2019/08/13

pag-inosara

ang  kaminyoon molungtad
diha sa pagkatulog dungan sa usa
ka higdaanan
bisag ang mga sampot na lamang
ang maghimamat

anad na ang tanan dinhing dapita
anang walay pagtinagdanay
ang katarungan mao nga daghan
pa kaayo kita ug atimanon nga bisag
unsaon dili gayod mahuman

kon ikaw na lamang usa sa balay
tungod kay ang imong mga kauban
atua na milakaw sa tag-sa tagsa ka mga
tuyo miabot ang panahon diha sa paglingkod
lamang lantaw sa gawas samtang
nagtuyatuya ka sa imong gilingkoran

nakita mo ang pagpanghulog sa mga dahon
ang paglabay sa mga abog
ang mga sanga nga hapit na mahutdan ug
mga dahon

sa imong kabahin samtang gisulayan mo
paghambin ang gamayng kalipay nga 
nahibilin nakahukom ka nga dili na mangilabot
sa bisag unsang silhigonon dinhing dapita.

hangtod karon gihunahuna pa gihapon nimo kon
asa na kaha ang kalay-on ang panaw sa mga abog
nga milabay sa imong tugkaran
ang kabugnaw sa hangin wala nay gahom sa
pagpukaw sa imong tingkoy.

No comments :

Post a Comment

Nindot ba? Unsay imong maikasulti?

Panginhas dire