kinsay makatoo

sa usa ka
segundo
dako kaayo ang
nahitabo
napagya ang
kalibotan

wala'y mitoo
gahi nilang
masabtan

naghikog ka
man god.

pagdapit sa orasan

milabay ang kinse minutos
paglantaw ko sa orasan
morag kusog kaayong
midagana ng iyang mga
kamot
libot-libot sa iyang
nataran

gisulat nako ang tanan
akong gisulayan nga ang
tanan gayod

diha sa pipila ka pulong lamang
bahalag dili mo kini masabtan

apan salig ko nga sa dugay natong
panagtipon
ang mga kamot sa orasan
sa kalit lamang mohunong
nga mora bag sakyanan
nga tinuyuang kita gayod
ang gipaabot
gidapit sa sulod niini
aron kita dalhon balik sa
kaniadto

aron sa makausa pa
mopahiyom na usab kitang duha
sama sa mga bata
didto sa bonbon nga nataran

maabogan sa tumang kainit
magkalapok sa kusog nga ulan
sa tanang higayon
kanunayng malipayon

balik-balik

ang kasagaran
mawala man
dayon mabag-ohan
tang duha
aron dili mahitabo
mobisita ka sa
imong higala
ako sab
managlahi na
kaayo ta
ang imong mga
higala
akong kaaway
kon mopauli ka
dili ka na manugilon
ako sab
inig-abot sa katugnaw
hawiran mo ang akong
kamot
dayon motanday sab
kos imong paa
dayon mahitabo na
pod ang
kasagaran
diha sa paghikalimot
sa tanan
aron sugdan na usab
ang naandan

taas ang imong sugilanon
sumpay sumpay ang kutay kutay

abi mo, duna sab koy sugilanon
gikan sa ilalom nako

maong, wa ko namati nimo
apan wa sab ka nanumbaling bahin niini

nindot kining atong kahimtang
ikaw diha, ako diri, tunga nato ang kahaw-ang

ulan
kusog kaayong ulan
ang akong payong
itom
gamay nga payong
nga ako lang
ang maigo
gani nabasa pa man
ang akong abaga
og kamot

misulod na unta ako
sa dakong lawak
apan nakita ko ang mga
karaan kong amigo

upaw, dagko na ug tiyan
sama kadako sa ako
taas, apan hoyhoy na usab
ang abaga

daghan kog mahinumduman
bahin nila
lami silang duolon, dayon
hunong, dayong ugkat sa
kagahapon

apan natiurok ko
layo pa gihapon sila
mibalik ko sa akong agi
bukhad ang gamay nga
payong nga ako lang ang
maigo

balik sa sakyanan
nanirado ko
samtang mikusog ang ulan


sa sud sa sakyanan
pagkamalinawon
gusto na akong mopauli
sa balay
apan wala ko dayon kini
gibuhat

naglingkod, mitutok sa unahan
wala koy gihikap
aron unta mawala ang
kalubog sa samin

aduna kay nakita
hagbay ra kining nagbalikbalik kanimo
gani matag-adlaw man
ila sab kining nakita
gani tanan man nakakita niini
apan

karong adlawa bisag mao lang
gihapon kini
aduna kay nakita sa iyang kasihag
nga nakasiga sa imong mata
hagbay ra man kini
apan naunsa ba nga karon pa man
nimo kini
nakita sa usa ka lahi nga panglantaw

gusto nimong isulti apan dili mo
masulti

ingon ani seguro ang nakita sa usa
ka buta
nga nakapahimo sab niyang
usa ka amang

dili ko usab malitok kanimo

miabot ra gayod ang panahon
nga di ka ganahan motingog
di gani sab ka ganahan manghilam-os
di ganahan molakaw sa gawas
bisan gani manumbalay
mangumusta sa mga silingan
sandurot sa amigo
di na sab ka ganahan mosuroy
sa baybayon
o balik sa bungtod lantaw sa
mga buwak nga bag-ong mibuswak
nga mora bag di na ka ganahan sa
pagbuhat sa imong naandan
unya nabalaka na silang tanan kon
naunsa ka unya maglisod kag ingon nila
nga miabot na ang saktong adlaw sa
kalipay

unsaon mo kaha pag-ingon nila
nga ang imong kalipay karon anaa
na sa pagpakahilom og sa
pagpalayo?

pagkalayo ra sa mga balak nga akong nasulat

ang liog sa kabayong puti
samtang imong gihapuhap

ang ulo sa imong itoy nga itom
nagdapat sa imong tiil natulog

ang asul nga alibangbang nga
milupad human nimo buhii sa imong palad

ang gapnod nga misandig sa kilid
sa abaga sa lunhaw nga bungtod

ang paglangoy sa haluan diha
sa lim-aw dayog hanggab sa hangin

nakita ko kini sa walay tingog
pagkalayo ra sa mga balak nga akong nasulat

ang mga pagbati pagkaanindot
wala nako kini mabati sa mga pulong

wa ako nagpahibalo kon asa na ako

apan kagahapon sa alas singko sa hapon
gamay na lang ang mianha sa menteryo
miercoles man god

nihit ang mga kandila sa kilid sa mga pantyon
gilabyan ko si Jingjing
kadtong namatay sa kanser sa matres (nga ingon ka
basig nagabaan kay ang iyang uyab
kadto mang tambok nga pari nga gisumpayan pa nimong
ginganlag monster sa imong maestro kaniadto sa
koleheyo)

ania ako nagtindog sa lubnganan sa akong
mga ginikanan

gisulayan ko pagsumpay-sumpay ang mga petsa
sa ilang kamatayon og pagkatawo
diha sa ilang mga krus og mga bitoon

hangtod karon wala pa gihapon nako
makita ang mga nangawala kanako

usa pa gihapon ako ka buak nga baso
hait nga mga buak nga kon matumban sa wala magbantay
segurado gayod nga makasamad

gisulayan ko baya upod pagtugkad
ang tanghaga
sa atong duha ka kinabuhi

kay ikaw lagi nagpunay man lang og
lutaw-lutaw diha nga morag dunay lain nga gipaabot
og ako nga giinitan na kaayo sa adlaw
og sa dihang wala kasabot

unya gustong sabton ang tanan kon unsa gayod
ang naa sa ilalom

mitiglom ko
gisulayan ko ang tanghaga kon unsa gayod ang
mabati diha sa pag-utong

kanang gusto kang mabuhi apan
wala na nimo ang paglaban sa hangin
kanang gusto nimo ang ilang kalibotan kay
nakita mo ang mga anindot diha kanila

apan wala ka nagpadayon kay lagi
ako nabalaka man kanimo kon asa ka na kaha
gipadpad sa unos
didto sa ibabaw

adunay milungtad
ah, akong giihap dili pinaagi sa akong mga tudlo
dugay, dugay-dugay usab kon ato gayong tinud-on pagsumatotal
labaw sa kawhaan og lima na ka  tuig

apan sayod ka ba nga kini milungtad
nga kini wala gayod milubad sama sa de kolor mong sanina
nga nahumol sa akong puti nga purol

ah, tungod kini sa usa ka paagi
nga wala nimo kaayo maaninaw kanako

kanang wala pag-ambat sa mga lamigas sa ulan og init
kanang ilang pagpunay ug paak, tulod, aswat nianang tiki nga hagbay rang patay
nga gani nanimaho naman diha sa kilid sa pultahan
napiit sa dihang imo kining
kalit nga gisirad-an

kadtong punoan nga
nawalis sa milabay nga kusog kaayong hangin
nga mihay-ad sa daplin sa dalan
paingon sa Situbo
kon gidapit mo unta ako human sa usa ka semana
aron makita nako ang
iyang wa damha nga pagpangudlot
human nangatagak ang tanan niyang
mga dahon

kon nakita ko pa unta kini kuyog kanimo
mas mitoo unta ako kabahin sa gugma og
kinabuhi

apan nganong ikaw
nganong ang numero 33 ra man lagi ang imong
gipili?

alang sa kaayohan

gibuhat ko ang
angayang buhaton
maayo kini

usa ka gamay nga tulo
 lamang

gikan sa akong kumingking
mibalik kanako
ang kusog kaayong ulan

nga nagpabunga sa akong
mga kamanggahan

nagpabulak sa akong mga
ylang-ylang

gamay lang nga kaayohan
pagkadako sa anihinon
natong tanan

blocking

sama sa salibotbot
nga akong gihinayhinay og ibot
sa akong hardin nga
ambot
pila na kaadlaw wala
malibot
dris facebook gihinayhinay ko
sab og block
kadtong siging pamakak

pangutana

naa ang kapuno
gani nag-awas-awas man
apan nganong kulang man
lagi gihapon?

naa ang kadaghan
gani di na man maihap
apan nganong mangita pa
man gihapon?

naa ang daghang tubig
naglanab miawas sa balay
giwala ang isla
apan nganong giuhaw pa man
lagi ikaw gihapon?

sayod ka ka kon unsa ang kulang
sayod ka kon asa kini
kuhaon
apan nganong dili man nimo
kini buhaton?

nagtanga sa kasakit

sa diha lamang nga ikaw
natunok sa
usa ka tayaong lansang

nakaiyagak sa kasakit sa
dihang gipatuloan sa init kaayong
lana gikan sa kalayo sa
suga
sa tumoy sa dahon sa
tabako og ikaw

nakapuyo sa balay
nagtanga
sama sa usa sa akong mga
balak

hinay hinay lang

isulat ang tinood, apan

hinay-hinay lang basin
makum-ot, busa ayoha una pag

papahaluna ang mga pulong
hinay-hinay lang ug hirit morag bag

mga baraha sa atong piyat-piyat aron
dili masipyat diha sa pangandoy nga

unta modaog kita sa kaulahian, isulat
ang tinood, apan

kon mohatag kinig kasakit kon
hisgotan na gani, hinay-hinay lang

ayoha paghapnig, kanang nindot siya
lantawon diha sa kilid sa imong tiilan

sa ibabaw sa imong kiting morag irong
bisag imong gisipa anaa mikitoy ang

ikog, mipahiyom, miduol kanimo dayog
tila sa imong tiil sa imong mga kamot.

usa ka daklit

ang pipila ka tuig sama sa mga habol nga nagsapawsapaw sa higdaanan.
gum-ot
nanimaho na gani
kon hikapon baga ang abog
mabati mo nga kini
morag
gilomotan,

sulod gawas ta ning lawak. pagkadaghang gihunahuna.
nagpasad ang bulahaton alang sa mga ugma
gilabaylabayan na ang mga panghitabo nga nanglabay
wala na ang tutok
puros na lang mga daklit, pasiplat,
usa ka daklit
igo na kini
wala na ang pagbarena kon unsa kadto ug unsa kini
ug ngano
daklit lang ang paghisgot
dayon balhin sa lingkoranan, tindog kadyot, lantaw sa unahan
pamati diri, balik sa kilid sa bintana
pahungaw, wala na ang pagbulhot sa sigarilyo
human na ang pagsalig sa aso

usa lamang ka daklit nga paghisgot
dayon ilubong ang wa mauyoni sa kalimot
sama sa mga habol nga nagsapawsapaw nga walay laba nga nanimaho diha sa higdaanan

wala na kitay panahon alang niini
layo pa ang panaw, mogikan na usab kita

maong asa ba ang panagbangi?
wala. asa na ba ang atong pagahisgotan dayon awayan?
wala.

o di ba? di ba malipayon tang duha?

usa ka panghitabo sa kalibotan

nagbagotbot ang kalibotan
diha sa dalugdog
nasuko kini diha sa iyang
mga linti

nag-iyak ang mga panganod
diha sa ilang mga ulan
walay hunong pipila na kaadlaw
walay pugongpugong

midagayday ang tubig gikan sa
aping sa mga kabukiran
nahulog sa mga suba ug mga sapa
nagpadayon ang ilang panaw diha
sa kusog nga baha

sa kilid sa bungtod atua ang mga
nag-undok nga  mga balay
ang mga inahan naglung-ag sa pamahaw
ang mga amahan nagtustos sa ilang
nilikit nga lomboy
nagpahulay, nagpungko
nagpaabot sa paghunong sa ulan
adunay batang giduyan sa magulang
nanaghoy ang manghod nga lalaki
misayaw ang anak nga tunga-tunga
sa higdaanan

miabot ang dakong baha ug gidagit
silang tanan
gilaknit sa payag
nadungog ang kusog nga mga syagit dayon
mibanos ang lalom nga kahilom


nawagtang ang aso gikan sa dapog
misutoy sa langit
morag nangamuyo
nagpadayon gihapon diha sa paghilak ang mga
panganod

uwat

pagkadagko gayod
sa gipili nga mga kasag

nalipay ka nga naghandom
unya sa ilang mga unod
diha sa dakong lawas og
paak

baye ang imong gipili
nagtubod ang imong laway
sa mga aligi

pagkagabii diha sa pagpangaon
dili nako mahulagway ang
imong nawong sa
kasuko

pagkadagko sa mga balayan
nga walay sulod
pagkadaghan sa mga tipaka
nga walay unod

kalibotan

dili nako
mahakop ang kalibotan

ang iyang mga dalan
nagsanga-sanga

unya wala may
kataposan

ang iyang dagat
pagkalapad

bisan gani ug ania ako
diri tupad sa mga panganod

wala gihapoy mga utlanan
kining lingin nga
kalibotan

usa ka estranghero

kon mogahi na gani ang
imong ulo

sahay molantaw ko nimo
dugay

unya makapangutana ko
kon kinsa ka?

kay morag ang akong
gikapuyo sa pipila ka tuig

nga dili na mopatoo kanako
usa na ka
estranghero

ang kabilla sa pantalan

ang mga luha sa
kabilya

taya nga gisalod
sa

dagat nga taas
og dila

kapobrehon

gabiing
mamingaw
uhaw
nga kasingkasing
hinumdumi
ang kanhiayng
kalisod
diha sa kagutom

kalimti ang
kamingaw
kutoy nga tiyan
kaniadto
kurog nga mga
tudlo
wa kaila niana

ang pait nga kahimtang

nagkaon siyang
nag-inosara,

buwad ang sud-an,
ang kan-on bahaw

kon unsa ang sa buntag
mao sab ang udto hangtod
na ang kagabhion

nagkaon siyang
nag-inosara

miabot ka, dayog sulod
sa kwarto

nakatulog sab kang
nag-inosara

migawas siya sa balay
milingkod sa plaza

siya lang usab
nag-inosara

pagkaduol ra gayod unta
apan nganong pagkalayo?

usa ka balay, apan
wala na ang magtiayon

unta dili moiyak ang
mga bitoon

unta dili mawa ang
buwan diha sa kangitngit

unta dili na lang nila
palongon ang mga suga

unta dili na lang manirado
ang mga bintana

gusto niyang madungog
ang pag-iyak sa puya

gipangita niya ang pahiyom
sa kaniadto

untao moabot na lang
ang kamatayon sa kaadlawon

ang pagbuswak

dugay kong gipaabot
ang pagbuswak

kapin sa unom ka bulan
napulo ka kagabhion

miabot ka isip usa ka
blankong papel

usa ka baroto nga walay
timon ug katig

gisulat ko ang akong
kamingaw

gisakyan ko ang usa
ka paglutawlutaw

ang imong pagbuswak
usa ka dakong bakak

papel nga gugma

ang papel sa saad
mao lang nga kini gision

aron mawa sa dayon
imo pa kining sunugon

ang papel nga gugma
motapak dayon

sunugon sab dayon
paluparon sa langit

sa usa ka kagabhion
makita mo ang bitoon

ang gamhanan nga tapolan

ang gamhanan nga tapolan

dihay usa ka hari

minaog sa iyang trono

aron lang dampasan 

ang sagbot sa nataran

sa gapatuyang og hagok

gapiyong sa paggawas 

ug nangahas pa

pagmando sa hari  

kay lagi daghan pa

ang sagbot sa likod 

sa balay dayon nibalik 

pagsulod sa lawak kay 

gikulangan pa og tulog

SA BUKID SA MARUPAY

Hilom ming nanglingkod

sa salog sa payag samtang 

gilantaw namo sa atbang 

ang kabungtoran 

apan kining kalinaw 

tuslakon usahay sa awit 

sa usa ka langgam nga 

nangita sa iyang kauban…

ang kabuntagon nga walay
baba
miawit diha sa mga
tamsi ug
uwak

ang kaudtohon sa iyang
mainiton nga kamot
giduyan sa hangin paingon
sa baybayon

ang kagabhion nga hagbay
rang nagpaabot kanato
didto sa higdaanan
nakasabot sa atong pagpanilap
sa katam-is sa iyang
kabugnaw og kangitngit

hangtod nga ang bulan
miabot og milandag sa atop
sa atong balay
milutaw sa langit
nagpahipi sa kilid sa atong
bentana

samtang kitang duha nagsalo
sa atong mga kahilom

ang alibangbang nga
mibatog sa imong buhok
nga wala milupad
unya wa ka na milihok
tungod sa imong
gibitbit nga kataha

ah, dili lang kataha
gihambin mo man ang
tumang kalipay!

way dag-anan ang
kasilag
nahaylo ra gihapon
sa kataposan
anang gugma

way dag-anan ang
kasamok
nahilom kini pag-abot
sa kasakit

way dag-anan ang
kahakog
silang tanan
nadala

gidagit sa kamatayon.

sa dihang mihangyo ka nga tudloan unsaon pagsulat og balak

matudloan kaha ang kasingkasing?

mahimong tultulan mo kini
sa lasang
sulod didto
kuyog ang kabalaka
kon makagawas pa ba unya
kita sa iyang kangiob
kuyog sab ang kahadlok kon
mabuhi pa ba kita
didto's ilang kaguliyang
kay daghan na baya ang
gidungog nga namatay didto
ug gilubong lang dayon
sa mga anino sa kagabhion

matudloan mo kaha ang kasingkasing
kon kinsa ang imong higugmaon?

mahimong gakson mo sa imong mga bukton
ang dili nimo gusto
apan ipiyong mo gayod ang imong mga
mata
dayon magpabilin ka diha sa kahilom
dayog bisibis sa mga luha
sama sa mga panganod nga nabug-atan
na sa iyang gihambin nga
dag-om

abi mo
ang balak naa ra man sud sa imong kasingkasing
busa dili na ikaw matudloan nako
kabahin niini

ugma dagan sa kalsada
silong sa mga panganod ug adlaw
kon mag-ulan
pasingulan
kon anaa pa ang bitoon sa kaadlawon
lantawa pag-ayo

nindot di ba? gibati mo ba kini?

wala mo na kinahanglana ang mga libro
ang ilang gipanugilon
ug ang akong isulti wala nay bili alang
kanimo

kay sa tumang kalipay
mobalak ka
og sa tumang kasakit usab
bisan ikaw wala'y mahimo
mobalak ka gayod

wala nay makabanban sa tingog diha sulod
sa imong kasingkasing
mora kinig bata nga sa dihang giluwa na sa
bilahan sa iyang inahan

kalit kining moiyak
litok sa pulong nga bisan siya
wala man gani makasabot

adunay iro
nga imong gihiktan

nahimong daotan
pila na ba ang iyang
napaakan?

ikaw nga naghikot
sa iyang liog samtang
galantaw sa iyang
kasuko, kasuko,
mingkatawa

og sila nga milantaw
kanimo
ug mibulig sa imong
katawa
midayeg kanimo
usa ka ka sulundon
nga amo
nga gahipos sa iro
isip adorno


adunay iro nga imong
gipuyok ug bukog
nga mikuyog kanimo
paingon sa bukid

imong gisikaran
nahulog kini sa pangpang
ug nawala

ang iring nga iyang
kaaway
nga nakakita sa imong
gibuhat

bisan pa sa ilang
gadasmag nga kasilag
nakaiyak

ayaw kog
tutuki

kon imo kong
tutukan

mahilis ko
dayon makita nimo

ang akong
pagkaako

ayaw kog tutuki
ayaw lagi

kon di ko
kaantos

motutok sab
ko nimo

og kon ikaw
mahimo sang ikaw

ayaw gyod
pagmahay

KODIGO sa KOLEHIYO

1. Pag gisig papel kanang gamay.
Ang agi dapat ginagmay
Pwede minuldi, pwde pd pinakatay
Basta igo mabasa, payts na bai.

2. Sulati ang imong bagtak.
Mao nay style sa mga damak
Pag number 4 para maklaro ang tatak
Ay lang pasakop kay diha ka mabagsak

3. Suwati ang palad nimo.
Tapos tutuki kini pag-ayo,
i-timing nga nagtalikod ang maestro.
Ug masulbad ang problema mo.

4. E apply ang number 1
Pangita lag kasuksukan
May duha nga imong pilian:
Pwede sa I.D o sa Bulsa man

5. Kon ikaw nagkapuliki,
Ug nanggahi sama sa butiki
Pag Atik-atik ug pangihi,
Tan awa ang kodigs sa CR ug dali.

6. Kuota sa bulsa ang cellphone
Gamita ang testpaper pang tabon
e open kadtong gpang type nimo ghapon
Ing ana ka gamit ang teknolohiya karon.

7. Obserbahi ang palibot
pahiyom ug pa kyut-kyut
Hinay hinayag kuot
Ang Photocopy sa imong lubot

8. Samtang misulpot ang tigpaperma
pagkumot ug papel ug i-itsa
I sure nga masalo sa imong higala
ipabutang ang tubag sa imong pangutana


9. Ukba ang libro.
Apan kini delikado kaayo.
pag inabtik sama sa sundalo,
Lingi sa wala, lingi sa tuo.

10.  Liko-likoa imong ulo tapos hangad
Ihulog ang ballpen tapos tuwad
diay timaan kana sa imong pagpanukad
nga birahon mo ang bluebook sa imong katapad.

sa usa ka sugilanon

daghan nga gabii ang
milabay

mitaas ang atong mga
babag
misamot kalayo ang atong
mga utlanan

kinsa ba ang gahimo niini?
kinsa ba ang gabalhin sa atong
mga mohon?

gihunahuna nako nga
mas maayo nga dili na lang
una nato kini hisgotan

dili nato kinahanglan ang
kabahin nianang pagpatag
sa mga bungtod
ang pagsuta ko asa na ba
ang mga utlanan
ug kon ngano nga ang mga
pensa gipatas-an na man
ug gipatalinsan

kinsa ba ang atong gikahadlokan
nga moabot?
wala ako'y nahibaw-an

nindot pa baya gihapon ang
atong hardin
unya diha sa gamayng sapa
wala pa man namatay ang
maanindot nga mga isda

wala pa magutmi ang atong
mga iring og mga iro
unya sinaw pa gihapon ang
salog sa sala
wala kay makitang pulgas
og karapata

ang kahilom usahay dakog
katabang sa pagdagan sa mga
adlaw
sa pag-abot sa mga kagabhion
sa kabugnaw sa mga kaadlawon
mahimong mitipas ang atong
mga kamot og ang atong mga tiil
apan ang kasingkasing
anaa, malinawon gihapon sa iyang
pagkahinanok

ayaw lang gayod sugdi ang usa ka
sugilanon
kay kon ako na ang maghatag sa
kataposan niini
dili gayod kini malipayon

ang iron nga wala na mahibalik sa atong pinuy-anan

kagabii
nasulti ko ang tinood
ambot
mora mag mikagot ang
akong baba
unya ang mga pulong
mora mag mga bunot
sa lubing guwang
nga lisod
langkaton

miinom ako ug
bugnaw nga tubig
miginhawa og lalom
og dayon nakog
gawas sa lawak
lantaw sa mga kakahoyan
sa unahan
bisag hanap pa kaayo ang
kalibotan
nga morag gitabonan pa
gani sa
baga kaayong gapnod
sa kaadlawon

gisusi ko ang akong gibati
sa dihang nasulti ko ang matood
bahin kanako

nahimo ba akong tamsi?
milupad ba ako sa kahanginan
og miawit?

misalom ba ako sa dagat
gisukod ang kalalom
maayo ba ang akong ginhawa
sama sa isda nga adunay
hasang?

gitagaan ko ug saktong panahon
ang akong hunahuna
gipangutana ko ang akong kasingkasing
kon nakaplagan na ba ang
gipangita nga kalipay

nahigmata ako sa ka katulugon
nanamin ko og dali-dali
human gihugasan nako ang akong
nawong sa tubig ug sabon

salamat
ako lang gihapon kini
ako lang gayod gihapon
abi kog
lain na kining nakigkuyog
kanako
abi kog
sa pagsulti sa tinood
sayon na lang dayon ang
pagkig-ila-ila sa
sama kanako

inig abot sa kabuntagon
diha sa atong pagpamahaw
hisgotan ko ang
kabahin sa atong iro nga
wala na gayod
mahibalik sa atong
pinuy-anan

diha sa pagkatkat og pagtugbong

ang pagkatkat sa bungtod
mao kanunay ang gilabayan ta
sa tanang
pagbagotbot

mopahulay kadyot dayog
bungat nianang pungpong
nga pagbasol
nganong mikuyog pa man
nga unta
didto sa patag atua man ang
kanunayng kaharuhay

wala kay mahimo
molakat ka na usab
mobaktas sa halayo
hangtod nga kitang tanan
moabot ug
walay bisag usa nga
kulang


sa ibabaw sa bungtod
gipupo ta ang mga hinog nga bayabas
ang uban sa katam-is og kahumot
wala na nato maantos
atong giingkit, dayon gisubad

sumala sa balaod sa panahon
mobalik kita sa atong giagian
karon mas hilom na
karon mas sayon na
dinhi niining pagtugbong
aron mahimamat na usab
ang wala nato kaayo mailhi
nga mga kaugalingon

patas lang ang tanan

ang mga kabungtoran
adunaysay ilang mga anino
naghatag og landong sa pihing
nga patag
sama sab sa mga panganod
kansang mga anino
nagpahipi sa walang bahin
ning kakahoyan

unya dapit inig palong sa
kahayag
mangawala silang tanan

abi mog wala ka nay maabtan
dinhing dapita gawas lamang
sa tumang kangitngit og sa mga
nangahilom na usab nga mga
kilok-kilok ug mga manatad

ang mga kanding nahikatulog na
ang kabaw miundang na ug usap sa
sagbot nga iyang gitagoan sa iyang
dakong apapangig

sa hinay hinay usab mibuswak sa
langit ang daghang mga bitoon
walay kisaw sama sa mga isda
sa kadagatan sa ilalom sa midan-ag
nga bulan

patas ang kalibotan
kay kon sa adlaw mamuswak ang
buwak sa tumang kahayag
sa kagabhion usab mogilak ang
mga bitoon diha sa lawod nga kangitngit

sa hingpit nga pagtubag

sa hingpit nga pagtubag

naghimo ko og tigmo

ug ang bata nga gatininuod 

og pamati wala katulog 

pila na kagabii

wala pa maanad 

sa akong kalaki apan 

duna koy punto 

samtang sayo pa ang bata 

kinahanglag makahibalo 

nga dunay mga tigmo 

nga mosumpay ra 

sa mga pangutana

nga tingali sayon ra 

mahibal-an kon huwaton

hangtod sa kamatayon