pahulay ug lahotay

matag adlaw
malabyan ko ang menteryo
daghang hunahuna ang
moduaw kanako

hinay ang dagan sa
akong sakyana silong
sa mga kahoy

abogon gihapon ang
dalan dinhing dapita

lalom kaayo ang kahilom
ug usahay mohunong ko
aron pagpamati kon unsa
ang pulong sa kahilom

daghang dahon dinhi
laya, nagpaabot sa hangin
ug kon moabot na kini
magdungan silag kapalid
kon asa sila dalhon unya
kon mohunong na ang
hangin, magtapok silang
tanan sa usa ka lugar nga
morag mga langgam nga
nangahulog sa langit ug
puros mga patay


daghan na akog mga higala,
silingan, mga kaila nga ania
na dinhi nagpuyo

lawas na lang ug bukog
hinipos sa mga sementadong
tagoanan

ang kinabuhi nga mabati dinhi
mao lamang ang mga hoyohoy sa
hangin, usahay, ang ulan, ug kon
duna may kalahian, kana kon
moabot ang kilat ug dalugdog

dako kining lugara, mingaw,
adunay bakante nga lote sa
unahan, pipila na ka tuig,
wala pa gayod himoi kini
ug usa ka panimalay, kay

kon ako ang pasultion, aduna
gayod gihapoy kahadlok ang mga
buhi sa mga gilubong nga mga
minatay

ug ngano ba kaha? ingon si tatay
ang kalibotan sa mga patay sa
patay lamang, ug ang kalibotan
sa mga buhi, kanunay kining lahi.


ibutang ta nga kini mao ang atong
kapaingnan,
dili kini nato malikayan, apan kinsa
ba ang isog nga makigsandurot
sa mga patay, ug makigpuyo diha
tupad kanila.

pareho ang atong tubag.
lahi ang atong pagpakahilom sa
ilang pagpakahilom.

ang ilaha, pahulay, ug ang atoa,
tawgon kog, lahutay.