ang babayeng wa magpautang ug beer sa iyang bana

namisita ang iyang bana didto sa syudad
giuhaw kini sa kainit sa panahon ug
mangutang untag beer sa iyang asawa
nga naninda didto

wa kini magpautang, kon dunay kwartang
itunol, pwes dunay beer nga mainom

wala mamugos ang maong bana ug mikuyog
kini sa iyang ig-agaw nga maoy naglibre kaniya
ug beer didto sa ilang gipuy-an

hagbay rang nakig-ipon ang iyang asawa ug laing
lalaki nga maoy naghatag kaniyag puhunan sa iyang
negosyo, nagpatukod kaniya ug balay, ug maoy
migasto sa pagpaeskwela sa iyang mga anak

ang bana way nahimo, lisod sa pilipinas, walay
trabaho, wa sad siyag igong edukasyon aron
makasulod ug trabahong makahatag niyag igong
sweldo

miuli siyag balik sa bukid ug nag-inosara sa
iyang payag, kuyog sa iyang kabaw nga tigulang na
ug sa iyang iro nga mokiwil ang ikog kada kita nila

mangita sab kog mohaom sa akong paglaum.

kon mawala ka kanako
kamao kong mag-antos
apan dili ko kini dugayon

si tatay nagtudlo kanako
unsaon paghulip ang mga
nangagisi nga banig ug si
nanay nagsulti kanako nga
ang mga kum-ot plantsahon
lang gayod aron dili kaayo
makit-an sa uban

dili ko gustong malumos
sa unos sa kasakit
busa gitun-an ko usab
ang paglangoy ug ang
pagtabok sa pikas tampi

mubo lang ang panahon
para ikaw lang ang mahalon
dili mahimong hangtod sa hangtod
mahaw-ang ang akong mga bukton
mangita sab kog mohaom
sa akong paglaum.

nakaiyak baya ang mga alibangbang nga itom diha sa sanga sa katsubong.

nindot baya usab tan-awon kining
duha ka alindanaw nga
nag-alindanaway diha sa dahon
sa antulanga

ang kapait lang kay imo mang
gidakop ug dayon gipamutlan ug mga
ikog ug imong gipanguhaan ug mga
ulo ug dayon nimog labay didto sa
kasagbotan

nakaiyak baya ang mga alibangbang
nga itom diha sa sanga sa katsubong.

LAHING SA LUBING GASANGA ANG PUNOAN

lisod lang kuno
ang pagsugod apan
kon masugdan
na lisod na pod usab
ang pag-undang

magkuyog man ta

gilantaw ko ang pagsayaw sa gugma
gisimhot ko ang kahumot niini
gisulayan ko paghikap ang iyang
hamis nga pamanit ug ako siyang
gipamati sa dihang aduna siya'y
gusto ko nong isulti kanako, ug
siya miingon:

"ako ang gugma. Dili  mo ako
mailhan diha sa hangin lamang
sa dihang gibati mo ang kabugnaw
sa imong agtang niadtong miabot
ako gikan sa kasadpan.
Sugdan mo ako sa tutok, itanom
mo kini, magtubog ang imong
laway, sama sa usa ka dakong
dag-om, motubo ang kalayo,
apan dili ka sunugon niini,
mabati mo ang kainit nga
dili nila makita kay mabutaan
ka sa akong kahayag, hikapon mo
ako, ug hikapon ko usab ikaw,
hagkan mo ako ug hagkan ko
usab ikaw,
kon ikaw ang kisaw, dili ako
ang katulugon,
kon ikaw ang ulan, ako
ang baha sa suba nga mihaw-as
sa akong kalalom didto sa dagat,
kay ang gugma kitang duha, ug
dili mahimong ikaw lamang diha
sa pag-inosara ug pagtutok lamang
kanako.

kay kon ako ang gugma dili ako
mahimong gugma kon wala ka."

sa tubig sa lapok sa sagbot

ang akong gisulat kon
tatawon dili kini sila gikan
kanako

sa matag litok mo sa pulong
mosulod usab kini sa akong
hunahuna ug unya matan-ogan
kini apan dili malata kay
pagkaugma litokon ko usab
kini alang kanimo

sama kini sa halok diin ang
mga dila makig-ila-ila kanato

sa matag ulan anaa ang sayaw
ug sa matag sayaw anaa ang
pagtampisaw sa atong mga tiil
sa tubig sa lapok sa sagbot

duyog sa paghinog sa panahon

ang mga dahon
kon mangahulog
mangahulog dili
tungod kay gustong
mangahulog apan
tungod kay duyog
lang kini sa paghinog
sa panahon

nahisama usab kini
kanato nga kon unsa
man ugaling ang
mahitabo moduyog
lamang kita sa paghinog
sa atong mga gibati

kay ug pugson
modugo kay ug hilaw
pa aslom baya

moabot  ra gayod ang
panahon
ug kini sakto na sa
katam-is
sa kalami ug sa
kahumok

salamat ginoo nga ako anaa pa diay pulos kanimo

si manong Gen, 79 anyos,
taga masbate, nagpaabot sa bintana
naghandom ug pagsubang sa adlaw
matag buntag,
baggiitang abogado kaniadto
karon siging gipanugnaw

si Lucia, 40 anyos, wala maminyo,
pintor, magmugna ug balak usahay,
taga capiz, siging dagkot ug kandila sa
iyang daddy nga dugay na nga namatay
ganahang mag-inosara
lantaw sa kasadpan
magdibuho sa mga sakayan sa
dagat silong sa
gabiing bulanon

si Elena, 45 anyos, adunay cancer sa tutoy,
survivor, tigtambag sa mga adunay samang
balatian, mitagam sa gugma,mas ganahang
magpuyo sa kwarto, gikalimtan na ang
katahom sa gugma,

si Jose, 56 anyos, maminyog kaduha, gibiyaan
ug asawa, nakasakop nga mikapyot sa
batan-ong lalaki nga nipis pa ug bungot
ang suwang, gipatulan ang iyang labandera,
nakaanak pa gihapon ug usa
maoy iya karong kalipay ang paghatod-kuha
sa maong batang babaye sa iyang
gieskwelahan

si Jun, 54 anyos, mao say palad, gibiyaan sa
asawa, gilayas ang munamunang kataposang kwarta
nga halin sa iyang yuta aron unta niya gamitong
pamalit ug tambal sa iyang sakit nga hangtod
karon way pagkaalibyo,nagpaabot sa iyang
kamatayon, hapit na nga mahalap,
ug luya na kaayo ang lawas

ug daghan pa sila nga akong lipayon sa akong
mga balak,

bisan ug ako, wala na nila kon malipayon ba
usab.

salamat ginoo, nga ako anaa pa diay gihapoy
pulos.

didto sa roxas

nahinagbo ko ang babayeng ulay
40 anyos, masub-anon usab
sama kanako

nagtinan-away mi nga morag
nagkasinabot

ug miabot kami sa punto nga dili
na gamitan og pulong

gakinamot mi nga nangaon
galutok ang among mga mata nga
misalom pag-usab sa lam-aw
sa kagahapon.....

daginiton pa gayod niyag tangag bisan kanang imong batikolon

kon mabasa mo ang balak
ayaw kalimti ug hikap ang imong batikolon
kinsay masayod
ug mabalik ra diay ang imong kasingkasing

nga imong gitago didto sa habog nga pangpang
tupad sa mga itlog sa tulabong
tungod sa imong kahadlok nga matangagtangag na usab kini
sa karaang bitin nga limbonganon

kon mahuman na nimog basa ang balak
susiha pag-usab ang mga pulong, tukia pag-ayo ang
mga tanghaga, paniti ang mga takuban sa mga linya
kay basin ug gikan lang usab kini gihapon
sa biting nga limbonganon

pasayawon ka na usab sa iyang musika
hubgon ka sa bino sa iyang mga silaba
ug kon di ka makabantay
daginiton pa gayod niyag tangag
bisan kanang imong batikolon

panimalos sa tubig

pagkakusog sa ulan
ug sa hinay-hinay misaka ang tubig
sa imong hagdanan
ug ikaw maglantaw niini

walay makabadlong sa tubig kon kini na ang
molihok aron maningil kanimo sa bayad  kabahin sa
pagputol sa punoan sa mangga

kabahin sa pagpunay nimog labay sa mga
dahon ug cellophane diha sa iya untang agianan
paingon sa iyang mga iyaan nga suba
ug sa iyang inahan nga dagat

karong tutokan ka sa tubig
sa usa ka hait nga panan-aw
bisan ug wala kini tataw nga
mga mata

sa pipila ka adlaw mosaka pa  kini
paingon sa imong kusina
mosaka pa kini lapaw pa sa imong atop
hangtod nga ikaw
mangayo ug pakitabang
diha sa usa ka pisi sa usa ka sakayan
sa usa ka tulay
sa usa ka bungtod

gracias

niadtong milabayng semana
natuki gayod pag-ayo ang
mansanitas, apil na ang mga kwaknit
ang mga sunoy, ug mga himongaan
ug nadalahig ang mga iti

karon gisugdan ang katam-is
sa tambis

isunod basin ang pungpong sa bayabas
atubangan sa bintana
pagkahuman nahibaw-an niya ang
kamatayon sa iyang amigong doktor
nga naapil sa bombing sa usa ka outdoor
cafe didto sa Ketkai

madalahig kaha ang tamsi nga mitugpa
sa sanga sa bayabas
aron motuka sa kahinog niini
nga walay nangambat?

hangtod sa pagkapodpod unya sa akong tugas nga baston

ah, balikan ko na usab ang
paghikap sa dahon sa hibihibi
nindot lantawon ang iyang
pagkamangiulawon

lakwon ko ang dalan ug
balikan ko na usab paglantaw
ang naglinyang mga kahoy
nga morag mga tawong
nagpaabot sa ilang
kumpisalan


hinay ang ulan ug wala kaayo
kini makabasa sa akong buhok
ug ang kahapsay sa akong pinahapay
wala magubot o matumpag

agosto karon, ug agosto kadto
sa dihang gihagkan ko ang imong ngabil
sama sa pagkahulog sa unang tulo sa
ulan karong bulana sa akong
gauga nga ngabil

bation ko na usab ang tumang kamingaw
apan kamao akong molingaw
sa kasubo sa iyak sa bulan sa agosto

hikapon ko na usab ang dahon sa hibihibi
balikan ko ug lantaw ang galinyang punoan
sa mga nangka nga morag mga tawong
nagpaabot sa ilang kumpisalan

ang akong mga tudlo dili bugnaw
ang akong ngabil nabasa sa katam-is
sa duga sa nektar nga gikan sa buwak
sa hardin sa atong mga kagabhion

balikan ko kining tanan sa makausa pa
hangtod sa pagkapodpod unya sa akong
tugas nga baston hangtod unya sa pagkabali
sa bukog sa akong mga bukton

ang pagmahay sa lawas ug pasalamat sa kalag

pangayog
pasaylo sa lawas
nga napasmo
sa kalipay
nga gidili mo
kaniya

sa dihang
iuli mo na unya
siya sa kalibotan
aron mobalik sa
pagkaabog sa
tiilan sa gamhanan
dako gayod ang
balonon niining
kahiubos

sa laing bahin
kalipay kini sa kalag
nga molupad na usab
sa kalangitan
ug mopahulay sa
landong sa galawod
nga kakahoyan
magpaabot kon kanus-a
na usab mosalom
sa lawod
sa kalibotan

mosulod balik sa
laing lawas
aron sulayan na usab
ang pagpangita
sa kalipay
nga wa pa gihapon
mabati sa
pus-on ug dughan

wa sukad magkita

dinhi
wa ko magdali
wa koy kalangan
mahimong magdugay
mahimong dili usab
dinhi
tanan posible
bisag asa lang ang abton
pwedeng mopahawa
mahimo sang
magpuyo
andam na
ang pagbiya
ang problema
asa paingon?

ah
dinhi
ang mga pangutana daghan
usahay walay tubag
apang madawat lang gihapon
nga mao gayod diay
kini ug mao gyod diay
kana

dinhi
dinhing lugara diin
ako ug ikaw
wa sukad
magkita

siya ang tinood nga manggihatagon.

karon patay na siya

bata pa, gwapa, ang iyang mga pahiyom
dulot sa kasingkasing, talolot sa rosas ang
iyang mga mata, ang iyang mga ngabil
daw sakayan nga makapalutaw
kinsang makahalok kaniya

sayang, kay karon patay na siya
sa usa ka kalit nga kamatayon nga
morag natulog lang siya

karon, ato siyang sabwagan ug mga
bulak, ipahaluna ang iyang lawas
sa iyang lubnganan

daghan ang mangiyak nga iyang gihigugma
ug nahigugma usab kaniya

wala nay manggiaway nga kanhiay nag-ilog
sa iyang talagsaon nga gugma

karon patay na siya, anaa na kaniya ang
tiunay nga kalinaw, ug dili na siya apil sa
atong kalibotan nga haskang gubota

karon patay na siya, adunay magpahipi ug
iyak, kadtong nahigugma kaniya apan
diha lamang sa tago, tungod  kay dili
angay nga ipakita ug ipabati bisan ug
patay na siya

karon, nahuman na gayod ang paghigwaos
sa duha ka gugma

silang tanan magpasalamat sa mga higayon
nga siya mihatag sa mga pagbati
giapod-apod nga morag pan sa tanang
batang bulingiton nga nagpaabot kaniya

siya ang tinood nga manggihatagon.

ang anaa dinhi ang atong mahinumduman mao nga kusog siyang mohagok ug sakit gayod kaayo sa dunggan busa gusto natong mopalayo. Daghang kahiubos. Daghang mga wala pa masulti. Gustong putlon ang tanan. Mangitag kagawasan kay ang gahuot nga dughan mao na man ang prisohan. Sa dihang nagtinga na siya, sa hinay hinay mikamang ang kamingaw. Hangtod nga siya namatay. Mitulo ang luha. Gikumot ang kasingkasing. Unya nakaingon ka nga nganong karon man lang kini, nganong mora mag dili na usab ako kamaong mabuhi nga ako na lang. Nganong gusto mo naman usab nga mamatay aron mokuyog kaniya nga kanhiay gikahiubsan mo nga kanhiay nasuko ka kay kusog kaayo siyang mohagok?

ang akong gihigugma mao na lamang ako

dili na ko ganahan anang laing sugnod. sakto na kadto. kon ako pang balikan pa wala na ang kainit. ania na ako dinhi.nindot dinhi. kontento na ako. ang kahaw-ang hagdanan ko kana. ang kamingaw pultahan. ang mga pagbasol mao kana ang agianan sa akong panaw diin naghandom pa ako nga makaplagan pag-usab ang akong kaugalingon. kon ikaw maghandom pa usab kanako, kalimti ako. wala na ang kainit. ang kabugnaw nga nahibilin, ako kanang balonon, sa akong layo pa nga panaw. ang akong gihigugma, mao na lamang ako.

sa wala nimo masulti kaniya.

nagkita ta
ang atong gipanagsultian haskang layoa ra sa atong mga ipanulti unta. Palingoglingog. Ang isulti unta bahin sa usa ka nindot nga salag sa tamsi nga maayong pagkahaluna sa sanga sa dum-on. Tago man kaayo. Unya putos sa kalinaw. Apan unsa ba ang gibungat? kabahin naman noon sa napalit nga isda sa  merkado nga dubok na kaayo unya ang hasang itom pa sa dag-om didto sa kasadpan.Dunay gamayng kahilom, panukad na unta kadto sa pagsulti kabahin sa gitago nga sulat sa ilalom sa katre nga wa nimo tagad mahatag. Apan nahutdan ka sa kaisog. Wala man god ang bino. Wala man god ang imong dagon nga bato sud sa imong sapatos. Busa, hangtod karon, nanimahong pan-os ang imong baba sa mumho nga wala nimo matulon kay mitapot sa imong tilaok. Nanimahong patay ang imong kasingkasing. Ug bisan ikaw gustong mamaypay aron dili ka malanag sa wala nimo masulti kaniya.

Gikapoy ka na ug basa

ang dayalogo ni plato ug ang trahedya ni sophocles ug ang mga baki ni aristophanes ug ang mga panganod ana sa sulod sa aparador wala nimo mautingkay. Busa nagyamayama ang kahilom ni socrates. Nagpunay ug alipasa ang mga baki ni aristophanes. Ug ang mga panganod nauga nga morag semento diha sa sulod sa baga nga samin. Si Sophocles dako gayod kaayog pagmahay nimo ngano nga ang iyang trahedya wala kalabang paingon didto sa imong mga silingan.

Gikapoy ka na ug basa. Hapit na maupos ang kandila ug ang kahayag niini imo na lang iiwag sa kangitngit diha sa imong gahanap nga agianan.

apil sab kos mga gidimalas sa natad sa gugma
kadtong maayo nakog pagkalup-og nga bisan unsaon nakog bangon wa jud kabangon nga bisan unsaon nakog palimotlimot wa jud ko kalimot unya sa dihang makatulog na ko damgohon ko siya nga akong gihagkan unya gikuramos kog gakos nga hugot kaayo unya giayo niyang usap ang akong dila unya sa dihang hapit na ko magawsan, nakamata ko kay kahion lang diay kaayo bugnaw kaayo ang kagabhion haw-ang kaayo ang palibot, ug sa pipila ka gutlo na lamang unta mamatay na gayod ako sa kahiubos ug kamingaw. Maayo na lang gani kay nangawras ang akong paboritong iro sa akong pultahan nga akong giabrihan unya ang iyang ikog siging gakawaykaway.

ang salmon sashimi didto sa rai-rai-ken

mas lamian ang
sashimi nga salmon
kay sa sushi
nga california
maki

nindot ang bulok
sa unod ani
unya ang
kahumok ug kabugnaw
mabati kaayo sa  akong
dila nga hagbay rang
nagkisikisi nga
motam-os niini
 labi
na ug makatutok ko
sa puti kaayong paa
sa usa ka seksing
nga nagpasaring-saring
unya
ang short haskang
puoka

ug ang kahalang sa
wasabe
nagdilaab diha sa
akong tilaok
lapos na sa gahuot
nga lawak sud
sa akong dughan

kada bakak, naay nawong

 

gahimo kog daghang nawong
tungod kay ang gabii, ang kabuntagon, ug ang
kaudtohon siging panawag kanako
unya puros sab bakakon

kada bakak, naay nawong
kada nawong naa ang lain laing
pasundayag

ako siyang gisultihan
sekreto nato kini ayaw gayod ipanabi unya
ingon siya
my lips are sealed apan wa ko magdahom
nga iya kining tumanon ug

tuod man adunay laing nanawag
nakadungog kuno kabahin ani ug bahin adto

ug sekreto lang pod namo kadto
ug mao say akong ingon i can keep a secret 
my lips are sealed

daghan na ang akong nawong
pagkaanindot tan-awon nga akong gipamutol

ug akong gibitay diha sa bongbong sa among
atop nga kon moulan magtulo ug ang tanang

mga nawong mangabasa apan kay puros
dili matinuoron nan di na pod nako ambaton

samtang ako nga nahinanok sa bugnaw nga
kagabhion gihabolan ang lawas nga karon

nagmalipayon kay wala nay nawong nga
moatubang sa akong kasub-anan.

ok ka lang ba?

nasulayan mo na ba ang wa katulog sa tibook gabii
hangtod pa gani sa kabuntagon tungod kay wa ka kabungat sa imong gugma?

 

nga ang imong gugma morag tawong nagloko diha sa banig unya dili kabangon
tungod sa kahadlok ug sa kabalaka nga basin ug pakyas lang kini gihapon?

nga sa dihang mihirit ka ug "i love you" wa katingog ang imong gihalaran
unya midagan sa "CR" kay kasukaon?

unya paggawas mitutok kanimo nga haskang sukoa nga ug di lang ikaulaw
ikaw unta iyang sagpaon?

haskang sakita jud, unya ikaw gustong moambak sa kinatumyan sa building
aron malata ang imong ulo human kini mabusdak diha sa kalsada nga morag watermelon

ok ka lang ba?

wa pa ko kasulay niini, busa giluom ko na lang ang tanang gugmang walay kahungawan
sud sa dughan, akong pabuthon nga morag mga rebentador

dili ninyo kini madunggan, kay ang akong gihalad kaninyong tanan mao man lamang ang
pahiyom nga balaan.

nanimaho kang aplod diha sa imong kabakakon

 

sa laing bahin
ablihan ko ang bintana nga nag-atubang sa adlaw

pagkaanindot sa bukid nga morag mga totoy ni maria
nga bag-o pang nadalaga nga kanunay kong lantawon
kon maligo na siya sa sapa

pagkaanindot sa mga buwak nga misalod sa kainit
sa adlaw diha sa ilang mga dila

pagkaanindot sa mga kahoy nga nangabre sa ilang mga
kamot aron hangpon ang hangin og adlaw

sa laing bahin
aduna akoy kasingkasing nga makamaong mosamoma sa
imong gugmang hilaw

nga bisan sa kaaslom akong gipakahimong
manggang makatubod pa gihapon sa akong laway

gihigugma ko ikaw apan bungol ka man
gipakita ko kanimo ang kaanindot sa akong adlaw ug sa mga bulak ug sa mga kakahoyan

apan patay ka diha sa imong mga limod
ug nanimaho kang aplod diha sa imong kabakakon

ako nga kamaong mohubo kanimo

 
karong gabii
gusto nakong huboan ta ka

sa imong sapot sa imong panit
sa imong unod hangtod nga ang

mabilin mao na lamang ang imong
mga bukog

unya tagsatagsaon ta kag hapnig
ang mga bukog nga tiil diha sa

kilid ug ang mga bukog sa kamot
diha sa tunga unya ang imong

kalabera akong ipagawas ug
ibutang sa altar ug akong dagkotan

sa kandila nga gitagkosan ug
itom nga tanod

molantaw ka nako nga walay
mata ug moingon ka nga pagkawakoy

puangod nganong gibuhatan ka sa
ingon unya mangadye ko nga unta

ikaw mahimong tawo nga unta ikaw
mahimong tinood kay sa atong

unang panagkita sa wa pa kita
huboi mananap ka naman dako

unya ang imong kinaiya ug mga
pinulungan makabukog namang daan.

kwadrado ug sinug-ang

ang akong nawong
kwadrado sukwahi

sa imo nga sinug-ang
nga kon akong tutukan

ug sabton mahimong
pulang kasingkasing

nga sa una gigunting
sa bata gikan sa

kwadradong papel
nga akong nawong

ayaw kahadlok kay
dili ako lawak dili ako

mahimo nimong karsel
kay ning atong dula

di ko nimo masudlan ug
di sab ka nako himoong

sug-ang sa akong
haw-ang nga kahimtang

kwadrado akong nawong
mahimong larawan sa sulod

ang sug-ang nga ang lubot
sa kalayo dauban

sulog sa hunahuna didto sa uma ni babie

 
ang mga bato gustong
mahimong ligbos

mubo lang man god
ang kinabuhi sa ligbos

sama sa lamok nga
sabaan babaye ang ngalan

sa kisaw sa sapa nga
anad ang isda nga

gisipatan sa bunga sa
nipa nga gustong mokawhat

sa bulan sa iyang ulohan
nga kutsilyo ug buhok

ang lingkoranan sa suba
nga bukobuko sa kabaw

namati naniid kon kinsa
ang sunod nga madakin-as

sa lapok nga agianan diin
ang reyna mao ang

undok sa bag-ong
gipamutol nga amorseco

nga gidayandayanan sa
mga tubol sa kanding

ug kon kanus-a siya humanon sa kapalaran

adunay mga relasyon nga morag
liso nga gibulad, unya nauga, unya gisabwag
sa kadaplinan,

wala man unta gituka sa langgam
nga kamaong mosayaw
apan unsang katarungan nga
wala man mogitib diha sa yutang
giabonohan

adunay panaglambigit nga
tagnatagna lang
gipiyal sa mga paghukom sa mga bitoon

nga ug molambo, ok lang nga ug kon
mapakyas
ok lang pod gihapon

mao kini ang panimpalad sa mga tawong
kahibalong mabuhi sa tungatunga sa lawod sa kamingaw

buslot ang sakayan, guba ang bugsay
gialirongan sa daghang mga iho
gisagpa sa dagko kaayong mga balod
giputos sa tumang kangitngit sa mga dag-om
nga mga panganod
gitulon sa mga tilaok sa baba sa kagabhion
nga walay pagkaugam
apan wa na kaila kon unsa ang kalisang
ug kabalaka kon kanus-a
siya humanon sa kapalaran

apan sa kalit, ang bombelya napundir.

lahi baya ang chat kay lahi usab ako kaayo didto

gawasnon man god kita sa atong isulat labi na kon dili mo madungog ang akong tingog
kon kini masulub-on ba sama sa usa ka sip-on nga wa pa mahinog ug dili kagawas sa ilong nga huot kaayog bangag,

labi na nga dili mo makita ang akong panagway, kon kini gubot ba ang buhok, katulgon ba ang mga mata,
itom ba ang kalimutaw, tangkag ba ang dalunggan, baga ba ang ngabil o talinis ba ang  liog, nipis na ba ang kilay, o misamot ba kalapad ang akong apapangig o daghan bang balod ang akong mga pilok

ang chat man god usa ka dako kaayo nga pagtakuban diha sa mga pulong nga walay nawong walay lawas ug walay tingog

nindot usahay nga ikaw mahimong usa ka bigaon nga tiki ug ako usa ka gamay nga lamok nga kamao sab nga mokiringkiring unya ang atong lugar sa dakpanay ug pangagpas mao ang kisame nga gisug-an sa bombelya nga hapit na  mapundir

nagsigi ko ug likay-likay sa imong taas nga dila, unya ang akong paglupad morag nagpasaringsaring nga aduna usay pangandoy nga unta ako imong matukob

aron pagkaugma malipay
(ang tawong nagsulat sa iyang balak sa atong ubos diha sa iyang computer nga
gipaypayan sa yabag ug abugon nga electric fan) kay wala na ang lamok nga uwagan unya
ang tiki naghinuktok sa tumang kamingaw kay ang iyang kabigaon
walay undang nga naghandom nga unta adunay lamok nga masaag na usab sa iyang kisame
 aron iyang himoong panihapon sa iyang kakiat.

nindot hunahunaon nga mitutok ang kunuhay (trying hard) nga magbabalak didto sa kisame tunong gayod sa
tiki nga nagmingaw,
unya sa dihang hapit na silang duha magtinutukay, o
magkasinabot ba kaha nga sabton na lang unta ang ilang mga pangandoy nga wala matuman
ug magdungan silang dakop niini karong gabhiona

apan sa kalit, ang bombelya
 napundir

ug diha usab, naundang ang atong chat
nga walay lami kay bisag unsa na lang ang gilantugian
bisag walay klarong
kapaingnan

morag black-out nga wala
masibya sa radyo ug pamantalaan.

sayang lang

wa ko na handoma
nga sulaton pa ang kinamub-ang balak

sayang lang.

diha sa imong hamis nga kahayag

sa dihang nagkahimamat ta
abi nako ug malimpyo ang kalangitan sa iyang mga dag-om
nahimo na man hinoong bato ang dagat
ug ang mga isda nahimong mga barko nga nag-iyahay ug
pangandoy nga maoy makatag-iya sa nahibiling
asgad nga yamog sa gagmayng mga kutay didto
sa baybayon

ang hangin nga midunggo sa akong agtang
troso nga gianod sa baha gikan sa lasang
nagdugo ang akong dunggan nga morag
lubog nga busay nga naigo na usab sa imong
mga pasalig

wa na ako malooy pa sa akong kaugalingon
wa ko man usab kini kasilagi kay mora lang
hinoon ako ug nangluwa sa langit unya milanding
pagjkahuman ang kalas-ay diha ra pod
sa akong aping

karon mao na ang tukmnag higayon sa panamilit
bun-og ang mga apapangig sa mga bitoon
ug unya ang daghang uwat ang bulan sa iyang
bungol nga nawong

karon ingna ko kon lami ba ang pagdagmal sa
akong mga kumo sa  kangitngit diha sa imong gipanghambog
nga hamis nga kahayag?

nasabtan mo na gayod ang tanan

sa kadugay
kamao ka nang mobalit-ad, ang imong mga bukog kamao na nga mahimong unod,
ang imong likod lahero na nga mahimong atubangan
ug sama sa atubangan, kon mobalit-ad pa gayod, mahimo kining likod,
usahay, lantawon ka nilang walay ngabil, ug dayog dagan kay kuno dili ka ingon nila,

ang ilang kahadlok, gikatawa mo kini nga mag-inosara,
dayog sayaw nimo sa imong kaugalingong musika nga gimugna sa imong kaugalingong
libreta diha sa kilid sa bukog mo nga kwerdas

gibali bali nimo ang ilang gitawag nga reyalidad, nahimo kang majikero, ug sa kadugayan
sa dihang nawala na sila sa pasing, mibilib sila nimo isip usa ka banggiitan nga tawo,
dili masakitan,dili madutlan sa ilang mga pagbiay-biay,

baga kuno imong nawong morag pader sa dato nga insik nga supplier og shabu sa mindanao
nga bisan unsaon nilag pusil, di na jud madutlan,

kini nahitabo sa dihang nakat-unan na nimo ang ilang mga binuang, sa dihang wala ka na  mitoo
sa ilang mga pasalig, sa dihang maayo na nimong pagkapiang sa ilang mga bukbok ug kulata

unya kay kamao ka mang mobangon, unya natakdan ka man sa tiki nga ug maputol ang ikog
kamao man sang mosumpay pinaagi sa hunahuna lamang, diha sa gamayng pagpailob sa
mga dag-om hangtod nga kini miulan,

gibalit-ad baya sa kamel ang iyang tiyan aron malatas niya ang kainit sa disyerto
gibalit-ad sa lalaki ang iyang ikog aron mailhan nga siya tawo ug dili unggoy sa lasang,
gibalit-ad baya ni dodong ang iyang kamisin aron maabtan niyag balik si inday sa iyang payag,
gibalit-ad baya sa abogado ang iyang mga papeles aron lang modaog sa kaso
gibalit-ad ko usab ang akong lubot aron masabtan mo ang imong nawong
ug daghan pa, ug ubay-ubay pa gayod

gibalit-ad ko ang tanan nga mga yano, aron unta ako nimo hisabtan
gipasabot ko ikaw nga diha sa pagbalit-ad, masabtan mo ang usa ka kamatooran nga
diha sa pagbalit-ad sa pagsabot

sa pagsabot nga ang tanan dili baya nato masabtan, sukwahi sa paningkamot sa syensa ug sa
literatura nga ang hapsay ug maayong pagkaplantsa maoy gikinihanglan aron masabtan ang tibuok
kalibotan nga dili ra ba gayod kana ang tinood

kay kinsa ba ang nakatungkad sa kinailawman sa dagat
ug sa kinatumyan sa kawanangan?

wala.

karon kon moingon ka, unsa ba kining giyamayama niining tawhana, nga wala man akoy nasabtan niini?
kon miabot ka na nianang punto sa kalibog, ug sa kasapat, dawata ang akong dakong pasalamat.

nasabtan mo na gayod ang tanan.

TAMBAG SA GIMINO (KADTONG NAWALA UG GABALIK BALIK SA IYANG GIAGIAN)

sunod sa tambag
sa sinati sa mino
akong gibalit-ad
ang akong sapot
sa kagahapon aron
nako
matultulan ang
akong
karon.

di na ko magul-an pa bahin ana

karon karon lang
mitingog na pod ang
tuko

akong giihap

ang kataposang
pagtuko

mao lang gihapon
di ko
magmalamposon

apan
sinati ko na kana

di na ko
magul-an pa
bahin ana

tungod sa katam-is

pagkahuman
mangatug ta sa
ibabaw sa
kasagbotan

ilalom sa kahayag
sa bulan

bisan sa kakapoy
madungog pa gayod nato
ang mga tunob
sa sulom
nga nanglakaw paingon
sa atong
tiilan

ang awit sa akong sabon

gibilaran
ang kisaw ning isdang
tunukon sud
sa akong
dughan


gadugo ang
akong
kasingkasing

puno sa kahadlok
ang kagabhion
miapaw ang kalisang
sa kaadlawon

apan kwidaw ka
di ko ganahang
mahimong
bug-at alang
kaninyo

busa sayo sa
buntag
didto sa banyo
madungog
pa gihapon ninyo
ang taghoy sa akong
sabon

sa likod sa imong balay

adunay gaingon nga kini nindot
ug ikaw misabat, nindot, ug silang tanan, miuyon nga nindot gayod

unya imong gikab-ot, gikuha, gidala, gitangag sa inyong balay, kay
lagi nindot,

ug silang tanan, nasina, kay ikaw ang nakatangag sa nindot, nga karon
ania na sulod sa imong lawak

apan, sa tinood lang, dili nindot, wa makalipay kanimo, apan
nahinaykan na lang, busa, nindot, nindot, gibalikbalik mo ang pagsultig nindot,

apan, sa tinood lang, dili gayod nindot, ug naghinuktok ka, kay dako ra kaayo
ang imong sakripisyo, aron makuha ang nindot,

kinsa bay mag-antos niini,kundi ikaw man lang, busa, gibalihan nimo ang bintana
sa likod sa imong balay ug didto,

ang nindot gilabay.

"you're fired", at least sa facebook lang.

wala ko
naglisod nga ako kang gi
block

sa facebook, kay nakaatik ko
nga ako lang man god
ang siging ga "hi" sa imoha

unya ang imong bawos "hi" lang
pod gihapon

unya kon maghisgot kog bahin sa imoha
di ka maghisgot balos sa ako
kon naunsa na ko

ikaw , ug ikaw lang ang importante
sa imong kaugalingon

ang imong kawsa, ang imong
hunahuna

nga mora bag ako, dili na usab ako,
dili tawo, dili gani butang, kon dili
hagawhaw lamang sa
akong kaugalingong kamingaw

"shit!" kataposang hukom nako,
karon ako ang magbuot

"you're fired", at least sa facebook lang.

it-it

kahinumdom ka pa ba

sa it-it?

wala na sila karon dinhi

sila kadtong mga gagmayng

langgam

nga ang balahibo sama

sa bulok sa langit

nga kamaong mosukol

sa mga uwak

nga nagpunay ug dumot

sa iyang mga pispis

didto sa tunga sa

iyang salag

gagimok pa nga puting ulod gikan sa usa ka dahon

molutaw gayod
ang gaan

pagkagaan
sa gibati nga samtang galakaw ka sa usa ka sip-ot nga dalan nga hapit gani di maigo ang kabaw

hapdos ang abaga nga misabod sa kilid

apan tungod kay gaan kaayo karon ang imong gibati

milutaw ka sama sa usa ka  tamsi sa ibabaw sa taas nga punoan sa lubi

samtang ang imong taas nga sungo

gabitbit anang gagimok pa nga puting ulod gikan sa usa ka dahon.