ang musika sa binatil nga duha ka dagkong itlog sa bebe

gitadtad na ang lawas
ug dahon sa sibuyas
gipanitan ug gidukdok
ang gagmayng bisayang
lima ka lusok sa  ahos
gihiwa ang pula ug
bus-ok ug baga'g panit
nga kamatis
gibuak ang duha ka dagkong
itlog sa bebe nga giliboran
sa usa ka pignit og kusi
sa hait ug pino nga asin
ug gibatil na sa
usa ka silver nga tinidor

nalagnaw ang duha ka itlog
nga morag utok nga nalibog
samtang
gipahiluna ang kalaha
nga morag rayna na 
sa lingkoranang kalayo

 ug gihuwaran sa
sa tungag baso nga mantika
sa lubi
ug sa dihang nakab-ot na
ang saktong kainit nga wa na
maglagiit
gihuwad ang gabula
nga binatil sa lansang
itlog sa bebe nga
giasoy ko kanimo
kaganiha

nindot pamation ang
tingog sa pagprito sa binatil
nga duha ka dagkong itlog
sa bebe
dungan sa kahumot sa mga
panakot nga gigisa sa
mantika nga karon sa
 akong ilong
nanuhotsuhot

pagkahuman sa linog

nahulog ang ulan
ning sayong kabuntagon
gikuyugan
ang pag-abot sa
naandang kahayag

gipanghulog usab
sa punoan sa ilang-ilang
ang iyang mga bulak
kagahapon

ang mga tamsi sayong
nangita sa mga mumho
sa atong gipanglawog
sa iro kagabii

nagduyog ang mga tingog
sa kalumo sa hinay nga
taligsik sa ulan ug sa
kahinay nga pag-abot
sa mga tunob sa kahayag

hilom ang mga bulak
nga nahaluna na sa tiilan
sa kahoy

abtik ang mga tamsi
diha sa iyang gaan kaayong
pako ug mga tiil
apan wala ka'y mabati
sa ilang mga kasikas

linaw na ang kalibotan
karon
human sa pipila ka
pagtay-og.

iyagak

maayo unta kon ang imong gugma
nahisama sa tugtugaok sa mga manok
nga motultol gayod sa pagtingog
matag abot sa kabuntagon

apan dili ko ikaw mabasol

kay ako usab nahisama na man lang
sa kalsadang sementado
nga dili na madutlan sa kabugnaw
ug kakusog sa ulan
sa kainit ug kadugay sa mga hulaw

apan dili ko usab mabasol ang akong
kaugalingon

gisunod ko lang ang lakat sa mga pagbati
nga dili na gustong mamakak

inig abot na sa kahaponon
maandan na nato ang paglingkod sa
kilid sa sibay sa atong balay
aron lantawon na lamang ang
nagtinga nga kahayag

di na man gani ta kahihumdom kon unsaon
pagsugod ang tininood nga pag-iyagak

handumon

sa mga panahon nga layo kita
sa kamatayon

niadtong mga bata pa kitang
kapyot-kapyot sa sanga sa mangga
dayog labyog paingon sa suba
dayog kapakapa tupad sa saging
nga natumba nga naglutaw sa
katin-aw diin kita kaayo ang
mga puyo ug haloan nga
nanibasib sa mga lumot sa kilid
sa kanipaan

human sa pipila ka linog ug baha
ug ginagmayng gubat sa mga isla

pagkaanindot gayod kadtong
nga hitaboa, handumon.

M.

sa atubangan
sa samin
inig abot sa
gabii

iyang lawayan
ang iyang
tudlo
dayon iyang
ihinod sa iyang
buhok

inig human
tilapan na usab
niya ang
maong tudlo
dayog gawas
sa balay

siging
panaghoy

yagayaga

ang pagpanghugas kuno sa mga plato
dili angay sa lalaki.
labi na ang pagpanglaba sa panty
sa asawa, kon makit-an ka,
kataw-an ka gayod, ug sa maong
salawayong buhat tawgon kang
bayot.

abi mo, kagabii, nanghugas kog plato.
unya, pagkabuntag, nanglaba ko sa
panty sa akong asawa.

ayawg katawa. Saon ta man nga
nanganak man siya.

sultihan ta ka

sa dihang nahinumdoman
nako ang pinakasubo nga
nahitabo kanako, unya,
nakaya ra, bisag kayamukat,
sultihan ta ka, nga kining linoga
dulaan ta, kitang duha,
sultihan ta ka, padayonon
ko na lang, kining akong
panaw nga mamingaw.

nothing serious

gitina ni doktor-pintor ang iyang buhok
og bulawan

kalit nakong nakita, pasayloa dok,
si marilyn monroe,

busa nakaingon kog, "ay, pagkagwapa!"
ug sa kalit sab mibwagsa ang iyang buhok
nga may pagka joseph estrada,

mi-comment ang usa, "gosh, girly keyo!"
ang akong gikalibgan nganong nasuko

ka man, nga unta, di ka man yotba.
hmm, wa damha, ako nagduha-duha.

buntag na diay

mas nindot ang kaadlawon
kay diha sa iyang kahilom ug kalinaw
mas dahunog ang tingog
sa mga panghitabo nga wala
magkinahanglan ug mga pulong

pagkaoran-oran
mabati ko ang pag-abri sa pultahan
sa kusina
kuyog ang agik-ik sa upat
ka bisagra

pagkahuman niini mosulod
ang irong pution nga ang
ikog
nagsigig kiwil
dilang naghalhal
mga tiil nga misayaw
ug mga matang migilak
tungod ug alang
sa buntang nga
masanagon.

gutom nga kulansyang atbang sa akong bintana

adunay kulansyang
mibatog sa usa ka hinog
nga saging
sa atbang sa bintana
nga akong gihinuktukan

itom ang iyang mga balahibo
pula ang mata
ug hait ang sungo
sa maong kawatan

adunay bato sa akong kamot
nga unta ibono ko  kaniya
aron siya mopahawa
apan wala ko kini buhata

nalingaw ako sa awit sa iyang
kagutom
ug nalimtan ko ang akong
laraw
sa pagsilot kaniya.

damgo sa kaadlawon kabahin sa milupad nga tawo

ngitnit ang simbahan
misulod siya sa lawak diin
si Fr. S.
nagpaabot kaniya
alang sa iyang
confession nga
milungtad og usa ka
oras,
gihatag ang sentensya
sa pipila ka amahan namo,
maghimaya ka maria,
ug gloria patri,
ug iya kining gilitok
sa pagluhod ug
pangaliya
nga dili na siya mousob
ug dayon
gilatas niya ang taas kaayong
agianan sa simbahan
paingon sa pultahan
nga iyang giabrihan
ug iyang gibati ang kagaan
sa iyang lawas
ug paglutaw sa iyang mga
tiil

gabii na kadto
nanirado na ang mga
tindahan
ug wala nay mga tawo
ang kiosko

didto siya sa ibabaw
sa akasya
naglutaw
nagpalabay sa iyang
nakaplagang
lahi nga kalipay

ako ang

halas
nga misutoy ug kamang
paingon sa kakahoyan
gipangita ang udlot o
panit o gamot sa usa ka
kahoy nga iyang makitkit
og mausap
aron mamaayo lamang
ang iyang samad
sa dughan

syudad

mao kini ang lasang
sa bagang gamingaw nga katawhan
silang tanan
ihalas
laherong moilog sa bagon
nga unta
imong kapyotan

mga gwapo og gwapang unggoy
gukod sa mga bagtok
rayaraya sa mga aliwas
sapang sementado
mga kahoyng gatugsoy
walay sanga
walay dahon

ang balak ni nanay para kang tatay

paniid sa panahon
kon modag-om ang kalangitan
sarang
ayaw gayod hikalimti ang payong

kon mopakita ang adlaw
aron dili ka maitom hawid lang
gihapon ug payong
isul-ob ang sunglass 
pahid sa
sunblock lotion

kon maatikan mo na ang iyang gitagoan
sa lawak
ug sa ngitngit niyang dalan
kon maaninaw mo na ang iyang gigakos didto's
silong sa punoan sa mangium

hampaka dayon sa payong
iduslak ang talinis niyang ilong
diha sa iyang pus-on

kitang magsusulat

agn atong dakong sayop
mao ang pagsulat sa atong gusto
unya wala nato gihunahuna kon unsay
dangatan sa nagbasa niini

dunay naghikog.

bisag wala siya katugkad
ato gihapon siyang igsoon nga atong
nasad-an
pinaagi sa dili nato maayong pagkapili
sa atong mga
pulong.

dunay nalumos

kay wala nato mahukad ang tanan
nga angayan unta nilang kan-on sa ilang
panihapon

dunay nagutman ug dunay
giuhaw

dunay nadagma ug wala
kabangon
dunay natuk-an ug wala
kalitok

ania kita nagpunay lang gihapon ug
sulat
sa tumang pagbasol.

panaw

manamin ako kanimo
diha sa imong mga mata

ako lang ang imong
makita
ug ang imong laway
unya magtabisay

pagkaunya
duha kita ka irong
nabuang sa atong
mga ikog

ang imong dila
mopatong sa akong
dila

mabati nato
ang kakusog sa bunok
sa tubig sa
duha ka sapa

kini ang panaw
sa duha ka sakayan
nga walay katig

walay timon
walay layag.

pauraray

inig ka domingo
gihimo ko ang akong bag-ong
kalibotan

diha sa duyan
ako mohay-ad
ug ang hangin sa dagat
moginhawa diri
kanako

ang akong baga mao
ang mga kahoy
ug ang iyang mga sanga
mao ang akong
mga ugat

ug diha sa duha ka
kamot sa orasan
ako
mopauraray

mga pangagho

UNANG PANGAGHO

gibasolan sa kabatan-on ang
pagpupo sa hilaw nga bayabas
hamis ang panit, apan pagkapait
ug pagkagahi sa unod

IKADUHANG PANGAGHO

ang imong gipili dili mao
gihawiran mo ang pagkahayahay
apan ang imong kasingkasing
walay tumong ang lakat


IKATULONG PANGAGHO

wala mo mahuman ang imong tahas
apan gitawag ka na sa hangin
ug ang dagat nagkisikisi na sa
iyang mga balod

IKAUPAT NGA PANGAGHO

ang mga lubong wala mo madalhi
sa mga buwak alang kanila
ang mga kandila nangapalong
ug nangapakpak na ang mga putli

MELANIA

mihangad si
melania

nangagho ug
miingon"pagkadako sa
kahoy....pagkamingaw"

ug ngadto sa
balay sa kilid
sa bungtod
midugang siay
sa pagpanghupaw
"pagkadako sa balay
apan
walay tawo"

ayaw basoli

ayaw basoli ang pagkabuak
sa garapon

niadtong higayona
giganahan ka usab sa tingog

sa dihang nabuak ang baba
niini sa salog nga

gahi ug sinaw ug gikalipay
mo ang mga bildong nagpasad

linog sa sugbo

ang tigulang nga babaye
mikaratil ug dagan paingon sa gawas sa hotel
nabyaan ang iyang bana nga nagbitbit sa iyang baston

mihawid kini sa sidsid sa akong sinina
nga mora bag ako ang makasalbar sa iyang tumang kahadlok

napandol ang laing tiguwang
misutoy ang bata palayo nga morag tamsi

miuyog ang yuta
nangliki ang mga bongbong

nangadyeg kusog ang mamaligyaayg saging mantikaan
unya nahug ang karaang kampanaryo sa simbahan

ang lalaki nga nagsakay sa motorsiklo
wala mawili
ug busa siya naluwas sa pagkapidyat
sa mga dagkong bato gikan sa langit

ang larawan nga dili nimo pahimoan ug balak

gamay ang dila ni maria nga
namintana sa iyang baba

 nahisama sa usa ka dalaga sa payag didto sa bukid

unya ang imong kamot nga mihawid sa iyang abaga haskang dakoa

morag lima ka sapa nga nagtagbo sa
dakong suba paingon sa dagat

mora sag udlot sa bayabas nga imong giusap
alang sa gamayng bata nga bag-o lang gituli

mora sag kamot ni tatay nga mihipos sa gamayng tingog
sa katabang nga gustong mogawas sa moskitero aron mosyagit ug unta manawag ug tabang
sa mga anghel sa langit

daghang parehas niani
ug busa gisulat ko kini

kay walay aso nga makumkom
walay tunod nga dili matultulan

ikaw nga nagtoo nga mabaw lamang ang akong panglantaw kabahin
sa gamayng dila ug dako nga kamot
mao ang naghandom nga unta dili na lang kini sulaton

 isip usa ka balak

sa dayon

gihunahuna nako
ang kinamub-ang balak

malinawon, apan
wa kaayo nasabtan sa
uban
gani gikahadlokan
pa man gihapon

mao kini ang pahulay.

sa tanan ug sa tanan gayod.

ang kalalom
sa gihulugan sa uban
diha sa mga dili
atabay
ayaw ug tugkara
kay basin unya
sa mga dili angayan
ug bililhon
maapil ka ug
kalumos

sagdi lang
moabot ra ang tukmang
panahon
alang kanimo

ang pagkahulog
mo nga
sagolan sa usa
ka lalom usab
nga pahiyom

ang kalalom niini
masabtan mo ra

kapila ka ba ingnon
ni nanay
nga adunay kalalom
nga ang ganghaan
atua sa laing
pultahan

laing unang kahayag
nga mahimong
makapalimot nimo
sa tanan ug sa
tanan gayod.

nga ug itunol ang kamot aron imong hawiran imo kining gibalibaran

paspas ang pagpamuwak
sa tanom nga akong paborito sa hardin
kong tinagoan

paspas ang pagpamalak sa kasingkasing
sulod sa lawas nga naghinayhinay ug
kakuyos

nanaghan na ang mga dahong laya nga
nangatagak sa kilid sa kahoy nga gialirongan
sa daghan ligbos nga gipapatubo
sa miaging mga liti kagabii

ug busa ako gibati na karon ug kahadlok
ang mga kabalaka sama sa mga sulom nga nagtapok
sa usa ka tibugol nga kamay
nga nahulog gikan sa garapon nga nalimtan
ug sira kagabii

adunay mga katarungan ang mga pangagpas
adunay nagpahipi nga lamdag sa mga pagdali
sayod ka nga diha ang pagdam-ag
ug sa pipila ka pagkahulog anaa ang wala na
nga pagkatkat ug balik aron makita mo na
usab ang kahayag
anaay pagkapandol diin wala na ang gana
sa pagbangon
nga ug itunol ang kamot aron imong hawiran
imo kining gibalibaran

sabaan kotirol ug dili pabangbang

molabay lang ako dinhi
ug kamong magsunod kanako
mahimong mangita sa akong
mga tunob

dili lapokon ang akong
dalan
ug wala akoy ibilin nga
mga ilhanan
nga kaniadto ania ako dinhi
ug giyatakan
ang mga bato, ang mga sagbot
ang mga bildo

aduna unyay bata nga
makadungog sa ngalan
ug mangutana
kinsa man kana siya tay?

maghimo kag mga
sugilanon
apan sagad sa mga dili
mo kaila
 ug wala mo maayo nakaila
ang tanan
taphaw lamang

ang bata magduda
ug mosamot kadaghan ang
mga pangutana

apan imo kining puyukon
dalhon mo ang iyang mga panglantaw
sa bulan

ug moingon ka
dayog tudlo sa bulan
didto sa ngitngit nga langit
"the moon! that is the moon!"

ug ang bata malingaw
mokatawa
ug sama kanako kaniadto
sa gamay pa ko
makamao na sang motudlo
sa bulan

ang bulan nga mihayag sa
tanan: balayng gamay sa kilid
sa bungtod, sakayang buslot
sa lapyahan, duha ka hubo nga
lawas sa kilid sa bintana,
buhok sa babaye nga naligo
sa sapa, abaga sa lalaki nga
naglingkod sa pangpang,
kunot nga kamot nga naghawid
sa usa ka baso nga tanduay,
mga batang nagtago-tago didto
sa plaza, duha ka batan-ong
nagsikitsikit sa silong sa
mangium, mamaligyag balot
nga nagsigig shagit sa init niyang
baligya ug aslom nga suka ug
asgad nga asin,
ug uban pa,ug uban pa kabahin

sa tanang nanglabay
sa tanang dili na gayod
ganahang magpabilin
sa tanang naglibog pa
kon unsay buhaton sa
tumang kaguol sa
di na matukib na usab
nga kalipay
sa mga dughan nga puno
na kaayo ug
sila pa wa nay kabutangan
sa kaulag ug kalipay

apan kanunay, mosurop sa
akong alimpatakan ang lahi
usab, ang dil mo ganahan: yutang batoon
balayng magabok ug maguba
ngitngit nga kagabhion
mingaw nga kaadlawon
 mga adlaw nga
sabaan
kotirol ug dili pabangbang

ug kadtong panahon nga
gipaabot nako ang mga bulan
ug mga bitoon
apan ang mituman mao
man ang mga itom nga
mga panganod
ug bisag giunsa pa natog
ampo ang misunod ug
abot mao man noon
ang dahunog sa dakong
ulan, ang kakusog sa mga
dalugdog, ug ang kapungot
sa mga liti

ug si nanay, midagkot ug
kandila, misunog ug
benenditahang lukay ug
gilabay kini sa bintana
ug mibungat: mga demonyo
pamahawa!!

mga mata sa kabayo

mahimong nahisabtan
ko na ang imong pagpakahilom

karon
ania gisulat ko kini

ania ra diay dinhi
ang kabililhon sa pagpakahilom

ania sa akong
mga tudlo
sa akong dila nga gipriso sa akong baba
sa akong mga tiil
nga boluntaryong nagpagaid
sa akong lingkoranan
sa akong mga mata
nga morag sa kabayong
tinabonan
sa tartanilya gisilotan

ang gikalibgan ko sa akong kaugalingon

matag buntag
isugid mo kanako ang imong mga damgo
nga gusto nimong
kanunay nakong paminawon

ug tuod man gipamati ko ikaw
unya pagkahuman
pangutan-on mo ako kabahin usab
sa akong mga damgo

nahilom ko
ug ako kang giingnan nga ang akong mga
damgo
kasagaran ako namang malimtan

namakak ako kanimo
adunay mga damgo nga maot kaayo
nga bisan ug isulti dili gayod angayan
bahin kini kanimo

ingon sila
aron dili mahimong tinood
kinahanglan nga kini ipanugilon


Mao kining bahina ang
gikalibgan ko sa akong kaugalingon

ang kasilag sa kaugalingon

adunay samin nga imong malabyan
matag buntag gikan sa imong lawak
paingon sa kusina diin ang suga sa likod
kanunayng malimtan ug palong
ug ang atong silingan nagsigig pahimangno
kay mora, og ambot, ug nganong
madisturbo man gayod sila niini

hilom kanunay ang imong kagabhion
busa bisan ang hunghong sa samin imo
sang madungog ug dili ka ganahan
niini. Matinud-anon ang maong samin.

adunay nadungog ang silingan sa dihang
sayo nimong gipalong ang suga sa kusina.
buang nga samin. Tingog sa imong shagit.

ang mga hanap

mas nindot gyod seguro ang hanap
sama sa mga gabon nga mitabon pa sa sayong kabuntagon sa mga kakahoyan sa kabukiran
diin ang mga langgam morag mga lama pa lamang sa kalangitan
nga imong naalaan nga luwa lamang sa kinaiyahan

mas nindot nga tan-awon si inday nga nagtapis paingon sa suba
aron maligo maong ang tubig nga lubog mitabon gihapon sa iyang yano ug hubo nga kaanyag
daghan kag mahunahunaan samtang gipiyong mo ang imong mga mata sa dili kaayo dayag

mas lalom ang dili pa kaayo masabtan ug imo kining balikbalikan ug makapangutana ka unsa ba kaha
ang anaa dinha nganong dili ko man kini matuhog sa usa ka paglabay?
gihasol ka sa mga lubog nganong dili kini dayon motin-aw
gikutkot ang imong utok sa mga katunga lamang sa mga tinabonan sa mga sagbot nga anaa taliwala
sa hardin sa mga buwak nga gusto nimong limpyohan

ang imo man god nga naandan, ug mao sab ang ilang gitudlo kanimo sa gamay ka pa mao man ang
mga dayag, ang mga kinahanglan sabton, ang mga makita ug mahikap ug matagna

karon mao ang panahon sa lahi nga pagsuway
tagboon ka sa di mo kaila, hatagan ka sa pahiyom nga hilaw pa
usa lang ka kamot ang iyang ihatag kanimo, daghan ang mga sapot sa iyang lawas
mabati mo ang mga baga nga paghot sa kakahoyan nga lahi na ang tonada

anaa ka sa usa ka garapon, ikaw lang usa, unya baga kaayo ang taklob ug samin
ang imong makita mao lamang ang gamayng aninag sa kahayag
nabag-ohan ka, apan sa dili madugay, madawat mo kini: kanang pagbati nga usa ka lamang ka langaw
unya gustong mangita ug lutsanan paingon sa hangin

nganong buang ang tawong magmingaw ning dapita?

gasipok akong utok.
migawas kos balay alas siete sa gabii.
suroy suroy sa plaza,diin akong nalabyan ang duha ka manag-uyab nga nagsikit sa silong sa ngitngit nga
punoan sa mangga
duna say mga palahubog nga nagsigig yarok sa tanduay sa kilid sa kalsada
sa ilang lanog nga katawa
sa unahan tua si Art nga usa sa mga Tamjuns (taman ra sa June ) napilde ang iyang gobernador naningkamot nga makabuhi sa iyang upat ka anak namaligya ug beer og balot gamit ang kahayag sa lampara
nalabyan sab nako ang bag-ong gitukod nga bakery ni Rubie
nga talagtag rang namalit ug init nga pan
dunay drayber nga nagpabugnaw sud sa iyang trak aron mopahulay makadyot paingon sa zamboanga maghakot ug bugas
mipatsarming ang babayeng nanimpalad basin makatsans ug bisag pangkape na lang

panahon sa akong lakaw-lakaw pasingot sa agtang
dili kaayo hayag ang plaza
daghang mga batan-on nga nanuroy sab nanglingkod atbang sa estatuwa ni rizal

giyab-an ug usa ka kabo nga tubig sa tindera ug barbecue ang duha ka iro nga nagtapot sa
atbang sa iyang tindahan
nag-ukang ug dili oras unya miiyagak ang baye sa kalit nga pag-ibot


bugnaw ang hangin
daghang makita

karon sayon na tubagon ang pangutana
nganong buang ang tawong magmingaw ning dapita?

ang gitadtad

mora siyag gitadtad
kita ang pinong tinadtad
intawon nagkasamadsamad

apan si Ferds
mibalak lang gihapon
bisan sa
kasakit ug sa kahapdos
ug sa mga tigodtigod

nagpasalamat gihapon
sa iyang kapalaran
kay kuno siya
nanaghan

balak alang sa mga tanga

alang kini sa mga lamok nga naibog sa mga tiki ug nalingla sa kisame
sa mga balagtok nga mitipas ug natukob sa mga sawa
sa mga manok nga nailad sa mga bayawak sa mga iring nga nagukdan sa mga iro
sa mga mga iro nga natangag sa mga buaya sa daplin sa suba

alang kini sa mga alimango nga nasabod sa bobo
sa mga kulansyang nga nabitag sa mga lit-ag
sa mga baki nga nangawala ug natigbak sa mga tilaok sa tulabong

sayod ka kon unsa kapait ang ilang gidangatan
kon unsa ang kataposan sa ilang mga sugilanon

kining akong balak halad sa mga tanga tungod ug alang sa kaibog
kining balaka halad sa mga gugmang guba, nga bisan ug kabalo na sila sa ilang dangatan
atua, nagpahiyom gihapon dulong sa ilang kamatayon.

kon unsa kita sa banag-banag

sa dihang nanamin ang panganod mo
sa akong suba

kadtong nakakita nailad sa atong
gipakita

abi nila ug kitang duha usa ra
abi nila ug kitang duha dili na magbulag

inig abot sa ilang kagabhion mawala ang
ilang mga anino

ug dinhi maaninaw nila ang tinood
wala magtapot ang gugma

kon gusto mo kining buhion
kinahanglan nga imo usa kining bulagon

ug kon manamin na kini pag-usab
kining panganod sa dakong suba

sa usa ka panahon, sa usa ka mubong panahon
kitang duha usa na usab, ug kitang duha unya

andam na usab sa laing panagbulag
sa laing pagpangita kon unsa kita sa banag-banag

pagkahapdos gayod.

ang kalay-on mahimong usa ka naandan

mahimo kining mas duol pa sa duol

moabot ang panahon nga ang kalay-on

motaban ug kalimot dayon nimog hagulhol

nganong nakat-onan ang kasakit nga di

na kapamunga ug mga luha.

karon dili pa angayan nga masabtan ang

tanan kay anaa ka pa sa sidsid sa  usa ka

kalipay.

magisi ang imong mahikap ug matangtang ang

imong makab-ot unya inig tagbo sa atong

takdol ug bagulbol makaplagan nato ang

atong tinan-ogang kahayag.

sa atong panagbulag unya balonon nato ang

atong mga pahiyom nga morag tuyom

kon makaigo, pagkahapdos gayod.

ang akong baso ug ilimnon

ang bino sud sa baso
adunay awit nga tinagoan
busa ako kining
gitupad sa akong dunggan

pagkaanindot
giyubit niya ang imong
ngalan

gipiyong ko ang akong
mga mata
gisubay ko ang
mapa sa kahumot
didtong
dapita

giablihan ko ang akong
baba ug
gitungab ko ang iyang
mga saad

gidaghan ko pa
hangtod nga ako
nahubog

misayaw, mikatawa
misulti sa kadaghanan
nga pagkaanindot diay
kining akong kalibotan

pagkaugma
gipangutana ko kamong
tanan
kon nakita ba ninyo ang
akong nakita
kon nadungog ba ninyo
ang akong nadungog
kon nasimhot ba ninyo
ang akong nahanggab

walay bisan usa ka ninyo
ang mitingog

ako kini, ug kamo usab
kamo

usa lang ang basong
akong giimnan
ug dili ko kini buk-on

wala kamo'y kaisog
sa pagtungab sa akong
kanunay nga pagaimnon

matun-an mo sa mga dahon

ang usa nga matun-an mo sa mga dahon
mao ang ilang pagpanggawas sa ilang mga lawak nga walay pultahan
mogitib, mobuswak, mausob ang ilang mga bulok
malaylay sa ilang mga sanga, hangtod nga kini buhian
aron matagak sa ilang padulngan

ang sanga magmingaw sa makausa pa
apan sa paglabay sa panahon mobalik na usab ang iyang kasadya
mogitib, mobuswak, mausob na usab ang mga bulok sa mga dahon
hangtod ihatag na usab kini sila sa mga sanga paingon sa yuta
matagak paingon sa ilang kataposang padulngan.

kuyog ta

wa ko hingpita ang paglingi
sa akong gigikanan
kay dili ko segurado sa akong
paingnan

gusto ko nga ikaw sa akong
likod
unta mosunod kanako
unya sa kadugayan motupad kanako
kay didto sa akong padulngan
wala gihapoy pulos kon ako ug ako
lamang

 

madonna sa sayong kabuntagon

aron mahupay ang kahaw-ang sa dughan
dawaton kuno nako ang akong kaugalingon
unya pagkahuman mobalik ko Kaniya nga
iyang nailhan unya motupad ko kaniya nga
iyang nadawat kaniadto pa.

oxymoronic nga kaugmaon

jondy,sakto gyod ka
bug-at ang kahaw-ang
unya kon mapuno na
ang imong dughan
mahimo kini nga
mas gaan pa sa gaan.

ginagmayng pudyot sa kalipay ni Tom Juns

sa mga pangutana
ang tubag mao ang mga buga
sa pipa

anaa ang aso
alang kini kanimo
dakpa

hakpa ang mga dili klaro
apan makalipay kanimo

gaksa ang dili angay
tawga ang anghel mong sangay

tali kaninyo mao ang kahanap
nga bisag nasayran mo na kini kaniadto pa

gibalewala mo
pudyot, pudyot sa ginagmayng kalipay
ginagmayng pudyot sa asin
alang sa manggang hilaw

pagkapino sa mga adlip
sa kaaslom diha sa wait mong giugahip

hala buga, buga, buga,
hangtod magawsan ka.