seesaw

wad-on ko ang mga lama
sa kabalaka og kahadlok
pinaagi ning
mga inadlaw kong
mga balak
alang kini kanimo nga
nabalaka og nahadlok
usab alang
kanako

kay sa tinood ang kanibuhi
timbang-timbang lang kana
sama sa usa ka seesaw

diha ka sa pikas og ako
usab diri sa pikas
morag suba sa ilang
tagsa-tagsa ka mga tampi
magtimbang-timbang ta
sa atong mga kabalaka og
kahadlok
apil na anang mga gugma
og kasilag
kamingaw og mga hudyaka

pahiyom ta panalagsa
mobahakhak sab og katawa
samtang magsiso tang duha

pero ayaw lang og palabi
nianang imong pagkakumpyansa
kay samtang naa ka tupad
sa usa ka habog nga panganod
basin unya og ako nga dia
diri sa kinaubsan nga yuta
mokalit lang unya og
ambak dayog
pahawa!

pagkaswerte sa habol

pagkaigang
ba sa dughan sa
panahon karon
nangahulog ang mga lusok
sa singot
ngadto sa duha ka
atngal

pagkatsansing
sa mga kamot sa kahayag nga
mihapuhap
sa iyang bus-ok og puti nga sampot

hapit makapanakla
ang
baba sa kisame nga
nagpistag lantaw
sa dihang
mitihaya na siya
sa iyang atubangan

usahay gusto sab ko anang kaguol

tawga kog
hilo apan usahay
ganahan sab
kong maguol

kay
walay binuang bay
tru ni
kasulay na man kaha
ka anang
kalami sa bation kon
kita magul-an?

ayaw palabi nianang imong mga kaguol

kay ang mga yamog
bugnaw unya
lumalabay lamang


palihog
ayaw lang hikapa
kay sa pagbuhat mo sa ingon
mawala ang
iyang pagkaperlas

PAGPANGITA SA PAGBATI

GISULAYAN ka nako
pinaagi sa pagtutok sa usa ka larawan
kining larawan
sa usa ka hubo nga lawas
nga nagtiad
sa daplin sa baybayon

gisulayan ko paglitok ang mga pulong
nga siya adunay duha ka totoy
adunay bolbol sa ulohan
sa iyang pagkababaye

ang iyang pusod mao ang bulan
sa bugnaw nga kagabhion diin siya
nag-inosara na lang
sa paghandom sa nawala kaniya
ang halok sa adlaw
ang mga bukton sa kaadlawon
ang mga ngabil og ang mga bungot
og mga kubal nga modap-ig
sa iyang panit

unsaon mo ba pagtukib ang kauhaw
og kagutom sa taliwala sa nag-awas nga
tubig
sa nagtubod nga tunggo
sa lamesa nga puno sa mga prutas
og mga pagkaon?

tutuki siya pag-ayo ayaw pagpamilok
unsa ba ang imong gibati? anaa ba ang
kalooy sa usa ka kanding?
anaa ba ang pagtabisay sa laway sa usa
ka iro sa panahon sa hulaw?
anaa ba ang pagtikig sa imong mga tudlo?
unsa ba ang kaulag sa usa ka iro nga gidugo?
sa kabayo nga nagpautog sa laing kabayo?
sa kabaw nga misyagit kay gilatos sa
pisi sa iyang amo?

pamatia ang pulso sa imong dughan
paspas ba? dangag ba?
tinood ba? hinay ba? nakulbaan ka ba?
nadawat mo na ba ang tingog sa konsyensa?
ayaw ako sultihi
kay basin og hukman ko ikaw
dili ako mangilabot
sa imong buhaton
unya sa mga tungaw nga mipasilong
sa mga kunot sa imong
utok.

ANG AKONG KINUMO

gahi nga kinumo nga
gilingin sa
ngotngot nga kasakit
usahay moabre
aron mahimong
mga tudlo nga
mohawid sa akong
kasingkasing
og mobalik na usab
pagsirado aron mahimong
usa ka
pakigbisog sa laing
adlaw nga
umaabot
nga ngotngot
laylay sakit og
hapdos.

kanang babaye nga nagtagad og sikad-sikad sa quezon street

pagkamahal gayod
sa iyang pahiyom,
sa mga nangayo,
wala gayod kini niya
ihatag,
sa driver sa sikad-sikad
nga milabay
nga wala sab niya gitawag
(Kay gimaotan dagway
sa iyang nawong nga
morag pan de mongo
nga napidyat)

usahay, ako nga nagtan-aw
nakaingon nga
basin og

prejudgmental ra pod
kita (0g ako)
kaayo,

init baya pod gyod
kaayo ang
adlaw ning
alas dose sa
kaudtohon

pati gani ang
mga commercial buildings
dinhi
morag gakulismaot ang
mga nawong
agi sa
tumang kauhaw og
kagutom

kabahin niaanang paggamit sa nawong sa ubang tawo

ang usa
nanghulam lamang sa mata ni Obama
mas kurat ang usa
migamit sa lips ni Oprah
ako sad
(ambot kon matawag ba kini nga kabuang)
migamit sa nawong ni
Alan Ginsberg, karyot lang, mga usa o lima
ka adlaw lang,
dayon mibalhin sa tiil sa usa ka ballerina
kay mora bag lami paminayon
nga mikinto ko,
sa dugay morag gikapoy na pod ko
migamit sa nawong sa akong
bugtong nga asawa,

trip lang, apan usahay gipangutana ko
si A., nganong ang iyang nawong
gihimo na lang niyang
tibook aping,
wala'y klarong tubag, seguro sama
kanako
trip lang usab,

pero kon di lang gyod unta offensive
sa traditional sobriety
o decency sa uban gusto nakong
ipakita ang akong hubo nga lawas
sama sa akong hubo nga
hunahuna
apan wala nako kana buhata kay basin
malabayan ko'g botelya sa beer
sa akong
behind, mabun-og unya ang akong
sampot nga
itom pa's anoos,

daghan pa kog pangutana
sa akong kaugalingon,
apan wala'y bisan usang parte ang
gustong motubag niini,

amang na man god ang akong ngabil,
buta na pod ang akong mga mata
(mahimong nagpabutabuta)
piang ang akong tiil
hubag ang akong ilok
og samdan na man god
ang akong kasingkasing.

ang karaang balay sa tacloban

daghang sugilanon
ang wala pa nimo madungog
ning balaya

dili ko kini isugid kanimo
kay mas maayo pa nga ikaw
dili na lang mahibalo

anaa ang mga anay
nga motagod tagod sa kataposang
gabok nga bongbong
apan bisan pa sa tanang
katuigan

ang mga sugilanon
magpabilin lang gihapon
karong gabii kon
matulog ka man ugaling
didto sa lawak sa
panghitabo
pamatia ang tingog sa
pultahan nga
hapakon unya sa hangin

ang duha ka tigulang nga wax

naghinunghungan ang
duha ka wax nga tigulang
dili gustong madungog ang
ilang nabantayan sa mga
tawong namantay usab
kanila,
dili katoo ang usa ka babayeng
nagtalikod
nakahawid kalit sa iyang baba
ang usa ka babaye sa
atubangan
nakahawid sa iyang kamot
morag nakaamgo
nga puhon
mao usa'y iyang dangatan

ang pina sa anino

sa laing bahin usab
ang samin nga anino
mao baya usab ang usa ka
abiso sa kamatooran
nga dili makita diha
sa kamatooran.

paglantaw balik, pagpanamin sa balak ni Candice

gilantaw ko balik ang
pato nga panganod
nga nanamin sa lim-aw

oy! sakto ka!
bali tuod, og duda
sab ko, sama sa
pagduda mo,

gani gisuta ko,
dili gyod tinuod,
bakak, bali.

masabtan ko ang imong
pangyam-id
sayod ako sa imong
gipangandoy

mamahimong ihatag ko
kini
tumanon ang imong mga
damgo
apan dili ko lang gayod
gusto

pabanhawon ang mga patay
lakaw sa ibabaw sa tubig
padaghanon ang mga isda og pan
og ang bino didto sa kumbiti
sa usa ka kasal

dili ako Diyos
salamat na lang.

kamatayon sa usa ka lalaki

gituhog niya og dungan
ang duha ka magsoon
sa usa ka higayon

nanimaho ang dakong
sala sa balay
miabot na unta ang kabaho
didto sa simbahan
apan ngakasabot
sila diha
sa pagtago

sa dihang gikuhaan siya
sa ginhawa
mohilak ang managsoon
ang mga iyaan og ang
mga asawa

ang akong silingan
adunay bangs
nga mao kuno'y iyang
pakamatyan kon
imong gubuton

bisan og maglinog og
magbagyo
mahugno man ang
balay o
mabali ang tulay
pirmi gyo'y hapsay
ang bangs sa iyang
agtang

alang kaniya ang
kalibotan bangs
ang kawanangan bangs
ang ginoo bangs
ang kinabuhi usa ka
dakong pag-amoma
nianang bangs

ikamatay niya ang
iya unyang pagka-upaw
og kinsa kadtong magputol
sa iyang bangs
andam siyang mamatay
og magpakamatay
tungod lang gayod sa iyang
bangs

wala siya magsundalo kay
maputol man jud ang iyang bangs
wala sab siya magpari
dili sab siya magmaestro
kay strikto ang policy anang bangs

nagpolitiko ang loko
midaog, ug ang konseho
ang kongreso
mipasa og balaod kabahin
sa freedom of the bangs.

bangs tirada! mao kana siya.

ako og ikaw

ang akong ganahang lantawon
dili mo maantos
mokagot ang imong ngipon
samtang nagtulo ang akong laway
og mibawog ang akong dila
morag iro ko nga naghalhal

samtang gibati nako nga
nahalangit ko sa tumang kalipay
gipanghimaraot mo ang tanan
sa akong palibot nga imong
gidanggaan og impyerno

ning kinabuhi ta
lain-lain ang atong mga pangagpas
ang tambal nga nakapaayo kanako
ambot, mao man hinoo'y makapatay nimo

pagkintokinto

diha sa ilang balay
nagkintokinto ka
kanunay anaa ang
kahadlok nga basin
dili ka nila
magustohan,

pagkaanindot mong
lantawon
usa ka tawong sulundon
dalaygon

apan sayod baya ako
nga ikaw wala gayod
malipay

sa imong hangyo dalhon
ko ikaw sa usa ka lugar
mamuak kita og daghang
mga baso
tadtaron ta ang mga plato
lubalubaon nato ang
mga habol
lumpingon ang mga kaldero
tun-an ka nako unsaon
pag-ihaw og baboy
gamit ang imong mga kamot
og tiil og ngipon
dili ka mokinto dinhi
dili ka maghilomhilom
wala'y tahi ang imong mga ngabil
walay puthaw nga tabon ang
imong dughan

'Yab

unta mahisama ka
sa hangin
alang kanako
ikaw nga wala nako
makita
apan
mahinungdanon

unta mas nindot
nga ikaw
dili na lang
magpaila sa
kadaghanan

mas nindot kon ikaw
akong mahalon
isip wail.

sama sa sakayan
sa dagat
naglawig ang akong
hunahuna

sa pantalan ugma
magtagbo ang
kadaogan

haiku

.
ning kabuntagon
bakak ang panganod nga
bali sa lim-aw

.

ang daro, ang mga baka, ang mag-uuma

lantawa ang hulagway sa imong amahan
nagsugod pa siya og daro sa kaadlawon
hangtod na kana sa kahaponon
mopahulay lang gamay sa udto
inom og tubig, kumot sa kan-on
kunis-kunis sa sinugbang balarete

dayon daro na usab
kagis sa yuta nga gahi nga
nagsalig lamang sa pagbisita
sa gasa nga ulan,

kinsa ba ang miasenso diha sa daro og mga baka
og mga humay?
wala, kutob ka lang sa pagkabuhi
nga usahay dili gani motunhay
kay sa gamay nga paghapak sa
kalisod labi na og dunay masakit
malubong ka naman dayon sa
lawod nga utang,

og busa sakto ka nga magpakaaron-ingnon
nga gihigugma mo ang daro og ang mga baka
nga imong idolo ang usa ka mag-uuma
nga ang umahan sagrado
nga ang mga humay mao ang tinood nga
sukdanan sa kalamposan,

milakaw ka sa layo kaayon syudad
og nagpaletrato ka sa ilalom sa ulan nga
snow, baga kaayo ang imong jacket
og nagpahiyom ka kuyog nianang
imong dedication nga " i miss you all"
with matching P.S. "there is no place like America!"

si Dadong wala na ganahi nga
magrasa sa daro nga wala na gamita
gipasagdan nga kan-on kini sa taya
giprenda na ang basakan og gibaligya
na ang mga baka
mipalit og bag-ong karsones, sapatos og
polo shirt
namutos padulong sa iyang bag-ong
damgo

ang Manila, ang Dubai, ang America!

diha sa lawak ni Reymar samtang nanigarilyo

tan-aw sa TV
pipila ka oras sa kasibot
sa football
samtang ang iyang
bag-ng puya natulog
sa kuna

wala na madungog
ang gamay nga
gininhawa

alang kang Camilo

pahilipayan kita sa imong
miaging hukom sa pagbiya
sa karaan na kaayo nga
kalihokan nga naghatag
sa pipila ka kamatayon sa
atong mga kauban sa buhat
sa pipila ka mga pagbakho
sa mga biyuda og sa pagkawala
sa paglaom sa pipila usab ka
mga anak,

dili nako madawat ang usa ka
hulagway sa usa ka tigulang nga
nagdala pa gihapon niaang nga
plakard sa mga protesta,

seguro kon nagpadayon kita
makalolooy gayod dagway kaayo
ang atong mga nawong,
mga tuhod nga nagkurog
mga tingog nga hupas
mga mata nga hanap na
og panglantaw
mga ugat nga andam nga
nga mobuto
mga kasingkasing nga
dili na madungog ang mga
batil og punaw

sa hardin sa mga bulak
usa ako ka gamay nga tawo
nga nahisama sa ulod
ang akong hunahuna
nagpunay og punting diha
sa mga dahon

ikaw nga nasayod sa akong
dangatan ugma
wala magpahimangno kanako
nga ako diay
mahimong usa ka nindot
kaayong alibangbang

ohara

sa imong kunot nga agtang
og napiko nga kilay
diha sa lamog nga kabalaka
gipangutana mo ako
kon sulaton ko ba ang tanan
nga kamatooran kabahin
sa akong kalibotan nga gipuy-an
o sa mubo og pranka
nga pagkasulti ang
kabahin kanako,

hagbay ra, hagbay ra
apan sila nga wala'y mga tiil
wala makatugkad niini
nahisama sila sa usa ka
nagsakay sa gakit
nga mubo ang mga tungkod
nga kawayan
sa lalom kaayo nga suba

sa laing bahin, ikaw Ohara ang
akong gibasa, gisulayan pagtugkad
wala matugkad, igo ko lang
nahikap ang hangin og ang ibabaw
sa tubig og dayon nako'g padayon
niining paglutaw sama sa usa ka
ka tulo sa lana diha sa usa ka
palanggana nga tubig.

Bung-aw

.

naabtan sa talisalop
kining pagpanaw nga
nawad-an sa tumong
sama sa tubig nga mibuhagay
agi sa haw-ang
mong kasingkasing

.

puti ang akong sanina
didto ako sa tunga sa kamaisan
sa unahan nakita ko ang
among dakong balay nga
hayag kaayo ang mga bongbong
ang mga kalanggaman sa
usa ka banagbanag
nagpasaringsaring sa usa ka
bangaw diha sa nagdilaab
nga kalayo sa kawanangan

wala ako magdali
gibati ko ang kahadlok
nga unya sa pag-abot didto
ang akong makita mao
ang ang akong naagiw
na nga kagahapon

paglutaw diha sa bula

nabatian ko na ang
paghawid sa imong kamot
sa akong kamot
nabatian ko nga tupad kitang
duha sa akong panaw
nabatian ko na nga dunay
nagsunod kanako
nga duan usab ako'y gisundan
nga usa ka dako kaayong langgam
sa unahan
nabatian ko na ang paglutaw
sa ibabaw sa kalibotan
ubos kanako ang mga lunhaw
nga sagbot og sa ibabaw
ang asul kaayo nga mga panganod
nabatian ko na ang paglingi diha
sa kilid
ang paglantaw sa ubos nga mora
ako og suyupon sa yuta
ang wala ko pa mabatii mao
ang pag-abot sa
atong paingnan
mao kini ang gusto ko nga
mabati

ang pagpaabot, ang dugay kaayo
nga pagpaabot

ang bag-ong natawo nga bata
gilantaw sa ginikanan
nagmug-ot kini
wala makauyon
sa nahitabo kaniya

kon duna lang unta siya'y mahimo
sa iyang kahimtang

pag-asoy sa nahitabo diha sa damgo

ang kamot sa pagbati
mihawid sa payong nga itom
milutaw sa hangin
padulong sa bulan
sa ibabaw sa mga anino
sa mga kahoy og sa mga balay
miapas ang bola nga pula

OM

http://www.youtube.com/watch?v=r364h19dXio&feature=related

ang iring namati sa langgam
nagpailob sa iyang mga pulong
daghang balita ang
wala na niya masala
walay puas ang tutok
sa iyang gisaknit nga
pamahaw

nagpahipi ang tiki
sa kilid sa labat
sa iyang nakitang pagluib

ugma sultihan niya
ang mga panganod

ang hawla dako
kumpleto kini sa tubig
og pagkaon

ang langgam
nahimong babaye
gibaylo ang iyang
mga pako
sa bag-ong
kagawasan

latay sa gamay
kaayo nga sanga
gitagbo niya
ang miabot nga
banag-banag

ning gamay nga
sakayan sa damgo
lingawon ako
sa kagabhion

subay sa kawanangan
makigsandurot
ang mga bitoon

gamay nga layag lang
og walay timon
subayon ang agianan
paingon sa kalipay

babayeng kusog manigarilyo

babayeng kusog manigarilyo

dili lang gatas
ang gihatag
sa usa ka inahan
nga kusog manigarilyo
sa iyang
anak nga
gipatutoy.....

dili hingpit

dili hingpit

kay ang imong
gihagkan mao lamang
ang akong ngabil

wala nimo giapil
apg-angkon
ang akong lawas
og kalag

dili ko usab
kana
itugot kay giangkon
og gipanag-iya na
kana
niya

magnifikasyon

magnifikasyon

mao kini ang pag-abot
sa akong binhi
diha sa imong
itlog,

sa usa ka halok
nahimo ang
milagro sa
kinabuhi

natawo ang
kamagwangan

pagpanigarilyo

pagpanigarilyo

sa kataposan
nimong bulhot
nianang usa
ka sigarilyo
wala kay mahimo
sa pagloyloy
sa imong
pikoy.

masokista

masokista

nagkahibat-hibat intawon
ang akong antipara
sa dihang
gitangtang nimo ang
kataposang
tabing sa imong
kalawasan

luyaha ako
bun-uga ako
sa tumang
kalipay

ang viuda

gibisitahan namo ang bag-ong viuda
og sa pagtagbo
nagbesobeso

kalit nga mitulo ang luha
sa mga matang lalom
dagayday sa aping nga
nangliki

"wala gayod makahulip
sa akong bana! dili ko siya
makalimtan!" mibakho ang
viuda

gidamgo sa akong asawa nga
ang iyang bana mibisita
sa balay og sanag kaayo ang
panagway
malipayon og nagtugon nga
dili na lang pahibaloon
ang asawa nga
nagbangotan

sa kataposan
mopauli na usab kami sa
among gigikanan
mihatag ang viuda sa
iyang kinuripot nga
katawa
usa ka pahiyom nga
nagtahod sa
kagahapon.

tabula rasa

sugod ka sa
wa jamo

mao kana ang
tabula rasa

walay sulat
walay patik

wala gani
sulod ang imong
mga damgo

kon mohagok
ka kuno

GIKAN KUNO KITA SA USA KA ISDA

ANG tapay naghandom
nga mahimong mga tiil
og busa nahimong tiil

nahimo ang ulo
og ang ikog

nawala ang ikog sa
likod
mibalhin sa
atubangan

apan kay
manggiulawon na man lagi

gitabonan gitagoan
ang iyang bag-ong
kinaadman

damgo

nasayod ka ba
damgo ko nga nagawsan sab
ko samtang
gadamgo nimo nga ikaw
usab nagawsan
kaupat kalima samtang
gadamgo usab nako?
nakalimot ka
nakalimot sab ko
nahinumduman ko lang
sa dihang
nakita ka nakong migawas
sa banyo humag kaligo
humot og walay
sapot
ang tapis sa imong hunahuna
hagbay mo rang
gilabay sa gawas
ning balayan sa lawas

nganong imon giunya-unya ang gugma?

ganiha nanguhit siya
gahapon nangamay na kini siya
ang gugma
nga dili kamaong mamakak
hagbay ra

sama sa pagsunod sa kabaw
sa sugo sa iyang amo
gibitad ang daro
giantos ang kainit sa adlaw
og ang mga bunal
ang pagkaalingogngog sa
mga isog
dinhing dapita

nangamay ang gugma
nanitsit
nagpabenta
gihangyo ka nga biyaan
ang tanan
nga supak na sa imong
kabubut-on

apan, gahi ka og ulo
tig-a ka
bato ka

putol na ang imong duggan og dila
nabutaan ang imong mga mata
mao usab kini
ang gugma
sa pikas tampi sa pagsabot

mainantoson
tapot lang gihapon anang
paglaom

ang mga maya

nangabot ang baga nga maya
sa ibabaw sa akong ulo
ang kasanag sa bulan
niadtong gabhiona
natabonan sa daghang mga
anino

miabot na ang mga maya
sa kabukiran
aron mamahulay
sa ibabaw sa ulo sa usa
ka tawo

gikoronahan siya sa mga anino
nawala siya
sa tumang kangitngit

wala masayri kon asa na siya
ang nagpabilin nga kahilom
kabalo ka na
dili gayod magsaba
sa iyang nahibaw-an

kon mosakay man lang kita sa baroto sa kalipay

dali na
sakay na
ning baroto sa kalipay
salig kita
sa iyang mga katig
og sa iyang
lig-on og bag-o
nga makina

dali na
sakay na ta
sa akong barko sa kalipay

diha ka
diri ko
balanse lang
ayaw og palabi og lihok

sa kanindot sa atong makita
og atong adtoan
bahala na og maguba ang
bangs

hulmigas

dili na kasaka ang
hulmigas sa lubi
dili na katangag og
momho sa
kan-on
dili na kahalok sa iyang
mga kahulmigas

patay na.

ang mga kahoy nga walay dahon

adunay mga kahoy nga walay dahon
mas swerte pa gihapon
kaysa kahoy nga wala nay mga sanga,
adunay kahoy nga baga kaayo
ang dahon
apan walay bulak
walay bunga

usahay mora kog bata nga mihangyo
hawid sa iyang punoan
nga unta mamunga kini
walay tubag
siyempre

gitutukan ko ang kahoy
nindot
pagkaanindot sa kahoy
nga walay mga dahon

pagkaanindot lang gihapon
sa mga kahoy
nga wala na gani sanga

lig-on
dili angayan nga putlon
masayangan ang hait nga
atsa.

ang iyang mga namatikdan

lalom ang iyang mga
mata
morag mga itom nga
dapit sa dagat
sa Bitoon

gubot ang kilay
morag gubat sa
mga sundalo og
mga rebelde didto
sa kabukiran sa
Valencia

iyang gisulat nga
dili angayan
kining tawhana
sa opisina

ang wala lang niya
masayri kay kulang
ang iyang mga
pangutana nga kini siya

kusog mobasa ni
Chardin

kon sakto lang unta ang
iyang mga pangutana
sama kalalom sa iyang
mga mata

lahi unta ang iyang
masabtan

ang pagkasipyat ni Nancy

unang rason
nakalimot kuno silang duha
ni Paul

ikaduhang rason
dili nila option ang
abortion

ikatulong rason
nagkahinigugmaay gyod
kuno sila

ikaupat
si Paul sipat

ikalima
si Nancy pod
Igat

ikaunom
lax ra pod kaayo si Lola

ikapito
nakalimot si Paul sa
condom

ikawalo
si Nanay tuas Hongkong

ikasiyam
si Tatay tua's Dubai

ikanapulo
mao'y palad.