akong kabatan-on

nahinumdom ko sa akong kabatan-on
dihang mulakaw sa eskwelahan
nga dili lang gani mamahaw
ug nga dili usab maniudto
dayunon ang panihapon

kadtong mga adlaw diin wala ako
ni bisan usa nila nangagda kanako
ni mangutana kung nakakaon naba ako
o kaha mitunol nalang ug supas

apan unsa ba
daw sa nibalik ang tanan
daw sa ang kagahapon
buot muhagwa kanako

kanus-a?

unsay pay akong ikadungag
gihatag ko na ang tanan

dili pa ba diay igo?
kanus-a ko man madawat
kanang imong kagawasan?

ug nganong gihigot sa gihapon
nianang imong hagit kanako

sa lalin niining mga pulong
ug sa hilo niining giangkon

kagahapon

wala ako masayod
nganong ikaw ang awit
nga ania sa hunahuna

wala ako magdamgo
ug mag-alindasay sa talidhay
sa atong kagahapon

akong buot kalimtan
akong giampingan
apan tulisok kini sa galamham

buot untang hunusan
haron dili na mag-antos pa
ang kasing kasing kong samaran

ang sungog

gisungog sa bulak
ang buyog sa pagbatog
sa pula niining gihay

apan wala magtuyo ang pak-an
nahadlok matab-ukan
sa katam-is sa bul-og

ug miiyak ang gahom
nahanaw ang paglaom
natagbaw ang dahon

ang tubig sa tinugdan

nag-ugot
ang tinugdan
sa tubig nga lunhaw
napagaw pagsininggit
ug tabang sa langit
nga naghatag
sa adlaw niyang mangitngit

apan mikatawa
ang ingkantada sa sapa
nag-agda kaniya pagsalom
ug nga dili mabalaka
sa kangitngit
nga dili makagapos kaniya

siya nga labaw sa tanan
siya nga tag-iya sa kinabuhi
ning kalibutan sa gugmaan

pagtuis

ang mga bakak
sama sa mga dahon sa ipil-ipil
nga nangahulog sa
dalan

gihapnig-hapnig sa
matag adlaw
hangtod nga kini mibaga
nalata

nauga, nabasa,
milamog sa yuta
nahimong
kalibotan sa usa ka
liso sa lomboy
nga nahimong usa ka
dako og
karaan nga kahoy

ang mga bata mikatkat
nagdula
sa kanhiay mga dahon
nga bakakon

walay mausik

bisan ang mga bakak
nga imong gipasupot sa hangin
nga imong gipaanod sa
baha sa imong kaligotgot
bisan ang mga
pulong nga hagbay mo rang
gisuka
og karon imong gikaon pagbalik
wala'y ni bisan usa
nga mausik niini
kon kini maghatag og kinabuhi
sa mga nag-aginod
nga paglaum
sa mga kamatyonon na nga
mga kasingkasing
tungod kay ang mga pulong
sa gugma
dili na nato makapkap diha
sa kangitngit

sa akong kwarto

miabot na ang
wala masabti sa kasingkasing
og busa
natawo ang dakong kakulba
ang gabukal nga kabalaka
nga kon unsa
nagkabuang ang hunahuna
kon unsaon
paghulma

pag-inosara

kon gisulat mo ang
imong balak
sa balay nga walay bungbong
kining akoa
nagpabilin lang sa akong
utok samtang ako
naglingkod sa balas sa
daplin sa baybayon
mitutok sa pagsalop sa
akong adlaw

ang mga kurakot

sa talad kan-anan
naghisgot sila kon unsaon
nila paghuman ang
dakong swimming pool
sa atubangan sa
dako kaayo nilang
mansion nga
giaalad sa habog kaayo
nga konkretong labat

ang mga posibilidad

nag-alirong kanako
apan wala ako mikuyog
nagpasabod sa akong
atubangan
apan ni bisan usa
wala ako'y gipunit
nag-ulan sa langit
apan wala ako migawas
wala ako'y gisugat

ang mga halas
ang mga lansang
og ang mga bangkaw

ang hukom sa
kataposan sa panahon
mao lamang kini

ako lamang og ako lamang
ang posibilidad
sa akong kaugalingon

ang mga bakakon

kagahapon
misupak ko sa sistema sa
bangaw

wala na ako
miluhod sa mga bulok

nagpaulan ako sa luyo
niini

og gitagbas nako ang
bangaw sa akong kalagot

sila nga nakakita
miingon nga ang bangaw nasamdan

mora bag
ang bangaw tinood

usikan man ang mga pulong

buot kong usikan ang mga pulong

buot kong ikaligo
kadtong giingon nilang kaulaw

ug hugbon ang kaugalingon
sa ilang singgit biay-biay

wala kana tanan kanako,
dili kana igo muhupay
sa kaalimuot sa akong huna-huna
ug muhulip sa nawala kong paglaom

kataw-anan ba?

ug mao man gani, unya unsa?

masabtan mo ba ako?

tingali muapil ka nila

tingali usa ka salamin
nga mututok kanako
ug dili mamilok sa paglantaw

sa gahagkot kong mga garay
ug ikaw na ang unang mupalayo
haron talikdan ang akong
huna-hunang hubo, nag-agulo.

sige padayon
wala nay makapugong kanako
sa pag-usik-usik ning mga pulong.

anhia ako

pino nga balas
nigpis nga mga hangin
sila nga buot mugakos kanako
dinhi niining baybayon

ang awit sa adlaw
nga galantaw sa hubong
hunahuna nga latagaw
nagpasamot kanako sa kamingaw

anhia ako,
kanauga sa imong
mga mata nga daw kahayag
sa akong mangit-ngit nga adlaw

tuyo kong ubanan mo
haron dili na mahimong
mingaw kadtong
ugma nga sugaton ko

hain ka na

hain ka na?

sama sa balod
nga nihalok dinhi ning aping
sa akong baybayon

nganong mipadayon ka pagpalayo
uban niadtong unos,

ang unos nga misuway paghunos
sa atong gugmang tim-os

wala na ba diay bili kadto?

nga nawala ka man lang
nga wala kanako magpahibalo

hain ka na?

ania ako naghulat
nga balikon mo.

ang imong gihigugma

lahi sab ka
gihigugma mo ang bato
sayod ka sa
kagahi niini
og sayod ka nga kini
wala'y pagbati
kanimo

unsa ba ang makuha
mo sa bato?
nganong natintal ka
sa mga tutok niini?
giganahan ka ba
sa iyang kahilomon?

o ikaw ang dunay
deperensya
sa matag adlaw
gipukpok mo ang bato
sa imong kasingkasing
hangtod nga midugo kini
gilugod mo kini sa
imong lawas
sa pangandoy nga unta
ang bato mahigmata
og mahigugma
kanimo

apan unsa ang nilugdangan
sa imong mga
pangandoy

bisan gani tipak
wala kay nakuha
bisan gani
abog na lamang sa
iyang pagkabato
wala kay
naani

apan sa kataposan
nakaingon ko
nga ikaw og ang bato
walay kalainan

nianang imong pagkagahi
sa imong ulo
nianang imo usab nga
pagkatig-a

demokrasya sa pilipinas

adunay gamay nga bata
nga nagpraktis og sakay
sa dako kaayong biseklita
dugay na
sige lang gihapon panikad
dili ka tungtong
sa patonganan sa lubot
siging kabangga
og kabali
og katuali
gamay ra kaayo ang kamot
og mubo ra kini kaayo
aron makagiya sa
manobela

dugay na
ambot ning bataa kutob
ra man gihapon sa
pagbansaybansay
siging kahapla
siging katuali
ambot og unsay gikaon og
giinom
nga wala man gayod mitubo

ang makita

sa ubos ning balay
sa kilid sa bintana nga samin
makita ang tayaon nga
fiera nga pasaherohan
nagduot ang mga pasahero
nga nag-ilog sa lingkoranan
ang atop puno sa karga nga pawod
ang kilid sa mga bukag nga wala
nay sulod
ang konduktor nga itomon
nagkarga og unom ka kaha
sa beer na beer
tambal sa kamingaw og kasakit
sa bukid nga
gihulaw

Dili

(hubad sa balak ni Lady Ki No Washika)


dili tungod sa pangidaron
mas nalawos,
sa imong pangagpas...

Kon mo-ingon ko nga dili,
kana tungod sa akong kahadlok
nga  sa akong pagtangho
maghatag lang unya og way laing sangpotanan
kondi ang mangtas nga kamingaw.

kasikas

morag kasikas sa kawras
sa irong nangulag ang akong
nadungog sa
kilid sa labat nga kawayan

adunay gustong mogawas
og aduna usay gustong
moangkas

pagkalubog sa dagat karon

kon makita mo lamang ang
dagat diring dapita sa amoa
pagkalubog gayod

subo usab lantawon
ang usa ka tawo nga naglakaw
nga nag-inosara sa daplin
niini

dagko ang balod
miduyog kini sa kusog kaayong
ulan kagabii

pangandoy

unta bulak ang manghumot
dili lang unta
manimaho ang mga dunot.

dinhi sa baybayon

kitang duha na lang
ang nagtugawgaw
unya ikaw
talagsa pa jud makaduaw.

(haiku) haynako

.

gabi-ing dako-
bisan ang palahubog
hadlok sa ungo

unsaon ba ang pangpanghayhay?

sarado ang baba
pasulod og hangin sa duha ka buho sa ilong
hunat
dayong pagawas sa hangin
diha sa abli
nga kasingkasing

mao kini ang pagpanghupaw
sa tungang bahin
sa akong kagabhion

paghuman og saka sa bungtod
molingkod ta
lantaw sa ubos
mahingangha sa baga nga gabon
nga mihapnig
sa mga ulo sa kahoy

gisubay ang panaw sa mga
antulihaw
nga nawala
nahilis sa kalay-on

mohangad sa panganod
dili na mangadye kon unsa pa ang
pangayoon
dili na interesado kon unsay
dangatan

palabay na lang sa panahon
palagaylay
unsaon pa ba ang utok
kon guba na ang kasingkasing?

kapoy na, wa na koy labot

nabalintong ang kalderong dako
sa banggera
kay nanungkab ang iring

ang mga iro nag-unot sa
nataran
nahagba ang lingkoranan

ang mga baboy nanawag kay
wa pay kaon

ang mga manok nangambak
sa labat
nanumbalay sa silingan

kapoy na
wa ko'y labot bisag maunsa pa
kamong tanan

lahi ang ilang kalibotan

sila nga himsog og
hapsay og hingpit
nagkahiusa diha sa
ilang balay
sa ilang lahi usab nga
kalibotan

kita rang duha
walay madungog nga kanaas
sa mga tunob
wala'y agik-ik
sa mga bongbong og sa mga
hagdan
wala'y panghupaw diha sa
bintana

mao sab kini atong kalibotan
manirado
hilom
hinay ang mga lakang
wala'y tinindogan
wala'y liningkoran
walay gipaabot
wala poy padulngan.

ikaw

ang taytayan
gikan dinhi paingon ngadto
mao'y imong
papel nga ikaw
ilang tumban

paglig-on.

walay gana

kaming duha
pareha baya'g padulngan
og mga tuyo
sud ning sakyanan
sa gawas kusog kaayo ang
ulan og hangin
dagkong lusok sa ulan
nagdala og mga dahon
sa tambis sa daplin sa
lapokon nga dalan

mitan-aw siya dapit sa wala
ako dapit sa too
walay tingog
tingog

laing uwat

taas ang iyang sulat
wa na gani nako basaha
pagtiwas

morag nabalaka siya nako
apan ako wala baya.

Amgo

way silbi ang akong mga mata
niining handuraw
bugti sa akong damgo
gikan sa lawom nga pagkatulog

buta, apan abli alang
sa mga bito-on...

apan gibutyag sa kabuntagon
nga ang ugong sa pagkakaron
maoy katunhayan
nga way pumamilok

ang mga butang tuod man
naningog tungod sa imong hangyo
lalom ang sa salog
taas ra usab kaayo ang sa kisame
og wala pabanban ang
mga bintana
apan sama sa naandan
og suma sa imong panaghap
walay puangod ang pultahan
nanira kini
og wala kay mabati
bisan na lang gani og gamay

dili usab kini nimo mabasol
kay niadtong adlaw sa tingpahulay
imo man sab god siyang
gisipa.

panaglalis

pagsulod sa imong katarungan
wala na nako kini tagda
migawas sab ang akong mga
pamaagi aron dili kini nimo kaayo
masabtan

sa panagbangga sa mga rason
nangapungig gayod ang atong mga pagbati

ingon ana na
paabot lang kon maabo na ang mga baga
ayaw wisliki og tubig
kay basin mapuling ka sa mga hinungaw
pagtalikod lang una kay
sulayan nakog ayo ang nahiwi nakong
apapangig

alang kang G.E.

ang nakaparat sa imong kinabuhi
mao nga kini tam-is ra kaayo
nga og sa ngipon pa
dulse kini nga nakaungkat og
daghang lungag.

mao nga ingnon ta ka nga ayaw
pagpaabot nga ako masina niini.

kon sa nobela pa kana
wala kaayo ang kulbahinam busa
dili kaayo lami nga basahon.

mas nindot man god usahay nga
ang bida namatay.
magsakit jud ang imong hunahuna
di ka katulog
di nimo malimtan.

ang karaang iring
dili na mokiring

ang tinood nga iring
kasabot sa kuting

ang bag-ong iring
gustong mobagting

moawat sa kabaw
motambling og mosayaw

ang tigulang nga iring
nanglimpyo sa kiting

dili na gustong ukbon
ang ikasiyam nga kahon

introvert

kon mogawas ka
hait ang mga kuko sa kahayag

gikawras ka
maong midagan ka

samdan
apan sa pag-abot sa unahan

gamhanan kang
mipaayo sa imong mga samad

mora lag mga abog
nga mitapot sa imong bukton

kon nasayod lang sila
nga mas gamhanan ka kon

mag-inosara
kay sud sa imong lawak

amigo mo ang adlaw
og ang Ginoo misalig sa

imong kahilom sa imong
kaligdong

gani wala'y hikap nila
nga makamantsa

sa imong kaputli
sa imong dungog

ang iyang langgam nga itom

dunay langgam
itom

taas ang mga kuko
hait
nga morag mga
sanggot


talinis ang sungo
nga morag
ice pick

gaan og lapad
ang iyang mga pako

nagtikuko lamang
sa ilalom sa lasang
di molupad
di mokakha
di mangutkot

hadlokan.

sa away
dili segurado ang kadaugan
apan
basin puhon og
magmadaugon ta
kay miaway
ta.

sa pakigbisog
daghan ang naparot
apan bisan og wala
na'y makahinumdom
kay nalubong na
silang tanan
sa kapildihon

ang ilang
gidaugan

mao
ang wala pagkaparog sa
ilang diwa

og ang pagkahuman sa
ilang matag adlaw
nga pag-antos

ang dili kampante

misukol mi.

imong tawag namo
mga anay
nga misulay og kutkot
sa dakong
haligi nga yakal.

misukol mi.

nahilom ka
sa dihang bisag
ang mga ngipon
sa anay nangapudpod
apan sige lang
gihapon og kutkot
sa dakong haligi nga
yakal.

misukol lang
gihapon mi.

wala ka modapig
kanamo
nga usa ka man usab
unta sama kanamo
mga anay.

tughok

ang mantsa sa imong bukobuko
itom
diha nagsugod ang akong pagsabot
sa sayop

didto nako nasugdan
ang paghulma sa bulok sa kalooy
ang pagsagol sa gugma
og buhat

diri ning dapita sa huyang nga bukton
sa dahon
nasabtan ko ang kahulogan sa
kusog

sa ngitngit nga wanang
nasabtan ko ang kalangitan
sa imong pagkahulog gisabot ko
ang kapildihon
og sa dihang ikaw milupad
nasabtan nako
kon nganong nagpatay
silang tanan
aron lang mahimong gawasnon