apasumpay sa balak ni gratian

daghang sisyphus ning kalibotana
ang kang gratian
kabahin sa iyang lolo nga hangtod sa
katigulangon
o gani hangtod na man seguro sa
kamatayon
magpabiling anaa ra gihapon sa
pagduso sa daro didto sa iyang
umahan

apan naay laing klaseng mga sisyphus

nakasakay sa kinamahalang Lexus
nagsweldo og usa ka gatos ka libo sa matag bulan
wa pay labot ang mga pitse-pitse sa pagpangilad
anaa ang mga travels nga dili na gani unta kinahanglan
mga allowances nga dili na matulon sa auditing team
anaa ang ilang mga galanoglanog nga mga katawa
sa tumang kahubog sa gahom
og influensya

sa matag adlaw nagsakaysakay sila sa ilang mga
bulawang karwahe subay sa halapad kaayong hawan
sa ilang dalan
paingon sa palasyo ni satanas
didto sa
Impyerno

sa matag adlaw gisunog nila ang ilang mga kalag
sa kalayo nga wala nay pagkapalong

wala kini kaayo kalainan nianang pagduso sa
daro diha sa umahan

apan seguro ang kalainan sa laing bahin
mao nga ang usa nag-antos sa kalisod
og ang usa nag-antos sa kahayahay nga hilabihan

(sa tago ang konsyensya nagbakho
sa matag gabii anaa ang insomnia og ang paghasol sa
tanlag
ang gitanom nga liso sa kaayo gikan sa Ginoo
gitisok sa atong
ulo)

apan ang mas labing kalainan nga dili pa kaayo dayag
sa pagkakaron
mao ang atong pagtoo
nga sa kataposan ang mga sagbot og kanding nga sungayan
sunugon
himoong abo
og yatakan sa mga lapalapa
sa katarong hangtod nga kini
mapapas na sa kahangtoran

og ang
mga tanom nga maayo
og namonga
diha sa paglutos og
pag-antos

og ang mga karnerong nagpabiling putli og maaghop
palamboon og atimanon
ampingan sa Ginoo
og hatagan sa kinabuhing
dili na gayod madutlan sa
kalisod og
kamatayon
sa kalipay nga dili mo matukib
hangtod na kini
sa kahangtoran diha sa
kasadya nga wala nay
kataposan


mao usab kini ang akong
paghandom mao kini ang akong paglaom
mao kini ang akong
pagtoo


basin puhon....