pagkalalom diay sa suba

patong naglutaw
nauwat ko, abi nakog
mabaw kaayo

kahigwaos

didto sa bungtod
mitakdol ang bulan
gakos kos unlan

pyanong gubaon

pyanong gubaon
gipatukar ni mama
yabag nga damgo

hubog nga nakatulog

adlaw nga mingaw
gisulod sa garapon
ngitngit intawon

Sidlak

Tubig sa baso
Nasidlakan sa adlaw
Sidlak daw kristal

Akoy
2009.6.1

igo lang ako nga nagsulat sa akong mga balak

manong og manang
igo lang ako nga nagsulat sa akong
mga balak

kon ang inyong mga mata nahibat
ning akong mga
balakbalak
kon ang inyong mga dughan nagusbat
sa akong mga abat

ayaw ako og lubaa
anang mga punyal sa inyong makasamad nga mga tutok
ayaw ako sagpaa
anang inyong mga gaan kaayo nga mga kamot
ayaw ako sipaa anang
inyong bug-at kaayo nga mga lapalapa

ayaw ako og pasipad-i kay kining akong mga balak
mga lansang kining tayaon
sa karaang panahon
nga og magpasagad ka og tunob og matunok
kini motaop
ang ilang taya mosurop

hangtod ikaw mahimong
usa na lamang ka agop-op

ngabil nga rosas

ngabil nga rosas
mansanas nga aping


mga gamot nga kamot
mga kasingkasing nga dahon

ang baga nga kahoy
nangita sa adlaw

dalunggan nga tuway
alimatok nga kilay

mata nga bulan
pilok nga ulan

dughan nga pader
haligi nga tiil

mga madre nga tudlo
obispong kumagko

gabas nga ngipon
dila nga tiglom

o! tinnga gaga
hi!
ay! bilatnga mi lam
bi

Rosas

Rosas ang bitbit
Matahom nga tan-awon
Pula og ngabil.

Akoy
2009.6.1

KABAHIN ANANG GRAPGRAP

Kabahin anang imong pagsukod-sukod
sa mga pulong
og mga silaba aron makamugna ka og usa ka
banggiitan og sikat nga
balak,

migamit ka pa anang graph,
tukod pa anang kahon-kahon ni rene descartes
giapil pa nimo ang paglubag-lubag
anang mga pako sa alibangbang
sa pamalaod sa probabilidad
sa mathematica og
sa pagtagnatagna diha
sa syensa sa sikolohiya
og mitago ka pa
sa bukad kaayo nga kapa
sa katre ni Sophia

pagkakapoy ba hunahunaon
ngano bang pugson ang dili pa hinog sa panahon
inat-inaton ang mga dahon
og sanga aron lang
daling makita og mapupo ang mga bunga?

ikamatay kana sa mga bulak
bisan pag imong habokan og bubuan
ang mga gamot
kay dili pa kini andam
ang mga pyous sa pagbukhad
og pagpahumot alang kanimo

paabota lang god
kanang walay mapagod

wala sa numero ang mga balak
o anang grapgrap
anaa ra kana sa kasingkasing
nga malipayon
nag-ambak ambak
nag-ulpot-ulpot
naglupad-lupad
nagbuskadbuskad

nagpakpak-pakpak bisan og ang
mga kamot samaran
bisan og ang palad
dili kaayo lapad

mas nindot gani kon
mosiplit ang dugo anang tudlo
nga ilang giluba sa dagom
sa pag-antos

nga nakalimot na
unsaon ang pagpaulat

mas lami paminawon
kon ang kasakit
mas lalom-lalom
sama nianang mikatap
nga gamot sa itom nimong
alom

pagpailob lang sa
pagpaabot bisan anang wala

katulog
og dayon pamati sa imong hagok
basin diha
ang imong mga balak
nagtipun-ok

ayaw og ok-ok
mahimo ka unyang
luyat nga tabako
nga ang gamit mao
na lamang ang
lagot sa usa
ka tigulang

unsay tawag nato anang kawatan og balak?

Tu

Plok!

ang nagbabag nga kahoy (alang kang langging)

adunay tugsoy nga kahoy
nga mitubo sa tunga-tunga
sa nagbilangkad nga yuta

nagbabag kini
ang iyang mga sanga
morag mga kamot
ang iyang mga dahon
morag balahibo
ang iyang lawas
morag kusgan
nga paa
sa usa ka
lalaki

wala siya mag-ampo
apan Langging
nganong imo man laging
gitando?

sa mga tiil nga balhiboon alang kang abel

sa mga tiil nga balhiboon
gilukat ni Abel ang iyang kagahapon
ang mga ugat
miawit og nadungog kini sa mga
uwak og kasingkasing
mibakho siya
atubang sa suko kaayo nga
hulagway sa kamatooran
mibaha ang luha sa iyang dughan
gianod sa dakong suba sa kasubo
ang iyang pagbati

nagpaubos siya
og gani miluhod pa
nangaliyupo
nangayo sa humok nga kamot
sa kalooy
sa bendisyon anang mga
lumoy nga bunga sa pagsabot

gihubo ang iyang mga sapot
gitangtang ang iyang kapa
gikumkom niya ang unsa
nga magunitan
sa nagkurog niyang mga tudlo
ang iyang gimahal ang iyang
gipakabahandi
karon iya na nga ipanglabay
sa bagang gabon sa kilid
sa uga nga bungtod

nagpaabot siya sa saktong
higayon nga karon miabot na
kuyog sa itom kaayo
nga mga panganod
miulan og kusog
sama sa haguros sa hangin nga habagat,
mihangad siya sa langit
og wala niya tabuni sa iyang mga palad
ang iyang nawong
og
iyang giinom ang tanan

aron lang siya
sa kataposan mahimong usa
ka langgam
ang gipangga
sa mga puting pangadlaw sa lasang

miawit, milupad,
hingpit na nga gawasnon

kon asa gikan ang mga kamot sa orasan

karon pa lang
ako nasayod
nga ang mga kamot sa orasan
nga kanunay nga
nagdagan
ila diay nga gikuha
diha sa usa
eroplano nga papel
nga hinimo
ni Abel

makahinuklog

kon makapamati gani ko anang yabag
nakong silingan
nga naningkamot anang
kantang
paano ba kita malilimutan?
usahay
makaingon kog swerte gihapon
ako sa akong kinabuhi
kay adtong mikanta ko anang
please release me let me go
nakahinuklog baya pod
ang akong asawa
sa kalami sa akong
tingog

kuradang

ang sayaw sa kinabuhi
morag tinikling
ang magdanghag
mapiit gayod sa
kawayan

ako napiit na anang
kawayan
mao nga miusob kos
akong sayaw
mibalhin ko
sa kuradang

pagsayaw ko sa kuradang
natapisod
kog napiang

mao nga karon
samtang nagsakit ang akong
piang
ania
mibalak na lang

ako og ang akong tobol

(kay naghisgot ka man god
og inodoro)

mitan-aw ko sa akong tobol
nga nahulog sa inodoro
human sa akong
kusog kaayong pag-unto

mitan-aw usab siya kanako
og dayon nangutana
nganong ang akong
nawong
morag sag
tobol

nganong ang akong
nilihokan morag tobol
nganong ang akong
panglantaw sa akong
kinabuhi
morag tobol
nganong ang akong
balak kobol nga morag
tobol

wa ko motubag
giinsulto ko sa akong
kinaon
wa sukad nga ang akong
gipakaon
ako sayon-sayonon

og ako siyang
gi-flush dayon

da! maoy ija!

akong mga pangutana sa anak og inahan

lahi ang imong inahan
wala ako sukad
makatagbo og sama kaniya
nakapangutana ko
basin og dili ka niya
anak

makakaon ka lang
sa iyang bugas
makahigda ka lang
sa iyang balay
makaukab ka lang
sa iyang kaban
kon siya patay na

gisultihan nimo ako
sa unod sa imong pangadyeon
matag gabii---

nga ikaw gigutom
giuhaw og wala makatulog

og nakapangutana usab ako
kon siya imo bang
tinood nga inahan

panamilit sa usa ka higala nga gustong maghikog

ugma
miingon siya
dili na siya makita nga buhi
kay siya
magpakamatay pinaagi
sa paghigot
sa punoan sa mangga
didto sa kilid sa ilang
karaan nga balay

mibakho ang karaho
samtang siging yarok
sa akong pinalit
nga tanduay
og mipunit sa sinugbang
baboy nga
akong dalit kaniya
isip pulutan

namati mi
ni pink floyd
anang Shine on You
Crazy Diamond
apan bisag akong
pakusgan
naghisgot gihapon siya
anang paghikog

hinubog nga estorya
sa tawong
wala sugod nga wala mahubog
nga ang giginhawa
mao ang kalipay
sa alcohol

sa akong sulod
unsa bay ako kon maghikog siya?
natig-a ang akong
kasingkasing
gikapoy na ko og pamati
anang panghupaw
sa nagpahipi nga baba
sa kamatayon

nga pirming bad news
kay wala madayon

kapoy na handomon
yano lang man unta ang equation
kon dili ganahan
unsay goy dugayan?

kitang duha my pren

mitaas na ang akong buhok
og ang akong bungot

kadali ba nga nahuman sa mga
adlaw og bulan
lain na usab nga tuig

mihawid ka sa imong suwang
giinat-inat ang imong alom nga
pirming giagian sa imong mga luha
mas taas ang imong bungot

kita ania naglingkod sa lamesa
atubangan sa dako kaayong
hunas sa dagat

misalop ang adlaw
nabugnaw ang laing tasa sa kape
nga wala na nato mainom

ato na usab nga hisgotan ang
taas og dili mahuman nga mga sugilanon
sa atong mga kapakyasan

unya dapit human
bisag walay panihapon
sugdan nato ang mas lami nga tagay
anang long neck nga tanduay
pawala sa atong kalaay
padugang og lami gamay
sa atong kalas-ay

kon ako ang maulahi

kon ako ang maulahi
sumala sa sabot
sa naandan
ako ang mamilo sa
habol
og maghipos sa mga
alugnan

ikaw kay nauna ka man
unsa ba ang imong
gikatabang?

igo ka man lang diay nga
nangihi og nalibang.

kalami sa mga hinog nga bayabas

adunay punoan sa bayabas
sa kilid sa habog kaayo nga
pangpang
ang iyang mga sanga
nga nanghitik sa mga hinog
kaayong mga bunga
morag mga dalaga
nga nanambo sa
bintana

ang tamsi
nga bag-o lang mibatog didto
nagpaibog kanako samtang
nagsigi siyag tusik
sa kinadag-an og
kinahinggan nga bayabas
nga og kon mahulog
padulong gayod kini sa ubos
sa hait kaayo nga mga
bato diin ang mga kamot
sa kamatayon nagpunay og
pangamay kanako

gitago ka man kanunay

gitago ka man kanunay
sama sa usa ka nindot kaayo
nga kangitngit sa
sulod sa langob

gusto ko nga kuhaon ko ikaw
aron akong angkonon
apan pagkalisod gayod nga buhaton

daghan ang mga babag
sama sa mga dagko
kaayong kahoy sa lasang
og mga hait nga mga bato
sa pangpang

ang akong kahinam
habog pa sa langit

kon ako ang ginoo

nanghambog ka nga ikaw
usa ka tawo nga malipayon
tungod kay ang ginoo mao
na ang in-charge sa
imong kinabuhi

siya na ang driver
ang cook
ang tutor
ang tatay ang
nanay
ang imong gisaligan
sa tanan
pati na gani sa
pagbudget
og pagbuhi sa imong
mga anak

pagkasikat mo!
og pagkatapulan!

kon ako ang ginoo
dugay ra ka nakong
gidauban

bagis

kon ang imong pagtoo
makapasibog sa mga kahoy

makahadlok nganong ang
tanang mga kahoy dinhi

nanagan og nanago sa
kabukiran

kadtong imong hinigugma nga makahinumdom lang nimo kon mag-birthday ka

kon manawag na gani tong imong
bf
nga nakahinumdom sa imong
birthday
dayon moingon og
i luv u

tubaga lang pod
nga
i luv u 2

kutob ra diha
ayaw pangimbitar
sa imong
party

kon mangutana siya
kon
magparty ba ka
ingna nga

humana!

(ha ha ha)

putol nga haiku

psst, duna unta
koy isulti nimo nga
importante a....

malipayong adlaw nimo diha inday

magpasipa ko sa kabayo karon
aron malabhag akong sampot
magpapaak ko sa mga hulmigas
ludhan nako ang monggos
magdupa ko sa udtong tutok
magpalatos ko sa kainit sa adlaw

kay wala ko kahinumdom
sa imong adlaw nga natawhan
karong adlawa

(joke lang, happy birthday my friend!)

haiku

candice salazar

sulti sulti

ang sulti sulti
lami sa atong baba labi na kon kabahin
sa kasakit sa uban
kay morag ang atong kasakit usab
mogaangaan

magdumog sa atong vokabularyo
ang mga kuno
kay lagi kini si mao kana
mao kuno

moapil na dayon ang kuan
kay kuno kuan man
og busa mao kini kana
og kadto

ang lami magdugay
sukad pa sa buntag
nagsulti sulti ang mga sulti
morag mga tawong nagtagay
sumsom anang laming sumsuman
kabahin anang uban

og sa kadugay daghang kang makalimtan
ang nilung-ag napagod, ang inun-onan naughan
ang lamesa gayagaw ang mga langaw
ang kabaw wala matugway
ang kanding nagaid sa kagingking

ang sultisulti
makasalaag anang kakugi
sama anang mga hisgothisgot moabot na ang punto
sa kapiskot og dayon naay naglagot

ang usa naghikot
ang uban nangutkot
kasagaran nangalukot
agi anang hisgothisgot

ako kang sabton

ako kang sabton
akong hugasan ang akong mga kamot
og tiil

akong kuhaon ang imong duha ka sapatos
og akong isukod
akong sul-ubon og sa atubangan sa samin
akong subayon ang imong
kanunay nga lakwan

akong adtoon kadtong tawong
imong gisagpa
og katulo

magpasagpa ko
og kaunom
dayon ako kang sultihan
sa akong mga kamatooran

sa pagtago nimo sa imong kagahapon

kon itago man lang nimo
puhon
ang imong kagahapon
diha sud sa
kaban nga karaan
palihog
ayoha na lang pod
pagpilo
kanang hapnig
nga hapsay lang gihapon
tan-awon

puhon puhon basin masuot pa kana
sa mga kaliwat natong masupilon

orasyon dilampayat

naay mga ginikanan
nga ang ilang anak
anak lang
ang pagkaamigo kulang

naay karon pa nimo nailaila
apan imo nang gihigugma

naay imong giminyoan nga
bisan sa dugay ninyong ipon
dili na nimo matulon
wala mailhi gihapon

naay amahan nga estranghero
hangtod karon wala makaila kanimo

naay mama nga dili nimo barkada
og naay barkada nga mora nimog papa

naay igsoon nga imong kontra
og naay kontra nga imong maamiga

naay mga amigo kon daghan kag kwarta
naay daghang kwarta nga walay amiga

naay lolo nga buhi apan patay sa inyoha
naay lola nga haskang istriktaha

naay iyaan nga hukhokira
naay uyoan
nga pirming bisita

naay ikaw nga pirmi nimong kuyog
apan hangtod karon wala nimo matuhog

orasyon dilampayat, relasyon nga walay kaliwat.

alang kanimo nga wala maghatag kanamo og kalipay

kon mamatay ka puhon
ikaw nga wala namo maingni
nga among gikasilagan

(kay lagi kanimo kami nalisang man
sa imong kabangis og ka walay
batasan)

amo kang palitan og lungon
nga ang kahoy bahi nga lubi
aron kanang imong panit nga
bugnaw na og ang imong unod
nga migahi na unta masamdan
pa sa grano nga morag mga
gagmay og talinis kaayo nga dagom

amo kang palitan og bulak nga barotohon
kanang medyo layos na
kanang bahobaho na nga patay nga bagtok sa kanal
kanang alang sa mga patay nga walay
ngalan sa katilingban

dagkotan ka namo anang kandila nga gagmitoy
kanang malanay lang dayon
kanang tag piso ang buok

ang imong lapida dili marmol
ang mga letra sa imong ngalan ordinaryo nga pintal nga itom lamang

dili ka namo ipalubong sa memorial park
diri ka lang sa municipal cemetery
tupad sa imong bana nga imong gibunyagan
og "Stupido!"

(on the other hand...
it will be of no use)

sayang dili na nimo mabati ang
kasakit nga among gibati
sayang dili na nimo ikaulaw ang
among mga kaulaw sa dihang
buhi ka pa nga nagdaogdaog kanamo

apan sagdi lang
basin og aduna kay kalag nga mogawas sa imong lawas
basin og makita mo
ang among gipaabot nga pagpanimalos

(kami nga nasilag kanimo
ikaw ra ang nagtudlo baya kanamo)

paabuta nya ko

kinsa pay maghuna huna sa piligro
kinsa pay makahinuktok kung insakto
kung nana ka nianang tampi sa imong kahinam

kinsa pay muhawid sa pagdumili
kinsa pay mamalibad sa grasya nga hinukad
kung nana sa imong atobangan

ang imo lang mao ang pagpanghawid
nga dili ka mabanlas sa bul-og
sa makusog unyang linog sa pangagho
human sa bunok sa uwan

balo~ wala sad ko kahibalo
ingnon ta lang unya ka
kung nana ko didto

kamatuoran

sahay sakit ning kamatuoran
sakit pa sa gikabahong ug gikamayo
nga dughan

apan unsay labot sa langaw
nga ganina rang gaantaw
haron mudasmag para sa iyang pamahaw

unsa say labot sa iro
nga gawiki wiki'ng ikog
nagpanikad sa usa ka bukog

ug bisan gani ikaw hari
tingale dili mudili sa usa ka bangkite
nga alang lang gyud kanimo

tingale andam sabton ang tanan
alang sa usa nimo ka kagustuhan
sa damgo ug sa iyang katumanan

abog lang ko

hastang pagkagwapuha nimo dong
niingon ka nako nga imo kong pangitaon
bisan asa pa kong suoka sa impyerno
kay imo akong dalhon sa langit
nga nahimutangan mo

ang kalibutan gamay ra
dili kini igong mutago sa usa ka
abug nga sama kanako
kay bisan asang ispignuha
maabot ka sa usa lang taghoy
sa hangin nga nangukoy

ang pangutana,
andam ka na ba?
musagakod unya sa atong pagbiya
dinhi sa kalibutan sa mga tawo
ug mukuyog sa alipulos
ikaw ang hangin, abog lang ko

Kilid Sa Bung-aw

Ako natanggong
Taliwala sa damgo
Kilid sa bung-aw

Akoy
2009.5.30

May Sulo Ka Ba Diha?

Nia ang tawo
Namingwit og mabalak
Sa kagabhion

Akoy
2009.5.30

palihog hikapa ang akong balak

palihog hikapa
kining akong balak

naa sa tungatunga
sa langit og sa
yuta

ablihi ang
mga butones
ning akong
levi's

anaa ang akong
balak
kilid sa akong
habak

giatay,
naluray

Pastilan

Pastilan nga bolpen
Wala nay tinta
Pastilan nga mata
Dili gusto sa suga
Pastilan nga balak
Dili na makita.

Akoy
2009.5.30

ok ra ba koy

ok ra ba koy
kon ako mangukoy
nimo akoy

sabat sabat lang ko koy
sa alimuot nga alimokoy
kay kining ako koy
libotsuroy

salamin sa tungang gabii ni akoy og ni ric

naglupadlupad ang balaknong alibangbang
diha sa akong kahimatngonan
pagkuha nako sa bolpen ug papel
daw naligsan sa nag-ungot nga hunahuna
silang tanan nawala.

silang tanan nawala
daw naligsan sa nag-ungot nga hunahuna
pagkuha nako sa bolpen ug papel
diha sa akong kahimatngonan
naglupadlupad ang balaknong alibangbang

Nawala

Naglupadlupad ang balaknong alibangbang
Diha sa akong kahimatngonan
Pagkuha nako sa bolpen ug papel
Daw naligsan sa nag-ungot nga hunahuna
Silang tanan nawala.

Akoy
2009.5.9

balay ni bilay libat

ang balay ni bilay
libat

ang balay ni bilay
tabil

ang tabil ni bilay
balay

ang libat ni balay
bilay

gan talib in labay
yabil

(sumpayi bay Akoy
hangtod katulog ko)

haynako

haynako
kapoy og kitoy sa tudlo
anang 5/7/5

ari na lang kos
5/6
ginansya pa.

babay bay

babay na ko bay
matug na kos balay
bay bay na bay
tug na ko bay
tug na

katulgon nako

katulgon na ko
apan tungod nimo
merespeto ko

mitindog, migahi
ang akong buhi

ang balak nga miduaw
morag naulaw

Gahapon

Dili katulgon
Tungod ba sa nainom?
Balak miduaw.

Akoy
2009.5.30

ikaw akong ginoo

gihuboan ko
nimo

wala ko
mireklamo

milabtik
akong garlic

miluhod ko
sa banyo

ikaw akong
ginoo.

kon akoy pangutan-on

kon akoy imong pangutan-on
samtang naglakaw ka
kon unsa ang balak

ako sa kang pahunongon
og sa tulo ka bol nga tuba ako
kang paimnon

ako sa kang pasumsumon
anang usa ka plato nga tuloy

dayon ako sa kang lingawon
kabahin sa lami anang kaminyoon
maghisgot tag
bahin sa hubonhubon
og tabontabon
og pulboron

dayon ako kang pataghuyon

mao kana ang balak,