bukog nga imong gilubong

ang mga bukog nga
imong gilubong
gikan sa imong gusok
ug dughan

ang gihandom mo nga
kalimot
ang gituohan mo nga
wala na

anaa migitib
nanubo nananga
nanahon
namuwak ug mga
kahigwaos
nakighinabi sa 
bulan nga himatayon

bisan pa....

lisod kalimtan ang
awit
bisan asa mahinumduman
gayod

sa paghinumdom niini
usahay wala na ang mga pulong
talagtag na lang

apan magpabilin ang nawong
sa imong gipangga
anaa pa gani ang baho sa iyang
wala malabhi nga
sanina

mabati pa ang kahumok sa iyang
kamot
ang kalami sa lawas
ang nangalimyon nga buhok
ang nangudlot nga pusod
ang puok kaayo nga
utnga sa naghinapos nga
kalipay

bisan pa ug wala na ang mga 
ngalan

ug ang mga angga nga sa paglitok
nangahupas.

hakolhakol

gibuak sa mga dagkong 
bato sa baybayon ang dagkong
mga balod
nga nagtaliabot
gikan sa buntag hangtod na 
kini sa kagabhion

nabugtas ang mga balas sa ilang
kasikas
naugtas ang mga umang ug
hipos sa ilang inilog  nga
mga balay

ugma walay sama

mamati na ako sa 
mga hakol-hakol samtang
magtulogtulog sa akong
bag-ong nahuman nga
lantay

ang mga bulahan

sa iyang pagbiya
giguyod niya ang baka

dili na tas-on ang sugilon
sa dihang mibalik siya
dala niya ang usa ka
liso sa 
paleya

gitagbo siya sa iyang 
kapikas
unya human namati sa
iyang sugilanon
gihagkan siya ug gidala
sa kusina
aron saloan nila ang ilang
init pa gihapon nga
panihapon

ang bata nga nawala didto sa merkado

mora kag bata nga nakabuhi sa
kamot sa inahan nga 
nalinga sa palaliton nga baratohon
didto sa dakong  merkado sa syudad

nawala ka, nahadlok, nagkabuang ug
lantaw kon asa na kaha kadtong
sa bag-o pa lang mihawid kanimo ug
naghatag kanimog kusog nga
makigharong sa kagubot lamog sa
kabaho ug kalibog....

karong gabhiona mao kini ang imong
gibati kabahin kaniya.

sa kagingking
kahinumdom ko 
giatngan mo ang
halas
dayon nimog bunal
kausa ra
ug kini
diha-diha dayon mikirig
ug 
namatay

"kabalo ko kon
asa ang patyanan
sa halas" maoy imong
sugilon kanako
dayon nimog tudlo
sa iyang 
buko-buko dapit
sa ulo

mipuli ang kahilom
sama sa patay nga dahon
sa uga nga yuta
sa alingiing nga hangin

unya nakapangutana ko
diha nimo

"bahin kanako
kahibalo ka ba kon asa
ang akong patyanan?"

mikatawa ka abi mog
nagkomedya ko

dugay na akong
nangita niini samtang ang
uban
nagpunay ug hisgot niaang
kabahin 
sa gigkanan

"ang akong gigkanan
ania sulod sa akong
baba, dapit sa dila
sa kilid sa akong alingagngag"
sukmat sa wala pa
sukad mahagki o kaha ba
matilai
sa kalipay....

ang tawong malipayon

ang tumang kalipay
nga imong natugkad
mao kadtong wala nay
laraw kabahin sa ugma

ang karon lamang
ang ania lamang
ang mahikap ang
makita

wala na kanang hunahuna
ang pagdebuho
ang pagkab-ot sa langit
ang paglangoy sa lawod
sa dagat
wala na ang pagdaro sa uma
ang pagpadagko sa mga isda
sa sapa
wala na ang pagtukod sa balay
ang pakighinabi sa bukid
ang pagputol o pagtanom sa
kahoy

kon unsa ang naa diha
mao ra kana
unsa pa ba ang kulang?
nganong pangitaon pa ang
wala?

wala mikamang ang tawong
malipayon
paingon sa gihimo nilang
lubnganan

nahubog kini sa kalipay
natumba kini sa bagang balilihan
mitutok kini sa langit
dayog katulog sa dayon

ayaw ug katingala

dili na kaayo
gubot ang akong kalipay

gani
ginagmay na lang kini

tinagoan pa man
uyamot

bisan ug tingog
sa usa ka igham wala kay
madungog

adunay kalipay
nga dili mo mapaambit
bisan kanus-a
ug bisan kang kinsa

sama niini
kon unsa man ugaling
pamalihog lang
ilha kini
sa usa ka hilaw nga
pahiyom

inig abri sa pultahan
gawas sa lawak
ayaw ug katingala

pasalig

giablihan ko ang
imong lawak
karong wala ka na

tungod kay sirado 
man ang bentana
nagpabilin ang
kahumot nimo

diha sa wala mapilo
nga habol
sa nahulog nga alugnan
sa salog

sa bulingon nga sanina
sa wala matagkos nga
liston sa sapatos
sa wala sa lugar 
nga tsinelas

gisulayan nakog pasalig
sa akong kaugalingon
nga dili na ako
magsubo pa alang
kanimo

sama kanato

ang kahoy buhing saksi
sa mga kamatay nga nanglabay dinhing dapita
sa templo sa mga nag-antos dugay na kaayong
panahon

gustong malimot ang kinaiyahan apan ang mga
bato anaa nagpabilin sa ilang mga hulmahan sa pag-asoy
nga walay undang nga mora silag mga buhing gangis
nga mikapyot sa mga sanga sa balite dayog sungog
sa tanang gauga nga nanglabay
nga gidagit sa hangin sa kabungtoran

gustong kaonon sa kahoy ang tanan apan
pakyas kini
gusto sa iyang mga gamot nga unta mahimo siyang
usa ka libo ka mga ngipon diha sa mga baba nga
wala nato makita
apan pakyas kini


sama ra pod natong tanan nga ania dinhi
misud-ong sa wala na nato masabti

kadali lang

wa baya ta magtapot
nga morag epoxy

dali ra langkaton ang
atong panaglambigit

mora kag staple wire
sa akong pagkapapel

ang magdamgo karong gabhiona

nakita niya ang naligo sa likod sa balay
silong sa kasagingan nga walay bunga

gikuha ang kabo dayog yabo sa tubig sa
iyang buhok unya ang tubig midagayday

sa iyang liog sa iyang dughan sa iyang 
tiyan lapos sa paa ug mga kumagko 

nagbasa ang yuta samtang ang adlaw 
nanginit sa iyang kahayag

karong gabhiona dunay dili makatulog
maghunahuna sa tubig nga midagayday

sa hubo nga lawas, sa yuta nga nabasa 
sa kainit sa nag-alipasa nga kagabhion

adunay gustong magdamgo unya sa sulod
didto siya ang giaayog pangga, gimahal.

ang imong unggoy nga kamao na nga maghunahuna sa sunod buhaton

sa dihang nagkataas na ang kahoy
unya nagkahabog na usab ang katkat sa unggoy
nakita niya ang pagsalig sa kaugalingon,

wala diay siya nagkinahanglan sa bagon
o sa pisi
labaw na ang kadena nga hikot sa iyang
kabatan-on

karon wala na siyay hunahunaon gawas lamang
sa iyang kaugalingon
gitantiya kon unsa kaha kon moambak na ba kaha
siya
gikan niining gabok nga sanga....

elevatior promotion

kitang walay nailhan
unya wala say nakaila nato
diri ta agi sa
hagdanan 
atong lakwon ang mga
ang-ang

diha sa kakapoy sa atong
mga tiil
atong hunahunaon ang
mga damgo
magpasukod tas pag-antos
bisan asa kutob

mabasa sa atong mga singot
ang salog sa hagdan
mogawas ang sip-on sa atong
ilong

ayaw ug lingi sa pikas
tua ang mga hayahay
nakiglamano
nagpaabot sa pag-abot
sa kasayon

dayog sakay sa elevator...

koronang tunok

ang korona nga
tunok

kabawo ka
kon gisul-ob
mo unta

diha ka kasangpit
kon unsa
ang amahan

kadtong giingon
mong gibiyaan ka
sa gamay ka pa

ang gawasnon nga buang

nahunahunaan sab nako kini
samtang nagsubo kos akong pagkadiligawasnon

kining kagawasan diay dili baya pod sa tanang panahon
makiangayon

kadtong balay ni, di ko na lang isulti ang ngalan,
gisunog baya sa iyang anak nga gitagaan niyag kagawasan

ang mahalon nga hukot

giganahan kas imong hukot
diha sa imong tiil
natingala ang naglantaw
wa sila masayod nga sa
maong hukot
ang imong tiil nga laagan
wa maligsi sa
sakyanan

tulo ka anak tupad sa kamatayon

tupad sa kamatayon

anaa ang tulo ka

mga anak: ang kamanghoran

namula ang mata ug iniyak

ang tunga-tunga wala na

kapangariglar sa iyang buhok

diha sa pagpunay ug bilar

ang kamagwangan

mapahiyomon nga mora bag

ang kamatayon mao ang

sulbad sa

kapobrehon....