kabog

ang pilit mong
tinutukan
maoy nakapahimo
nakong
budbod nga
kabog

kalooy

da dihang gitugtog niya
ang iyang
gitara
ang iyang iro ra gayod
ang milahutay
ug pamati

nalooy kaayo ko
sa iro.

trabongco

naandan ko na
nga humag biya ninyo
gipakisama na kamo
nga akong
mga kaaway puhon

ang nahitabo sa usa
nahitabo sa tanan
busa ayaw akog ilara anang
pisik sa inyong
mga luha

kay ang mga has
sa trabongco gayod
magpatay
maanak man o
maamahan

sa akong mga kamot itugyan ko kanimo ang akong kalag

sakto ka
lami gayod gihapon kon
magkinamot

ganahan kas
akong kamot nga
nagkinamot
diha nimo

dakto ang akong mga
kamot
baga ang akong kubal
sama sa akong
nawong

ang akong mga kamot
goldfish sa
imong aquarium

og ang imong aquarium
sugod karon
mao ang akong
field sa soccer

sakto ka
masaligan lang gihapon
ang akong mga tudlo

busa nanirado ang akong
baba
gitagoan usa ang
intermedidong dila

sa akong mga kamot
itugyan ko kanimo ang
akong kalag

status

nagkaon kog
lanzones
samtang naglantaw nimo
nga naligo sa
banyo

ayaw og tingog

abi mo ang sunod nga mahitabo
dugay na man god nga gibansaybansay sa hunahuna
morag sine
nga gibalik balik apan nindot lang gihapon

busa kon mahitabo na gani
mora bag naagian na nato unya dili na ta mangutana kon ngano

ayaw og tingog ha
sakto na ang kalami ayaw na saguli pa ug kaaslom sa imong mga pulong
ayaw pamubo ug luha
kay mangalaya unya ang mga buwak
nga haskang nindota diha sa
bugnaw kaayong kabuntagon

kaberk

ang atong gipangandaman
mao ang pagbiya

dugay na baya
og kon moabot na gani ang saktong
higayon

dawaton nato kini sa usa ka
tam-is kaayong pahiyom unya ang
atong mga pagbati
morag kadtong nakatagbo ug
bag-ong amigo nga dugay na
nga wala makita dayog biya
sa tupad nga
kaberk.

paglantaw sa usa ka nindot nga Opera

gitangtang ang
telon
sa pagsugod

pagkahuman
gihulog na usab
ug balik ang
telon

didto sa atong
lawak
gisugdan nato
ang pagkahulog
sa atong
mga telon

kita ang mga
bagag nawong nga
mga artista

kabahin sa kasubo

ang mga sugilanon kabahin sa kasubo
kadtong ila kang giingnan nga nawa sa kaugalingon
unya nasabwag nga ikaw gigaid sa punoan sa doldol
(dili lang baya ikaw, daghang nahitaboan usab sa pikas
lungsod)

kasubo nga kon tinooron gyod ug istorya
mao ang kabahin sa kabuang
(nga siging gilimod sa mga halangdon
sa atong balangay)

mikuyanap, mikatay, sama sa usa ka bagon
diha sa punoan sa karaang santol unya ang kilid
gibalayan sa mga hantik og tamboboan
(ayaw kalimti ang mga lapinig nga migukod 
kanimo hangtod nga ikaw napaakan unya
haskang hubaga kaayo sa imong nawong
nga mora kag insik nga naputo sa iyang
negosyo)

naapil ko, ug siya, ug ang tanan gawas lamang
sa mga nanghimakak pa gihapon niini,
sa mga higayon nga ato pa gihapon gitago sa
atong kaugalingon

imong gilukot ang habol dayon nimog hubo sa imong
sapot ug misayaw ka sa inyong veranda samtang ang buwan
galutok ang mata ug naulaw kaayo kabahin sa imong
gihimo

ako sab naanad na niini sa dugay nga panahon nga sigi akong
gibisitahan niini
nga kon moabot na gani ang akong mga amigo ug kaila
mora lag walay nahitabo

balik lang gihapon sa naandang pagtimpla sa kape
abri sa garapon nga puno ug sopas
arya sa mga sugilanon kabahin sa atong mga silingan
kinsa ang naapil sa kasubo, kinsa ang namatay ug
kinsa ang naospital
og kinsa kadtong miingon nga sila gikalag lamang
o dili ba gitaptan sa daotang ispirito ug dili mga ingon nato

di na maambat ang   kaguol
wa ko na kini gisukod, kanus-a miabot kanus-a mibiya
sa giingon ko
mawala usahay kita sa mapa sa atong paingnan

kasagaran ihangad na lang sa langit ang tanan
hangtod nga miulan ug nabasa ang akong nawong

pero sama sa pagtuna sa kabaw didto sa lapok
miabot ang takna sa pagbuhat sa angayng buhaton
lakat paingon sa suba, kaligo, humol sa tubig
ug dayon tindog

nga karon hayahay na usab ang pamati , limpyo,
ug bugnaw ang kasingkasing
kay nahuman na ug hatag nimo ang angay sa
pagbangotan

motindog na usab, dala ang bag-ong pahiyom
andam na nga moatubang sa mga kaila
suroy sa plaza, lingkod na usab ug mamantay sa
mga nanglabay nga dili na nato kaila

dayon, sugdan na usab ang usa ka bag-ong sugilanon
dili na kabahin nako o kanimo
bahin na usab kini kanila: ang mga nanghimakak
nga sila ulipon usab sa kasubo, unya gilikay-likayan
sa hadla sa kalipay.

salimuang sa kaudtohon

aduna ray adlaw nga sayon na lang ang tanan
hikapon ang dughan, haployon ang mga kamot,
pikpikon ang abaga, unya walay masuko
walay mangutana ngano ug unsay milagro diri
kanato nganong nagkasinabtanay na man ang
uwak ug ang it-it, ang iring og iro, ang bagtok ug
ang iring,
ug ang mga gapos tangtangon, ang gihuktan buhian,
ang gilukot ibuklad, ang mga kinumo mahimong mga tudlo nga
mibugkhad sa langit
ang mga kabug-aton mogaan, ang mga hulmigas moundang
na anang sigig hakot ug pamaak,
ang tanan dula-dula na lamang ngadto sa hawanan
ang suba kaligoanan na sa mga bata ug kabaw
ang mga kamot sa orasan moundang kadyot ug dagan
og wala nay mamantay wa nay mangutana
tanan nganha sa menteryo mosugat kanimo ug pahiyom
bisag dunay bag-ong gilubong
mamahid sa ilang mga luha, dili na mag-ambat sa ilang
mga singot sa ilang mga agtang
bisan og init pa kaayo ang adlaw.

sulod sa klase

ang gaantyohos
walay sulod ang ulo

ang kaanyag sa
unahan
dili mo gayod
maangkon

ang imong
gikaibgan sayod
ka suko gihapon
nimo

ang maalamon
haskang maota ug
dagway

ang nagpatulo sa
imong laway
nanimahong tuway

ang tambok sa kilid
niwang ang iyang pamati

1973

ang blanko nga
papel
nangitag katumanan
sa imong
mga pangandoy

1978

wiris wiris
sa kum-ot mong
papel
gikumot mo
pag-usab
gilabay sa basurahan

1981

wa ka nay
pagsalig sa papel
og lapis

1998

bisan sa pulong
dako na usab ang
imong pagduda

2012

mas misalig ka
sa kahilom
mas kampante
ka sa
pagpamati lamang

2014

gibalikan ang papel
siging sulat
gitiklop
gihipos sa bulsa
dayog lakaw
lakaw
bisan asa

sa akong gibasa
sa sayong kabuntagon
wa ako'y nakita
bisag anino mo lamang
ang papel bisag
puno sa imong gisulat
nagpabiling usa ka
nawong nga walay
mata ug ilong

pagkagamay sa baba
morag usa ka bag-o
pa lamang
napilot nga samad

kay ang imong kasakit
kanunayng kong
gihapnig sa kilid sa
pultahan
og kanunayng kong
giyubit aron dili ako
masakitan
nga kini dili gayod ako

nalipay ang bata
nga imong gikugos
unya sa bugnaw nga
kagabhion imong
gitudla kaniya ang
bulan nga hayag
kaayong midan-ag
sa inyong bintana

abi mo ang bata
nagtoo nga ikaw ang
tag-iya sa bulan
ug sa tanan
ug kini giganahan nga
karon
ikaw ang iyang
amahan

moabot ang panahon
nga mausob ang iyang
pagtoo

busa samtang sayo pa
ipakita ang imong pagpangga
ipabati ang kainit sa imong
bukton ug dughan

kon mahibaw-an niya
ang matood
dili ka niya panghimaraoton
dili siya masuko kanimo
dili siya moingon nga ikaw bakakon

ikaw gihapon ang iyang amahan
nga tag-iya sa bulan
nga init ug dughan
nga dagko ug mga kamot
nga lig-on ug mga bukton

gisampungan ni tatay
ang iyang dalunggan
og iyang gilantaw ang
gawas sa balay
ang iyang ulo migimaw
sa pultahan

gisampungan ni tatay
ang iyang mga mata
wala na siyay makita
wala na siyag madungog

gigapos ang mga kamot ni
tatay
gihuboan siya sa iyang mga
sapot
gikoronahan siyag mga tunok
sa isdang balarite
gitusok ang iyang kilid sa
bangkaw ni Oging
gibalian siya sa iyang gusok


si tatay wala na igkita
gilabay siya sa dagat


nganong suko ka man
ni tatay?
nganong giingon ani man siya
nimo sa
imong balak?


karon nahuwasan ka na ba?
kabahin ni tatay,
ang amahan sa tanang
gidaogdaog sa mga tatay

nga ang imong ihalad
mga buwak nga patay
ug ang imong kandila itom
nga dili mosiga

tatay mo si tatay.
panahon na
para undangon mo na ang
tanan

pagmugna kabahin sa
kabayong puti nga adunay pako
sakay kuyog ni
tatay
karon, ug ugma
paingon sa langit

wala ko kini gipili
aron ako mabuhi

ambot nganong
gisubay ko kini

buhi na man god
akong daan
mao segurong
gusto ko na usab
nga mamatay

nangyam-id ka
ingon ka: pagkabuang
mo, pagkasayop mo!

usa ka alibangbang
nga gustong mahimong
ulod?

usa ka agila nga mahimong
usa ka hulmigas?

usa ka bitoon nga
gustong mahimong balas
sa dagat?

pagkabuang mo gayod
pagkauga sa imong utok!


adunay hari nga misaka
sa iyang gingharian
gihubo ang iyang kapa
ug korona
gilabay ang iyang baston
sa bintana
minaog sa iyang trono
ug miambak sa iyang tore


patay.
dili buang.
dili uga ang iyang utok

patay na siya
ug karon nagbakho
ang mikatawa.

daghan kog
kalimtan tungod lang nimo

ang akong gipangtanom
wa ko na alimahi
ang ugma damlag
mangalaya lang

daghan kog biyaan tungod
lang nimo
apil na gani ang akong
kaugalingon

kon biyaan ko kini
mahimutang nga ako wala na
wala koy dalhon
walay say magdala kanako

daghan kog ipanghimakak
tungod lang nimo
antoson ko ang ilang pagtawag
nako sa laing mga ngalan

dili na ako
ako
tungod lang nimo

sahay ning panghitabo
miiyak ko
nagbasol
nasayangan kos akong
mga gitukod
sayang lang gayod

tungod kini nimo
unya unsa ka man?

gilantaw ko
usa ka lamang ka hangin
mas bililhon pa ang akong
gininhawa
apan nganong gipili ko man ikaw?
labaw pa kanako

daghang mga tubag
susamang mga tubag
sa mga tubag pa kaniadto

pagkawalay pulos
pagkaalaot gayod
sa usa ka nahigugma

ilabay ang tanan
mahiwiran lamang.

ingon ka
wa ka ganahi sa panghitabo
daghang supak
mga bagotbot
daghang miingon
dili angayan

kalimtan ko lang kaha?
nakapangutana ko

ingon ka
depende ra sa panahon
kon hayag ang bulan
kon mobundak ang ulan

daghan pa kitag gihisgotan
sama sa atong mga utang
sama sa nahitabo kaganiha
diin ang mga manok nanglupad
sa pikas labat
diin ang baboy nakabuhi sa
iyang tangkal
diin ang kabayo
nakasipa sa kutsero
diin nauga ang suba
natipak ang bato
nabuak ang tipaka
nabali ang sanga sa
bayabas nga gikapyotan
sa bata nga buta

gihawiran ko ang imong kamot
gitutukan ta ka
gidapion ko ang akong ngabil
sa imong ngabil
gitagbo ko ang imong dila
sa imong dila

miginhawa ko
ug ako kang giingnan
sakto na
ayaw ug saba

kita lang duha dinhi
unya ngitngit na kaayo
ang kagabhion
ug napalong na ang
mga bitoon.

ang pagsulat wa ko baya
pilia

ako ang gipili sa pulong
nga ilang
higdaanan sa ilang
pagkatulog
matag tungang gabii
sa ilang
pagtukaw

ayaw ako kasinahi

walay bili ang akong
kaugalingon
nahisama ako sa sa
babaye didto sa baylehan
nga walay ulitawo nga
gustong mosayaw

nahisama ako sa bata dito
sa sagopanan nga walay gusto
mokuha

busa ayaw ako kasinahi ako
nga nagsulat karon sa

imo na nga nahibaw-an apan
wala pa gihapon nimo masulat
o malitok

ako ang kabaw nga adunay
yugo nga gisangon sa akong
liog

ako ang kabug-aton
aron mo mabati ang kagaan
sa lukdo sa kolon sa kinabuhi

ikaw ang yukboan kay
gikinihanglan mo kini
kay gipangayo mo kini
og busa gihatag

ako ang miabot ug dayon
mipahawa
ikaw ang mangita sa akong
tunob

ako ang mahikalimot
ikaw ang mag-alipasa unya
sa imong kagabhion


kay ikaw ang nangandoy
apan wala kay makab-ot

kabahin kini kanato

aron ako
mahisama kanimo
aron ka
magmalipayon
aron ako
mamahimo mong
lawak
o balay balikanan
sa imong
mga panaw

gipagawas nako
ang nia sa sulod sa
akong dughan

giablihan ko ang
akong baba
ug gipalupad ko
ang langgam
nga ang bulok sa
iyang balahiho
langit

gibungat nako ang
matood
kabahin kanato

apan gipili nako ang
wala pagshagit niini

nakita mo
apan wa ka gayo'y
madungog
bisag kanaas na lang
sa tiki diha sa
gilantaw ta nga
kisame

ang tanan
usa lamang ka samin
sa atong
hulagway

ang atong pulong
bola nga atong
gilabay sa
pader og sige
kining balik
balik
banda banda
sa atong
mga kamot

usahay makaigo
sa atong nawong
nga makabun-og
sa atong aping
ug makasamad
sa atong baba

ang tanan natawo
tungod sa atong
mga kagahapon

nakagapos ang
atong mga bukton
sa wala pa nato
magakos masukad


ang atong mga
panglantaw
nahibat sa tumang
kalaog
sa atong gusto untang
dangatan

ikaw diay ang
tigkuhit sa mga bitoon

sa buntag nagpasad
ang mga nangahulog

walay bata nga magdahom
nga kini mga bitoon

gilabyan sa mga bata
ang nagkumpol nga bonbon

kinsa ba'y magdahom nga
kini sila ang mga bitoon?

nagkabuang ug shagit tabang
nga mga nagpasad

apan sa kalibotan nga ilang
gihulgan lahi na ang mga pulong

ikaw diay ang nasayod kon
unsa ang mga bitoon

ikaw ang tigpatay sa ilang
mga kahayag sa ilang kaanyag


ang mga bata milabay kanimo
nagpaligd sa ilang mga kariling

sa natad sa usa ka balak

sa siradong balay
anaa ang tinagoang
agianan
nga ikaw lang ang
makagawas
sulod

sa bungtod anaa
ang ganghaan
padung sa imong
tinagoang bahandi

sa dakong lawod
anaa ang imong kaugalingong
lilo nga
maoy magdala kanimo
sa imong
palasyo sa atlantis

sa dakong wanang anaa
ang ayuyok sa buhok sa
nagpasad nga mga bitoon
nga magtultol kanimo
sa planetang imong
pagapuy-an

alang sa babayeng nagladlad sa iyang mga bulingon sa nataran sa telepono

ang wala niya
makuha sa
higdaanan

iyang gibuhat
diha sa telepono

ang mga oras
iyang giwaldas

ang mga kamot
sa orasan

mibikangkang
og ang mga habol

nanagyaka sa
salog

sama sa mga kahoy
nga wala mamunga


ang iyang pag-ampo
ug pangaliya

ang usa ka
lawak
mahimong usa ka
dakong
lawod
sa pacifico

ang higdaanan
mahimong duha ka
tampi sa suba nga
walay tulay

ang mga pultahan
mahimong mga bukana
nga wala nay
dagat

ang mga habol mahimong
mga gapnod na lamang

ang mga alugnan mahimong
mga bungtod nga
angaton sa matag adlaw

ang mga bukton mga langod
sa mga kwaknit nga
wala na mibalik

ang mga ngabil mga bulak nga
laya ug ang mga mata mahimong
mga bungol nga bitin nga
nagluno sa kilid sa atong
matag pultahan sa balay nga
hagbay rang gibiyaan.

tulo ka
buwak sa
utot-utot

upat ka
pungpong
nga hilaw
nga bayabas

lima ka
suwaki
duha ka
tuyom

usa ka
itlog sa tiki

ug usa
ka hait nga
suwag sa
tutok

ug usa ka
apdo sa
sawa

ang mga kagugnan
samok

gakaguliyang kini
nagtipun-og

nga bisan unsaon
mo ug patay
o sunog
madaplisan lamang
sa usa ka adlaw
nga talithi

manubo na usab
bisan sa
kanunayng pagbagotbot
sa tigdaro
dinhing dapita

ang mga sibuyas
naulawan
ang mga kamote
nagniwang
ang mga saging
gibukbok

walay talisay nga
motubo sa tunga sa
asin

walay kinason nga
managhan sa
kamad-an

usahay
balikan nako ang mga
kakugnan

bation ko ana kasina

kadtong naghikog sa
punoan sa sibuyas
atong pakpakan

kadtong saging nga
gibukbok sama sa
mga kamoteng gibunsalo
dalaygon

ug kadtong gitanom mo
nga liso sa talisay
sa pusod sa dagat

gikasinahan sa mga
kinason
nga nangatikig didto
sa tig-a nga darohan
sa mga tampalasan

hagki ang
bato

patay na
ang mga lumot

hagbay rang
milalin ang
mga tubig ning
sapa

wala na
ang pagpunay
ug bisita
sa ulan

hagki ang
bato

basin ug
motubo na
usab ang lumot

basin
moawit na usab
ang umang

basin ug
ang nabilin nga
balayan

nga natipak
basin ug
matapakan

ang usa ka
panglantaw

walay katumanan
kon dili mo usab
kini
sugdan ug haploy
sa imong
mga tudlo nga
nangaloyloy

ang panit nagkinahanglan
sa sugnod sa
bisag gamay lamang
nga kainit

aron unya modilaob
kini
mahimong kalayo
sa imong dughan

maghatag ug kahayag
sa imong bugnaw kaayo
nga kangitngit

gakson mo ang imong
kaugalingong
mga pangandoy

makigsandurot ka niini
sama sa usa ka
hinigugma

piit, papiti sa mga aligato,
init kaayo,
magdilaab ang
kahigwaos ug ang
kalami

mokab-ot sa langit
ang mga tudlo
hawid sa mga panganod
lubong ang mga kuko
sa abaga sa
kawanangan

hangtod nga moabot mo
na ang
kinatumyan sa naandang
kinutuban

ang gabagang mga lawas
maugdaw
ang mga abo sa kahigwaos
magpasad
diha sa mga lapoy nga
mga tiil
sa mga lapa-lapa
sa lapyahan sa atong
tagsa-tagsa ka mga
hunasan

sa mga makabusog
unta

ang atong natulon
mao lamang
ang atong mga laway

igo lang silang
mikaway
dayog biya kanato

ang mga anino sa ilang
mga tudlo
mitapot sa hangin

ug sa dihang atong
gisulayan pagkutlo
sama sa mga buwak
sa antulanga didto
sa atong bukiran

mora kinig mga
abo sa atong mga
panumdoman

ikaw nga midali
paghikap
nalarag
napuling sa mga
abog
nga iyang gibilin

ako anad na  niana
ang akong giatiman
mao na lamang ang
akong mga tiil
nga kusog gihapon
kaayong modagan

ang mga kamot
sa kagabhion

kinumo

ang mga buhok
sa kabuntagon

halas

ang pusod sa
atong mga adlaw

wala nila maayog
putol
mibudlot

ang atong mga palad
sakayang buslot

ang atong mga tiil
nahasulod
sa sayop nga mga
sapatos

busa ang
bulan usa ka
budlat sa mata sa
iring

nga giputlan
sa iyang ikod

tin-aw na man
unta
apan imo mga
gilubog

kita na man unta
ang isda
apan wala mo
man
gisibot maong
wala mo
masikop

wala na ang
kusog nga hangin
wala na nang
mga dagkong
balod sa dagat

abli na ang
pultahan sa
balay ug ang
mga bintana
nangihat na
man unta kanimo

ania na ang
kalinaw ning
payag
miawit na ang
hangin sa kabuntagon

apan nganong
wala ka man misayaw?
nganong
wala ka man miduyog
ning salo-salo sa
kalipay

usa lang ang imnanan
usa lang ang kan-anan

apan nganong
mipahawa ka man?

wala baya'y
magpaulipon kon
walay rason

walay moduko
kon wala kini
ugma puhon
angayan nga
hangpon

walay magpaabot
nianang wala
aduna gayod kini
gihandom nga
maiyaha

busa ikaw andama
ang usa ka bukag nga
pagduda

kadtong giulipon
mo
kadtong miduko
kanimo
kadtong nagpaabot
sa pipila ka
adlaw
o dila ba kaha
mga
katuigan

pangitaa ang mga
rason
ang mga tinan-ogan
nga mga
kahayag nga nagpahipi
lamang
diha sa kilid kilid
sa ilang mga
kangitngit

ang langgam sa
kaadlawon miawit
sa kasubo

kay ngano
natandog ba ang
sanga nga
iyang gibatugan?

kay ngano duna
bay luha ang
mga mata
sa dahon?

ang iyang kasakit
gisugilon niya
sa matahom nga
kabuntagon

kay ngano aduna
bay dalunggan ang
kabuntagon?

kay ngano
makatugkad
ba kini kon unsa
ang kasubo
ug kasakit?

ahh, kon miawit
man ang langgam
igo lang kining
nagpahungaw

kay sayod siya
nga sa kasubo siya
lang diha
sa pag-inosara

ang kabuntagon bungol
ang mga dahon patay
ug ang sanga nga iyang
gibatogan
kon aduna man kini
kasingkasing
sama sa uban
hinimo lang usab
kini
sa usa ka gabok nga
kahoy

oo, gikamingawan mo sila
gani gusto mo na usab silang
igkita bisan pa ug mabuslot na
usab ang imong bulsa

sila wala magmingaw kanimo

aduna silay balay nga limyohan
ang ilang mga bata nagpaabot sa
ilang mga hungit
ang ilang sakyanan kaligoon
aduna silay mga iro nga pagalawgan
buwak nga pagabuboan
nataran nga silhigon
kamote nga lung-agon
ug daghan pang bulohaton

sila wala na gani kahinumdom kanimo

oo, ikaw ang tanga
nangita gihapon anang wala na diha
mibalik sa kagahapon
nga hagbay rang giagop-op
mibalik pag-usab sa balay nga
hagbay rang naguba
sa dalan nga gituboan na sa
daghang sagbot ug nahimo nang
abtanan sa mga kakugnan

oo, ikaw ang tanga
ang kadenang gustong mokutay gihapon
sa taya na kaayong rehas

buntag na
pagmata.

balak sa kamingaw

ang kaadlawon
gakamang aron lang
makita pag-usab ang
sanag nga hulagway
sa aping sa kabuntagon

ang kagabhion wala
matagbaw
sa sayaw sa kangitngit

ang mga bugnaw nga
bukton
gilaposlaposan sa
hapdos nga
hangin

ang kabuntagon
asyosa
miabot man sa saktong
orasan
apan ang suwang sa
adlaw
haskang hangara

ang mga kabuntoran
sa unahan
ilang lawas lamang
ang kanunay nga
giatiman

mora ka nag
budbod sa guot
mo kaayong sinina

gikan pa kaniadto
ang mga salip-ot
ang mga guot man
gayod ang imong
mga gusto

sa imong kasal
karong agosto
guot nga trahe de
boda ang imong
gisukod ug
mipahiyom ka
sa atubangan sa
samin sulod sa
imong lawak nga
hagip-ot usab
sa kadaghan sa imong
mga hinipos
nga unta angayan
na nga ilabay

nahimong guot ang
kalibotan
ang langit ang
agianan sa sapa

ug nganong gikalipay
mo ang tanan
ikaw lang ang nasayod

apan gibalewala mo lang kini tungod sa pagmahal mo sa ihalas nga baboy

matag adlaw
gibisitahan mo ang lasang
aron pakaonon mo
ang ihalas nga baboy
nga taas na kaayog
bangkil
nga baho na kaayong
lapok nga nauga
sa iyang balahiho nga
hait na usab kaayo
ug sayod ka nga sa
umaabot nga adlaw
kon wala ka nay
ilawog niini sa
matag adlaw nga ikaw
mobisita sa iyang lasang
ikaw na ang sunod
niyang putahe.

ang usa ka blanko nga
papel
ikaw ang magsulat

ikaw lang ang magsulat
sa usa ka blanko nga papel

kon unsa ang imong gisulat
ikaw kana

ang blanko nga papel
nagpaabot kanimo aron
ikaw mamahimong
ikaw diha sa iyang
pagpakablanko lamang

si Papa naghigda sa sofa
unya pula kaayo ang iyang nawong
ug sa makausa pa
milantaw nato

si Mama miabot gikan sa merkado
apan wala siyay dala nga basket
nga kasagaran unta
puno na sa isda og utanon

ug sa ikaduhang higayon sukad
pa kagabii
milantaw sila kanato

wala silay mga tingog
luspad ang nawong ni mama
morag bulok sa usa ka
bugnaw nga kaadlawon

ning pagsugilon ko niini kanimo
sayod ka nga nagsunod ang ilang
kamatayon

napulo na katuig ang milabay

apan sa damgo ko pipila na ka gabii
sa makausa pa milantaw gihapon sila
kanato

ganiha midagkot akong kandila sa
ilang lubnganan
mihalad ako og mga buwak
gipangadyean ko ang ilang paglalin

ug sa makausa pa giampo ko ang
ilang pagpahulay na unta sa dayon

ning pagsugilon ko kanimo
gipaagasan ko ug mga luha
ang kabahin kanato

ang mga tanom sa atong hardin
nangalaya na
ug sayod ka nga dili tubig sa atabay
ang ipabubo ni mama aron sila mabuhi


ang atong mga luha
ang atong mga pangamuyo
ang pagpasaylo
ang pagsinabtanay sa mga panganod
ug sa mga hait nga bungtod
ang pagdawat sa suba
sa mga naanod nga patay nga kahoy

ang ispedno sa iyang dughan

nagdilaab ang
iyang kasingkasing

ning kalayo nga
walay pagkapalong

bisan kusog na ang
aircon
gipatukar pa gihapon
sa iyang atubangan
ang electric fan

sa gawas baya
saba kaayo ang ulan
nga imong madungog
sa naniradong
mga bintana
sa pultahan nga
gitrangkahan

ang kainit sa iyang
lawas
usa ka nagbaga nga
oling
nga kon imong
tumban
sa imong lapalapa
makapaslot

usa lang unta ang
iyang gipangayo
kanimo
apan wala gayod nimo
gihatag

nga unta haployon
nimo ang iyang pus-on
bisag usa na lamang
ka tayhop
sa imong ginhawaan
sa pipila ka lugas sa
iyang buhok

wala na kunoy
kabutangan sa iyang
naghinobrang
kalipay

puno na ang
kusina
mas labawng
puno ang
veranda

gipapauli niya
ang imong
gihalad nga
gugma

ang mga bitoon nga
naglantaw
nangaulaw

unya sa kalit lamang
mibunok ang
dagkong lusok
sa ulan