sa laing bahin

 mao kini ang gipanday mo nga

balaod

walay katungod nga bana nga

daugon sab sa inhustisya

kay lagi lalaki man siya

unsaon ba siya pagdaog-daog sa asawa?

walay katungod ang mga tag-iya sa

yuta nga mangitag hustisya

kay lagi mga amo kani sila unya

dili angayan sa espada sa hustisya?

ang mga dato papobrehon

ang mga pobre padatoon

miabot ang mga mangingilad

nga mopanday sa balaod

mga balaod alang sa mga pobre

ug mga dinaogdaog

unya sila unsa ba? nag-aginod sab sa

tumang kalaog

ania na ang mga pobreng kawatan

ania na ang mga pobreng mopatay

mobuntog sa sistema 

mangyam-id sa hustisya....

bisan pa sa iyang kangil-ad (alang kang cesar)

 gisulat ko ang mga mohon

ang mga ilhanan

gisulat ko kini dugay na

sa tubig ug sa hangin

nabasa mo na kini kaniadto

ambot ug ngano

kon mahinumdoman mo pa ba kini

og ako ba kaha

namahala na ang kapalaran

miabot ang balita sa kamatayon ni

cesar

didto sa suok sa slum area sa carbon

tupad sa karenderia nga

nanimahong tinae sa baboy

sa dinuguan nga

kinaon sa kasagaran

gilubaluba kuno si cesar makatulo sa

iyang dughan 

gitulod sulod sa lawak nga nababagan

sa pultahan

baho na ang iyang lawas

tulo na ka adlaw ang milabay

hangtod nga natimahoan na

kini sa barangay

ug gidala sa kinabaratohang punerarya

sa carbon

gitaho sa kahanginan ang iyang

kamatayon

miabot sa kabukiran

apil na seguro ang kalangitan

karon ania ka sa kasubo

bisan ug madumduman mo pa ang kasilag

ug kasakit nga gihatag sa namatay

mibakho ang langit

mibanaw ang ulan

miabot ang dalugdog ug kilat

diha sa mga mata

nga nabulikat

bisan pag unsa kangil-ad ang

igsoon

bisan pa ug dili mo magdugay

inig kita manggiaway

apan kon kini gilubaluba sa

kamatayon

moabot gihapon ang bation

mong kasakit

mahulog ang mga luha

nga makapuno sa gauga

nga mga sapa....

gipangutana ko ikaw

kon pangitaon mo pa ba ang

idlas nga hustisya

unya miingon ka 

dili na, dili na,

sakto na nga mipahulay na

siya...

bakho sa amo...

 titulo ra ang ako

ang yuta imo

pagkadaghan sa

kanding ug mga manok

ug mga baboy

sa akong titulo apan imo

man ang yuta ang mga kabaw

baboy manok kanding 

nga misabsab sa sagbot sa imong

yuta

ako ang titulo

imo ang yuta

ug diha ka sa imong yuta

ugma madugta

ako ang titulo sa akong

kaban

sa panahon nga nagdagan

nagpabiling ilhanan

sa makabungog nga

kabag-ohan

saop nga limbongan

kopra gipadagan

katungod sa mga tag-iya

karon giyurakan....

pahuraray

 nanago ang mga bitoon

sa panganod sa kaulaw sa kaanyag

sa miabot nga

buwan nga tibook nga mirampa

sa kapanganoran

malipayon kitang gidan-agan

sa tibook nga buwan

samtang ako nagpahuraray sa

bus-ok mong dughan

gahom sa kangitngit

 ang gugma

makamaong mamakak

tungod sa gugma

alang sa gugma

aron molambo ang

gugma

ang kamatooran usahay

mapadayon sa pagpatay

walay kalooy

sa gugma sa mga pagbati

hawid ang kahayag nga

maoy nakapalong hinoon

sa kahayag

ang kangitngit mipahiyom 

sa kasagarang panghitabo

kanato

dala ang kahiubos sa pagtunob

nato sa iyang ngalan ug

sa iyang gahom usahay nga

mas makalipay pa man hinoon

ug gani makabuhi pa man

gani sa hagbay nga nga patay....

garay sa kaadlawon

 inig piyong ko

samtang ikaw naghilot kanako

duna koy gibati

nga medyo bati

nakatulog ko 

ambot dili ko 

madumduman kon

unsa ang akong

gidamgo

balod sa dagat ang imong

mga kamot

ang akong likod

uwagan sa kahimuot.

sambingay

 nanguhit sa mga bitoon

sa kalangitan

walay napudyot bisag usa

ka pulak lamang,

mga aninipot nagtuyoktuyok

sa iyang ayoyok

nangasunog tungod sa

ilang pagtapok

nahagbong gikan sa langit

maayong pagkahagba diha

sa yuta

ang usa ka bitoon nga

kulang sa pagtoon

usa ka nilalang nagdamgo

tungatunga sa udto

mitagbo sa kaadlawon

nagsalimuang intawon

tungod ni nanay

 ayaw seryosoha ang

gugma,

una sa tanan

wala bayay gugma

nga seryoso

dula dula lang

balay balay

dakop dakop

halog halog

hawid hawid

kayat kayat

ayaw seryosoha ang

gugma

kay wala kana

busa balik sa dula dula

hagwa hagwa

gakos gakos

kitik kitik

sugod sa buntag hangtod

sa kahaponon

pauli sa balay 

kay nanawag si nanay

panghimasa

panghilam-os

ayaw paglangaylangay

kay nasuko na si 

nanay....

mao na....

 gisulat mo ang 

wala mo hisabti

ang wala mo 

nasabtan unya sila

sab nga nagbasa

nahikurat sa imong

kalalom

midayeg, misulay sab

ug salom

didto sa lalom 

nga wala mo 

masalom

nangalumos sila

unya duro nimong

katawa.

pahawa

 karong buntaga

pamatia ang sulog sa imong

hunahuna

biyai makadyot ang

kasingkasing

nga wala midapig kanimo

sa imong kasakit.

paanod lang sa sulog sa

imong hunahuna

padayon

padayon 

inig abot sa unahan

kanang hapit ka na sa pangpang

kapyot sa bato o  sa bagon ba

kaha

pahawa.

tigmi nga panahon

 tigmi ang panahon

walay undang ang ulan

kitang duha nia

nagabhian

namasilong sa payag

nga biniyaan

nagkurog ko nga

naglantaw nimo

ikaw nga usab 

basa, unya walay 

panty nga akong

nakita.

ikaw

 hibaw-i nga ang tanan

kanako dili baya pod tanan
lamian.
karon seguro aslom ko
apan manggang hilaw ang
akong pagkaaslom
unya ikaw ang mawos nga
ginamos
nga akong sawsawan

pamili

 ania ang imong kagawasan

mahimong ikaw mahimong

dili sab ikaw

mahimong ang tanan

mahimong wala sab bisag

sakuban man lamang

kay wala mo man gipili

ang sundang,

ania ang imong kagawasan

bisag unsa lang

pilion mo

ang imo pilion mo usab

kon gusto ka ang

ako.

ania ang imong kagawasan

na hala pamili na

nga morag ukay ukay ba.

paghinumdom kang fr. dotterwich

 kusog ang ulan

wa koy payong

ako nga mayokmok lamang

gihatagan mos imong payong

dayon nimog paspas og

dagan misungsong sa kusog

nga ulan

makaulaw sa usa ka mayokmok

nga gipangga 

sa dakong tawong nagpakabana.

kabahin nako....

 gamay pa lang ko

kabalo na ko kon unsay akong gusto

kon unsa ang lami alang kanako

kon unsa ang akong buhaton

gamay pa lang ko

nakaila na ako kanako

gamay pa lang ko

nakat-unan ko na ang kahilom

kon isulti ko kini kanimo

wa sad kay mahimo.

kaulag

 kahayag nga gitunong

sa imong mga mata

makabuta, kalami nga alang

lang kanimo

kon naunsa siya, kon nalipay ba,

wa kay labot.

sundang nga nahulbot

hait gikan sa sakuban nga

buslot.

kasilag

 nadisgrasya ang iyang bana

sa motor nga iyang gisakyan

patay.

sa dihang gipahibalo ang

asawa

ang gikumusta ang motor.

K A S I N A T I A N

 

KASINATIAN

 

dugukan ang kasinatian sa binuhatan,

singot ug katakos ang puhunan,

 

sa kadaghanan kapanaminan,

ang kawad-on mapait nga kasinatian,

 

hinatagay, tinabangay ug binatiay,

kini kasinatiang nagsapnay ug kalipay,

 

may magpahimulos sa kahalangdon,

balewala ang kaayo, mangabuso  sa gahom,

 

gikalimtan ang dalan sa katarong,

talagsaong kasinatian iyang giusikan,

 

panagtambayayong,   kahiusahan, mga  kasinatian,

talan-awon ang tanan sa mabungahong katilingban,

 

kaliwatan, katawhan, katilingbang atong namat-an,

kasinatian, kinamaayohang magtutudlo sa tanan…

pagtudlo

 wala nako

pun-a ang balde

ug tubig,

igo ko lang

giduslitan ang

posporo

dayon nakog

palayo kaninyo.

kamatayon

 duna sab tay mga tinipigan

kitang tanan, dunay tinipigan

depende sa tinipigan

makahadlok, makalipay,

makaguol, 

depende sa pagtipig

sama sa dili makita dili masakpan

dili sab malitok

dili masabtan....

gitipigan ko ang gugma ko kanimo

busa dili mo kini mabati

dili ko malitok busa dili mo usab

masabtan

gitipigan ko ang akong kahayag 

sulod sa langob

oo, mapalong kini apan sa usa ka higayon

mihatag kini sa kainit

sa wala pa miabot ang imong kamatayon.

unsa kaha ?

 unsa kaha kon kita

nahimong mga bitoon

sa langit, bisag sa 

mubong higayon lamang?

bation kaha nato ang

langit, sama sa langaw nga

mitungtong sa 

sungay sa kabaw?

unsa pod kaha kon kita apil

sa mga nangahulog nga mga bitoon

gikan sa langit?

sakit kaha kon kita mawad-an

na sa kahayag

molagapak diha sa mga bato

dayon nabuak

unya bugnaw na kaayo diha

sa kahilom

sa dughan sa kamatayon?

ang kwentada sa nahigugma nga nagmingaw sa imong pagbiya tulo ka adlaw

 wala ka dinhi

sa balay sa tulo ka adlaw

maayong pagpananghid

maayo sang pagtugot

gikan kanako paingon kanimo

apan kon nasayod ka pa

lang unta

nga kanang imong tulo ka

adlaw

tulo ka tuig kanang

pinaabot kanako

pagkabuak sa butang nga imong gimahal

 sabton mo nga

adunay butang nga dili mo ganahan

nga hawiran

kay  hadlok ka nga mahugaw

o kaha ba sa imong kadangag

mabuak

kon imong susihon gayod ang

kangitngit sa kagabhion ug ang

iyang kabugnaw niini

sulod sa imong lawak diin ka

nag-inosara

gihandom, gimahal kining

butanga

diin ka namakak nga dili ka 

ganahan

kay sa tinood lang gusto mo man

gani kining hagkan

halogon

gakson sa guot kaayong

paghandom

mangagho ka,

sa mga gidili sa imong kaugalingon,

busa natulog ka lamang

unya didto sa imong damgo

ikaw ang batang layaw,

ang batang maldito nga mikuha

niining butanga dayon imong

giitsa itsa paingon sa mga panganod

paingon sa langit

imong gisalo, giitsa pag-usab

gisalo na pod,

handtod nga nalingat ka sa tumang

kalipay 

sa imong kagawasan

dayog kahulog niini 

dayog kabuak

dayon dungog mo ang tingog

sa pagkabuak

sama sa bildo sa garapon nga puno

ug kamay

nga nahulog sa salog 

galagubo diha sa iyang

pagkabildo

apan wala ka miiyak

didto sa imong damgo mora kag

si buddha

nga durong katawa

samtang gapas-an sa iyang

wala ka mga anak

nga pareho kaayog niyag

nawong

ug tiyan.

ang sapa sa hunahuna

 ang atong hunahuna

dunay usa ka sapa nga kon

subayon mo pag-ayo pag-usab

usa diay ka dakong suba

diin mitaob, mihunas, mibaha,

mimala usab,

depende sa pagsubay mo sa

iyang ugat sa iyang sulog.

mabati mo sa unang bahin ang

iyang kabugnaw, mangurog ka

sama sa usa ka basa nga piso nga

wala sa pako sa iyang inaan.

apan kon kanunay mo kining duawon

og kaligoan, dayon ang iyang kalalom

imong salomon, didto makita mo ang

kahilom, ang tumang kalinaw, 

didto mabati mo ang iyang kainit

nga mokuyanap sa imong bukog

paingon sa imong unod hangtod na

kini sa imong  panit.

manglimbawot ang imong balahibo

dili ka makatoo nga ikaw diay kadto

ang iyang tinubdan.

malditong bata

 maghandom na sab tas

mga patay

ako sab, maghandom kang

nanay

siya kaha maghandom pa

kaha kanako?

bation pa kaha niya ang kasuko

sa dihang gipang-ibot nako ang

iyang mga african daisies  kay

dako ang akong kahiubos nganong

wa ko kuyuga niya sa lubong

kaniadto ni Tiyo Miguel?

giayo ko niyag bunal sa bakos

ni tatay

nga ug siya pa dila na lang nako

ang walay labod

nakasala ko kaniya apan gikalimtan

ko na ang tanan

ang akong mga labhag ang akong 

mga samad

ang malditong bata siging dasdas sa

mga balod sa kapalaran

dili na kamaong mohandom

wala na usay gidumdom sakapatagan

bisan gani sa pag-abot sa kilomkilom

wala na ang kasuko ug paghukom

K A M O T E

 

KAMOTE

 

lagutmong dangpanan sa naglikay ug karne,

kan-onong makapahungaw ug hangin'g isog pa's iti,

 

may mga  pangandoy nga  mangasapli,

pangamote ang dibuho sa  mga butang sama niini,

 

mga taspokan, karagan, dili mahimutang, 

kanunay'ng paundayonan ang pagpatuyang,

 

pangamote ang mahimong sangpotanan,

kamote, mahimong  ilogan ug kuninitan

 

samtang kamote kalan-on sa mahilig ug lagutmon,

pangamote ang padulngan sa binuhat nga mapasagaron..

mga alibangbang gikan sa abog

 nindot kaayo ang imong pagtayhop

sa abo sa imong kamot, 

maayo ang imong panglantaw

sa dihang gipalupad mo ang mga

alibangbang ngadto sa bangaw....

apan unsa ba god ang tinood nga nahitabo

sa pagtayhop mo sa abog diha gikan sa imong

palad?

gi ba god nabukog ka man sa kaisog sa

abog? di ba god nga nakaubo ka man?

kahinumdom ka ba sa imong kalaog sa

polboron ni mama, nga imong gihuwad

sa imong baba?

hapit baya ka namatay kay wala kaginhawa,

hangtod nga gidalidali pagtunol ang usa ka

basong tubig, diha pasulod sa imong 

baba paingon sa imong tutunlan hangtod

nga naluagan ang imong dughan

nindot baya ang mga alibangbang apan

ayaw hikalimti ang makabukog nga mga

abog, nga sa imong palad gipadpad.

iro batok iro....

 didto sa baybay gikuyog namo ang

among tulo ka iro nga saktog barog,

kay lagi sakto mas kaon, 

dagkog mga lawas, kusog managan,

abtik, maayong mobantay, paghot

hait ug mga ngipon, kusog mamaak,

sa sulod sa among lugar misulod kining

iro nga itom, kita ang gusok sa kaniwang,

gikagid, opaw nga tiguwang, hinay ang

lakaw, gutom, nangita ug kaon,

gidasmagan sa mga kanahan, gipaak,

gitabangan, samdan, natumba ug gani

wa na kabangon pa, nga morag patay

nga naghay-ad sa dalan, gustong motindog

aron modagan,

way puangod nga mga kanahan, mga iro

man unta, apan nganong ang iyang parehong

iro, dili man nila masabtan,  unta giabiabi

dayon gitabangan, unta gitagaan sa sobra nga

bukog nga ila na lang ganing gipihig sa daplin

sa ilang tumang kabusog.

paglikay nga mapraning.

 KAPOY NA  maghisgot kabahin sa covid.

Pahulay sa ta.

Maglipay ta.

Magpatulo tag laway.

Spaghetti sa Cafe Isabel.

Kapeng Barako  nga

Isog kaayo.

Higanteng New York Pizza.

Recall, tong tour tas

Hawaii, ako sab tong sa 

Iceland.

Bigatin.

Ari pod tas pinobre.

Ag didto tas bukid.

Katkat sa Bulawan.

Pahulay sa payag ni Ronnie

Tupad sa walay hunong nga

Agas sa tunggo.

Kalami sa tubig, may

pagkatam-is sulod sa

langob.

Nangatawa tas atong

kabayo nga gisakyan.

Mas dako pa ko

Nalooy kos kabayo

nga gahangos intawon

sa akong kabug-at

busa minaog ko aron

siya guyuron kay gadala

pa baya intawon

sa mga bulig sa saging

og sako sa kamote.

daghang basahon nga

mga librong wa matagad

sa pipila ka tuig.

Netflix movies nga

nabyaan.

Mga kaila nga hapit

na nga nalimtan.

Mga karaang higala

nga himamaton pag-usab

aron lang

mabalikan ang mga

kaniadto.

Dili ta maghisgot ug

Covid.

Lain na usab ang 

atong atimanon,

Dili ko ganahang

mapraning,

sama ninyo.

gamiton

 kana bang mora kag giayag

dayon gihipos sa kamot dayon

gilabay nga morag monggos

sa balason nga yuta

gibati mo nga sugal ra diay ang

tanan unya ikaw ang pusta nga

ilang giawayan, nga mora bag

ikaw na kunuhay ang bililhon

sa ilang kalibotan apan dili tungod

nga angayan kang higugmaon o

panggaon kondili ikaw ilang gamiton.

paghikalimot sa syudad

 balik sa kabukiran

palayo sa mga kasakit

awit sa tukmo

taghoy sa tamsi

panaghoy sa suba 

kahilom sa mga bato

sitsit sa hangin

kuhit sa sanga 

gakson mo ako

sa tumang kainit 

niining tungura 

hikalimtan ko ang syudad

pagpukaw

 ulan sa kabuntagon

musika nga giduyugan

sa mga dahon ug sanga

sa mga kahoy

kalibotan nga nanaghoy

ginhawaan sa yuta 

bentilador sa kalag

haploy sa lawas 

gugmang nagbaga 

mibanhaw nga kaulag

mga pagbating nahikatulog

gipukaw sa imong kaanyag

ang akong mga tunob

 sa gawas sa korte

nananom diay si jefrey

ug lain-laing bulok sa 

bougainvilla,

naa say cactus, sanseveria,

apil pa gani ang puti nga

kawayan

nga gagmay pag dahon

sa ubos atua ang laing itom

nga kawayan nga

hinatag sa election officer

kusog nga mitusoy ug tubo

sa daplin sa pader

dinhing branch lang kini

ang uban  morag miingon nga

wala kinahangla ang mga bulak 

sa korte

binayot lang daw ni jefrey

ang maong pagpananom,

apan nindot baya pong tan-awon kay

ang akong mga mata morag 

mga alibangbang nga milupad dayog

patong sa mga buwak

nga bisag walay kahumot 

masimhot mo man gihapon ang

kalipay

sa ilang pagbuswak.

usahay malimtan sa uban ang

kinaiyahan

sa tumang pagdumot sa kinabuhi

nga ilang giaway,

gisalipdan sa mga panginahanglan

kwarta, dungog, kahayahay,

pamilya, amigo, 

kadugo,

ug mga politicians nga dili kuno

gayod mabalibaran

ang akong mga kamot ania

sa akong likod, wala sa akong hawak

nga mora kog 

senyor sa kanhiay, hawod, hingasaba,

gikahadlokan,

wala pa mibawog ang akong bukog,

tul-id ang akong tingog

lig-on pa gihapon ang akong mga tuhod

hait pa akong panglantaw

nga kon babagan sa imong tutok

makasamad

dili mo makita ang dugo nga mobanaw

unya diha sa 

pagtindog ug ligdong

dili kini mahitabo

sa akong pagpanagana ug

pagtagna 

basin ugma kaha, o basin sa sunod 

pang hugna sa kinabuhi

basin makita mo ra ang akong agianan

tunob sa usa ka tawo 

dili sa halas

dili sa bakukang

labi na nga dili sa 

mga buaya nga nanambok

diha sa kamad-an

dili gihapon malimot

 nakatawa ko nimo

giambat ko baya pod ikaw

kay mora bag

sa imong feeling

usa ka lamang sa grano sa balas

sama sa gilitok ni Maras,

tan-aw kaha nimo langit ko?

o kaha habog nga palasyo

nga gilabat sa semento ug sa

puthaw?

ang imong gihangad 

dakong bakak,

usa lamang ka simbolo

nga walay kahulugan,

nahisama gihapon sa akong

gihangad kaniadto

nga karon nahagbong,

napandol, nahulog, naputol,

walay ulo, walay lawas,

wala gani kamot, nga kaniadto

mohawid kanako

dayon mopasalig nga nindot

ang kalibotan

nga kining tanan molungtad

kolon, lapok nga migahi sa tumang

hulaw,

tulay nga gabok

hanging bridge nga uyog kaayo

ang mga kwerdas niini naghinay hinay

ug kaputol sa 

asgad nga ginhawaan sa dagat

nahilis sa taya ang

mga hawid ug kapit.

naunsa ba ang nahitabo kanako?

nawala ang pagsalig sa tanan,

nakikisakay na lang

nagpauyon uyon 

mitukar sa musika sa panahon

misayaw

giusob ko na ang balay sa kalipay

ang duha ka pultahan gidugangan

daghang lutsanan ang kasakit

sulod gawas, walay tinagdanay

kon naunsa ug unsa ang sunod nga

hugna

didto sa gawas anaa gihapon ang

karaang lingkoranan diin si papa 

maglingkod, manigarilyo magpasupot

sa iyang mga damgo 

pinaagi sa sunod sunod nga aso

gabon, panganod, 

hulmahan, papason, dayon sa

pagpahawa na niini

ang hunahuna matulog,

mopahulay, 

gusto nga unta wala nay

mahinumduman, nga wala nay

mobalik, 

kay ang pangutana nagpabilin,

unsa ba? wala kay pulos, walay

mahitabo, walay mabag-o , walay

kataposang paningkamot 

unya dili gihapon malimot.

nakatawa ko nimo,

apan sa tinood lang

nalooy ko,

wa ko nahimuot

sa pagkaitos ning tanang

mga kalas-ot.

lumalabay lang

 kinahanglan pa ba god nga

ma-publish ka aron mosikat

ug mailado?

dili naman seguro.

kon mosikat ka, para unsa man pod?

kon mailhan ka, dayon unsa man dayon?

kining pagsulat, alang kanako, personal

kaayo,

imo kining pagpadayag sa imong kaugalingon,

molabay ka man god lamang

kadyot ra, morag dahon nga gipalid sa hangin

dayon dili na makita pa bisag kausa man lang,

malimtan,

kay unsa man god ang pulos sa usa ka dahon

sa usa ka sanga sa usa ka dakong punoan sa mangga?

ang iyang prutas? ah, kadyot lang gihapon, 

labi na ug daghan, dali ra kitang pul-an,

mabarato, 

wala nay kalainan sa bato , sa balas, sa

abog,

nahisulat man god ang tanan,

ang tanan gayod, sa tubig, gani sa akong

naagian, 

nahisulat lang ang tanan sa hangin,

sa pagpanghupaw, 

sa usa ka ginhawa diha sa ibabaw sa

bungtod,

nga nawala siha sa kawangan,

nagsulat ka kay bug-at na kaayo ang tanan,

mahimong ingon ana,

apan naa say nagsulat tungod kay gaan na

kaayo ang iyang pamati,

busa naglutaw siya sa panganod,

unya samtang atua didto,

mikawaykaway ang iyang mga tudlo,

nagsulat sa tumang kagaan,

naglutaw, 

gianod, unya didto sa anahan

wala na gayod igkita.

lihok sa tumang kahilom

 NAHINUMDUMAN ko si mama nga

nag-bake ug cake,

chiffon, pineapple flavor,

lamian, 

hangtod karon humot gihapon sa

akong ilong

humok gihapon sa akong baba,

tam-is gihapon sa akong dila,

kon siya na gani ang molihok sa

kusina

walay saba, paspas,

systematic,

walay kasamok, walay kagulkol 

kang madungog sa baking tins

ug sa pagsagol niya sa itlog,

harina, asukar,

butter.

lihok sa hilom, madungog mo na lamang

dayon inig kahuman

ang kahumot sa iyang paghigugma

ug pag-amuma niya kanamo

nga iyang mga anak, 

nga karon, ambot, nagkaguliyang,

samok, nga morag luwag 

nga nagdumot lang gihapon sa 

kasili nga makuha ni papa usahay

sa sapa kon kini labyan sa dako kaayong

baha.

malipayong hinigugma

 sayong kaadlawon

gipapa sa itom nga panganod

ang kanhiayng

bulan nga suod kaayo sa

nahibulag nga bitoon

hanap ang langit sa

nagmalipayong hinigugma.

lantaw lang, pamati ba

 kapoy ang magsangyaw

busa buhata ayaw.

anaa ka, lingkod lang

tan-awa lang god ang

tanan,

ayaw paghukom,

dahon nga nahulog sa sanga

sa kahoy

sunda,

ayaw lung-i ang iyang

pagkahulog

hangtod nga modapat na

kini sa yuta

o sa lapok ba kaha

dayon paminaw sa pagkatagak

sa tumang kahilom batia ang

nabanhaw nga kalipay.

 pagsugod sa wala,

wala kay nahibaw-an
wala kay buhaton
wala kay pulos
wala kay kapaingnan
wala kay sulod
wala kay batasan
diha,diha nianang
pagsugod, layo gayod
ang imong maabtan.
mapuno ka, kay dili na baya
mapuno ang puno nang daan.
mausob ka, kay dili na mausab
ang way kausaban.
makat-unan mo ra ang
maayong pamatasan.
mahimo kang tawo,
diha sa imong mananap
nga kagikan.
mahimo kang mapasalamaton
kay wala ka nay madangpan
kay wala ka nay kapaingnan
gawas sa imong kaugalingon
ang gapahipi nga Gamhanan

ang nahitabo niadtong gabhiona

 miabot ang hilanat

kulismaot ang lawas

gakatol ang tutunlan

milaylay ang kamot

gangutngot ang tiil

gitutukan niya ang

baga niyang buluhaton

sa ibabaw sa lamesa

ang baga kaayong basahon

ang komplikadong suliran

nga pagasulbaron

mihangad siya sa langit

mihangyo nga dili una

siya kuhaon karon

dako pa ang iyang tulubagon

lapad pa ang iyang misyon

daghan pa ang luwason

gadasok pa ang atimanon

midag-om ang langit

nangitngit ang kalibotan

miabot ang kusog nga hangin

aron paliron ang tanan

wala na diha ang ayagan

gikawat sa kahigayonan

ang tubag tali sa kasamok karon

 wala siya mitingog

wala niya tubaga ang

pangutana

nahimutang gani nga

wala niya ambata ang

gaalirong kaniya

duna siyay punto nianing

bahina

ang tubag wala kaniya

anaa kini sa kahilom lamang

ang tubag anaa sa tungatunga

sa bilahan sa kalinaw

nindot nga lantawon apan

aron walay samok

dili na gayod una kini

hikapon.

pagtuon

 tun-an ta ang

paghulip sa atong

mga kalaay

bordahon mo ang

kahaw-ang gamit ang

mga gabon ug

mga panganod

ako sang kuliton ang

mga ngalan sa akong

gihigugma 

diha sa hangin

ang mga buwak sa

kasakit akong ipatong

sa atong mga ulo

ang tinulo sa buslot nga

atop

gikan sa kusog nga ulan

maoy atong

musika sa kataas sa

kagabhion

pagsimba

 sa iyang pagsimba

ako usab misimba

diha kanimo,

pangadye kining akong

gipasupot

sa altar diin ang

mga santos

miyango diha sa

pagsabot kanato.

kahibulong

 Kahibugngan uyamot

kay ang akong gipalupad nga

tabanog ganihang buntag nahimo

mang tikarol pagtugpa sa 

kahaponon.

ang patay nga naglupad 

nahimong buhi sa pagpahulay.