pulong, pulong

pila na ba ka linibuang pulong
ang gibuhian
niadtong gusto mong maangkon
ang gugmang tinaguan
alang kaniya?

pila na ba ka libua'ng pulong
ang gipakawad-an mo'g bili
ug hinunua gibiay biay
kay kasaypanan
ang gisapnay niya?

pila na ba ka pulong
ang linibo mong gitaguan
ug nga wala gipabuhagay
kay nagtuo kang ang kahinaykanan
mahimo unyang hilak ni inday?

pulong, pulong
siya ang nagbugkos kanato
siya ang naglimin sa dughan
niining halapad nga baybayon
nga sa kanunay midawat
ug naminaw sa atong mga garay

ug sa walay pagdumili
iya kining gitugutan
bisan ilawom sa iyang pag-iyagak
uban kanato hubo namahid sa luha

ug bisan sa pagpadayag
sa atong mga tinaguang pagbati
nga makanunayong gibanlas ta dinhi
matag karon ug unya.

PUNG BAY MAGDAJON

pung bay magdajon
mao kana't tugon sa Bol-anon

usaha'y wala'y unod
ang mga bukog

giilogan sa mga irong buang
og nahadlok ang mga tigulang

kay sa kataposang pagkapalong
ang pulong dili lamang pulong

ang lawas ang unod madugta man
apan ang pulong mobatog sa kahanginan

gikan baya kita sa usa ka pulong lamang
nahimong lawas, naabog sa sam-ang.

ang gugma kanimo

sultihan ko ikaw
nga dili sa mga pulong
nangunod ang pagbati

dili sa mga awit
nahimong sayon
ang pakiglantugi

usbon ko,

ang gugma kanimo
tungod kana kanimo
ug dili tungod sa gipakita

bulawan man kini
ug bisan sa walay bili
nga batong tinapok sa palad

ang bili sa mga pulong

(alang sa mga tigdumala ug nagtuo sa kalubihan)

gisapnay ninyo kanunay
ang mga pag-amping

gibuligan sa pag-amuma
gitugutang mahimong lanog nga pulong

ilawon niining nagkabagang kalubihan
nga sa kanunay nakig-uban

sa mga nag-inusara'ng pakigbisog
ug wala'y panon nga sarang tultulon

dako'ng pasalamat alang sa kalubihan
nga nihatag sa tipik nilang higayon

haron kining pundok sa mga pulong
mahimong lanog nga lugaynon

diin mabati sa mga bungol nang kasing kasing
nga nitikig ug nigahi tungod sa pagkaulipon

sa mga pulong nga iya sa mga kasikbit nga dapit
ug nga midaug daog sa pagkagamay niini

pulong pa ni bay uray sa iyang mga awit
nga latagawtawan

"dako ang iyang gugmahanong buwan"

GARAY SA PULONG

(Pahinungod kong Day AngelnJuly sa Kalubihan)

Gipadayon mo ako sa imong kalibutan
Sa matuod nga pagbati imong gidalitan
Taliwala sa kagutom imong gihukaran
Sa mga pulong mong pagkabalaan.

Diha kanimo nakita ko ang kakuwang
Napun-an ang pagbati kong haw-ang
Namatay nga gamut imong gibisbisan
Nabuhi kini og nanalinsing nga hilabihan.

Panahon sa akong kalipay og kasub-anan
Nag-inusara,apan napabuhagay kong tanan
Sa matag-patik sa mga pulong nga gibuhian
Mahupay og malipay kining akong balatian.

Mga garay sa pulong sa usa ka uyamot
Dinhi sa yagit kong pagkatawo nakapahimuot
Bisan kalibutan ko man karon nagkagubot
Ipabanlas ko kini,ipalanog,sa matag palibot.

Higala, dayon sa among gamay nga kalibutan
Mga balak sa pakigbisog atong pagasaw-an
Hubiton ta kini og atong paga-ambitan
Talagsaong kalipay atong matagamtaman…

Salamat kanimo higala ko
Mga garay sa pulong gipaambit mo
Tungod niini naaghak usab ako
Karon ako nagatoo nga mao kini
ang gipangita kong pagbag-o….

ang luha

ang luha
nangita kana
og pultahan

gawsanan
sa motuok kanimo

mosubay kana
sa nahitabo
dili manugid
apan katultol
na sa
langit anang


mga panganod
kabalo nang
molupad
didto's dakong
kawanangan

maabre ang
imong dughan
maluagluag
ang kipot
kaayo nga
dalan

dili ko kahimo

dili ko kahimo
og kaon sa
akong amigo
dili nako mahimong
kilawon
ang akong
trabahante

mao nang
ayaw kog ingna nga
arte
kon dili jud ko kahimog
kaon
anang imong karneng kabaw.

kaasgad

ngano ba
nga sa tanang lami
ang dagat
nga pagkalapad og
pagkalalom
gihimo mang
asgad?

nganong dili na lang
gihimong tam-is
sama sa
orange juice?

o kaha gihimong
beer
o tanduay?

nganong dili na lang
kaha aslom
sama sa suka?

nganong
dili na gihimong
asin ang tanan?

nganong
gipili man gyod
ang pagkaparat?

nganong dili
na lang paet?

sama niining
akong gibati
karon.

kabahin sa gianod nga tsinelas

i

kabahin sa gianod nga tsinelas
didto's dakong suba sa Lanao
sa tiilan sa Marawi
hangtod kuno nga dili
makit-an ang paris
dili gyod mabalik ang kalinaw

ii

akong mahinumduman
ang gibuhat ni jose
unsa kaha'y iyang punto
nga sa pagkaanod sa usa ka
tsinelas iya man usab nga gipakuyog
ang nahibilin?

iii

ang kalinaw god kuno shotshot
dili mahimong hiposon ang usa ka tsinelas
dili mahimong paaboton
kon kanus-a pa mauli ang usa nga naanod.

mga tunto

ang mga tunto,
nagparihas lang

nabinunalay,
nagtinigbasay,
nagbinutangay ug black eye

sa katapusan
sila ra gihapon ang naunay

nag-antos sa ilang
gisapnay sapnay.

pares sa sinelas

wala ug tuo

managsama ang dagway
managsama ang kolor

pares hangtod sa hangtod
mao kana ang ilang bulok

hapin sa lapa lapa
kalipay nilang duha

mabugto man ang usa
mawad-an sa silbi ang pikas

mao usab kita
gitagana sa usa'g usa