balak alang sa kalibotan...

gikahadlokan mo ang tanan
gikalimtan mo na ang kalami sa usa
ka katulogon

sud sa imong damgo
ikaw ang babayeng gigukod sa usa ka dragon
nga mibugwak og kalayo

gikahadlokan mo ang tubig
pati ang hangin nga imong giginhawa
imong gikalisangan

kagahapon
sa hungihong nga moabot ang tsunami
nagbukot ka sa imong habol
og wala na mogawas sa imong kwarto

buntag na
bangon
lantawa ang kalibotan
abrihi ang bintana

dili ba nindot ang mga kanaway
nga namatog diha sa dagkong mga bato sa dagat
dili ba usab nindot kaayo tan-awon ang
sakayan nga gipatongan sa mga bata
nga nag-ambak-ambak sa
malinawon kaayong dagat karon?

ang kalibotan
kamao usab nga maghunahuna kon unsa
ang makaayo og
makadaot kanato
iya kitang mga anak
mga apo sa tuhod
mga pag-umangkon
og mga ig-agaw
mga amigo

adunay sumpay ang atong mga
pusod
sa iyang kasingkasing

busa ayaw og kabalaka
kon milinog man
kana tungod kay gigil-asan ang
lawas sa kalibotan
kon mitsunami man
kana kay naligo lang ang
kalibotan
nanglimpyo sa iyang kagid
nanglugod sa iyang
mga buling
nanghilam-os
sa iyang nawong
nanarapo sa iyang mga tiil
og nanghinguko
sa iyang mga tudlo
namul-ong sa iyang
mga buhok



apan kadyot lang kana
pagkahuman niini
ang kalibotan mobalik
sa iyang naandan
mangabre sa iyang mga
bukton
kay iya na usab kitang
gakson