2019/08/01

kabahin sa nagpunay ug away bahin sa katigayonan

sa monyeka pa
lang kaniadto sa
gagmay pa sila
nag-away nang
daan

kay lagi kuno
mas bawod ang pilok
sa iyaha 
kay lagi mas nindot
ang sapot sa
iyang monyeka
kaysa iyaha

si nanay nga
nagsakripisyo sa pagpalit
sa ilang duha ka
monyeka
gikapoy 
nakatulog sa lamesa
sa kilid sa
bongbong dapit sa
pantawan

x x x 

karon lahi na
ang ilang giawayan
kabahin na sa yuta
nga kabilin ni 
nanay ug ni
tatay

kay lagi naa sa suok
ang iyaha
kay lagi mas daghan
ug tanom ang
iyaha unya ang iyaha
batoon 
unya wala kaayoy
lubi

x x x

nagpakahilom lang
gihapon ako sama
ni nanay ug tatay
gikapoy kog pamati
apan dili ko matulog

x x x

unta magpatay ni
silang duha
aron ako ray mabilin
unya akoa na
ang tanan apil ang
ilang giawayan

No comments :

Post a Comment

Nindot ba? Unsay imong maikasulti?

Panginhas dire