Dawata Kining Kahayag

hubad sa balak, "take this light"

Usahay naay mga panghitabo
nga sa iyang kahilom
imo kining mamat-an.

Sama sa kadalisay
sa kahayag nga milusot

sa rehas sa imong  tambo-anan

nga naglamdag sa lab-as nga batunaw

Anaa ako sa gawas
namasin nga makita
mo usab ang dan-ag.

Kani usa usab ka panghitabo.
Ang akong pagpaabot,
maoy nagpahilom sa kahayag.

Sakob

Nahinanok ang palibot
dihang gisapnay
sa kagabhion ang
kinatumyan sa kahilom


Bisan og supak
ang banagbanag
sa kasulopan sa kangitngit,
ikaw nga dumuduong
puno sa tam-is
nga katarungan

Sakob ka
sa Hubong sanga
sa panahon sa tingtugnaw
nga nagsanta sa iyang pagkatagak

Uban sa mga layang dahon,
mao lamang ang alingawngaw
sa kaparutan

Ang Diktador

Salig ka sa pagbati?
kay kinsa man
ang gustong
mahimong ulipon?

Du-ol nang mabu-ak ang
balod sa ligating.
Ang kakusog sa hangin
milapaw na sa akong panabot.
Ang kaanyag sa adlaw
nag-awhag na og kasubo

Lisod ibton ang nagbara
nga bukog luyo
sa akong gusok.

Lawom ang iyang
pagkahulog.

Bisan pa og ang akong
dughan puno sa kahiubos,
batukan ko ang iyang
pagkamanlulupig

Lagyo

(hinubad sa balak ni  Louis Simpson)

Ayaw na og sulat.
Sa akong kasubo,
wala na ang akong kahayag.
Dihang nahanaw ka sa tag-init,
ngitngit na ang akong kwarto.
Sirado na usab ang akong mga bukton.
Kon tuktukon mo ang akong dughan,
sama lang kana sa lubnganan.
Ayaw na og sulat!

Ayaw na og sulat.
Kinahanglan makamao
kita og unsa ang kamatayon.
Gimahal ko ba ikaw? Pangutan-a ang ginoo.
Susiha ang imong kaugalingon.
Nasuta mo ba?
Sa paglitok mo sa pulong nga gugma
nga ana-a ka sa halayo
susama lang  sa langit nga lisod kab-uton.
Ayaw na og sulat!

Ayaw na og sulat.
Gikahadlukan ko ikaw.
Nahadlok ako sa unya nga handuraw.
Kay ang handurawan ang naghupot sa tingog
nga sa kanunay kong madungog.
Ayaw hatagi og tubig, ang di kamaong moinom,
Ang hulagway mo anaa sa Pulong.
Ayaw na og sulat!

Ayaw na isulat, ang maaghop mong mga pulong
kay wa ko kini hagita nga dili na tan-awon,
Mura og misaliyab ang imong tingog
sa akong  kasing-kasing, nagpakita kanako
tabok sa imong pahiyom
Daw imong mga halok nga napatik sa akong dughan.
Ayaw na og sulat!

Bantawan

"Ever drifting down the stream

Lingering in the golden gleam

Life, what is it but a dream?"--Lewis Carrol

kung ang kinabuhi susama
lang sa damgo
gusto ko nang mahigmata

kung ang kalibutan
maoy entablado
sa  piniling papel
asa ang bantawan sa kamatuoran?

bisan unsaon pagbugsay
usa lang gihapon
ang atong padulngan

insomnya

nanglu-od na

ang kagabhion 

sa pagpina-abot sa 

imong katulugon

gihangop ka sa adlaw

apan daklit lang
ang alimungaw
nga gikatanyag

sa udtong tutok

talaw

dili ko takos
makita ang adlaw
sa udtong tutok
paabuton ko na lang
ang dan-ag sa kahapunon

Ang Damgo sa Til-as

nagtubo ako nga wala ka,
inampingan ug puno
sa pag-atiman,
wala nila ako tuguti
nga makigbugno sa gubat
sa kinabuhi

sila nga nahikatulog na sa suwab
sa kalibutan mao ang kanhi
kong mga pako
nga gisakmit  na sa kangitngit


subayon ko unta ang agungoy
sa hangin
aron masuta ko ang
tuburan sa kasakit
ug kalipay

apan ikaw ang akong nakita
sa hanap nga kapunawpunawan,
ikaw ang lim-aw nga gikutaw
sa libog kong pangisip

kuspaw ang imong pamayhon
sama  lang sa imong laraw
dili ikaw ang tubag
sa akong mga pangutana
og salimu-ang

tuktukon ko ang pultahan
sa langit
lungkabon ko ang giyawihang
mga bintana

pamuniton ko ang mga nayagyag
nga mga bitu-on
ug isabwag ko kini
sa mga lunhaw pa og pangisip

uslan ko ang mga pako
ug anting-anting sa mga anghel
aron paghagwa sa ilang katulugon

Bag-ong Tuig

sugaton ta sa kalinaw
og kalipay ang bag-ong tuig.
mokaransay ang lingganay
sa tumang himaya
silhigon ta ang mga lawa-lawa
sa galamhan
ablihan ta ang mga bintana
sa atong kasing-kasing
aron kini makadungog
sa hagawhaw sa atong salabutan
supakon ta ang naandang dinagayday
alang sa kausaban

Ang Pagpadayag

sa dihang gipaila-ila ko
ang akong kaugalingon kanako,
nabulabog ang dagat
sa alingisig sa kanaway
nga nagsalimuang
sa pagtuong
iyang masupil
ang iyang pagkahulog
sa daw batobalaning dagat
nga bisan ang tagum
nga panganod
way igong gahom sa pagdumili
dihang kini nakig-ambit
sa iyang bulok.

mahulga-on ang tigpa-ila
apan gihangop
ko siya sa halu-ag
nga panabot

alim

hanggapa ang huyuhoy
alibyo sa sakit-katol
nga kahigwaos
apan og mura nag
lamayo nga di na
madala sa tubig-dagat
ug ahos
dawaton ta ang kapait
sa ilang mga tutok
usahay mas masangputon
ang kahapdos sa kamatayon.
pagtamod ug pagpahiubos sa kalag-
ang unang ang-ang
sa usab nga paghimugso

Balaki ko

dili pa paigo ang kalawom
sa tubig sa sapa
lumsan ko unta
ang akong mga kasubo

Palad ba?

motu-o ka ba di-ay
nga ang kapalaran
sama sa tul-id nga badlis
nga daw udyong
nga moigo sa kinauyukan
sa nagtuyok nga kinabuhi?

anaa pa ang naghut-ong
nga mga bato nga usa-usahon
pag pas-an aron moabot
sa kinatumyan sa himaya

padayon

bisan pa og ang balas
mangita og kang-a
sa tiniklop
mong palad

ang gugma
magpabilin samtang
halapad pa
ang baybayon

kapit-os

gum-os ang panabot
sa pulong nga misubay
sa unos

hatagi og butang nga
makaalim 
sa balati-an

sama sa kainit sa tubig
nga mohupay sa sagalsal
nga igham

sama sa imong palad
nga mohanoy sa mahagiton
nga katimawa

Ang Imahe

nakakita ka na ba ug
kaanyag nga way anino?
sama sa panan-aw
sa unang pagbuka
sa mga mata sa masuso?

nasaksihan mo na ba ang adlaw
sa way paghinumdom
nga sa pagkahuman sa paggahin
sa iyang dan-ag motidlom kini ug balik
sa dagat sa kagabhion?

nahiayunan mo ba ang rosas
nga way bisan usa ka lugas nga buhok
sa imong paghusga
nga  luyo sa iyang kaanyag
anaay hait nga mga tunok?

kon ikaw motangho,
tingali nahiusa ka na
sa akong bathala,
wa siyay panumduman
sa akong kasal-anan

Pak-an

nagbiya ug badlis
sa panganod ang agi
sa sutoy mong
paglupad

di katuhoan nga
ang imong pako
naani gumikan sa
alilang

ayaw palingla
sa kahayag
sa  hinulamang
abilidad

baliki ang haw-ang,
nag-abay sa manulunda
nga way kinutuban

handurawan

sayon kab-uton ang
ana-a lang sa kiliran

apan ikaw nga akong
minugna, idlas
nga nagpahipi sa suwab
ning dughan

hinuktok

gilimod sa kasingkasing
ang nasaksihan sa mga mata,
gibalibaran ang hagawhaw
nga mikuyamang
sa dunggan

ang utok,
gidusingot sa salikwaot
nga kabutang

mipahilayo,
nangita og katarungan

haiku

dungan sa hangin,
tugaw sa kagabhion
uwang sa iro