bisan pa sa makadaghan

hapit nahikalimtan ang
buot  kong
isugid kanimo

dugay na kini
nagpahipi sa akong
likod

duro nakong pangita
sa akong pakamatyan

apan wala na kini dinhi
wa ko gayod makaplagi

ugma mogikan ako
paingon sa halayong dagat
sakay sa
walay kataposang balod

apan bisan pag
maguba ko ang mga balaod
bisan pag tumpagon
nako ang mga
tinuhoan
ang mga dili mo
masulti

mobalik gihapon ako dinhi
aron matuman
ang akong gipangandoy
kadtong
ako gayod nga
pakamatyan

bisan pag mausob
ang tanan kanako
bisan pag
dili ko na mahinumduman
ang unsa kanako

balikan ko gihapon
kining balaya
kay wala matuman
ang hitabo
wala mahagki ang
ngabil sa
tinood kong
gugma

kadtong ako gayong
pakamatyan
bisan pa
sa makadaghan

gugmang matuod

nanghambog ang maong babaye
nga nagluto ug itom
pahinungod sa banang nahanaw
duha na ka tuig ang
milabay

"ang kaulag mahimo man diay
usab nga limot-limotan"-
dayog pakita sa iyang kamot
nga wala na magkurog

misambat ang tigulang
"bisan gani ang gugma
mapapas man
sa kagamhanan sa
kalimot"-
gipakita sab niya ang
kunot na kaayo nga
pahiyom

ako nga namati
wala gayoy angay nga
 ikapanghambog
wala man gani ako'y
ganang mosumpay
sa ilang mga tingog

gibali-bali  man god sa
kaulag ang akong tuhod

unya ang akong
dughan maayo man gong
pagkalumping diha sa
gamhanang alho
sa gugmang
wa mahadlok sa gahom
sa kalimot

wa sila masayod nga ikaw dili na tawo

balikan mo ang
kaniadto

tawgon ka sa
kagikan

pagkadaghan
ba
dili na maihap

ang kalipay
gaguot nga mga
anino
sa usa ka hardin
sa ilalom
sa bulan

unya adunay
mitumaw nga gamay
nga kahilom

giuli ang kaniadto
gipuli ang karon

maguba ang imong
nawong
naasloman ka
sa imong
natilawan

namakak kadtong
mihalok kanimo

sabton tang
sakit usab pamation
ang kakusog
sa ilang mga katawa

apan sipyat ang
hunahuna
hagbay rang
dili ka na
tawo

ang imong mga kamot
dili na gani kamot

dakong baha ang
imong kasingkasing
ang imong lawas
kusog nga bagyo
 sa hangin

usa ka balay nga syagit

sakit paminawon
nga ang katarungan sa gugma
mao nga kini
anggid anggid lang sa
tinood

usahay
mas nindot man diay
ang larawan
kaysa
mahikap

ang hagkan mao
lamang ang anino

sakit mabati
ang hunghong sa
tinood

mao nga aron
matambalan ang
kasakit
pinaagi sa paghikalimot
sa kahapdos
gipuy-an mo
ang gubot nga balay diha sa usa
ka syagit

 






nagpuyo

tres pension

pagkadako sa akong
lawak

apan
pagkahuot ba ning
akong
kalibotan

dos palmas

nag-inosara akong
nagkaon
sa dakong pizza
sa dos palmas

naglantaw kanako
ang usa ka
pitpit

nagbilin kog momho
sa kilid sa
lamesa

dakong kalipay niini
ang akong
pagpahawa

patong

akong
gipatong ang akong duha
ka tiil
sa duyan

ug sa tunga nilang duha
akong
gilantaw ang pagsalop
sa adlaw

ning akong panaw

 

wala ako'y pangayoon kanimo
bisan ug mohatag ka sa usa ka pungpong nga mga bulak
sa kalooy
dili ako modawat niana

ning akong panaw
kahilom ang akong gikawo
kuyog kanako ang
pagpaubos nga
tiguwang na kaayo

mas hinay pa kining molakaw
kaysa iwon
ug bisan sa kataposang adlaw
wala kini magpalaban
sa tingog

ang gidangatan

 
dili makita ang kahaponon
diha sa kahayag
wala kini nagpuyo dinha
ang agianan paingon didto
mingaw
sa imong pag-abot
mangahulog ang
mga dahon
unya kadtong nahigugma kanimo
dili na
motingog

ayaw kasubo
kay mao kini ang gidangatan
sa kadaghanan

ang gibuhat sa kamanghoran

 

mikuha siya
sa dakong bato
ug gibuno niya
kini
sa iyang tatay

naigo ang walang
bahin sa
abaga
sa iyang nagsamparay
nga
amahan

ambot
hangtod karon
wala gayod siya
nasayod
sa iyang
gibuhat

ang gisulti sa kamagwangan

"unsa
tukuran mo silag
bag-ong balay?

tigulang na kana
silang duha

mangamatay na na!"

ang pag-antos sa usa ka inahan sa lima niya ka mga anak

tungod kay daghan kaming
nangiskwela
naning kaayo si nanay

sa wala, ice candy
sa too, piniritong kamote
sa atubangan, budbud nga kamanting
sa likod, ang bukayo

pagkahapon
ihap sa sinsilyo

pagkagabii
himo sa lesson plan

pagkakadlawon
sugod na sa hikay
sa mga ibaligya
sideline sa
eskwelahan

moonlighting
ingon sa principal

tungod sa daghan
kaayong gihawiran
nahug si nanay
sa sakyanan

nawad-an ug
bagol-bagol ang
tuhod

unsaon ko kaha
pagkalimot niining
tanan?

paghinumdom kang nanay

 

daghan ang mga sugilanon ni nanay
kahinumdom ka ba kabahin ni
Flora del Cielo?

ah, mas nindot ang kabahin ni
Saturno

wala pay kuryente kaniadto
dili kaayo hayag ang lampara
unya sayo kaayo kitang
matulog tupad ni Nanay

unya sugdan dayon niya ang iyang
mga sugilanon
usahay hadlok ug busa kitang
tanan
moluklok sa iyang kiliran
nga morag mga itoy
sa irong bag-ong nanganak

dayon motingog ang kikik sa
kilid sa bintana unya mangahadlok kitang tanan
apan sa kilid ni nanay
mawala ang tanang kahadlok

ug kitang tanan
sa katulog nahinanok

unsaon kuno pagpasar sa pasulit

aron dili kuno mahadlok
miingon si nanay nga disir mosulod sa lawak
magsulod ug gamayng bato sa bulsa
dayon
kumkumon kini
dayon sa ikatulong lakang
pangadyeon
ang usa ka amahan namo

ang gisulti ni nanay kanako kabahin sa gaba

 

ang gaba
dili kini sili nga mohalang dayon

dili usab gayod kini
magsaba

kabahin sa iyang nanay

 
gimudmod ni Nidas
ang nawong ni Kunsay
sa salog sa banyo

dako ang iyang tingog
nga milanog sa
balangay

nganong ang iyang inahan
nangihi na usab sa
maong salog

nangahadlok ang tanang
tawo
kabahin unya sa
moabot nga
gaba

M A M A

Pahinungod ko alang sa usa ka babaye nga gitawag og "Inahan"...!

ang Ginoo

 

 Ang Ginoo mao ang kahoy sa lasang nga
gitugot ang iyang kamatayon ug wa manalipod atubangan sa
mga gadala ug mga atsa, kay dili siya gusto nga
sila maulawan

Ug ang Ginoo mao ang kalibotan nga mitugot nga
siya gub-on sa mga himan sa mga tawo, og miiyak siya; oo, Miiyak ang Ginoo,
apan diha lamang sa atubangan sa iyang mga suod kaayo.

Ug ang usa ka matahom nga mananap gibunalan hangtod kini namatay
apan nagpadayon  ang pagpakahilom  sa Ginoo
ngadto sa kadaghanan
o moingon


"Undangi, undangi na intawon, nganong inyo
man kining gibuhat kanako?"

pagkamahiubsanon sa Ginoo
miiyak si Kabir
sa dihang nasayran ko kini


 KABIR

ANG LANGGAM

 
nagtago diha sa 
halwa nga makita

mao ang langgam
nga tagolilong

ayoha siyag
pamati

iyang giawit ang
imong awit 


kabir

SA GAMAY NGA BALAY

gipangita mo ba ako? dia ko sa sunod nga lingkoranan
ang akong abaga sunod sa imo
dili ko nimo makit-an sa mga hiposanan ug mga santos
dili sa simbahan, o mga sinagoga, o katedral,
wala ko diha sa mga misa, wala sab ko diha sa
pagkaon lamang sa mga utanon,

kon imo kong pangitaon, makita ko nimo diha diha dayon---
sa kinagamyang balay sa orasan.

ingon ni kabir, sultii ko kon unsa ang Ginoo?
siya ang ginhawa sud sa ginhawa. 


kabir

PAGKAON SA HINIGUGMA

 
sa hinay giusap nako,
pagkahuman na nakog
kaon sa akong lola,
nanay,
bana sa akong anak,
duha ka bana sa akong igsoon
ug ang amahan sa akong asawa
(apil na ang iyang dakong banay)
nianang pagkasunod,
ug alang sa akong
palami
giapil kog kaon
ang mga lumulupyo
ning atong balangay

naa ba didto, miingon si kabir,
ang akong gihigugma nga
karon pahat
na kanako?


KABIR

ANG BALI

 

nakita nako ang katingalahan, higala,
ang mga leon nga nagbantay sa mga
 baka nga nagsabsab 
ang magtutudlo nga
 mihapa sa iyang mga tinun-an
nangitlog nga mga isda 
sa tumoy sa kahoy
ang anak nga 
nanganak sa iyang inahan
ang iring nga
 nagbiitbit
 nagtangag ug iro
ang kabaw nga naglingkod 
sa kabayo paingon sa sabsaban
ang kahoy nga ang
sanga pailalom sa yuta
samtang ang iyang mga gamot
 namulak sa mga panganod

mao kini ang yabe, miingon si Kabir
sa kalangkopan
kon imong maatikan

aswa

kahinumdum ko
ni Liklik

nakatawa ko
sa iyang pangutana nganong
nakatawa daw ko,

giaswahan niya ang pari
nga nangasaba niya kaniadtong
desisayis pa iyang edad

apil ko sa aswa
wa daw koy nahimo

tres anyos pa lang ko kaniadto
unya ang pari

patay na.
 

dili siya hubog nga
mihangyo kanimo
sa usa
lang ka
halok

sa dihang gihatag mo kini
milupad siya
sa tumang kalipay

samdan baya ang iyang
mga pako


ang mga rosas nga
nakakita niini
nanghilak sa

kalipay
 ang samin
sa dingding

 nagpasalamat
ugma na man god
ang iyang
kataposang adlaw

wa kong kainom,

sa dihang gisultihan
ko niya nga
nakuratan siya nga
ako
 nagsulat ug mga
balak
mora kog
naugbok
sa karsada

nakita niya ang dako ug
bagang aso
sa akong
dapogan

apan
aron mawa ang kalisang
gihatagan nako siya ug
usa ka
pahiyom nga
tihik

nagsigi kog pamakak
nga sa bagang habol sa mga pulong
wa ko  didto

mugna lang kadtong tanan
sa gubot nga hunahuna nga nangitag
kahusay

sama sa tanan
sa dihang nakainom nako unya
mituyok gamay ang
bombilya sa akong ulohan
nagsugod na dayon akong
bungat sa
mga tinood.

 

archaeologist

Florence syndrome: mao ni ang akong nabati sa dihang nakakita ko nimo. Nangutana ka: alang nimo unsa ang sinugdanan? Buot kong molitok og kataposan. Apan galisud ko og tulltol sa akong buot ipasabot. Bisan lisod, gitubag kita. Nahilom ka. Gikuptan lang nimo ang akong kamot. Naay mga adlaw nga sama niini: kalit lang tipigan nimo ang imong kaugalingon sa akoa. Hangtud, dili nako kahibalo unsaon pagbisita sa imong kahilom. Mahuman ang adlaw nga wala ko kahibalo sa ngalan sa imong mga iro, sa pila na ka bungtod ang imong nakatkat, sa kung unsa ang imong nabati sa unang higayon nakapalupad ka og tabanog , o sa kataposang nimong paghilak tungod sa gugma. Sa dihang magsugod nako og estorya, ug mangutana kanimo. Maihap lang gyod nako ang imong isulti: kuan, dlii, mao, basin. Hangtud wala nako kasabot kung unsa ang kahilom alang kanimo. Di ka ganahan makipag-estorya, tungod ba kay naguol ka? Gikapoy ka? Naglagot ka? Imong kong gipabisita sa usa ka kalikopan, diin ang imong mga sugilanon nangalubong. Sama ko sa usa ka archaeologist, nagkawot sa mga pulong nga dili nimo masulti. Karon lang nako namatikdan, dugay-dugay naman diay kong nahigugma sa mga pala. Kung kanunay kong naa sa imong kiliran, pila ka mga pulong kaha ang imong makalimtan. Unsa kalawom sila? Unsaon kaha ni nako sila? Tun-an? Dayon, ibalik ni nako nimo aron dili na nimo makalimtan. Lagi, dugay naman diay kong nahigugma sa mga pala, ug dili kanimo. Basin apil nako diri sa mga nangalubong, basin ba. Ug sa dihang magkita ta og balik, ug kuptan nimo ang akong kamot, dili ko mokupot, dili ko magtingog. Unsaon nato pagbalik sa sinugdanan? Unsaon nako paglitok sa kataposan? Basin ang tinuod nga gugma kinahanglan mamatay aron tinud-arong mabuhi. Ganahan ko mahibaw-an.