bitoon sa kabuntagon

ning sayong
kabuntagon human sa
pagtuktugaok sa 
puting sunoy sa nataran
sa sanga sa 
karaang punoan sa
mangga
sa pag-abri nako sa
bentana nga 
nag-atubang sa 
baybayon
akong nakita ang
usa ka bitoon 
nga morag nagmingaw
sa abohon nga
langit

natandog ko sa
iyang pag-inosara
samtang nagpunay
kinig
kinang nga morag
akong kasingkasing
nga
morag nagbatil og
sekwati sa
kolon

pagkaanindot sa
bitoon
pagkakusog sa iyang
dating
pagkalanog sa iyang
kahilom
diha sa dakong wanang
sa kapanganoran
nga mora ba nga og
kining tanan
kanato sama sa iyang
nahimutangan
mga walay 
utlanan

sa gawas sa balay

pagawas ko sa balay
nausab na  ang plastada
sa naandan
unta, pananglitan ang
unta naa sa tunga nga
lamesang puthaw
atua naman sa kilid sa
punoan sa manga mipasilong
nga unta diha man ang
landinganan sa kahayag sa
kabuntagon unya ang iyang
mga alalay nga  lingkoranan nga
sa naandan gayod upat
man kabook
nahimo naman hinoong tulo
maong nakapangutana ko kon
asa naman ang
usa?

kasagaran kon mangahulog ang
dahon sa ylang-ylang dinhing 
dapita
dili gayod nako maantos ang
akong naandan sa pagpanilhig
dayog hipos sa mga dahon
og labay niini didto sa 
gawas
apan karon nga dayag na kaayo
ang pag-usob-usob
nga sa tinood lang wala gayod
nako naangayi unya wala sab akoy
mahimo niini
nan
nakahukom ako nga ang tanan
ako na lang
pasagdan

abi mog ikaw lang?
makamao sab kong 
magpasagad
makamao sab kong
magpaalayon sa sulog sa
panahon

sa laing bahin
nindot ang mga nagpasad
ang mga wala sa ilang lugar
ang mga mitago og mipasilong
sa bisan asang
kalandong

kadtong mga dahon nga
nag-upong upong kadtong mga
nangawala sa atong
panan-aw
nakapahimo natong
gawasnon

sama kanato sama sa mga dahon
nindot ang bation sa pagkalata
sama sa nawala nga lingkoranan
lami sab ang kahingangha kon asa
kini makit-an og kon kanus-a....

ang atong sabot

walay usbon
sa tong panagkuyog
walay bisan usa
nga ibalhin
sa atong panagpuyo
walay but-anay
kon asa itanom ang
halok
ibugsok ang mohon
sa asang
utlanan

gikasabotan nato
ang kagawasan
iyahay og pangita
usab
sa kaluwasan

sagbot

kon ang tanang
sagbot imong
pamutlan dayon
inig kalaya
imong sunugon

unsaon na lang
pagkabuhi ang mga
kanding?

hustisya

pun-on ang taksanan
pun-on pag-ayo 
nindot lantawon ang
pag-awas

sa dihang imong
gikalis
imong gipasabot nga
sa hustisya
walay sobra 
walay  kulang

walay labot ang
mangausik
ang naa sa sulod
maoy igong
tubag

kagawasan

sa dihang nahurot
na ang bilib nako nimo
sa dihang
nawala na ang gana
sa tikarol sa
haloan
sa dihang wala na
kinahanglana ang
pultahan o
labat sa dihang dili
na angayan
hisgotan ang tuko
sa dingding nga
nagsigig panukob
sa mga ok-ok
og lamok
sa dihang bisag unsang
bikil ang imong
gihimo
dili na ko
madutlan

panagbungol sa mga nagmahal sa mga patay nga ginikanan

giduaw ko ang lubong sa akong
inahan
og amahan

anaa pa gihapon didto ang
dakong buwak nga pula nga rosa

unya ang mga nahibilin nga hilis
sa kandila wala pa malugit sa mga
sipat nga bata sa 
menteryong karaan diin
maoy ilang gilubngan

wala pa malaya ang maong buwak
nga akong gituparan sa ako usang dalang
buwak nga african daisies

gidagkotan ko ang akong napulo ka
kandila
dayon nakog pangadye sa akong
natun-an kaniadto nga buhi pa si mama
samtang si papa
naghulip sa mga banig og buyot nga
gikan-an sa mga
balagtok

abi kog ako lang ang nasaag dinhing
dapita
makalibog nganong ang african daisies
og ang dakong buwak nga pula nga rosa
dil man mag-abot
nga mao ra mang dagkota usab kana
sa mga kandila

diha sa pagpislango sa kinabuhi

karong gabhiona
nagpislango ko 

gusto unta nako nga matulog
aron makapahulay dayon malig-on ang
akong lawas

apan lagi nagpislango ko
karong gabhiona unya bisan unsaon nakog
piyong ang akong mga mata
anaa ang akong ilong nga dili kaginhawa
unya wala ako naanad nianang
paginhawa ginamit ang
pag-abre sa akong baba

sa mga dili naandan bisan
sulayan sa pagbuhat aron lang unta
mabuhi
anaa magpabilin ang kakulang
nga mora bag bisan unsaon nimog
inom og tubig
bisan gani og mibusdik na ang imong tiyang
sa kabusog
magpabilin pa man gihapon ang
kahaw-ang
ang pagbati nga naa pa gayod
gihapoy kulang

alang sa akong kaila nga nangutana kon unsa ang kinabuhi

hawirig
sulay ang kalayo nga gikan
sa gisunog nga mga papel
ang tubig nga nag-agas sa gripo
ang balas nga imong gipunit gikan
sa baybayon nga imong gilingkoran
ang abog nga gikan sa karsadang giagian sa
kusog kaayong Ceres didto's 
Tungawan
ang hangin nga akong
gininhawa

ingna ko dayon
kon dili
ba ako sakto
sa akong mga 
pahimangno
kanimo

sa mga kuripot, sa mga tapolan, og sa mga dangag

sa dihang
miabot ka dala ang
kumpay
patay na ang kabayo

ang mga lampin
nga imong gitigom
wala magamit

ang kwarta nga
imong gihipos nga
pagkadaghan ra ba
wa gyod nimo
madala

swerte ang lungon
nga kanimo
nakaangkon


ambot kang tawhana
ka ang empaynada nga naa sud
sa imong palad
nahimo mang bato
nga lapad

walay buot ipasabot

sa dihang nagkita ta
pag-usab
daghan akog gipanulti 
kanimo nga
wala sa akong bout

sama sa adlaw
sa matag-adlaw 
wala na kaayoy
bili ang matag
pulong og pasalig
unta gisayran mo
na kon unsa ako og
kon asa ako karon
og asa ako padulong

managlahi na ang
atong mga kalibotan
unya ang akong
panglantaw kanimo
nahisama na lamang
sa namaligya og 
bingka sa silong sa
bus sa kilid sa bentana
nga inig larga na niini
mawala na usab
ang tanan
gani mahimo pa mang
mahikalimtan ang
bayad og ang sukli
kon duna man ugaling

pasayloa apan
ingon ana lang gayod
ang lakaw sa kinabuhi
kanunay nga
nag-impaki sa mga
sapot og galamiton
aron mobalhin na
usab sa laing lugar
sa laing hugna sa
pagpanginabuhi
nga bisan og dili
madala ang tanan
dili na man usab
kini balikan

kon unsa man ugaling
ang akong nasulti og
nasugid kanimo
ipakisama na lamang
nga ako hubog niadto
unya ikaw mao
ang serbedora sa
tanduay tupad sa
bas-oy nga baka
og barbekyung
baboy.

kon giunsa pagpatay sa kahayag ang mga pagabati

kon sa imong
pagawas sa balay
anaa pa gihapon ang
kangitngit
nan mas mabati mo
ang kabugnaw
mas madungog mo
ang hunghong sa hangin
apil na gani ang
mga tunob sa 
aliwang nga mikatkat
gikan sa yuta paingon
sa mga dahon sa
kamanggahan

ingon ana ang mahitabo
kon wala pa 
maningil ang kahayag
sa iyang gihatag kanimo
sa pipila na ka kabuntagon
sa imong kinabuhi

ang kahayag
adunay daghang nga ipakita
kanimo
sa katuyoan nga wala kayo
namatikdan
nga kon imong hinuktokan
pag-ayo
iyang gitago ang imong
mga pagbati aron
malingla ka
sa iyang mga dayag
nga ipakita

pananglitan sa dihang
nakita mo na ang
mga gumamela nga pula
kaayo
mahimong mahikalimtan
mo ang kabugnaw
mahimong dili mo na
mabati ang kainit
gani mawala na usab ang
imong
gahom sa pagpanagna
og sa pagpanimhot

kay ang mga dayag usahay
makapahimo nimong
kumpyansa sa umaabot nga
katalagman
nga dili mo masulbad pinaagi
sa paglantaw lamang.

siya og siya lamang ang naghatag og kalinaw sa atong katilingban

samtang nagsulat
ang maalamon gipatukar
sa tunga-tunga sa
lawak
ang musika
nga giawit sa mga harem
sa hari nga
walay ugam

ang iyang gisulat nga
nagustuhan kaayo sa kadaghanan
sa iyang mamasahay mao
ang kabahin sa duha ka
managrato nga nangaminyo
nanganak og lima ka buok
unya bisan pa sa mga unos sa ilang
kinabuhi nagpadayon gihapon
sila sa ilang pagkamatinud-anon
sa ilang giampingan
nga kaminyoon

kadtong balak kabahin sa 
langgam nga abtik pas manatad
nga gibuhian sa tigulang gikan
sa hawla nga bulawan
wala kaayo
nila giambat kay matud pa
sa usa ka mangkay nga siging
naukay
dili na kaayo bililhon ang
kagawasan

kadtong gigapos og nag-antos
sa balaod
sa kanunay 
pagadayegon kay siya og siya
lamang ang
naghatag og kalinaw apil na
ang kalig-on  sa atong
katilingban

magtiayon

lima na ka tuig
silang nagtalikdanay
sa usa
ka higdaanan
nga tugas
nga hinatag sa ilang
ginikanan
kaniadto sa ilang
kasal

abri ang duha ka
bentana
sa ilang lawak
matag gabii diin
ang hangin
sarang kabugnaw

res inter alios acta

kon iyang angkonon
ang pagpatay

nganong iapil ka
man? wa kay labot

kon moingon siya
nga ikaw ang
iyang kauban sa
pagpatay unya
gipakita niya ang
hulagway sa inyong
tinandayay
og nianang 
paghinawiray

pwes, naa kay labot.

res gestae

kahinumdom kang
celia nga gikan sa
manila? nga misuroy
sa merkado kay
mopalit og alimango
nga siging pangutana
kon magkano?

sa iyang pagtudlo
tudlo sa alimango
napaakan ang iyang
kumagko og sa iyang
kakurat nakasyagit

og agay! yawaa kang
alimango ka!

kon ang tawo kuno
makuratan
wala na kunoy tsans
nga ikaw bakakan

kini

arte lang
kini sama sa imong
pagsuot sa 

mubo mong
palda dayon

nimong kiay
kiay sa karsada

nadam-ag ang
naglakaw

nga kanimo
milantaw

arte lang kini
sama sa kabaga

sa lipstick sa
imong ngabil

sa kapula sa
imong aping

gwapa apan
walay sulod

kini, kini, 
kini, arte lay

gadaghan
apan walay sulod

kon nadam-ag
ka kon nabukol

ang imong
agtang, nan

pasensya, 
dangaga ka!.

ang mga anindot nga walay pulos

wala sa akong hunahuna
ang akong gisulti

ingon ana usahay ang
lakaw sa pulong

sama kini sa pagpagawas
sa mga plato apan walay

salusalo. Gipahiluna mo
ang mga baso apan wala

kay gipaabot nga mga
bisita. Naglingkod ka

sa kilid sa bentana lantaw
sa kalsada og sa mga tawong

nanglabay, sa mga sakyanan
sa mga suga nga bag-ong

gipasiga sa sayong kagabhion,
unya gikalimtan mo ang 

kandila nga imong gibutang
tunga sa lamesa

nindot ang talan-awon sa
imong paghapnig sa 

umaabot nga walay moabot
unya ako nga naglantaw nimo

sayon ra kaayo nakong 
nakat-onan kon unsa ang

kamingaw diha sa pagpaabot
ang mga anindot nga walay pulos

salamat sa imong pagbasa
wala sa akong hunahuna ang 

akong gipamulong.Mao kini
ang akong nakat-unan

sa kandila nga siging gasiga
apan walay miambat kay kadtong

nagdala niini atua man sa
gawas ang kahayag nga iyang


gihigugma.....

kabahin ni cornelia

nakuhaan
si cornelia

wa damha
nga kadtong

bata sa iyang
sabakan patay

na diay gikan
pa adtong pasko

gidalidali siya
og dala sa ospital

hapit sab siya
mismo namatay

ang iyang kaipon
morag wala lang

apan si cornelia
anaa nag-antos

sa kasakit sa iyang
duha ka totoy

sa mga gatas
nga hagbay ra

untang nagpaabot
sa batang giuhaw.

kalay-on naton

dili magpasabot
nga ang kalay-on
natong duha
madug-ol sa atong
panagkita karon

ikaw usa na ka
estranghero nga
miabot sa akong
lawak, unya ako

kadtong bata nga
dili na pakudkod
sa akong amahan
nga wa ka uli sa
pipila ka katuigan
nga abi namog 
patay na busa
wa na gani  kami
makaila.

sa sinaw mong
sapatos
nakapanamin ang
itom nga sulom

dako siya kaayong
tan-awon 
harianon tan-awon
apan ang iyang
pagkaulipon 
nagpabilin sa iyang
kaugalingon

tighakot sa
dukot
sa mga bangag
tigkutkot

miawit na si antolihaw

miawit na ang 
antolihaw
sa kabungtoran
kuyugan sa 
pabukhadbukhad
sa iyang
dughan

pagkataas sa 
tingog sa antolihaw

apan lagi kay
higala ko man
kining 
antulihaw
suod pas 
lugod

bisan sakit na sa
dalunggan
ania namati gihapon
ako ni antolihaw
ubos og
ibabaw

tungod kay lagi sila mga iro lang man

ang duha ka
irong igat
nga sa dalan
nagkayat
dili na maambat

makamao na akong
motago
dili diay diha sa likod
sa aparador
og dili ba kaha
sa ibabaw sa tokador
dili sa ilalom sa
higdaanan
o sulod ba usab sa
trangkado nga
sakyanan

kaniadto kon imo
akong makit-an
pildi dayon ko kay
imo kong
nasakpan

dula dula lang
abi nato og dili kini
nato madala sa atong
pagkadagko sa
panahon nga
kita ilhon na nila nga
tawo

kon dili man ugaling
sila motoo kanato
naa kitay tagoanan

ato silang kalimtan

kon dili kita nila ambaton
sa atong kapobrehon
sa ilang pagduda nga kita
nagpaabot lamang sa
ilang itula nga mora kitag
mga manok nga
puhon ilang
pagaihawon

ato silang biyaan

mao kini ang atong bag-ong
tagoanan
ang atong pag-ikyas
sa tumang kahiubos

ato silang pasagdan

wala gayoy pagbasol nga
mag-una
kon mahitabo na ang
mahitabo

dili ko na usab siya dawaton

mangalata ang mangalata
madugta ang mangadugta
ilubong ang ilubong
kusog modagan ang mga takna
ila na usab ang tanang gaba.