daghan siyag
mga plano

apan walay
nahitabo

daghang nahitabo
apan wala maplano

unta magkuyog
na ang duha

ang plano og
ang mahitabo

sama sa paglupad
sa langgam
diha sa miapas
nga hangin

sama sa pagminyo
diha sa simbahan

sama sa panagbulag
nga wala damha

sama sa pag-ambak
sa tulay

sama sa pagkatawa
bisag wala gitika

sama sa pakigsulti
mo sa bulan

sama sa mga susama
diha sa tanke de gyira

BAGUIO CITY

nagkita mis
Mine's view

sa dugayng
panahon nga
plano-plano
nagkatagbo

ra gayod ang
among duha ka
dalan

apiki ang
inestoryahan
first time

picture picture
suroy suroy
palit palit anang
ginagmayng
mga souvenir

mipalit siya
atong barrel
man

og everlasting
flowers

samtang ako
no comment lang

pagkahuman
nangaon mis
Good Shepherd

palit sa ube jam
og peanut brittle


apil na ang
strawberry ice cream

nindot siya
motila sa cone

lami tan-awon
makatandog

ambot morag
dunay mitindog

sa akong kasingkasing
morag yabag nga kasing

dayon nangutana siya
kon asa na dayon mi
sunod mopaingon

nangadto mis
burnham park
sakay sakay sa
patong baroto 

human nangutana
na pod siya og
asa na pod mi sunod

bugnaw na kaayo
ang Baguio
morag mikurog na ko
wa kaatraka akong
mga balahibo

asa na man pod ta
sunod?


bugnaw na jud
kaayo ang Baguio
adtong gabhiona

gasunod sunod ang
iyang pangutana sa
unsay sunod

gitubag nako ang
tanan
diha sa kabugnaw
sa Baguio

gasunod sunod sab
ang akong tubag
sa iyang pagsunod
sunod kanako

misunod ang mga sunod
hangtod mihantong
sa among mga unod
og kami nangalunod.

dali diri sa sulod

gakatol ang imong
lawas

tungod kaha sa
dapaw sa inaning
humay 
sa kilid sa balay?

dali diri sa
sulod
akong tambalan 
ang imong
katol

kaibog

ang dili angay
sahay maoy giunot-unot
sa kaibog

ingon ka
aykog tintala
babayeng anak sa 
yawa

molakaw ka
palayo apan nagpabilin
baya ang imong
talidhay

molingi kag balik
sukip ang mga pasiplat

sa iyang talinis nga
ilong
sa iyang buhok nga
pilit pas imong palad
ang kahumot

ganahan ka
apan tungod lagi sa
mga regla
mipadayon kas
pagpalayo

girosaryo nimo ang
ayg kog tentala
demonya ka
anak nga bugtong babaye
sa yawa

gipanghimakak mo na usab
ang kaanyag
ang kaanindot ang kalami

tig-a na ang imong kasingkasing
kubol na ang mga pagbati
nga kon pusilon sa kamatooran
dili na gayod madutlan

ingon ana daw ang kinabuhi
matod pas mga tak-an
aron ka magmalipayon
daghan kag atimanon nga pamatyon

balak sa akong gugmang guba

sa unsang
hitaboa nga kita
nagkaabot
aning lugara?

ngitnit
igang
tigmi
baho

ug nganong
ako nahimo mang
nakatupad nimo?

wala nako damha
kini

ang mga possibilidad
natong duha nga
layo ra kaayo sa 
akong tinai

ganahan kos baho
sa usa ka
umaabot unya ania ako

naghubo sa akong
sapot
sa akong mga kahadlok
og kaikag

bahala na puhon og moingon
ka nga wala ka ganahi

bahala na
ikaligo ko ra kini pagkahuman

nindot lantawon nga ikaw
nahikatulog

unya sa hinay hinay ako
miginhawa

aron akong ablihan pagbalik
ang pultahan

samtang ang kabaho, kangitngit
ang katigmi 

ako na gayod kining
biyaan
og  dili na nako
bitbiton ang kaigang

kalibog

ang kalibog usahay
makahagit

tiaw bay ingnon
kag
undangi

ampo na lang
biyai

pauli na
ayaw pugsa

basin modugo
o magsunggo ka?

naa pa ang
pagduha-duha

ang atras abante
hangtod nga

maligsan ka
sa panahon

malata mapidyat
 tiaw mo ba 

ang ang hagit
mapug-aw na
lang


tungod sa imong
paglangay-langay?

naalisdan
nabyaan
ug sa kalimot
nalubong

ang duha ka igat nga nanambo sa bentana nga nag-ambong sa dalan paingon sa simbahan

ang iyang atngal
nga duha ka buok
nanambo sa bentana
nga milantaw sa
mga nanglabay

dili ko maayong 
tawo makamao sab
ko unsaon pagamit
anang pulong nga
makaalinggat.

karon akong
pas-anon ang yugo sa pagpamalak

ako ang imong kabaw
nga imong pagasakyan

kon gusto ka nga moliko ko sa wala
sikad lang

kon gusto ka nga mopaspas ko pagsulat
aron dako ang akong agi
bunali lang kos imong latos nga sanga
sa bayabas

gihiktan  mo og pisi ang akong ilong
sakit kini palandongon

mabaw lang ang kalipay sa kabaw
ang imong sagbot ang imong tunaan

ang imong pagsakay, pagsikad,
diha sa pagbilangkad, kapyot

bitad, hay-ad, mao kana ang ginagmayng
kalipay sa usa ka kabaw

gipamati
nako ang awit sa
antolihaw

mora
kog naputlan
og pako

morag kaniadto
usa ako ka pak-an

di na lang gyod
nako kaayo mahinumduman

nabati ko ang paglupad
ang pagkahulog
ang kahapdos
ang kasakit

gipamati ko ang awit sa
mga antolihaw

mga panghayhay....

aduna kitay mga
tulubagon
sa gawas anaa
naglinya ang atong mga
sulbahonon

kon nagsulat man ako
tungod kana kay nangita ako
og tambal sa labad sa 
akong ulo
sa gangotnogt kong
batikolon

unta masabtan mo nga ako
wala na maglantaw pa sa mga bitoon
sa pipila ka kagabhion

wala na nako tuhoi ang pasalig
sa bulan
ang mga dayandayan sa iyang
kahayag
ako na nga gisalikway

ambot naunsa na ba ang akong
mga tinuhuan 
nganong gidudahan ko naman
ang tanan

dugay nakong gitutukan ang
imong mga mata
ang mga bentana sa imong
kalag

anaa pa kahay magsulti kanako
sa matood?
sa pipila ka tuig nadam-ag ako
sa mga pasalig
sa pulong sa buhat

mibangon man ugaling ako
apan pagkadaghan gayod sa akong
mga pangos

kagabii nagtindog kos kilid sa pultahan
sa may beranda sa balay
gihawiran ko ang rehas sa pasilyo
giduko nako ang akong ulo
gipiyong ko ang akong mga mata

nahapdosan ang yuta sa kaasgad
sa akong mga luha
nalaya ang buwak nga gihagkan
sa aninipot
ang mga wati nangamatay sa tumang
kahilom

ang akong mga damgo didto puros tinood....

abi mo
naamgohan ko
nga mas
malipayon ako
isip 
isla

sa una
wala namo
kwentaha kong
pila ka lugas
sa ulan ang
nahulog sa 
langit

ang mga adlip
sa panganod wala
namo
giihap

ang mga buhok
sa adlaw
sa among
lantaw
puros lamang
kahayag

ang sapa nga
daghang isda
wala namo gisulod
sa bubo

karon nga miabot
ka sa akong
kinabuhi
kanunay na lang kitang
nakighinabi sa
mga numero

pila na ba ang imo
og pila na ba usab ang
ako

nagpunay kitag
hunahuna
kon kinsa ang
nakaginansya
og kinsa ang
alkanse

sahay kon moingon
ka kanako nga ako
imong gihigugma
moabot kanako ang
pagduda

matinund-anon ka ba?
nganong kanunay man
kitang gapanimbang
aning sakayan
nga walay katig?

nganong anaa man
sa kilid sa atong higdaanan
ang mga taksanan
sa kasakit og kalipay?

ganiha akong giayog
hunahuna kon 
nagsubay ba ako sa saktong
dalan

kon wala ba kaha ako
masayop sa pagpili nimo
alang sa akong
kinabuhi?

ugma mosakay ako
sa akong sakayan
balikan ko ang akong
isla

mas maayo didto
kanunayng limpyo ang
akong hunahuna
unya ang akong mga damgo
puros tinood.

alang kang mikael

gipaundang mo ang
mga balod
sa dagat

ang kahuyang sa dahon
imong gitul-id

ang duyan nga giduyan
sa hangin
nahunong diha sa
pagtabyog

ikaw kini sa imong
mga pinili nga larawan
sa imong pag-inosara
sa paglakat sa 
balikog nga dalan

hangin nga wala milupad
panganod nga dili molungtad

sa imong palad anaa
ang ilang mga kapalaran
mga dalan nga nagsanga
mga pangandoy nga nagsiga
kalayong bugnaw
tubig nga nagbukal

 i

ang imong halok
karon
nakapanglimbawot sa
akong balahibo

mangayo gayod akog
pasaylo kanimo
bisan sa hunahuna lamang
diha sa pagpiyong sa
akong mga mata

aron makita ko pag-usab
ang tinood nga gugma

ii

ang matood kong
gugma
wala na diha kanimo

giunsa mo kaha siya
nganong
mipahawa naman
hagbay ra

iii

sayop usab ako sa akong
pagkausab

mihunghong ang sala kanako
nga ang akong gugma
nagpaabot na sa usa ka
tinagoan nakong dapit
sa ngitngit

iv

lig-on pa gihapon ang akong
panglantaw
gitun-an ko ang pagpamakak
ang pagsupak sa akong
kaugalingon

gisagpa ko ang akong aping
aron mahigmata ako sa akong
katulugon

v

tambal ang kasakit
makaayo ang ilimnon nga pait
sa kanunay
mapailobon ang kahilom
dili ako
maluibon.

kon wala ang gugma

ang hubo nga
lawas
kon dili kuyugan
sa gugma
o bisan lang gani
sa kaulag
sa panahon sa 
ting-init sa tingkoy

makalood maong


nagkabuang kag
lingiw
kay ang imong
nakita mao 
man ang hiwi nga
ngisi sa usa
ka siwsiw.

sukwahi

ang damgo
dili na nako
katuhoan

sukwahi ang
iyang 
gisugilon sa
akong 
katulugon

ingon siya
nagsubo si papa
sa pagkamatay
ni mama

una mang namatay
si papa
dayon misunod si
mama
human sa unom
ka bulan

ingon sab siya
haskang gugmaha
daw nako
nimo.

balak sa sayong kaadlawon

nakamata ka na usab
sa kaadlawon

2:49, lagtik ang
lagiti sa nalugti nga
hunahuna 
kagabii sa kakapoy
hoyhoy ang
abaga sa mga
pangandoy

gidala ka sa 
hinanok
wala ka masayod
kon unsang 
lugara kadto

usa lang ang imong
gibati, karon mas 
lig-on ang pamati
mas makadungog
ang dunggan
wala ka kasakay
og tigre
apan gibati mo ang
kaabtik ang kakusog
niini

wala mo sugod
maabti ang buwan
apan sayod ka sa
gibati mong
kalayo niini

nakita mo ang kahilom
sa mga bitoon
nga gisabwag sa
kangitngit diha
sa langit

kaanindot sa ilang
pagilak
sama sa imong
gibati karon

ang pagbati
dili kasaligan
apan pagkadaghan
sa iyang
gipanug-an

ang wala pa nato hisabti

mao kini ang pagsulat
hubaron daw ang gitago pinaagi
sa mga
dayag nga sa usa ka mibasa
nasabtan sumala usab sa
iyang naagian nga
dalan

batoon, duha ka kapilian
abog og lapok
hagip-ot og makapangos

mao kini ang pagkabanhaw
sa mga patay nga dili mamatay
sa mga dugo nga unta mahimong
bino alang kanatong tanan

wala nako gisaad nga ang
bato mahimong pan
nga ang kamatayon mahimong
kinabuhi

mao kini ang pagsulat diha sa
pagkawala
sa dili pagtultol sa kapaingnan

moingon ka unsa ba kining imong
gibuhat kanako
nganong imo akong gidala sa
wanang sa kapildihan sa wala
na nako pagsabot sa mga panghitabo?

ayaw kahadlok kay sa atong adtoan
wala ang kasayoran kon unsa og ngano
mao kini ang gipadulngan sa tanang
nawala og wala na gayod mibalik

dili kini kamatayon dili usab kini
kinabuhi og kon pangutan-on mo
ako mao lamang kini ang akong pamati
sa akong mga pagbati: ang kaanindot

sa mga wala pa nato mahikap sa wala
pa nato mahibalag, ang pagbayaw kanato
diha sa atng gilingkoran paingon sa
langit nga dili panganod nga dili pultahan.

cecilia bartoli aria

gipiyong ko ang akong
mga mata
aron makita ang wala
nako makita

samtang si cecilia bartoli
miawit sa ombra mai fu

gipalong ko ang kahayag
aron makita ang gidalit nako
diha sa kangitngit
sa sulod sa akong kasingkasing

abi kog ako
mahimo na nga malipayon o
kaha ba usa na ka nilalang nga
gawasnon

gipiyong ko usab ang akong
mga mata
diha sa pagpamati sa usa ka
awit sa usa ka taas og talinis
kaayo nga tingog nga
milapos sa pusod langit og mitabas
sa akong kasingkasing

abi kog mao na kini ang akong
kalipay
gibuka ko ang akong mga mata
aron lamang balikan ang
gadahunog nga kasamtangang
kahaw-ang

ang hingpit

gamay na lang
ang kulang
aron mahingpit
ang tanan

gamay na lang
gamay na lang gayod kaayo
usa na lang ka 
gunting ug usa na lamang
usab ka tahi
sa usa ka tinabas dayon

mahingpit na ang tanan
unya pagkahuman sama sa
mananahi

kadtong hingpit iya na
nga biyaan

kay ang hingpit mao ang
pag-abot na sa punto nga
wala nay tahion
wala nay tabason
wala nay buhaton