2/27/2014

#4

sa akong paglantaw nimo
miingon ko walay gamot kining tawhana
kon moabot ang hangin
mapuklid kini

dili ko angay nga ikaw kasinahan
lahi ka sa imong
kahuyang

ug ikaw nga naglantaw usab kanako
nagpiyong man hinoon sa imong mga mata
nga mura bag nag-ingon nga walay dahon
walay sanga
walay bunga kining tawhana
walay udlot
wala diha kaniya ang mga timailhan sa
kaugmaon

ug miingon ka usab nga dili angayan nga
kining tawhana kasinahan

patas lang
mao kana ang tinagoan nato sa atong pagpakabuhi

malipayon, malipayon lang gayod gihapon
unya kamaong mosupak
dili dali mouyon
kon biay-biayon

No comments :

Post a Comment

Lami ba?