walay kahadlokan

ang balay nga gabok
hadlok sa kalayo
ang balay nga salamin
hadlok sa bato

ang walay balayan
bisag gamay walay kahadlokan

usa ray kinabuhi

nagbuwa ang baba
og nag-ungot ang apapangig
ni manoy Pedro sa dihang gi-atake
sa kalala sa kagaw sa tetanus

wa dangtig usa ka adlaw
sukad misugod pagtakboy
ang sakit nga dala sa kagaw
mihalin siya sa laing kalibotan

maayong pagkatunggab
sa pinuting bag-ong linimbasan
ang tiyan niya dihang nadakin-as
siya sa nagbanaw nga dugo
sa iring nga iyang gitigbas

human kini mokatkat
sa iyang buko-buko saka paingon
sa punoan sa tambis aron pag-eskapo .
sa irong itom nga naggukod niini.

labihang sukoa ni noy Pedro
busa mikuha ug pinuti ug gihapsan
ang iring nga nagkabyon pa
sa punoan sa tambis.

mituagsik ug nagsirit-sirit ang dugo nini.
naminti ug namalikas si noy Pedro
"peste kang yawa iringa ka, siyam imong kinabuhi?.
patay ka man laging panuwaya ka !".

natunga ang lawas sa iring
nagsiyagit si noy pedro sa kasakit
sa iyang tiyan nga maaayong
pagkatuhog sa pinuti

mipaghot ang iro
nagtuyok-tuyok ingon
sa wa mahimutang
miyaka kinig miuwang

karon, nagsugod nag kadunot
ang patayng lawas sa iring
didto sa mabaw niya
nga lubnganan

Patay ang iring
patay si noy Pedro
samtang ang iro
nagpabiling buhi

ambot nasayod ba
kaha siya nga usa
ray kinabuhi
natong tanan?

..

sa daplin sa kalsada

sa daplin sa kalsada
si lola metring
naglingkod
sa iyang
tumba-tumba nga karaan

karong sunod bulan
nobentay-singko na
ang iyang
pangedaron

milabay ang panon
sa mga tawo nga naglubong
sa usa ka patay
paingon sa simbahan
alang sa
kataposang misa
og bendisyon

nagduda si
lola metring kon basin
og nakalimtan na siya
sa Ginoo

samtang nagtindog ka atubangan sa dagat

sa bag-ong kabuntagon
miabot ang bidlisiw sa adlaw
og ang imong lawas
nga walay sapot
hayag kaayo sa akong
panumduman

pagkaanindot

gusto ko na nga mopauli
sa akong dalan
balik sa akong balay
og nangita ako og
rason

hiwi ang imong ilong
og baga ang imong ngabil
og ang imong
agtang morag lapad ra

apan bisan unsaon kog
pangita sa mga rason
aron maundang na ang
akong kahidlaw

mipiyong ko sa akong
mga mata
og miginhawa og lalom

lami man lang gayod
gihapon tam-oson ang
imong mga ngabil

samtang nagtindog ka
atubangan sa dagat
og ako naglantaw kanimo
wala gayod gihapon
miabot kanako
ang paghuna-huna nianang
giingon nilang
ulahi nga pagbasol

ambot og unsaon na lang
lami man gayod gihapong
tilaan og osap-osapon
ang imong dila

pagkatam-is
pagkaanindot
pagkalami

bahala na si bathala.

ang paglihok og pagbalhinbalhin

kon mopondo ka lamang
sa imong gitindogan
daghan ang mahitabo
malabyan ka lamang
og mabiyaan ka
tataw kana sa balaod
sa pagsibog og
pagbalhinbalhin

ayaw og ampo sa kapalaran
pakigduyog sa
kabag-ohan

kon pilion mo nga ikaw mora
lamang og pato
nga galutaw sa usa ka linaw
kaayo nga suba
mamahimo ka lamang
nga puntirya sa ilang mga
pusil
ikaw ang ilang hingpit
nga target

nganong magpalupig ka man
dili ka sama kanila nga
natawong pildihonon
kay ang imong mga ginikanan
kaliwat sa mga haring
gangis sa kagulangan


lakat, dagan, mamahimong mopahulay
panalagsa
mao kana ang atong ngalan

sa akong kabahin
ako nagbalhin-balhin
aron ang akong kahaw-ang
pun-on sa hangin
sarapon ko ang kabugnaw
og isulod ko sa akong ilok
og pus-on
dinha maipon ang
gatipun-og nga
dilaab
sa kalayo sa akong
kaulag

kainit ang akong
habak
kay og wala na kini
unsa pa kahay pulos sa akong
kinabuhi?

ang pag-alili sa mga gabok

sa pag-alili sa mga gabok
kadtong gipangbokbok
nga wa ka masayod kon ngano
og naunsa
og dis-a gikan
dili kalikayan nga tangtangon
gayod ang atop
dayon ang bongbong
og ang mga haligi

abi nimo og gamay lang ang alisdan
kay gamay lang
man god usab ang makitang
bikil

sa kataposan ang tanan jud diay
ang alisdan

mao kana ang pagpabarog sa
kabag-ohan
ayaw na paghunahuna og
paghilo sa mga anay
dugay ra nga sila wala na
ang nahibilin mao na lamang
ang ilang mga iti
og ang galawod nga
kahaw-ang

LAHI ANG SAKIT SA KUTO-KUTO

lahi ang sakit sa
kuto-kuto og sakit sa pus-on

sama kana sa
panaglahi sa imong bag-ong gikaibgan
og sa imong asawa

hunahunaa pag-ayo ang ilang
kalainan
sa dili ka pa mosalom sa dagat.

pagbantay lang niini

kon makita na gani nimo
nga mikiling na ang imong barko
ang tanan
nimong mga bagtok
mokaratil og dagan
ambak
og balhin sa laing barko
nga dili na imo

natural lamang kini
og ang nahitabo kanila nga nahiuna pa kanimo
mao usab ang
mahitabo diha kanimo

usa ka lamang ka hangin nga lumalabay niining
dako kaayong bungtod
busa akong agaw
ayaw gayod panghambog
nga ikaw dili madutlan niaanang
politikal kagaw.

ako ang bakak nga imong gibuhi

sakit paminawon nga
sa pagsugod pa lang
ang tanan nakong gisulat
kabahin sa
kasakit og
kapakyas
gihandom nimo nga kining
tanan
matood

gusto ba nimo nga ako
mismo na ang
malumos sa mga balod
nianang pagsulay?

nalunod ang barko nga
akong gisugid kanimo
og ang tanang mga nanakay
niini
nangamatay


wala ako maapil
ako ang bakak nga nabuhi
gikapungot mo kini
og nagpalayo ka kanako

ang tanan
matood
nahitabo ang akong mga
gihimong sugilanon
ang dugo nga mibanaw sa salog
nangauga
og ang imong nakita mao lamang
ang mantsa
sa usa ka tagok sa caimito
wala na ang langto

nakita mo ang imong kaugalingon
og miiyak ka
nga mora bag imong gihaya ang
karon og ang
imong kagahapon

tagai og lugway ang umaabot
ayaw og too kanako
ang akong mga sugilanon
nahimong matood lamang
tungod kanimo

wala ko damha nga kining tanan
matapos sa usa
ka panagbulag

naglingkod ako sa daplin sa imong labat
dala ang akong usa ka kaban
nga mga laing sugilanon
wala ka na mangambat

og sa akong paglakaw palayo kanimo
sud sa akong dughan
ang akong pasalamat dili na nimo mailhan

ang kamingaw

ang kamingaw
dakog panahon nga
makiglambigit kanato

makigsulti sama sa usa
ka suod nga higala
makigkuyog bisan
og asa
kadulog sa matag gabii
kanunay nga
makasabot
sa atong kaugalingon

nganong mangita pa kita
og laing kauban?
samok na lang hinoon
ang kinabuhi

bugnaw usahay ang kagabhion
diha sa pagtindog sa kilid
sa bintana
apan kanunay na kining
mahitabo og dili na kini
angay pa nga ikatingala

ang kamingaw usahay
maoy atong pultahan
padulong sa kagawasan

sa pagdawat sa iyang mga kamot
dali ra ang paghikalimot
ayaw kabalaka kay sama sa imong
mga ilong og mata
kini siya apil na sa mga parte
sa imong lawas
adunay lawak nga ang sulod hangin
ang tingog
hunghong og ang iyang
kahaw-ang
makapalig-on

hagki siya
og gaksa
kay ikaw og siya
usa ra

pagbangotan

sa kagahi
sa yuta

mibulhot
ang hangin paspas

gikan sa iyang
mga kamot

mitulo ang luha
nahumok ang yuta

miturok ang
usa ka liso

gihandom nako
pag-usob ang

wala na didto
mikagot ang akong mga ngipon