pamilya

tulo
ka throw
pillows

nindot
pangdekorasyon

suede
leather
silk

square
rectangular
oblong

ug uban pa

humok
pawala sa sakit
sa liog

paatik sa mga
bisita

walay tingog
tingog

tunglo

Gibusdikan mo ang matag tiki
sa akong kasingkasing nga dugay nang ga-umido.
Imong gisupsop ang duga nga miagas gikan niini.
Tam-is ba ang akong nana?

Matod mo bisan unsa kahugaw ang pagtan-aw
sa uban kanako, imo gihapon nga kalawaton
ang kinatibuk-an sa akong pagkaako.
Bisan pa man ug salin na 'ko sa nahurot.

Kung tinuod kang nagmahal nako
Nganong imo man kong gipatay?

Karon nga ania na ko ning bung-aw
sa lubnganan nga gituyo gyod nimo ug kutkot
aron lang maimo ako, nag malipayon ka ba?
Nagmalinawon ba ang imong tanlag?

Awahi na ang tanang pagbasol,
wala ka nay mahimo aron mabuhi ako pag-usab.
Patay na unta ko, imo pa gyod kong gibanhaw.
Karon imo na usab kong ilubong pagbalik.

Pagkawala nimoy buot!
Maayo untag matakdan ka sa akong matag tiki.

garay sa tawong di kamao mobalak

bugnaw ang huyoyhoy sa hangin
nga misapigad sa akong aping
buntag sayo sa akong pagmata

mga dahong laya sa mansinitas
hinay-hinayng nangatagak
sa umog nga tugkaran

mga gihay sa sagbot nga balili
gikapyotan sa kamig nga yamog
nananghalok sa yuta

lumoy ang bidlisiw sa adlaw
nga midapat sa akong panit
morag halok sa gamayng bata

kanindot untang himoan ug balak
sa gibati ko karong buntaga
agda kanako sa akong kasingkasing

apan
unsaon man
di man ko magbabalak

kalawaton ko na lang
ang kalalim nga gihalad
karon sa kabuntagon.

pangadyeon sa usa ka bol nga tuba

tawong yano
kon mainom mo na ako
unta dili mo ako
isulod sa imong ulo
sa tiyan lang
unta akong amigo

nga og kon matagbaw
ka na
niaanang imong kauhaw
matulog ka lang
unta sa kabugnaw
sa mga bakhaw
ang imo untang
mga damgo
magsapawsapaw
magpilitpilit
morag ampaw

og kon ugaling
sa imong ulo mo man
ako ipaling
unta adunay mga balak
nga manalingsing

ako og ikaw

kausa mo lang akong
mahibalag
og didto kini sa mga kumagko
sa mga pulong
nga gusto untang mohikap
sa imong aping
apan nagdumili ka
sa akong
mga pangaliya,
kausa ka lang motunob
sa mga tubig nga
gadagan sa sulog
sa akong suba
gibati ko ikaw
apan wala mo ako makita
sa akong matag-adlaw nga
pagikan
kausa lang nimo akong
mahanggab
og magpabilin ako sa imong
kasingkasing

karon, dili ko na ikaw mahikap
apan dili mo na usab ako
mahikalimtan

kaadlawon

ang kaadlawom
mopahawa
nga sayo kaayo
sa wala pa makapamusyak
ang mga bulak
nga antulanga
naglikay anang panamilit
sa mga panganod
diin ang mga luha
sa usa ka
kuhit na lamang
mangahulog

sama sa usa ka
manggang imong
giplantig
ang iyang mga tagok
morag busay
nga gaagas
kanunay

dag-om

ang yuta nga basa
sa mga luha
nangandoy sa
hapuhap sa mga
kamot sa adlaw

ang mga hunghong
sa hangin
matag gabii iyang
gikasilagan

og samtang wala pa
ang kainit
bisan pa sa kahapdos
ang mga upos
sa sigarilyo
iya unang gikumkom
diha sud
sa iyang mga palad

sa dihang midag-om
na usab ang langit
mikurog ang yuta og
nakapanaad nga
mokaon siya
og mga bata

ug sa kadlawon giabrihan ko

ang bintana
sa kalag

nanglangoy ang barongoy
sa sabaw nga damgo

nangambak ang baki
sa punong nga kahiamgo

naglalis ang gangis
sa akong pangabubho

namista and dulon
sa bangaw nga misteryo

nanglupad ang kabakaba
sa orasan sa hunahuna

ngadto sa tanaman
sa bahakhak ug luha

ngadto sa atop
gitunga ang bulan

ngadto sa bulan
nag-ilog sa duyan

ang mga pak-an
gialimungawan

kaming tanan
nasaag

ulan

dagtom sa langit
dahunog sa dalugdog
humod na kita

pasensya na bay

pasensya na bay og mga inday
kay kon adunay basurahan ang
mga lungsod
og ang mga balay

kining mga balak aduna say
mga basurahan

dili ning baybayon kay
basin unya ta
og dakpon

kining lugara diin ikaw
nagbasa
basurahan kini
sa akong mga mugna...

mga suka, mga laway,
mga igit, mga tobol,
mga bitok, mga kagid,

mga nana, og mga
patay nga dugo
mga patay nga kuko
mga sip-on og kugmo

ayaw pagloodlood diha
mora sag kag
dato!

mga samad og mga
uwat...

ayaw pagkyimekyime
kay unsa? imong lola
virgin pa?

kining mga taga-head office

kining mga taga head office
kon makaari sa mindanao morag mga hari og reyna
sa atong mga special treatment

dalhon sa dakak, kita pay makabayad
dalhon og panihapon sa kusina ni manay
ipasiyo sa glorietta kaon kaon og pizza sa circus
picture picture sa fountain
stroll stroll sa boulevard sa talisay
hay, pagkahayahay
unya og molarga na
padalhan pa sa pila ka garapon anang
montano sardines
mga bulad gikan sa labason
og mga nokos
og mga manggang hinog
og mga mangosteen

apan kon kita na gani ang makaanha
sa ilang opisina
follow-up anang atong mga papeles
og submit anang mga reports og pangumusta sa atong allowances
bisan unsaon natog posing
sus wala na gyod sila makaila

niay usa ay
ako man ta ning gipakaon og dagkong
alimango og bangos nga relleno
wa na kaila ang tonto

da! gabaan! naistipleran
niya ang iyang tudlo...dangag!

libakon nato kay di gihapon
kasabot og binisaya...
amaw! wakwak! kikik! pusong! busong! bahog bisong!

kaning tagamanila

kaning taga manila hadlok
nga sak-an bisag
duha lang god
kaadlaw sa ilang
probinsyanong
paryente busa kon dunay
mag-doorbell
dili na gani abrihan ang
gate
mosilip lang sa gamayng
buho
og pangotana kon
kinsa og unsay tuyo

with specific instruction
sa maid nga kon
si agaw niya Erning
gikan sa mindanao
ang miabot
ipaingon nga
wala ra ba sila dire
tua sa marinduque
og mobalik karon
pang sunod
semana

og ikaw nga nagdala
og kanding og manok
moingon na lang
sab og
ok

nagbasol baya
ang agaw mong
ganahan anang
tinolang manok bisaya
og paklay
nga libre na pod unta

(walay lami ning balaka,
antosa na lang

nganong mibasa man god pod ka?
ha ha ha)

kabalo ko. ayaw na og reklamo

experiment lang ni
para sa mga kritiko nga morag mamatay
kon makabasa og balak nga
ambot pagkalas-ay
ayaw kabalaka
kay magsulat na pod kog
balak nga makalumping
kanang makaingon kag
"kuyapan ko da!"
kanang mokurog imong mga
tremble
kamang God knows na lang mahibalo
sa tagsulat.
emen.)

ang dalo kon manangpit

ang dako kon manangpit
haskang
pagkaplastic

hilaw ang pahiyom
nga dili kaayo motarong
og tan-aw og
dayon og ingon

"Dili
ka ganahan mo
snack?"

with matching hipos
sa iyang
bibingkang
pinutos sa dahon
nga saging

ang pangasaw-onon ni Gabino

yano lang ang iyang
pangandoy
nga iyang mapangasawa

bahala na kuno og
gwapa basta
doktora
bahala na kuno og
dato basta
de kotse
bahala na kuno og
seksi basta
bright
bahala na kuno og
kamaong moluto
basta
maayong molipay
og bana

nganong dikihan
man kuno ang
mga pangandoy
nga wala may
bayad

nganong sukdon man
kuno ang mga damgo
nga dili man kini
bugas nga kinilo

kay para ni Gabino
ang tawong wala nay
damgo
kon dili patay
buang.

lubong

karong taud-taod
ato na siyang ihatod
didto sa luna
nga inyong giandam alang kaniya
sukad nahibaw-an ninyo
nga dili maayo
ang iyang sakit nga kanser..

Nagkakita kita niadtong Lunes
atol sa imong pag-abot
gikan sa Japan
aron pagtambong sa pangadye
ug paglubong sa imong papa.

Kapin na sa baynte ka tuig
sukad sa kataposan natong panagkita.

Nagkailhanay gihapon ta
Bisan pa man sa kadugay na sa panahon.
Nagtinutokay.
Nagpahiyumay samtang nagmisa ang pari..
Naghimamat human sa misa.
Naglamano.
Nagpilsitay sa kamot.
Nagkinumustahay.

Nataas ang atong mga sugilanon.
samtang nagkaanam ug kalawom
ang kagabhion, daw sa namalik
ang mga pagbati
nga kanhiay natong gisaw-an.

Wa gihapon ka mausab.
Maayo gihaapon ka motagad nako.
..

Pagkatungang gabii,nananghid ko
nimo nga mopauli na...
Mipahiyom ka ug nagkanayon,
"Balik bya ugma ha?...Hatod sa lubong..."
Misanong ko ug miyango sa imong bana
nga Hapon nga nagkalingaw ug inom ug Beer
sa imong tupad.

Mibawos ug yango ang hapon...
Mitunol ka sa imong kamot
ug gipislit ko kini.
mibawos sad kag pislit.

Karon ania ko
sa imong atbang nagsud-ong kanimo
nga naghilak tupad sa Hapon
naghapuhap sa imong abaga.

Igo ra ko sa pagtan-aw.
Nakasabot ko nga di na ka moyanghag
ug motan-aw pa kanako
bisan kahibawo ka
nga naa ko sa imong atbang.

Natapos na ang tanan kanato.
Dugay na.
Minyo na ta pulos.
Wa na koy mahimo.

Ug karong adlawa
akong idungan sa paglubong
sa imong amahan
ang dugay ko nang gihambin
nga kamingaw
ug pangandoy
nga unta magkabalik kita.

Pahulayng dayon ihatag mo ..........O Ginoo......

ang iyang wala gisulti nga sugyot

gamingaw
walay lingaw
nanawag sa selpon
ang tingog morag
katulgon
bag-o kuno siyang
kaligo
og siya lang usa
sa iyang lawak

ang iyang irong
himaak dapit
sa ilang pultahan
iya nang
gihuktan

nalimtan kuno
niya og lock
ang ilang gate
og kon mahimo
itulod na lang

ulan nasad

ang kaigang dinhi sa Mabolo
daw sa nibukot

naglabad na hinuod akong ulo
gipanungay na ko sa singot

daw adunay nag-ung ung
sa akong lubot--kagawason

mibundak dayn ang ulan
mitaas ang baha

ng kanal nahawan na usab
daw sa gisilhigan sa buswak sa baha

sa nagdahurog nga bul-og sa tubig
gikan sa langit

sa hamubong higayon
daw sa nahupay

ang akong kapungot
nimo ganihang kadlawon

mangutana lang unta ko

sa gamay pa gyud ko, kulitan
permi bitawng mapungot nako si mama
kay pastilan ko makapangutana
dili gyud lung-an ug dili nako
makuha ang gusto nakong mahibaw-an

hangtod ron mao gihapon
sahay kung dili ko kamatngon
mao ra ko ug imbestigador
susihon, tukion ang tanang lantugi
sa pangutana ug kung mahimo
aksyunan, pangusgan unya
kung mahimong linkuran
buhaton haron masayran lang
ang kamatuoran

ang tinuod
nagpasabot lang ko nimo daan
haron dili ka nako mahamulingwan
magutana man unta ko
kung asa naka karon
murag importante man gyud
nang imong gilakaw

nakadisturbo ba ko?

wala lang

niadtong gamay pa ko
ingnon ko nilang mama
nga kong magminyo
pilion kuno nako kanang usa ka
milyonaryo... patay paminaw ko
himuon lang ko'g ulipon
patrapuhon sa iya unyang mga hugaw
imud-mod ug himuon ug amaw
pasensya apan nakadisider ko
dili ko mangita anang milyunaryo

kung si papa say paingnon
gusto niya kanang usa ka inhenyero
kay matod pa niya dili nako maglisod
unya sa akong pamuyo
makatukod ko'g balay dili na kinahanglang
lain ang muplano, apan gahuna huna pud ko
dili ko ganahan mahimong dinumero
but-an o sa akong gusto unya
naa ra ba koy kinaiya nga pwerting ngil-ara
matod pa sa akong manalagna nga amigo
gahi sad kuno ko ug ulo
murag gipangalaan sa bato

maong nihunat ko
nidisisyon nga higugmaon
ang usa ka simpling tawo
kanang walay kapritso nga daghan
kanang makainom o dili ok lang
kanang maka pusta sa bulangan kung manari
o bisan gani dili ok lang
kanang higugmaon ko labaw sa tanan
labaw sa iyang habol
ug labaw sa iyang unlan

apan unsang pagka unsaa
karon gisugo ko sa akong hinigugma
niingon siya pasulaton kuno ko niya ug balak
nga para ra gyud niya
kanang tambal sa among kamingaw
sa mga kalaay niining adlaw sa kagawasan
ug kay gihigugma
gapa-anod, nia gakatawa
naggaray sa balak
nga hangtod karon
wala ko kahibaw ug unsa

ikaw nasayod naka?

arang pataya

pagkaanindot sa mga naglutaw nga
mga dahon
kon asa ang sulog
didto modumog

walay babag
ang ilang pagkagawasnon

pauraray sa tubig nga bugnaw
pahangin, palubaylubay

arang pataya....

batang gustong molupad niadtong dekada 70

naatikan ta ka
sa gamay ka pang bataa ka
sa imong fantasia

wala ka ganahi
sa imong palibot og
naglagot ka sa mga
nagdaogdaog kanimo

abi nimo og wala ko
kakita
mikuha ka og gamay kaayong
bato og mitan-aw ka sa
palibot og sa dihang
nasuta na nimo nga walay
nagtan-aw
imong gitulon ang maong
bato nga puti
og dayon nimog hangad
sa langit og syagit
anang

Darna!!!!!!
Darna!!!!!!!

una mong kaguol,
walay nahitabo
Narda ka lang gihapon
walay buot, wa epek

balak alang sa panahon nga dili kini ganahan mobalak

kaanindot sa baso
walay abog, sinaw, og ang kahayag
naglaposlapos

suga nga wala mapalong
pasagdan lang
nga magsiga hangtod na kana
sa kaudtohon

mga habol nga wala mapilo
og mga alugnan nga baho
brief nga nawala
natungtong dapit sa akong ulohan

kasilyas nga wala ma flush
tobol nga nagsimag ang hait nga tumoy
kiki nga namilit sa kilid
sa alababo

tsinelas nga lapok
medyas nga gilangaw
kurtinang lagom og mga
librong gipangabogan sa kilid
sa bintana

adlaw nga walay palta
pukpok sa martilyo sa hagdanan
nga hapit na matumpag
mga tunob nga gipapas sa ulan

radyong haskang kusuga
balita kabahin sa mga artista
mga platong gipasagdan sa
banyo og dila sa iring nga nagtilap
tilap sa sobra nga inun-on

ako nga naglingkod
nagpaanod sa baha sa mga oras
nagpauraray sa hangin
nagptulogtulog
wala na ako mangilabot
kapoy na ang pakigsandurot
mga pulong nga walay pulos
akong imudmod sa blanko nga screen
giinom ko na ang tinta
gikaon ko na ang lapis
gikalibang ko na ang bolpen
giigit ko na ang tanan
mga walay lami mga walay hinungdan
dili ka ganahan nako
shit! labaw kong dili ganahan nimo
ang imong nawong
dakong hulaw sa akong kalibotan....

ako usab mihatag man

ako usab,
sa tinood lang,
nanghatag man
apan dili gayod
ako maghisgot
bisan gamay
lamang sa mga
butang og
panahon nga
akong gihatag
sa kang bisan
kinsa og kon
kanus-a

wala masayod
ang akong
baba sa mga
nahatag sa akong
mga kamot
og sa mga
kaayo nga
gibuhat sa
akong kasing
kasing.

nadungog mo na
ang akong mga
pasalamat

ayaw ako sultihi
kabahin
sa akong nabuhat
nga gusto nimong
magpasalamat
kay wala na ako
masayod niana

ang tanan mga
halad lamang
akong gisunog
og nahimong mga
aso nga ang
kapaingnan
mao lamang ang
mga kawanangan.

pasalamat (apasumpay sa email kabahin sa pagpasalamat)

magpasalamat kita sa Diyos
nga siya ang nagbuhat sa mga bulak og mga panganod
sa mga bitoon sa atong kagabhion
sa bulan nga magilakon
sa adlaw nga walay puas ang pagsidlak
og pagsalop

magpasalamat kita sa Diyos
nga siya ang nagmugna kanato
nga nagpakaon kanato pinaagi sa mga abot
sa iyang umahan
sa mga prutas sa iyang mga kakahoyan
sa mga bunga sa iyang kalubihan
sa mga otan sa iyang nataran
sa mga isda sa iyang kadagatan
sa mga mananap sa mga kalasangan

magpasalamat kita sa Diyos
sa mga awit sa iyang mga langgam
sa kaanindot sa mga alibangbang og mga aninipot
sa mga baki nga malipayong nagkokakokak sa mga sapa
sa bugnaw kaayong mga ting-ulan
sa mga haw-an nga napasol nato sa mga kasubaan
sa mga asul nga tikarol sa kanipaan
sa kaanindot sa atong mga palibot
sa mga bulok sa adlaw nga misalop
sa kahayag nga mibutho sa sayong kabuntagon
sa mga sapa nga malinawon

magpasalamat gayod kita niining tanan
magpasalamat kita kaniya
kay siya ang naghatag niini
walay bayad kay ang tanan libre.

kamingaw (ayaw lang god basaha kay basin gipul-an ka na)

nindot nga borda
sa diyos diha sa suba
sa panapton nga tubig
mga dahon nga
nangahulog gikan
sa taas nga kahoy
sa akasya
naglutaw-lutaw
sa ibabaw
walay hulagway
og bulok ang
mga tanod nako
sa kamingaw
pareho sa akong
hunahunang
galatagaw

gusto nako nga dapat simpol lang ang kinabuhi

ang mamatay
ilubong ang mopahawa kon ganahan pa
pwes siya gayod ang mobalik
wala na kanako ang gahom nianang
pag-apas og kinsa kadtong masirad-an
sa pultahan siya gayod ang
maningkamot nga makasulod
og balik

ang dili na ganahan magsulti lang
kay atong pangitaan og paagi
nga dili na nimo makita pa ang dili
nimo ganahan o kon dili ka na makaantos
ikaw mao ang dunay gahom
sa pagpahawa pagpalayo aron
mo makita ang imong kalipay aron
matagbaw ka anang imong
tanang mga laraw

gusto nako nga dapat simpol lang
ang kinabuhi
kon yawa ka pahawa
kon tawo ka pakita

gikapoy na ako sa akong mga pagpasalipod
wala na akoy mga katarungan
nahurot na
gisuyop na sa mga liki ning atong yuta
gitaban na sa mga lilo
gitakbas na sa mga kilat
nahunob na sa atabay
natuliro,
nabuang, gusto nang mamatay
wala na ang angayan nga dugayan
nayabag
natumpag, nasalaag, nangitag silong sa kahoy
sarang himoong
lubnganan
ang landong ang kangitngit
sa kagabhion
ang kaadlawon nga wala na moabot...

haw-ang

ang kamalig nga walay
sulod og
binakid nga humay
haw-ang

ang katre nga ikaw na
lang usa ang natulog
haw-ang

ang lingkoranan sa
talad-kan-anan nga
naandan mong
dunay maglingkod
kada panihapon
nga karon
mibakante na
haw-ang

ang haw-la diin wala nay
sulod kay ang langgam
nga imong gipriso
nakalupad na

dili kana haw-ang

ang imong harden nga puno
unta sa mga kahoy og bulak
nga imong gipuril
kay wala na ang imong
gimahal

dili na kana haw-ang

ang imong pagpalayo
dala lamang ang hulagway
og pipila ka sapot
og gamay nga kwarta
padulong sa lugar nga wala
ka pa masayod kon asa

kanang misakay ka lang
sa bus
apan wala ka mangutana
kon asa kini paingon
og kanus-a moabot
kanang mitan-aw ka
sa nanglabay
nga haskang paspasa
sa imong atubangan

wala na ang kahaw-ang

kay sa hinayhinay
ang nangawala kanimo
ang mga nangatagak
mora lang kinig mga
tunok nga naibot
kanimo

sa hinayhinay nawala ang
kangutngot
nalimtan ang anaa sud
sa nagbangotan mong
dughan
nangahaw-as
ang kahaw-ang
mobanos ang pagsulod
sa bag-ong pagbati nga
morag bag-ong napalit
nimong sapatos
nga imong gisul-ob sa
imong tiil
niadtong gabii sa wala
pa ang unang adlaw
sa imong klase sa
grade one.

dili gayod magtupong

nagdungan ta og gawas
wala kita kulangi sa ilang pag-ugbok
sa kagahion og sa mga pulong
sa kagilakon
sakto ang pag-apod-apod

nagsunod ako kanimo
mipundo ka
og ang uban gustong moapas kanato

naningkamot ko nga bisag
sa atong animo na man lang unta
magtupong tang duha
apan wala gayod kini gitugot
sa adlaw
bisan gani ang bulan nga
nakasabot sa akong
mga pangagho

kaniadto sa miduaw ka kanako

kaniadto, mga duha na ka tuig
ang milabay
miduaw ka kanako
sa pagtaho
sa iyang gibuhat kanimo
nga imong gipatuloan
og daghang luha

gipahikap ko sa imong
kilid nga morag
semento nga mikaging
apan wala ka
mibakho kay
ang imong kaisog
mora sab og
puthaw

wala ka na mobalik
og ang akong
nadunggan nga
ang imong lubong
didto sa Pinan
wala tambongi sa
imong mga
gimahal sa kinabuhi

ganiha gihikap nako
ang akong kilid
og nakahinumdom
dayon ko nimo

apan bisan unsay mahitabo
ning umaabot nga adlaw
wala gayod ako'y laing
pahikapon niini
bisan kinsa bisan kanus-a

kining akong kabalaka
akong hiposon sama sa akong
paghipos sa akong
gitagong gugma nga alang
ra gayod kanimo.

hapit lang man god unta

gusto ko lang untang
mohapit
gamit ang mga ginagmay
og kasagarang
mga panugon
alang lang god unta
kanimo og
sa atong
panaghigala

ania
mitapot ko
morag baba sa
sobre
nagtago sa usa
ka sulat
nga karaan
nga wala na nimo
gidayon og
pagpadala

kaluha

Ang alimyon
sa babayn-on mong kahumot
maoy motultol kanako
ngadto sa tinubdan sa tanang lamdag.

Ang tingog mong mananoy
maoy moganoy kanako
ngadto sa hapsayng luna
nga gigikanan sa tanang pagmahal.

Ang bidlisiw sa kahayag
sa pasiplat sa imong mata
maoy modan-ag sa dalan
nga akong pagasubayon.

Walay makapugong o makapakgang
sa akong paghigwaos nga mahinagbo
ug makauban ikaw.
Tungod kay kitang duha
gilatid nang daan sukad sa sinugdan,
nga mahiusa sa gugma ug kalipay
hangtud sa kahangturan.

Managkaluha ang atong Kalag.

mga manimbahay

giihap nako
mga dise-otso kabuok
ang nanimba karong
buntaga
ang simbahan
morag haw-ang
kaayo
ang hangin naglapos
lapos sa
mga dagkong bintana
og ang mga langgam
naglupadlupad
niining dakong
hawanan sa mga
santos


ang miawit sa
responsoryo
nga konsehala usab
ning lungsod
namong mingaw
haskang yabaga
mora bag ang iyang
tingog
gilukat pa sa
lalom kaayong
atabay

og ang sakristan
nga nagkilingkiling
sa bagting
bulingiton og
dagway

ang tigbagting sa
kamapanaryo
opaw, niwang
og morag dunay singko
sa ilok

ang manang nga
tig-lead sa rosaryo
sa kaadlawon
nag-inosara lang
kay nag-iyahay na
og panglupad
ang iyang upat
ka anak nga
dalaga

ang kantora dunay
siging giguyod-guyod
nga anak nga lalaki
nga giuban na
nga para gasto lang
mokurog ni siya
kon imong
tutukan

ang among bag-ong
kura paroko
gustong mag-abogado
og karong gabii
ako ang iyang
maestro

daghang iti ang altar
sa simbahan
og wala magtarong
ang mga sinaligan nga
gitahasan og
pagpanglimpyo
sa matag adlaw


bag-o lang
mibalik og simba
ang akong amigo
nga kontra sa
among ex-kura-paroko
nga gibalhin na og
laing simbahan

og ang babayeng
nauyab sa among
kanhiay nga kura paroko
nag-uli na man diay
kuno sa iyang
banang nagpagsug-o

Huwaw

Taud-taod nang walay sagbot
sa daplin sa dalan.

Nagmala na lang ang tunaan..
Nag-uga na ang kahumayan.
Ug wa nay bisan usa ka mais
nga nagbarog sa daruhan....

Nipis na lang kaayo
ang agos sa tubig sa dakong sapa…

Sihag na ang kanhi
huot nga kalibonan.

Nahanaw na ang mga saging
nga nagpunsisok sa tiilan sa bungtod

Uga! Uga! Uga!
Uga ang tibuok kong kalibotan!

Wala nay tubig.
Walay kahoy,
sagbot ug tanom.
Wala nay bulak.

Wala nay bisan gamay na lang nga mugna
nga moturok pa ning akong kasingkasing!

Wala nay bulok ang kinabuhi,
sukad akong nasuta ug nahibaw-an
nga siya ug dili ako
ang matuod mong gihigugma.

gusto nako unta

gusto kong maggaray
nianang balak sa kakapoy
anang balak sa kapuol
anang balak sa kaduka
anang balak nga gamika

gusto ko untang mugaray
anang balak sa gugma
anang kamingaw nga sobra
gaatang kong kanus-a ikaw mutunga
sa akong atobangan
ug mupahiyon dayon
muhalog sa kamingaw
sa usa ka pinalangga

gusto sad ko muhimo
anang balak nga walay padulngan
walay kinutuban, himo himo lang
walay katawa, walay pagbakho
walay kahiubos, walay pagpangagho

gusto ko anang ikaw mismo
mupasabot kanako
nganon naingon ako niini
nganong ikaw ang gisinggit
sa huna huna ug kasing kasing
nga dili makakaon ug dili makatulog
ang hulagway sa kaamguhan
nahimong hanap ug lisod angkunon

gusto ko anang sinumbagay
dili sa kumo kung dili sa mga garay
kanang mamungingi sa akong hulagway
sa kahait sa akong mga pangindahay
mga katumanan sa gugmang nahipalasay

gusto kong manulisok sa akong kaugalingon
nganong ikaw ang gusto nakong angkunon
nganong haw-ang kong dili madungog
ang dugdog sa atong katulogon
ang liti sa pagbating kanunayng muhadla
sa atong panagtigi niining balud
nga ikaw ang naghari

gusto kong mabusog ka
sa mga pulong nga akong ginama
gikutlo sa atong tanaman
nga ikaw ug ako ang gapuna
ug miamuma sa walay pangandoy
nga ato kining mautan
sa kulon sa ato unyang panag-uban
tinimplahan unya sa mga singot
sa atong pagbudlay sa katam-is
sa kapalaran nga hangtod karon
wala pa kini nahimugso sa atong atubangan

Ngano ba sad?

ngano ba sang nadungog mo man
ang mga tinaguktok sa akong sapatos
sa dihang nisaka ako niadtong bato
nga hagdanan sa kampanaryo

ug dayon miingon ka'g mikominto,
nangutana kong misayaw ba ako
sa sayaw sa Bohol nga maglalatik,
o nagdokdok ba ko ug bagol
sa akong abaga o kaha sa akong ulo

mikatawa lang ko ug dayon miginhawa
giabot sa ilalom ang akong dakong kahingawa
nga basin unya sa pag-bot sa panahon
dili lang tinagoktok sa sapatos
ang imo unyang mapungtan

maong ingnon tika daan
haron dili mo mataligam-an
usa ako ka yanong tawo
ug wala ako'y kalainan sa uban

aduna usab ako'y kinaiyang dili unya nimo masabtan
nga tingali unya mangyamiid ka sa kadugayan
kay dili mo mauyunan ang mga pagbakho
kong manilingang may gikusgong dili hintupngan

pangagho sa usa ka kamingaw

ang tinuod
ganahan unta kong magtuyo pagsulat
sa imong giingon

kanang balak kabahin
sa usa ka magbabalak

apan unsa ba?

daw sa dili malitok
sa akong mga tudlo
ang matuod nga mga pulong
nga nagpangurog
sa kahadlok
nga tukion
sa mga matukibon

maong pasaylua
kining mikitiw
nga pagbati

gimingaw lang
nipahayag
sa pila ka mga pangagho
nagtampusisok
sa akong dughan

"Ling, kadugay mo ba ? nag-unsa ka man diha?"

kaganihang kaadlawon
hapit silang nasakpan

nakaipsot siya sa gamay
lang kaayong lungag

swerte lang gihapon sa
abtik nga linya sa iyang palad

miungot ang zipper sa iyang
maong nga pantalon

og nalimtan ang iyang panty
nga bordado og kasingkasing

sa kasagbotan sa likod sa kasilyas
diin nagpasumangil ang gugma og pangihi

gibati niya ang tumang kalami
sa dihang naglamog ang kahadlok og kahidlaw
ang katam-is og kalisang

ang sakyod sa kalami ang gauros-uros
nga kaulag ang halok nga dinalian

ang nagdahonog nga tunob ang
gilak sa hait nga sundang nga

diin nanamin ang maanyag nga nawong
sa kakiat og ang kagahig

ulo nianang pagkamabudhion.

halad

gihalad ko ang mga bulak
kaniadto sa una natong panagkita
sa dihang mipahiyom ka
gisunod nako paghalad ang usa ka balak
sa una natong panaghalok
mihalad ako kanimo og usa ka saad
gisaad ko kanimo ang akong mga pangandoy
og tungod sa akong gugma kanimo
gihalad ko ang akong lawas
apil na ang akong kalag

apan ang usa ka saad wala matuman
og busa sama sa mga baraha
nangatumpag ang tanan

gihalad ko pag-usab ang mga bulak
og kini nangalaya lang
gihalad ko ang mga mansanas
og kini nangadugta lang
gihalad ko ang usa ka kandila
sa usa ka hulagway
nga walay undang og pahiyom
diha sa silong sa tumang kahilom

kadaghan

nagpanon sila

ang kinagamyan
nagpang-os og ice candy
ang gasunod nagkitkit og gulang nga bayabas
ang ikatulo nagpang-it og pranses
ang ikaupat nagbitbit sa usa ka kilo nga bugas
ang ikalima usa ka silopin nga tuloy
ang ikaunom nagdaladalag backpack
ang ikapito usa ka bol nga tuba
ang ikaunom nagpang-os og tubo

nanglingkod sila sa daplin
sa plaza atubangan sa
munisipyo
nagpaabot og habal-habal
pauli sa bukid sa Bulawan

nahuman na man god
ang tabo sa Domingo
diri sa Katipunan

tag-naa pinaagi ning akong
gisulat
kon asa ang inahan og asa usab
ang amahan

ang bag-ong haon nga kan-on

ang pinakalaming paminawon
nga awit sa kusina
mao ang inaso sa
bag-ong haon nga kan-on
gikan sa kolon
kanang puti kaayo nga
nilung-ag ni nanay
gihanigan og
dahon sa pandan

pagkahumot!
pagkalamian!

mora kog giduyan
sa langit sa
tumang kalipay


tupad niya
mao ang lima ka
sinugba nga bulad
nga palotpot nga
gasiga ang mga mata
nga nangitom ang panit
kay napagod sa tumang
kasina

ha?

hatuntong habato
hatuli handres habonifacio?

bow!

ang imong pusod
gipanuhot busa akong gidapion ang akong
tuo nga palad
mereklamo ang imong abaga kay
matikay-ang pod kuno siya
busa gipatong ko ang akong
wala nga kamot
abono nga umahan ang imong liog
mao nga gitamnan ko kini sa
daghan kaayong halok
ang akong pus-on nga katulgon
mihagsa sa sampot mo
nga kutson

haduol sa atong katapusan

asa na ba kita?
daw sa nahanaw na ang atong pakigbugo
asa na kita gibanlas sa bul-og sa pagdaug-daog

aduna pa kaha kitay kalingkawasan?
aduna pa kaha kitay kalipay nga sangkuan?

daw sa nahanap na ang tanan
daw sa napapas nga mga badlis sa dalan
nga kanunayng giyatak yatakan

pagkapaet palandungon
apan ingon niini na gyud tingali kita

haduol sa atong katapusan
silingan sa atong kamatayon
ilawom sa atong panag-ipon

binulig nga kalipay

sa nilabayng mga katuigan
aduna kitay mga binulig nga pangandoy'ng
atong gitagana sa pagpakigbisog unya
sa pag-abot sa huwaw nga atong ng nalantaw
bisan sa layo palang niining nahimutangan

apan unsay ato karon
ang binulig nangapulak
ug ang nahabilin mao nalang kadtong
lukay sa mga pagmahay

gihurot pagharos
sa bagyong walay kukaluoy

karon nahanaw na ang tanan
karon daw sa nahubsan na ang kanhiay
binulig ta'ng kalipay

lahi baya ang panglantaw diri sa ibabaw

kon diri ka lang unta
sa taas
nga akong
nahimutangan
makita mo unta
ang bangkil sa
dakong buaya
nga mopaak na
anang walay
alamag nga
nawong sa usa
dalaga

apan sa imong
pagkahinay
nagpabilin ka diha
sa ubos og ang
ang imong nakita
mao lamang gayod
ang hagdan
nga naghangad
alang sa imong
kalamboan

ako ang nahadlok
sa gaong-ong
nga kaparotan

as ip

as ip walay snow
nag-sunbathing ka
nagpurol
naghubo og shirt
nag-goggles
nag orange juice
aning imong
kabuang
na-frozen
imong balls

ang akong gibuhian

dunay koy nabungat
nga gusto nakong kuhaon
og balik
apan walay pulong
nga moatras
kay sama sa itlog
kon kini mapusa
ang piso
nga mipiyok
dili na gayod matulon
og balik sa
tipakang gabok
duna koy gipagawas
sa akong mga kamot
nga gusto nakong
itago og balik
sa akong mga palad
apan dili na gayod
kini mahimo
wala motugot
ang init nga hangin
og ang adlaw
nakuyapan sa tumang
kaulaw

duna akoy gilabay
sa baybay
og gusto unta nakong
salomon
aron sa balik ako unta
gihapong angkonon
apan nanuyo ang mga
balod
kay lagi bisan sa
ilang pamalaod
dili na gayod kini
mahimo

nakapangutana ako
nganong gibuhian ko man
kadto?

palimos

palad nga hikyad
matang naghiyonghiyong
kalo'yng idlas

ang saktong pagbitad sa ikog ( alang sa mga asawang palaaway sa bana)

sayop ka misis
nga nagbitad anang iyang ikog
dili gayod kana patoo
supakan ka gayod
niana niya

kon ako pa ikaw
akong inaton
kanang iyang
ikog nga anaa sa
atubangan

tan-awon tag
dili ba siya
mamatay sa
tumang kalami