wala koy nasabtan
sa bag-o mong mugna.
ang mga pulong mo
morag gabon, ang gisulayan
mog pabati kanako,
morag yamog lamang
nga nagpatong man sa
dahon, apan walay gilak
gikan sa kahayag sa
bag-ong bidlisiw.
sad-an ako kanimo,
hagbay rang gibudhian ko ang
pagbati, ang iyang punto
dili na makadulot kanako.
miabot na ang panahon
nga gusto nakong bungaton
ang walay sapot
ang nawong nga walay tabon,
ang lawas nga mihay-ad
sa baybayon
nga gihabulan sa balod
dila sa dagat
nga mitilap sa tungatunga
sa imong walay kinutuban
nga kauhaw
sa kahulugan sa gugma
ug kahilas.
No comments :
Post a Comment
Lami ba?