Balak Kalibotan

Malipayong Adlaw, matag-adlaw!

-Lubi Kalubihan

Mother Tongue

Sa parat-parat ug lami-lami sa kinabuhi,

Kaugalingong dila ang itila.

-Lubi Kalubihan

Misalop Na

Mihalok sa bungtod ang adlaw
Misalom sa kahiladman sa kahinangop
Sa tim-os nga tinipigan nga awit sa himaya
Nga giduyogan sa huni sa gangis sa kagabhion
Diin ang perlas sa kahidlaw maoy bugtong nga
Bituon.
Misalop na...

-Lubi Kalubihan

Baybayon: Ikaduhang Semana sa Agosto 2009

Baybayon: Ikaduhang Semana sa Agosto 2009

13 ka mga balak ang midagsa sa Baybayon

Pananglitan ang Sakayang Papel ni Cindy Velasquez nga miabot sa baybayon nga daw gipalid lang sa hangin, unya namidpidpid lag iya sa lapyahan. Morag ayaay ang dagat, apan mora pod og dunay mga balod nga mihatod sa sakayan. Malinawon. Hapsay. Dunay mga hulagway nga mamidpid pod sa panimuot sa magbabasa, labi na ang pagkaayahay sa way sangit nga pagbasa niini.

Kon basahon pod nimo ang iyang balak nga Makighagwa sa langit mora pod og bation ang dakong kamingaw kun kahidlaw. Samtang gahangad sa langit, sa mga bitoon, ug sa unsa pang hinungdan, daw ikaw nanamin na man hinoon ug imong matataw ang kamingaw diha sa imong dughan.

Kinsay magdahom nga ang gilubong niining gibalak ni Ric S. Bastasa, mao diay ang gugma ko kanimo (mao pod ang titulo sa balak). Ug kinsay magdahom nga kini dili pa diay patay, inay buhi ug milabong pa. Bisan gikalimtan na sa naglubong sa iyang gugma, anaa pa gyod diay, gapadayon. Ang nindot ani, mao ang wa damha nga anaa pa. Diay!

Kalingawi ninyo'g basa. Ug kon duna moy ipadala nga balak, dire lang ipadala: lunsayngbinisaya@gmail.com

Lubi

Sakayang Papel

Gituhil ang anino sa sakayang papel inig

salig niini sa agay ug pagtukaw sa tubig.

Nitapot sa papel ang hangin, namidpid

kini, lakip na ang gibug-aton sa panid.

Kini naunlod sa galiyok-liyok nga kabugnaw

diin ang mga letra nagkisikisi sa pagpanaw.

Ug nibukhad kini sa dila sa dagat

samtang gihapyod sa tumang kaparat.

--Cindy Velasquez

Makighagwa sa langit

Usa ka eskultor ang kangitngit

nga makighagwa sa langit.

Apan ang iyang mga kamot, mokudlit

sa gilay-on sa mga bituon

ug karong gabii gatan-aw ko nila,

ug diha pod nako mahipalgan

ang tibuok nakong kamingaw.

--Cindy Velasquez

ang gugma ko kanimo

duna kay gilubong

gusto nakong hinumduman

apan ikaw

dili na ganahan

nindot kadtong imong gilubong

ilalom sa yuta

imong gitago

apan kini mitubo

mangutana ka kon unsay ngalan?

kay imo man gyod nga sa dayon

gikalimtan

sa imong kabangis

ako nalooy

kadtong imong gilubong

gugma ko kadto nga karon

sa gihapon

milabong.

--Ric S. Bastasa