sa dugay nakong tinutok

kining tinagong pagbati
buang

sa dugay nakong tinutok
kanang ako lang
wala siya'y labot
aduna ra gyoy miabot

akong nakita nga gadangas
baya pod ang iyang agtang
og mora kog nahuwasan

nawala ang sakit
og sa dihang mihunong na ang gahaguros
nga sakyanan

minaog ko
dili na sa parehas sa una nga ako nagdali-dali
milantaw ko og balik kanimo
og dayon nakog
pahiyom

wala na, nahuman na usab
ang usa ka panid

sa akong kabuang
kanang gugmang sinug-ang
nga morag saang

dili mapugos ang
gugma

og ang kasilag
kon moabot na
dili pod
kapugngan

gusto unta nakong
kab-oton ang
pasaylo
apan pagkalayo
pa gyod
kaayo

morag katol
nga pinaakan sa pukyutan
hapdos
sakit
dili jud pahikap
dili gani magpakita

ang imong gong gusto
nga ako
mamahimong pareho nimo

nangutana ka sa ilang mga ngalan
og kapila
og asa
og kon nasayod ba siya

mitambag ka
nga bisan sa imong kaugalingon
dili gayod nimo isugid
ang matood

bisan og masakpan
hawid gayod sa saya sa bakakon
tago didto sa ilalom
og dayon hatag nianang pahiyom

pagkahuman

pagkahuman
sa dihang ako nagawsan na
mitalikod ko
og gigakos ko ang akong
mga bukton

wala na'y aso ang akong tabako
og kon imo pa kining
dagkotan

oo lang gihapon
ikaw ang akong sabton

ikaw ang moyupyop
og ako ang mohanggab
sa hinungaw
ning atong gaaso nga kinabuhi

batia ang kahagong
hakpa ang kaisog
tam-osi ang katam-is
kini ang kinabuhi
ayaw panabi

maanad ra ako bisag wala ka na

nabasa ko na ang sulat
sa ibabaw sa katre nga imong gipatong
sa uluhan sa
alugnan

mamahimong magmingaw
ako sa duha
o tulo hangtod
sa unom ka bulan

basin gani og makaiyak pa ko
nga magtutok sa imong
larawan

kadtong mipahiyom ka kanako
og ako nakatilaw og unsa
ang katam-is nga labaw
pa sa asukar

pila pa kaha ka gabii ang
akong antoson sa paglimbalimba?

apan ayaw kabalaka
naa ra gihapo'y utlanan ang kamingaw
pagkahuman niining
gamay nakong pagbangotan

mobalik ra ang akong saktong
panglantaw
madungog ko ra ang
bag-ong hunghong

nga ikaw dili gayod ang angay kanako
og ako
dili angayan nga mabuang
sud sa unom ka bulan

karong gabhiona
taposon ko na ang tanan
katulgan ko kining akong kaguol
ugma magsugod na usab ako
sa usa ka
bag-ong kabuntagon

ala una

wa ka lang masayod
sa maong oras
diin ang kamingaw
mibangon gikan sa usa
ka hinanok

misaka pataas nga morag
aso gikan
sa daob diha sa dapog

ngitngit kaayo
og bisag asa na lang padulong

ang mga garay ni inday gasa

pastilan gyud nakong lingawa
usa ka kulbahinam nga blog
ginama sa usa ka bata

apan balo lang
ug nasayod ba kaha niini ang papa
mga garay niya pwerting labuha

mga unod pwerting tinuora
labaw pas bulawan o
gilak sa dyamante sa kalangitan

wala ko kaila niya
apan ngalan niya inday gasa
matuod nga gasa

hinuot inyong dawaton siya
ug buligan sa iyang
paglingaw sa atong mga mata

paghupay, pakatawa
sa iyang paagi isip usa ka bata
tingog nga angayang nimong masuta

pamatud-i unya
ug bisitaha sa blog niyang gama
http://gasapinky.blogspot.com/

Mamasura, hayko!

Nagsakit ang bukobuko
sa tibouk hapon pagkayod.

Lakip ang tangkugo hapit
nabaliko sa punayng duko.

Napaig sa kainit ang panit
na itomon na daan.

Daw himungaan sa nataran,
kaykay, tuktok ngari'g dito.

Pili sa plastik,
karton ug lata,
lakip na bildong buak.

Apil pa ang balde'g
kalderong busloton,
botelya'g grapa.

Nangyawat makakwarta
bisa'g gamay,
para palit bugas.

Maayo unta kung makasobra,
para may mapalit pa.

Bisan lang ang sud-an kinaham,
sardinas,buwad ug monggos.

Lipay na kaayo si undo'g inday
kung may madala sad na pan.

Maayo na lang matimo,
maghulat makaluto.

Para matambalan ang gutom
nabatyagan sa tiyan.


-sakagawasan

Ang Dalang Way Padulngan

       A
      n
     g
      D
       a
       l
       a
          n
           g
<<=THIS WAY=>>
            P
           a
          d
           u
           l
            n
             g
              a
              n


-sakagawasan

unsaon man

Wala nay umoy

Wa nay gahum si manoy

Di na kalangoy

Karon si manang

Tawn mobalibad na lang

Di na pa-ang-ang

ang pagpangandam sa kamatayon

nabati ko ang kahapdos sa kasing kasing
sa matag tuyok sa akong hunahuna diha kanimo
nganong ikaw pa ang natanom ning pag-inusara

buot kung mulinkawas, mamuhi apan
nasayod kung kamatayon ko lang ang mahimong bugti
kung mahilayo sa tubig ug hangin nga gipahulaman mo maka-usa

naanad na ako, nahimo ko na kining kabahin sa akong pagkatawo
apan unsay mahimo niining ulipon kung imo na kining bawion
bisan malisod giandam ko na ang akong kaugalingon