takla

gipatay sa
takla
ang pagpangabli
sa akong
hunahuna

mga damgong
mas
nindot lang sa
sulod
sa kagabhion
apan
kuslimaot sa
kabuntagon

gidawat ko ikaw ubos ug ibabaw...

ang kahadlok ania
matag gabii
labi na sa kaadlawon
nakapakurog 
kanako

ang akong kasingkasing
morag bomba
nga moboto sa tumang
kahadlok sa
kahadlok

mata sa mata
gilantaw ta ka sa
kalimutaw
ako kang giutaw

sa kadugayan
sama sa uban
miabot ang kalaay
ug ang pagdawat

kahadlok, mihay-ad
ikaw sa akong
higdaanan
nagbantal, nagbilar

tupad ka kanako
maghalog kita isip
hinigugma

kay unsa bay mahimo
ning buta ug amang?
ning nabungol na sa
imong kakwanggol?

gidawat ko ikaw
ubos ug ibabaw....

mga tigmo sa kinabuhi

gilantaw ko
ang bag-ong natawong
ralf
sa iyang duyanan
usa pa lamang
ka bulan

pagka-cute sa
baby
nga mora bag
miapil kos
bag-ong kalibotan

ah, lain na usab
nga kalag ang naa
sa sulod ning
puyang lawas

pila pa ka tuig
pila pa kaha ka tuig
kining
magkisikisi sa
pagtubag sa
mga tigmo sa
kinabuhi

gugma sa bato, sa kahoy, sa mga hulmigas ug tubig

higugmaon mo ba ang usa ka rebulto?
higugmaon mo ba ang bato?
unsaon ba paghigugma kanimo sa balas?
sa kahoy, sa hulmigas?

halok sa usa ka bato, gakos sa tubig,
kadulog mo ang balas, napaakan ka sa mga hulmigas.

gigakos mo ang kahoy, baga kaayo ang panit,
gihatag kanimo ang mga garas, sa taas nangulapyot ang mga  kwaknit

ania sa sulod sa akong dughan

nakit-an ko kini
kaganiha
gusto ko na unta kining
isugilon

hapti ko na kining
mapatik
gisulat ko na unta 
kini sa kahoy

apan wa ko kini
mabungat
wa ko kini mabuhat
adunay ania sa sulod
kanako
nga nagduhaduha
nahadlok
basin adunay masakitan
unya sa hangtod
di ko na makaplagan

walay aso nga makumkom

walay aso 
nga makumkom
gibalikbalik
kini
apan tungod
lagi kay
kagumkom
anaa mikaon
walay aso nga
makumkom
gikaon jud ang
batikulon

pulong

kanus-a ba gilupig sa pulong
ang mga buhat?

anaa ang bag-ong milagro

walay nanagat apan nagpura
ang isda sa kusina
walay nananom apan nganong
daghan mang bunga

anaa ang mga nagpakaginoo
nga mga walay trabaho

ang ilang mga pulong nahimong
mga balaod
sa paglitok lamang sa pulong
nangabot ang mga pagkaon
nagpahaluna sa ilang kan-anan
natukod ang mga balay
natuman ang mga pangandoy
 

korte

nabugnaw ang kape
sa lamesa
gilamigas ang saging
nga hinog
naponder ang suga
didto sa opisina

sa laing bahin nadungog
mo ba nga abonohan na
usab ug dugo ang 
nahiradang huwes sa 
branch 7?

 

kataw-anan

nahimo kitang
kataw-anan

giahak, nganong
gilalisan man nato

kon kinsa ka
kon kinsa ko....

ang akong mga tudlo

kon mangutana ka man
ugaling ug kumusta na ako

masulti ko lamang ang karon
wala nay labot ang mga ugma
damlag

ipalantaw ko lamang kanimo
ang akong mga tudlo
ug unsa ang nahitabo kanila
ug unsa ang ilang mabuhat
usab bahin kanimo

makamao silang mosulti sa
walay pagamit sa mga silaba
moawit nga walay gamit sa
mga nota

mahapyod sa imong buhok
mohaploy sa imong aping
mosubay sa balayan sa imong
mga bukog diha sa imong likod

ang akong kagabhion anaa sa
ilang mga pagtakyop diha sa
pag-ampo diha sa mga tulumanon
sa akong mga kamot

walay daghang gisulti

nindot siyang moawit
nakadayeg sab kita
apan mas maayo gyod
to siya
pagkalamian sa iyang
tingog
pagkaanindot niyang
lantawon
sa gamay lamang nga
kahayag
sa habog nga entablado

sa kataposan mihukom
kita
mas nindot gayod kadto
siya
kay wala siyay daghan
nga gisulti

miawit siya kanato
wala siya nagpaila
wala gani nato kaayo
nakita
ang iyang mga luha

ayaw sabta

didto sa isla
wala kay madala

ang tanang kalami
ang tanang kaanyag
didto lang ibilin

adunay awit
nga madala mo sa
imong kasingkasing

apan palihog
ayaw ug sabta nga
kadto 
kabahin sa gugma

didto lang

gilantaw ko ang
tanan pag-ayo
dugay

dinhi lang kini
dili ko madala

pagkaanindot gayod
sa tanang dili nako
makudkod

ayaw kalimti

sa atong
pagkatkat sa 
bukid
usa lang ang
gihangyo
kanato ni tatay

ayaw ug 
lantaw sa
ubos
aron dili ka 
mahulog

paghinumdom na usab

magtapok na usab
kita
aron hinumduman

kinsa kadtong
gibitay sa sako?
kadtong gisulod
sa bukag?
kinsa kadtong mitago
sa ilalom sa
lamesa
samtang nanglupad
ang mga plato
ug mga kaldero?

mangatawa kita sa
atong gikahadlokan
kaniadto

sahay kanang ako na
lang
maglantaw sa kahaponon
makapangutana ako
sa kinabuhi

nganong nihit man ang
kalipay?
ngangon nagbalik balik
man ang mga paypay
sa pagdaog-daog

basin kaha ug sila usab
gikan didto
busa mao lang usab
ang ilang nahibaw-an
nga itunol kanato

wala akoy gustong usbon
misalig ako sa dagan sa
ligid sa kinabuhi
nga ang tanan dunay
mga katarungan
nganong kini mao ang
nahitabo
ug dili kadto

bugok

isda kang
gitudloan unsaon 
pagkapyot sa
bagon

sa laing bahin
unggoy kang
gibitad sa ilalom
sa dagat
aron manikop
ug tuyom

dakong katawa
sa mga magtutudlo
ninyong duha

puros mo
tabugok matod
pa
sa bantogang
bulok

mangabugto sama sa pisi

misabod ako
sa mga pulong

maayong pagkasangit
sa akong mga
hunahuna

ning samdan nga
kasingkasing ning
gisakit nga kalag

ang nagtambag 
kanako miingon usa
lang ang akong
ikyasanan

diha sa pultahan
sa pagbati
diin ang mga pulong
sa usa ka pagsabot
mangabugto sama
sa pisi

ang nalipay

sa dihang
mitungtong ka
kanako
nagsulti kang
daan
nga dili
ipasulod ang
sakit nga
kagahapon

sa pikas lawak
nga ang tabon
seda unya ang
bongbong papel
adunay namati
nga haskang
lipaya

dula dula

dula dula
lang kini
sayod tang
tanan
gamayng
kalipay
sama sa usa
ka pulak
sa mangga
nga imong
nakit-an
sa tunga tunga
sa  tunaan
sa kabaw

dili sayon

dili baya
gayod sayon
ang pakighinabi
sa kaugalingon
labi na nga
sa dihang
gisugdan mo na
ang pag-asoy
dali ra kaayo
kining moingon
nga pasayloan
apan bisag ikaw
dili ko na
gayod masabtan

sa kaadlawon

sa kaadlawon
anaa ang saad

gikumkom
gikumkom sa
kanunay

anaa ang unta
isulti
giluom giluom sa
kanunay

vivaldi

vivaldi
vivaldi

wad-a
ang akong
kakapoy

vivaldi
vivaldi

andamon
na ang balde

kita sab

ang tanang
kalay-on
pagabutangan
ug mga 
muhon

kita sab
sahay magbutang
sa kahilom

tungod niini
mamuwak ang
kamingaw

kusog molamon sa tanang paglaom.

wala nako kaayo
kadto hisabti
apan kita kaayo nako
ang panghitabo

nahitabo na gayod
ang nahitabo
natagboan na sa
nawalang taklob
ang iyang sibo.

daghan kaayong
 nakalas
nga kinabuhi
gikaon sa miabot nga 
higanteng
 kahaw-ang

mao kadto ang gihisgotan
sa atong mga 
katigulangan
ang dakong lasang
 sa kahaw-ang
nga gipuy-an sa 
higanteng kahilom
nga kusog milamon sa
tanang paglaom.

ang kahaw-ang

makigharong kita
sa wala pa diha
gisabotan na nato
kini gikan pa kaniadto
ang atong mga
ginikanan
anaa kanunay sa
pagpangandam

nakigharong kita
kanunay sa wala pa miabot
sumala sa kasuguan

natapos ang mga adlaw
nanirado ang mga bentana
miabot ang tanang
kahaw-ang sa tumang kahilom

miabot na ang wala diha
nga walay puangod
mihabhab sa tanan
nga kalit lang nangawala

alang kang B.

gihatag lang nakog
balik ang imong
gihunahuna

gipaanak lang nako
ang imong gipanamkon

dayon nimog kasuko
dayon nimog panirado
sa pultahan

kon manambo ka man
sa bentana
sa dili pa ang kagabhion
anaa lang ako sa
nataran
nangandoy sa imong
maayong kaugmaon

ang akong gihalaran ning maong balak

kinsa bay
ganahan magpuyo
sa usa ka
lawak nga walay
bentana
ug walay pultahan

wala kay makitang
langit
wala kay mabati nga
kalibotan

gani ang imong
mga kamot dili man
kainat sa iyang
gusto

huot ang imong abaga
nga mora kag
ginapos sa matag
adlaw

walay ganahan
magpuyo dinhi
daghan na ang 
nakigpatay aron
lang mogawas

mao kini ang akong
gipuy-an
ang akong gihalaran
ning maong
balak....

alang kang R.

kadali mo lang
ingnon
nga bisag sa kangitngit
ning kagabhion
wala kay kahadlok
sa pagpalong sa usa
ka sugang
panulondon

hinoon
anaa pa ang kahayag
sa kabuntagon
diha sa imong
kahalangdon

ugma damlag
moabot ang pagbasol
lantawon mo ang
tunob
sa akong sapatos
diha sa dalan nga
lapokon

alang kang B.

una nawad-an
siyag trabaho
ikaduha
namatay ang
iyang pinalanggang
bana

nawad-an siyag
paglaum
morag nabuang
naglakat nga
walay
klarong asa
ang kapaingnan

nahitabo ang ikatulo
nahigugma siyag
batan-on
nga morag apo na
lang gani
niya kon sutaon

natagboan ang
kalipay
kontra sa tanan

nakita ko ang ilang
larawan
akong giampo ang
unta molungtad nilang
kalipay
hangtod sa kataposan

alas dos sa kaadlawon, alang sa walay hinungdan

dakong sayop ang imong gibuhat
nagpailaila ka man god
sa usa ka sayop nga ngalan

kadtong nakadungog gilood.

gipasagdan ka
gisakyan, samtang misulay kag
hirit sa usa ka katawa

wala damha nga sa pag-abot
sa ulan
tungod kay wala ka may payong
o kapasilongan
nabasa ka pag-ayo sa usa ka
ngalan

piso ka pa lang unya walay
inaan.

alang kang B samtang naglingawlingaw ako sa akong lawak sa crowne plaza

layo ra kaayo
ang atong sitwasyon
dugay na ako dinhi
ayaw paghisgot kabahin
sa mga patag
higala ko ang mga
kabuntoran
nagpaingon ka pa
lang 
mibalik na ako

ning dula sa kinabuhi
daghan na akong
gipakaako
daghang sapot daghang
dagway
apan sayod ka nga sa
tanan niini
usa lang ang ako

kung makigduwa ka nako
dili ko mobalibad
makamao ako nga mobalik
pagkabata
dili lang ako maglantaw
moapil ako sa ambak ug
sayaw sa kinabuhi

nindot ikauban ang mga buta
ug bungol
ug ang mga amang
sa unahan wala sugod naaninag
ang mga kasakit

samdan ang dughan

bali ang
panahon

anaa kami
sa likod niini

walay
katulgon samtang

ang mga panghitabo
naghinay hinay ug laray
aron tagaan
sa iyang numero
sa iyang ngalan

gipadpad ang mga
hinungdan
misitar ang realidad

unsa ba gayod?
nanghagit ka pa ba?

bali ang panahon
habol ang likod
hait ang atubangan
samdan ang dughan

likod sa quincy market

dili na kita
mangita pag kauban

ngano ba? nganong
hangtod karon
wa ka may salig sa
imong mata
ug sa imong tiil

gikapoy na ako 
niining sitwasyona diin

anaa ang magsunod
sunod
anaa ang buta misulay ug
giya sa laing buta

miabot kita didto dapit
sa ngitngit
diin ang upat ka mga
lalaki nga wa nato hisabti
ang ilang punulungan
naghatag kanatog kahadlok

ngano ba? unsa ba ang
atong gikahadlokan sa
atong kaugalingon?

dili angayan nga
isugilon ang tanan

mawala lamang kini
sama sa haguros sa
mga tingog

ang magpabilin nga
tulisok mao ang kahilom
ang dili malitok

usa kini ka makahingangha
kanato nga nahibilin dinhi

unsa ba kaha kadto?
nganong wala man kini
niya masugid kanato

pagbati

imo man god
gitandi 
ang hulma sa
akong ilong
ang bulok sa akong
pulong

kanus-a ra gani
kadto nga ikaw miingon
pagkalami
sa kinabuhi
ang atong mga kamot
managsama
ang atong panultion
nahisama sa 
alawiton sa mga kalapati
sa taas sa 
ilang balay nga usa
ray tiil

balikan ta ang
balak

wala kini katarungan
huni sa amorseko
nga gihaploy sa hangin
sa kahaponon

tingog sa gaagas nga
tuba gikan sa sugong

awit sa pagwalis sa
moskitero sa dihang 
misulod ka na
aron modulog tupad
nako

sa gawas 
mihunong na ang mga
gangis
nahilom na ang mga
bakbak

kini ang mga pagbati
kanunay 
kining wala nangita sa
rason
wala mangambat sa
mga nilugdangan
wala kakita kon asa ang
utlanan

mahinanok ikaw sa
akong dughan
samtang ako
mangita sa bitoon diha
sa buslot nga
atop
ug bongbong

gimingaw

Ang tanang karsada
Mga tulay
Bisan gani ang
Bungtod ug
Ang mga panganod
Sa quebec man o sa new york
Managsama

 Karon moingon ka
Mobalik na ako
Mas nindot ang katipunan
Mas lami ang
Inun-unan
Bisan gani ang mga bulingon
Humot na gyod hinoon

paghinumdom

Gikamang sa kagabhion
Ang kaadlawon

Kusog nga miulan
Ang kabuntagon

Udtong tutok
Nahitabo ang

Dili unta angayang
Buhaton

NIAGARA

Gipangita
lang nato ang
bangaw sa
Niagara

ug sa dihang 
nakita na nato kini
gipangandoy
nako nga kini
 mahimong
tulay
sa atong
kalay-on

mokaon ra ang galot mong silingan

cream pie

Cheers

clam chowder

Fenway franks

baked beans

lobster

nangutana man

god ka kon
 mag-unsa

kos Boston.

borloloy

karong adlawa
pa New York mi
ako ug ang akong
asawa

nahuman na siyag
pamutos
sa duha ka sapatos
duha ka jacket
ug uban pang mga
borloloys

apan ako ania
nagtimbangtimbang pas
mga pangagpas

unya na lang
dali ra akong mamutos
usa ka paresan sa gaan
nga sapatos
duha ka polo shirts
nga itom
usa ka medyas
tulo ka briefs
usa ka jacket

tambal sa highblood
sa blood sugar
sa cholesterol
sa labad sa ulo ug
sa kalibanga

hapit na ang kahaponon
sakit na gamay ang mga tuhod
busa pahimuslan gayod ang
tanan
samtang di pa kaayo bugnaw
ang kagabhion

medyo

dili lisod
hunahunaon nga
ako lang

ako lang ang 
nagpahawid sa imong
bukton sa
akong abaga

ako lang ang 
mihalok nimo
samtang milapos ang
imong panglantaw
gawas sa bongbong
paingon sa
plaza

(layo ra kaayo ang
imong tinan-awan
habog ra kaayo ang
imong pangandoy)

oo, ako lang.
wala gyod ka didto
samtang
nagawsan ko.

hinumdomi

kon unsa ang imong apohan
kon wala ka mahinumdom 
lantawa ang apapangig sa 
imong anak, lantawa kon 
giunsa niya pagpanit ang 
manggang bisaya, giunsa kini 
niya pagtam-os, giunsa niya 
paghipos ang wala mahurot 

hinumdumi ang mga mantsa
sa kamisin, ang nagkamuritsing
nga aping, ang nangalata nga
mangga sulod sa iyang bag diin
gitago niya ang iyang bulingon.

alang sa namatay

gilamigas ang aparador
sa namatay
kon nasayod ka lang nga
ang polvoron nga nawala
sa wala pa siya mamatay
iyang gitagoan sa ilalom sa
iyang wala maplantsa nga 
barong

adunay panahon

tungod sa mga balak
nasayang ang akong panahon
wala na gani nako mabuhat
ang angayang buhaton

sa laing bahin
tungod niini nausab ang
akong panglantaw

adunay panahon nga kita
mag-undang
magyamayama sa dalan
makigsandurot sa bulan
ug sa kangitngit
makighawid sa atong
kaugalingong kamot
nga mora bag dili kini
apil sa atong lawas.

sa galawod nga kadagatan

ang mga nakaila ko kaniadto
lisod ko na nga mahinumduman
kadtong akong nahibalag
unya nahibalag pag-usab
motawag usahay kanako sahay
kon magkatagbo ang among
dalan, apan aron walay mahiubos
moyango ako dayon mangutana kon
asa na sila nagpuyo karon nga mora
bag ang tanang tawo anaa morag
mga barko nga siging nanagsibog
balhin balhin sa mga pantalan
haw-as sa mga pasahero ug kargo
dayon ang ibilin mao na lamang
ang kahaw-ang nga unya dapit
pun-on na usab sa tanang mosakay
aron ihatod dayon bayaan 
hikalimtan kay silang tanan walay
labot kon unsay imong dangatan
sa galawod nga kadagatan

bugnaw na

ang balak sa akong
kabuntagon
morag kape nga
nabugnaw na
kay nalimtan ug
inom....

ug samtang wala na ang mga iring ug iro anaa ang tanang balagtok nanayaw, nanahudyaka

sa matag adlaw nga adunay
buwak nga nalaya
dahon nga nangahulog
sanga nga nangaputol
alibangbang nga nabalian ug pako
iro nga naligsan sa karsada
baboy nga natikig
tawong gipatay
kining tanan nahimong
naandan unya ang tanang
naanad na niini
wala nay ikasulti.

ang mga nakakita ug
nakadungog
usa lamang ang pangandoy
nga unta dili kini
mahitabo kanako

matag adlaw atua
ang sulugoon sayong nagprito
sa bulad ug itlog
sayong nakalung-ag sa kan-on
sayong nagtimpla sa kape
sayong milantaw sa TV
dayon pagkaoran-oran ang
tanan wala na dinhi

ug samtang wala na ang
mga iring ug iro
anaa ang tanang balagtok
nanayaw, nanahudyaka

dila na lang ang walay labod

kahinumdom ka ba
kon unsay labaw nga
bililhon sa atong inahan?

ang iyang mga african daisies
nga akong gihurot ug ibot
dayon akong gipaligsan
sa daghang trak nga nangagi
didto sa lapok nga dalan

kahinumdom ka ba sa 
akong gidangatan nga matod
pa sa atong inahan
dila na lang ang walay
labod sa batang kanahan

unsaon ba paghikalimot
ang natun-an nga sa dugo
gipatuloan?

si chelu ug si tekla

sa usa ka comedy show
gisagpa ni chelu si tekla

mikatawa ang bayot nga
morag wala lang bisag
sakit ang iyang apapangig

ako nga naglantaw nakaingon
dili na to comedy, kondili cruelty.

trabaho lang ang kang tekla
nga kon mawad-an siya wala 
nay ipalit ug druga.

sa laing bahin, sabta lang
nga si chelu hagbay ra sang
gibyaan ug bana

ayka,  mikuyog sa bayot.

Bakante

Mas angayan ang bata sa sanina
nga tinahi sa iyang mama
ikumpara sa human-daan
nga gibaligya sa ukay-ukay

Inig kahapon samtang ang inahan
nag sikad sa makina, mag-ampungad
ang bata nga maghulat sa sanina
nga gipasingutan sa pagmahal

Namatay og sayo ang iyang inahan,
ang dalan nga iyang nasundan
dan-ag diay sa kaparutan ...

Walay kahago, walay singot
kon tan-awon mo sa kinatibuk-an.
Galanog ang utok, sa gikutoy nga dughan
sama sa nipis nga hangin, bakak ang
mga hunghong nga nihapuhap
sa bakanteng kagab-hion