babayeng nahulog sa habog nga tulay

sa una
pagkahabog mo
nagtungtong ka
sa lig-on nga tulay

ang imong katawa
kuyog sa
dakong bugal-bugal

ang imong panahon
sama sa kandila naupos

ang gaba
miabot ug samtang naglingkod ka
sa tulay
lantaw sa dagan sa tubig
nga nanimahong patay
gisuyop ka
sa kalalom sa
pangagho
sa imong gilupigan

gituklod ka
sa suko nga oras
nahagbong ka
ug pag-abot mo
didto sa
dakong baba sa
patay nga tubig
gilamoy ka

morag bagtok
nga walay
dag-anan sa gutom
kaayo
nga iring

usa ka pagpaabot

usahay mahikatulog ka
sa usa ka malinawon nga
kangitngit

dili tanang kangitngit
daotan

usahay gani ang gugma
magpahipi man sa kangitngit

sa usa ka tam-is kaayong
kalipay diha
sa usa ka hinanok
sa pag-inosara

ang pagpaabot
usa ka kahiubos
kasakit nga abi
mo walay tambal

moabot ang kahayag
magpakilimos sa imong
paglantaw

walay moabiabi sa iyang
pagduaw

mangamuyo nga unta
mahagkan ang imong
aping sa
kaadlawon

usa ka pang-it sa mansanas

ang pagbasol
usa ka pinang-itan nga
mansanas
diin ang unang katam-is
niini diha sa imong
alingagngag
sa hamubong paglabay lamang
sa panahon
nahimong aslom
nga mibanaw didto sa sapa
sa imong kasingkasing

dugay pa kining
mawala
 

hadlok

 

unsa kaha
kon misugot ka
sa akong hangyo
kaniadto?

unsa kaha kon
gipiyong  na lang nato ang atong  mga
mata ug
nagpaanod kitang duha sa sulog sa atong
mga pagbati
ug misakay kitang duha
sa pako sa gugma

mas malipayon kaha ang
atong karon?

sayop kaha ang akong pagpili
sa tin-aw nga panahon

sayop kaha ang akong pagdala
ug payong
didto sa silong sa
kusog nga pagbunok sa ulan?

ang akong gihunahuna
dili ang kalipay

mao kadto ang akong gipili
dili kitang duha

lahi ang atong dalan
naglikay ko sa sulog
hadlok ko nga maanod
malumos

tuko

 

sakay sa duyan
lutaw-lutaw sa hangin
piyong ang mga
mata
namati sa tuko
gihagpat
kon swerte ba
o dimalas
ang kinabuhi

kahoy

 

sa dihang naglingkod
ang kapuol sa
rocking chair nga uway
milantaw kini sa
langit
unya kalit niyang
nahunahunaan nga
panahon na usab
diay sa
pagpamul-ong sa
mga sanga
ug dahon

apan wala na baya ang
mga kahoy
nalimtan sa kinabuhi

dako ug kalabotan ang
mga dahon nga nangapalid sa akong
kinabuhi

naghatag kinig mga pagbati kanako
nga kaniadto usa usab ako ka sanga sa kahoy

nga gilangkatan sa hangin ug mga ania kanako
kaniadto

tapot kanako, buhi, malipayon
adunay gininhawa

kadtong gusto unta nimong hawiran pa apan
napalid na man diay

wa gani nimo kaayo mabati ang kalunhaw
ang kainit

mobalik ako kanunay sa usa ka
nalangkatan

walay dahon, wala say gamot