babayeng kusog manigarilyo

babayeng kusog manigarilyo

dili lang gatas
ang gihatag
sa usa ka inahan
nga kusog manigarilyo
sa iyang
anak nga
gipatutoy.....

dili hingpit

dili hingpit

kay ang imong
gihagkan mao lamang
ang akong ngabil

wala nimo giapil
apg-angkon
ang akong lawas
og kalag

dili ko usab
kana
itugot kay giangkon
og gipanag-iya na
kana
niya

magnifikasyon

magnifikasyon

mao kini ang pag-abot
sa akong binhi
diha sa imong
itlog,

sa usa ka halok
nahimo ang
milagro sa
kinabuhi

natawo ang
kamagwangan

pagpanigarilyo

pagpanigarilyo

sa kataposan
nimong bulhot
nianang usa
ka sigarilyo
wala kay mahimo
sa pagloyloy
sa imong
pikoy.

masokista

masokista

nagkahibat-hibat intawon
ang akong antipara
sa dihang
gitangtang nimo ang
kataposang
tabing sa imong
kalawasan

luyaha ako
bun-uga ako
sa tumang
kalipay

ang viuda

gibisitahan namo ang bag-ong viuda
og sa pagtagbo
nagbesobeso

kalit nga mitulo ang luha
sa mga matang lalom
dagayday sa aping nga
nangliki

"wala gayod makahulip
sa akong bana! dili ko siya
makalimtan!" mibakho ang
viuda

gidamgo sa akong asawa nga
ang iyang bana mibisita
sa balay og sanag kaayo ang
panagway
malipayon og nagtugon nga
dili na lang pahibaloon
ang asawa nga
nagbangotan

sa kataposan
mopauli na usab kami sa
among gigikanan
mihatag ang viuda sa
iyang kinuripot nga
katawa
usa ka pahiyom nga
nagtahod sa
kagahapon.

tabula rasa

sugod ka sa
wa jamo

mao kana ang
tabula rasa

walay sulat
walay patik

wala gani
sulod ang imong
mga damgo

kon mohagok
ka kuno

GIKAN KUNO KITA SA USA KA ISDA

ANG tapay naghandom
nga mahimong mga tiil
og busa nahimong tiil

nahimo ang ulo
og ang ikog

nawala ang ikog sa
likod
mibalhin sa
atubangan

apan kay
manggiulawon na man lagi

gitabonan gitagoan
ang iyang bag-ong
kinaadman

damgo

nasayod ka ba
damgo ko nga nagawsan sab
ko samtang
gadamgo nimo nga ikaw
usab nagawsan
kaupat kalima samtang
gadamgo usab nako?
nakalimot ka
nakalimot sab ko
nahinumduman ko lang
sa dihang
nakita ka nakong migawas
sa banyo humag kaligo
humot og walay
sapot
ang tapis sa imong hunahuna
hagbay mo rang
gilabay sa gawas
ning balayan sa lawas

nganong imon giunya-unya ang gugma?

ganiha nanguhit siya
gahapon nangamay na kini siya
ang gugma
nga dili kamaong mamakak
hagbay ra

sama sa pagsunod sa kabaw
sa sugo sa iyang amo
gibitad ang daro
giantos ang kainit sa adlaw
og ang mga bunal
ang pagkaalingogngog sa
mga isog
dinhing dapita

nangamay ang gugma
nanitsit
nagpabenta
gihangyo ka nga biyaan
ang tanan
nga supak na sa imong
kabubut-on

apan, gahi ka og ulo
tig-a ka
bato ka

putol na ang imong duggan og dila
nabutaan ang imong mga mata
mao usab kini
ang gugma
sa pikas tampi sa pagsabot

mainantoson
tapot lang gihapon anang
paglaom

ang mga maya

nangabot ang baga nga maya
sa ibabaw sa akong ulo
ang kasanag sa bulan
niadtong gabhiona
natabonan sa daghang mga
anino

miabot na ang mga maya
sa kabukiran
aron mamahulay
sa ibabaw sa ulo sa usa
ka tawo

gikoronahan siya sa mga anino
nawala siya
sa tumang kangitngit

wala masayri kon asa na siya
ang nagpabilin nga kahilom
kabalo ka na
dili gayod magsaba
sa iyang nahibaw-an

kon mosakay man lang kita sa baroto sa kalipay

dali na
sakay na
ning baroto sa kalipay
salig kita
sa iyang mga katig
og sa iyang
lig-on og bag-o
nga makina

dali na
sakay na ta
sa akong barko sa kalipay

diha ka
diri ko
balanse lang
ayaw og palabi og lihok

sa kanindot sa atong makita
og atong adtoan
bahala na og maguba ang
bangs

hulmigas

dili na kasaka ang
hulmigas sa lubi
dili na katangag og
momho sa
kan-on
dili na kahalok sa iyang
mga kahulmigas

patay na.

ang mga kahoy nga walay dahon

adunay mga kahoy nga walay dahon
mas swerte pa gihapon
kaysa kahoy nga wala nay mga sanga,
adunay kahoy nga baga kaayo
ang dahon
apan walay bulak
walay bunga

usahay mora kog bata nga mihangyo
hawid sa iyang punoan
nga unta mamunga kini
walay tubag
siyempre

gitutukan ko ang kahoy
nindot
pagkaanindot sa kahoy
nga walay mga dahon

pagkaanindot lang gihapon
sa mga kahoy
nga wala na gani sanga

lig-on
dili angayan nga putlon
masayangan ang hait nga
atsa.

ang iyang mga namatikdan

lalom ang iyang mga
mata
morag mga itom nga
dapit sa dagat
sa Bitoon

gubot ang kilay
morag gubat sa
mga sundalo og
mga rebelde didto
sa kabukiran sa
Valencia

iyang gisulat nga
dili angayan
kining tawhana
sa opisina

ang wala lang niya
masayri kay kulang
ang iyang mga
pangutana nga kini siya

kusog mobasa ni
Chardin

kon sakto lang unta ang
iyang mga pangutana
sama kalalom sa iyang
mga mata

lahi unta ang iyang
masabtan

ang pagkasipyat ni Nancy

unang rason
nakalimot kuno silang duha
ni Paul

ikaduhang rason
dili nila option ang
abortion

ikatulong rason
nagkahinigugmaay gyod
kuno sila

ikaupat
si Paul sipat

ikalima
si Nancy pod
Igat

ikaunom
lax ra pod kaayo si Lola

ikapito
nakalimot si Paul sa
condom

ikawalo
si Nanay tuas Hongkong

ikasiyam
si Tatay tua's Dubai

ikanapulo
mao'y palad.

si joe

sa kahubog
gikan sa pista sa Galas
maayong pagkasalom
ni Joe
sa dakong buho
sa kasilyas

morag
Slumdog Millionaire

wala'y ulohan

ang eternidad
dili angay nga dudahan
sama sa lingin
nga singsing

nga wala'y sinugdan
og wala'y kataposan

wala'y ulohan
og wala'y tiilan

wala na kanako ang
trabongko

gikuha ko kini sa
bakunawa kaniadto

og ila akong gikasinahan
og gikahadlokan

ang akong ugat sa
bukobuko miligti

mikanga ang akong baba
og napaakan nako

ang akong dila og ang
akong tiil mikurog

wala na kanako ang
trabongko

gikuha kini sa iro
sa kaadlawon

nadungog mo ang iyang
paghot

ikaw ang buta-bungol
ang amang

pangutan-on ka nila
kon asa na kini

kining kisaw sa sapa
wala ko maghandom niana

bisan pa kon kisaw kini
sa usa ka isda

wala ko kini pangandoya
mas nindot pa gihapon ang

pag-inosara sa daplin sa
usa ka sapa

dinhi manamin ang usa ka
puti nga panganod

kadyot lang og
mopahawa lang sab dayon

ang iyang kinabuhi mao
ang panaw

ang iyang kamatayon mao
lang gihapon

sa pipila ka adlaw
abli ang pultahan

giablihan kini niya
kay nagtoo siya nga dunay malipay

kadtong ilang gipaabot
nga wala miabot

gusto na niya kining sirad-an
apan duna siya'y gikahadlokan

adunay masakitan niini
apan dili lang kasulti

botbot

i

wala na kaayo'y
lana ang
lubi nga
gibotbot

ii

ang iyang botbot
wala sa iyang sampot

iii

human ka
magpaopera sa imong botbot
seguro
mamati na ko

akong hunahuna

smoke nga gikan
sa gihaploy nga
lata
migawas nahimong
genie
nabali nga tennis racket
basketball nga
triangle
lima ka colored pens
shield sa knight
salampati nga
walay mata
apan tuloy
sungo

interpretasyon sa usa ka abstract painting

naa ang mga
celiated organisms
paramecia
lamog sa mga
flagella nga
mga eukaryotes
Apusomonads
kita na jud kag
spermatozoa

nganong wala gidungan ni Lord paghimo si Eba?

ang akong pangagpas
ani bay
kay maulaw si Adan
nga makit-ang
Pisot

lantaw sa abstract

kinaon nakong mga
uhong
milangoy tupad
sa akong mga
bitok
sud sa akong
tiyan

Timon Sa Kinabuhi

Hain ka
Kasingkasing?

Akoy
2010.4.25

pasudla ko sa pultahan sa balaang bungtod

pasudla ko sa
pultahan sa balaang bungtod
wala ko'y laing
dala kondili kining
baba kong
uga king dughan kong
haw-ang

panghadlok lang

gisugdan na namo
ang pagsaka sa bukid
sa Malindang

sila siging hisgot nianang
higanting cobra
nga nagpuyo sa usa ka
langob nga ang kinaham
kan-on mao
ang kabaw og baka

upat na mi kaadlaw nga
naglakaw
labang og dakong suba
katkat sa pangpang

wala mi natagboan
gawas lang sa usa ka

alibangbang
nagtapot sa laing
alibanang

kining lugara

lunhaw
dahon ang bulok sa iyang tubig
paraiso sa lab-as
nga hangin
bintana nga matahom
bugnaw

ayaw og saba
sa lain
pagsaad

makahadlok kon
modagsa ang
kadaghanan

mihisama unya
kita sa
boracay

larawan sa kalinaw

ang kalinaw panaw
sa tubig sa ilalom sa
kakahoyan
daghan siyag
gilabyan
wala siya'y
gikahinabi
nagtinan-away lamang
wala'y gidapit nga
ikuyog sa iyang
padulngan
wala'y kisaw bisan
daghan siya'g nahibaw-an
bahin sa mga tuway
og saypo og sa mga
baki og siwil

tungod kay siya
mismo
hingpit.

ang mga travel haiku ni John Tiong Bong

nagsuroy-suroy
sa Malaysia, miabot sa Thailand
mihapit sa Myanmar
pahulay kadyot sa Kinabalo

pagkaugma tuas Finland
nangihi sa Iceland
nalibang sa Transylvania
namahaw sa Bulgaria

miinom og tubig sa Vienna
misutoy sa France
balik dayon sa iyang
natawhan sa bukid
sa Bayawan

sa kakapoy
wa na gani kalatag og banig
sa salog nga kawayan
nahikatulog
sa tumang kagalot.

mao kini ang imong kalibotan
dili baya nindot
ang mga sagbot mamaak nga
morag halas nga lala
ang mga sapa
lubog og baho sama sa patay
nga bagtok
ang mga kahoy walay mga dahon
morag mga kalabera
ang mga atabay
nahutdan na sa tubig ilimnon
mao kini ang imong kauhaw
og kagutom

og kapungot
diha sa imong mga anino og
lawas

apan aduna kay laing mahimo niini
bisan og ang imong mga kamot
mag-iyahay og balibad
bisan og ang imong baba
hagbay rang napilot nga morag
samad nga naalim

anaa ang kalibotan sa imong damgo
ablihi ang pultahan
og ikaw lang ang adunay yabe niini
diha sud sa imong
hunahuna og kasingkasing

isul-ob ang imong pako
lupad palayo sa kagabhion

10:33 g.

moabot ka sa punto
nga wala na ka mangita
og hulip sa
tinood,

ang tinood sakit
apan tinood
og aron malimtan ang
sakit

gitabontabonan
gipanikamotan nga
malimtan
gani gikataw-an og
gibiyaan apan
dili gayod mabiyaan ang
kamatooran nga
sakit
nagpabilin kini isip tinood
mong kauban
og wala'y laraw nga mobiya
kanimo

miabot ang panahon sa
pagdawat
og imong gibatbat ang
dili kaayo dayag
imong gitusno ang imong
hait nga kuko
gikulitog og giangkon ang
tanang sakit didto
hangtod nga nawala
ang sakit og ang napuli
mao ang kalinaw

miabot ka na gayod
sa imong pahulayan
sa imong balay nga
karaan og
wala ka na'y laraw nga
molakaw pa

sakto na kini
alang sa imong
buhok nga puti na

sama sa usa ka
tiunay
nga lubnganan

kon yanong kangga lang
ang sakyan
dili mahadlok ang
kalibotan
tagaan ka niyag
siyamsiyam

karon midagsa
ang mga train
nga mas paspas
pas imong
tingog
mas paspas pas
imong pamilok

karon nahawiran
na sa Irag ang
para lang unta
sa America

og nabalaka na ang
kalibotan
basin og ulahi
na unya ang
tanan

mibalos kini og
panghadlok
anang global
warming

og ang akong
manghod
nagsugod na og
ihap sa iyang
mga liso
sa nangka

mihunong siya sa makadyot
giandam ang kaugalingon
miduko dayon mihangad
milantaw sa wala
sa too
miluhod
mitindog mikinto
og dayon og karatil og
dagan

nakiglumba siya sa
hangin
og durong buhakhak
og katawa
ang taas
kaayong agianan

bisag unsaon
wala'y agianan nga
mahuman!

kalagot

unsa ma'y imong bation kong
mag-atubang ka na
sa lamesa diin
puno na sa pagkaon
og ang mga kubyertos
sama sa bulawan
nga kutsara og tinidor
og samin nga
mga plato og
porcelana nga mga
tasa
unya ingnon ka
nga wala pa miabot
ang pinasidunggang
dinapit unya
hapit na mogawas
ang imong mga
mata sa tumang
kagutom?

sa laing bahin

ambot ug unsa kitang duha
nga kon
mosulti na gani ko
mosulti sab ka
dungan ta morag
mga baki nga nabag-ohan sa
kadaghan sa ulan

gusto nako nga ilis-ilis unta
ta
nga kon mosulti ko
mamati ka
bisibersa

gusto ko na karong gabii
mouna ka og estorya
apan
sa laing bahin
mas lami diay usab
nga magdungan ta

ang isog nga lalaki (he he he)

naglakaw siya sa dalan
og kalit lang nga gipusil
wala lung-i
sa dihang natumba siya sa
dalan dapion sa dugo
sa iyang tiyan
giduol siya sa usa ka gamaskara
og gitikbas
og dayog dagan sa duha
ka malapason

ang isog nga lalaki
giukab ang iyang tiyan
og gikuha ang iyang tinai
misakay sa kabayo
og gigukod ang
duha ka criminal
nga karon gigapos
niya sa iyang
taas nga
tinai.

(mas labaw pa sa
sine)

human nakog basa sa SHADOW OF DOUBT

Nakasabot ko
nganong dili na kinahanglan pa
ang mosaka
gani nakahunahuna ko nga
mas maayo pang
mopahawa adto sa gawas sa
balay magyaka sa
daplin sa garden
tan-aw sa mga kahoy
og mga panganod
maghimo og
balak
alang kanako

halad sa nagpakaboang
sa sistemang guba.

pag-amp0 nga unta dili lang madayon

kon mangadye ka
itapot ang imong duha
ka mga kamot
nga morag sandwich
ayaw butangi
og palaman

sulayi og hulagway
nga kini nangahimong
mga ligwan
dayon imong gipaasohan
sa imong ginhawa
og ang tanang
nanglupad
paingon sa langit
hangyologo
sa imong Dios.