sa pagpamalak

usahay makapangutana ta:
nganong mobalak man ang tawo?

nasulayan mo na ba kanang
napaakan ka og iro
unya ang imong inahan
nabalaka
kay basin ugma sa sayong
buntag
mahadlok ka na unya
sa tubig
sa kahayag nga morag punyal
nga miluba sa imong
lawas
og unya mibula ang imong baba?

nasulayan mo na ba ang
pagsulod sa usa ka langob
nga natumpag ang ganghaan
og unya
wa na ka kahibalo
kon asa ang gawsanan?

nasulayan mo na ba ang
paglantaw sa batang naligsan
sa dumptruck
unya wa kang kahibalo kon
unsay imong buhaton
unya ang bata nabuak
ang ulo og unya
nagpasad ang iyang utok
og unya mibanaw ang
daghan kaayong dugo?

o nasulayan mo ba ang paglantaw
sa tamsi nga midagsa sa imong
bintana
mibiya og dayon og tugdong
sa usa ka pungpong nga hinog nga
bayabas
dayog tuhik sa ulod nga
mikamang sa dahon
atbang sa imong bintana?

kadtong nag-ulan unya nabasa ka
unya nagbaha
sa Manila unya wa kang kauli
kay walay sakyanan?

seguro
sa nahitabo kini
nakahimo ka og balak

gusto nimong isulti ang tanan
bahin kanimo
apan dili pa sa saktong panahon
unya na lang
miingon ka
unya nakamata ka sa kaadlawon
unya wa kay tupad

unya wala na diay madawdaw nga
oras....